انقلاب مارچ فلاپ!

پاکستان نوں جس طرح دیوالیہ کیتا گیا معاشرتی اقدار نوں وی کجھ ایس طرح ای زندہ دفن کیتا گیا۔ مریم نواز تے وی غیراخلاقی گند اچھال کے ایام جاہلیت دی یاد تازہ کیتی گئی جد کہ گندی ذہنیت دے لوک آپ اپنی گندگی تے تصدیقی مہر ثبت کردے سن۔ ہن تے حال ایہہ وے کہ سوشل میڈیا توں لے کے مین اسٹریم میڈیا تک’ ہر زبان اک ای ٹرینڈ چلا رہی اے بدتمیز’ مکافات عمل دے تحت موصوف دے چہرے توں اک اک کرکے سارے نقاب لہندے جا رہے نیں اوہدے حمایتیاں نوں وی چانن ہو گیا اے کہ حواریاں دے پہلو وچ رہ کے ڈنڈ بیٹھکاں لا کے بہادری دے سارے مظاہرے صرف ڈھونگ سن کیوںجے جدوں انقلاب لیان لئی سڑکاں تے نکلنا سی تے لوکاں نوں باہر کڈھ کے اظہار مردانگی کرنا سی تے اوہ بذریعہ سرکاری ہیلی کاپٹر صوبے دی حد ٹپ کے اڑانبھر گیا’ درباری نوفتناں وچ حیران کن طور تے اوہدے کول اک وی سیانا نہیں سی جو اوہنوں دسدا ہیلی کاپٹر تے انقلاب نہیں آندے۔ جعلی لانگ مارچ دے غبارے چوں ہوا نکلن دے بعد ہن اوہ پہاڑاں دیاں چٹاناں تے بسیرا کر چکیا اے۔
25ہزار لوک نہ لیا سکن والا پتلی گلی چوں نکل گیا۔ ہن کون اوہدی پھوکی دھمکی تے یقین کرے گا کہ الیکشن دی تریخ دا اعلان کرے نہیں تے چھ دن بعد دوبارہ آواں گا۔ ہن تے اوہدے کٹر حمایتی وی کہنا شروع ہو گئے نیں کہ سانوں ڈی چوک بلا کے آپ باہروں بار ای پتلی گلی توں نکل گیا۔ انج وزیراعظم شہباز شریف بڑے ای کٹھور نیں اوہناں نوں چاہیدا اے کہ نویں انتخابات لئی 2023 دی تریخ دا چھنکنا اوہدے ہتھ وچ پھڑا دین انج کنی مزاحیہ صورتحال ہووے گی جدوں اوہ ایہ کہوے گا اسیں جت گئے اسیں حکومت نوں انتخابات دی تریخ 14اگست 2023ء دا اعلان کرن تے مجبور کر دتا۔ وزیر داخلہ رانا ثناء اللہ خان نے مصدقہ شارٹ مارچ دوران جس کمال حکمت عملی نال پی ٹی آئی رہنماواں تے زومبیاں نوں ڈیل کیتا اوہدے توں لگدا اے کہ چوہدری نثار دوبارہ خواب وچ ای ایس کرسی تے بیٹھ سکن گے۔ انٹرویوتے تقریراں کرن دی بیماری وچ مبتلا بندے دا ریاست مدینہ نامی چورن مکمل طور تے فشوں ہو چکیا اے۔ نادان درباریاں دی فرمائش تے اوہ نادان اعظم جدوں سازشی خط دی ڈگڈگی وجان لئی حماقت دے کوہ ہمالیہ تے جا بیٹھا تے پوری دنیا پکار اٹھی جھوٹھا جھوٹھا’ سوچو کتھے کوہ ہمالیہ تے کتھے چھوٹی ڈگڈگی دی مدھم جہی ڈگ ڈگ’ مینوں پورا یقین اے کہ ضرور کسے نادان دوست دے لقمے تے ای امپورٹڈ حکومت دی ٹیگ لائن دی تکرار کرن دی منظوری دتی گئی ہووے گی نہیں تے اوہدے ویاہ’ اوہدے بچے’ اوہدے وزیراں تے مشیراں وچ جنے امپورٹڈ بندے نیں اوہدی مثال نہیں ملدی۔
سوشل میڈیا دے فیک بوٹ اکائونٹس دے راہیں مقبولیت وچ وادھے دا جعلی پراپیگنڈا کرکے اوہدی نرگسیت زدہ تقریراں تے کئی پپوسمراٹ رقص رنداں کر کر کے اپنیاں اڈیاں پاڑ بیٹھے نیں۔ ایاک نعبد توں عاشق رسول دے فرمائشی اسلامی ٹچ دا لقمہ اوہناں دا لاڈلا بھیدی چینل وائرل کر چکیا اے جہدے توں ایہ ثابت ہوندا اے کہ کاروبار اپنی تھاں تے دوستی اپنی تھاں’ ٹی آر پی دے بے رحمانہ اصول وچ صرف کانٹنٹ دا وزن ویکھیا جاندا اے نہ کہ اپنا پرایا’ اوہ جہڑے واوڈا سنے کہندے سن کہ قوم 2 سو روپیے لٹر پٹرول وی برداشت کر لوے گی کیوں جے اوہ جان دے سن کہ پی ٹی آئی دے حکام آئی ایم ایف نال معاہدہ کر چکے سن۔ گمراہی دے شعلے بھڑکان والے دیسی بمب دا بارودی مواد استعمال ہو چکیا اے۔ کنے پیروکار’ کنے تماش بین اوہدیاں بے سراپا گلاں توں اک گئے نیں۔ ایہداثبوت ایہہ وے کہ لانگ مارچ نوں لوکاں نے اُکا رد کر دتا۔ افسردہ واں کہ پہلی واری منصف نوں ملزم دا وکیل بن دے ہوئے ویکھیا’ اپنے آپ نوں زمینی آمر منوان دی ضد کرن والے جان لین کہ رب ای زمین تے اسمان’ کون و مکاں دا بادشاہ اے اوہدے کن وچ ای سب پنہاں اے’ اوہ اک خاص حد تک رسی لمی کردا اے فیر جدوں خدائی احتساب دی چکی چلدی اے تے بلاامتیاز سب کجھ باریک باریک پیہہ دیندی اے۔٭٭