پھلاں دا بادشاہ امب

سارے پھلاں دے بادشاہ امب نوں بڑے شوق نال کھاندے نیں۔ امباں دا موسم شروع ہو گیا اے تے پاکستان دے عوام تے باہر رہن والے سارے لوکاں دا انتظار وی ختم ہو گیا اے۔ پاکستان وچ گرمیاں دے موسم دا مطلب ایہہ وی اے کہ ایس موسم وچ مختلف قسم دے مزیدار پھل تے خاص طور تے امب آندے نیں جہدے توں ہر چھوٹا وڈا لطف اندوز ہوندا اے۔
ساڈا ملک دنیا وچ امب پیدا کرن والا چوتھا سب توں وڈا ملک اے جتھے امباں دی سینکڑاں قسماں پیدا ہوندیاں نیں۔ ایہناں مٹھے تے کھٹے ذائقے والے اماں دے زبردست فیدے نیں۔ پاکستان وچ عام طور تے ام گرم علاقیاں وچ کاشت کیتے جاندے نیں تے بہت سارے فیدے مہیا کردے نیں جیویں پتے’ چھال تے ایتھوں تک کہ اوہناں دی گٹھلی۔ گودا تے چھلکے وی مختلف کماں وچ استعمال ہوندے نیں۔ ایسے وجہ نال پاکستانی امب ساڈے دلاں وچ اک خاص مقام رکھدے نیں تے ایسے وجہ نال اوہ پوری دنیا وچ برآمد ہوندے نیں۔
ایس مشہور پھل نوں بہت سارے طریقیاں نال استعمال وچ لیایا جا سکدا اے۔ مثال دے طور تے ایہنوں براہ راست کھایا جا سکدا اے۔ سلاد وچ’ مٹھے پکواناں وچ’ امب اچار دی مختلف قسماں وچ بنایا جا سکدا اے یا آمیزے’ شیک یا ایتھوں تک کہ امب دی چٹنی’ مربے وی مل جاندے نیں جہڑے پورے ملک وچ بہت مشہور نیں۔
ایس مضمون وچ اسیں تہاڈے لئی امباں دی قسماں تے فیدیاں دے حوالے نال ساری اہم معلومات مرتب کیتیاں نیں جہڑیاں کہ تہاڈے لئی سوشل میڈیا’ الیکٹرانک میڈیا تے پرنٹ میڈیا دی زینت بندی رہندیاں نیں جہدے پاروں تہانوں مختلف قسم دے امباں بارے جانن دا پتہ چلدا اے۔ پاکستان وچ امب دی جہڑی قسماں اگائی جاندیاں نیں اوہ دنیا بھر وچ مقبول نیں۔ ایہناں معلومات توں تہانوں ایہہ فیدا ہووے گا کہ اگلی واری جدوں وی تسیں امب دی خریداری لئی جائو تے تہانوں کسے دی مدد دے بغیر وی پتہ چل جاوے گا کہ تہانوں کہڑی قسم دا امب خریدنا چاہیدا اے۔
امب دے قدرتی فیدے
روزانہ اک امب کھان نال تسیں ڈھڈ سنے مختلف بیماریاں توں محفوظ تے صحت مند رہندے او جد کہ امب دل دی بیماریاں تے کینسر جئی موذی بیماریاں توں وی محفوظ رکھدا اے۔امب نوں مختلف کھانیاں دے نال وی استعمال کیتا جاندا اے جد کہ امب توں جیلی’ جام’سکواش ‘ اچار تے مصالحے وی بنائے جاندی نیں۔
ام اک غذائیت نال بھرواں پھل اے۔ امب وچ چربی’ کولیسٹرول تے سوڈیم دی مقدار بہت گھٹ ہوندی اے۔ تاہم ایہدے وچ وٹامن بی6 دے علاوہ وٹامن اے’ وٹامن سی’ وٹامن ای تے وٹامن ڈی دی وی چنگی مقدار موجود ہوندی اے۔ امب وچ پوٹاشیم’ میگنیشم تے تانبے دی وی بہترین مقدار موجود ہوندی اے جہڑی صحت لئی بہت ضروری اے۔ پھلاں دا بادشاہ ہائی بلڈپریشر دے مریضاں لئی وی انتہائی مفید اے۔
امباں وچ کوئرسیٹن’ آئیسوکوئسیٹرن’ اسٹرلگن’ فیسٹن’ گالک ایسڈ تے میتھائل گلٹ جئے کیمیکل پائے جاندے نیں جہڑے چھاتی دے کینسر سنے ہر طرح دے کینسر دے مرض نوں روکن وچ مددگار ثابت ہوندے نیں۔ طبی ماہراں دے مطابق امب وچ شامل اینٹی آکسیڈنٹ آنتاں تے خون دے کینسر دے خطرے نوں گھٹ کردا اے جد کہ گلے دے غدود دے کینسر دے خلاف وی ایہہ موثر کردار ادا کردا اے۔
ہارورڈ یونیورسٹی دے ماہراں دے مطابق امب لون یا وڈی آنت دے سرطان دے خلاف اک اہم مدافعانہ ہتھیار ثابت ہویا اے۔
کمزور بندیاں لئی امب بے انتہا مفید اے کیوں جے ایہہ وزن نوں ودھاندا اے۔ امب وزن ودھان لئی دوجی خوراکاں دی نسبت سب توں آسان خوراک سمجھی جاندی اے۔ 150گرام امب وچ 86 کیلوریز پائی جاندیاں نیں جہڑی آسانی نال جسم وچ جذب ہو جاندیاں نیں۔
امب نظام ہاضمہ لئی وی انتہائی مفید اے جہڑی خوراک نوں ہضم کرن وچ مددگار ثابت ہوندے نیں جد کہ امب بھک نوں وی ودھاندا اے۔ امب وچ موجود ریشے جہناں نوں فائبر آکھیا جاندا اے آنتاں دی صفائی تے ورم دے خطرے نوں گھٹ کردے نیں۔امب حاملہ زنانیاں دی صحت لئی وی بے انتہا مفید اے۔ ڈاکٹرز اکثر حاملہ زنانیاں نوں وٹامن تے آئرن لئی گولیاں دیندے نیں لیکن امب اوہناں دی مقدار نوں ودھان دی صلاحیت رکھدا اے۔امب چہرے دی خوبصورتی لئی وی انتہائی مفید ثابت ہو سکدا اے۔ ایہدا گودا جلد اتے لان نال بہت سارے جلدی مسئلے ختم ہو جاندے نیں۔ امب دا گودا چہرے اتے لان نال نہ صرف جلد دی نمی برقرار رہندی اے بلکہ رنگ وی صاف ہو جاندا اے۔
امب دماغی صلاحیت نوں وی ودھان وچ مددگار ثابت ہو سکدا اے۔ امب وچ بہت زیادہ مقدار وچ وٹامنز موجود نیں جہڑے تہاڈے دماغ دی بہترین نشوونما کردے ہیں۔ امب گلوٹامائن نال بھرویں ہوندے نیں جہڑے یادداشت لئی مفید نیں۔امب جسم وچ مدافعتی نظام نوں ودھاندے نیں۔ امب وچ بیٹا کیروٹین دی بہت زیادہ مقدار پائی جاندی اے جہڑی انسان دے مدافعتی نظام نوں مضبوط تے تندرست رکھدے نیں۔
ذیابطیس وچ امب انتہائی مفید اے
امب وچ مٹھاس دی بوہتی مقدار پائی جاندی اے جہدے بارے خدشات سن کہ ایہہ ذیابطیس دے مریضاں لئی نقصان دہ ثابت ہو سکدا اے لیکن ہن نویں تحقیق نال ثابت ہویا اے کہ امب ذیابطیس دے مریضاں لئی انتہائی مفید اے۔ ایہدے وچ کافی مقدار وچ منرلز تے وٹامنز پائے جاندے نیں تے آسانی نال جسم وچ جذب ہو کے خون وچ گلوکوز دی مقادر نوں معتدل رکھدے نیں۔
امب وچ آئرن دی کافی مقدار پائی جاندی اے جہڑی انیمیا دی تکلیف وچ مبتلا لوکاں لئی زبردست علاج اے۔ روزانہ اک امب دا استعمال جسم وچ لال خون دے سیل دی مقدار ودھاندا اے جہڑا انیمیا دے خطرے نوں گھٹ کردا اے۔امب دا استعمال ہڈیاں دی بیماریاں توں محفوظ رکھدا اے تے اوہدے وچ موجود کیلشیم ہڈیاں نوں مضبوط کرن وچ مددگار ثابت ہوندا اے۔ امب کھان نال ہڈیاں دی کمزوری دی امکانات بہت گھٹ ہوجاندے نیں۔امب دی سب توں مشہور قسماں مندرجہ ذیل نیں جہڑیاں تہانوں پاکستان وچ ملن گِیاں۔ اوہدے علاوہ وی امباں دی کئی قسماں موجود نیں۔
چونسہ،سندھڑی،انوررٹول،لنگڑا،دسہری
چونسہ :پاکستانی پنجاب دے علاقے رحیم یار خان توں شروع ہون والی امب دی چونسہ ایس مشہور قسم دا نام شیر شاہ سوری دے نام اتے رکھیا گیا اے جہنے ہندوستان دے علاقے بہار وچ ہون والی اک لڑائی وچ مغل بادشاہواں وچوں اک ہمایوں نوں شکست دتی سی۔چونسہ پورے سوری قبیلے دا پسندیدہ ہوندا سی۔ چونسہ امب ہر طرح دے اماں وچوں اک مشہور امب اے تے ایہدے حیرت انگیز مٹھے ذائقے دی وجہ نال لوکاں وچ بہت مقبول اے تے سب توں ودھ پسندیدگی دے نال کھاہدا جاندا اے۔ لوکاں دی اکثریت ایس مزیدار امب نوں اپنے انگوٹھیاں نال نرم کر کے براہ راست رس چوسنا تے خام حالت وچ کھانا پسند کردی اے۔ چونسہ امب دے پکن دا موسم جون دے درمیان تے اگست توں ستمبر دے اخیر تک ہوندا اے۔
سندھڑی:
سندھری ام دی شروعات پاکستان دے ضلع میر پور خاص توں ہوئی۔ ایس امب دی شکل بیضوی ہوندی اے تے ایہدی جلد چمکیلی تے پیلے رنگ دی ہوندی اے۔ ایہہ انتہائی خوشبودار امب ذائقے دی علامت اے جہڑا عام طور تے مٹھا ہوند ااے لیکن فصل دی ابتدا دے موسم وچ تھوڑا جیا کھٹا وی ہوندا اے ایس لئی ایہنوں مکمل پکن تے کھایا جاوے تے ایہدا اصلی مزہ حاصل ہوندا اے۔ ایس امب دا نام سندھ توں آیا اے کیوں جے ایہہ امب دی قسم پاکستان دے صوبہ سندھ وچ عام طور تے اگائی جاندی اے۔ سندھڑی امب خام حالت وچ کھان دے علاوہ شیک’ آئس کریم تے اسموتھیز بنان وچ استعمال ہوندے نیں۔ زیادہ تر لوک سندھڑی امب دی جلد نوں چھِلن مگروں امباں نوں کیوب دی شکل وچ کٹ کے کھاندے نیں۔ سندھڑی امباں دے پکن دا سیزن مئی توں اگست دے درمیان اے تے ایہناں دی زندگی امب دی دوجی قسماں دے برعکس بوہتی لمی ہوندی اے۔
انور رٹول:
ایس امب دا نام انورالحق نال جوڑیا جاندا اے جہدے بارے آکھیا جاندا اے کہ اوہ ہندوستان دے صوبے اترپردیش دے ضلع باغپت وچ ایس طرح دے امب دی فصل لان والا پہلا شخص سی۔ ایہہ امب زیادہ مانگ تے لذت دی وجہ نال امب دے ”بادشاہ” دے نام توں جانے جاندے نیں۔ ایہدی کاشت بنیادی طور تے پاکستان دے صوبہ پنجاب وچ کیتی جاندی اے۔ انور رٹول دے پکن دا موسم مختصر ہوندا اے۔ ایہو وجہ اے کہ ایہدی بہت زیادہ مانگ اے تے ایہہ نہ صرف پاکستان بلکہ دنیا بھر وچ لوکاں وچ امباں دی سب توں پسندیدہ قسماں وچوں اک اے۔
لنگڑا :
ایہہ امب ہندوستان دے شمالی حصے وارانسی (بنارس) توں تعلق رکھدا اے جتھے ایہدی پہلی واری کاشت کیتی گئی سی۔ ایس امب دا نام لنگرا رکھن دے پچھے دی وجہ پتہ نہیں لیکن افواہاں ایہہ نیں کہ ایس امب دی پہلی کاشت کرن والا شخص خود وی لنگڑا سی۔ جہدی وجہ نال ایس امب نوں وی لنگڑا دا نام دے دتا گیا۔ امب دی ایس قسم دی انوکھی خصوصیت ایہدا رنگ اے جہڑا پکن مگروں وی سبز رہندا اے لیکن اندروں نارنجی ہوندا اے تے ایہدا ذائقہ غیر معمولی اے۔ایہدی فصل دا موسم جولائی دے وسط توں ستمبر تک ہوندا اے تے ایہدا ذائقہ پھل دے پکن اتے منحصر ہوندا اے جہڑا بہت مٹھے توں تھوڑا جیا کھٹا ہو جاندا اے۔
دسہری :
پاکستان وچ پیدا ہون والے امباں وچ اک ہور مقبول قسم دسہری اے۔ ایہدی جڑاں اوہناں باغاں توں شروع ہوئیاں نیں جہناں دا تعلق ہندوستان دے علاقے لکھن دے نواباں نال سی۔ انتہائی مٹھا تے ہونٹاں نوں چپکن والا ایہہ مزیدار امب بہترین ذائقہ رکھدا اے۔ ایس چھوٹے جئے امب توں لطف لین دا بہترین ویلا جولائی دے پہلے تن ہفتیاں دے درمیان دا ہوندا اے جدوں اوہ ذائقے تے خشبو وچ بہترین ہوندے نیں۔ نیلم’ فجری’ سرولی’ مالدہ تے طوطا پری دوجی قسم دے پاکستانی امب نیں جہڑے پاکستان وچ ای تیار ہوندے نیں تے آسانی نال دستیاب نیں۔
امب دے درخت نوں اُگانا وی بہت آسان اے تے ایہہ عام طور تے سندھ تے پنجاب وچ بہت سارے مکاناں دے پائیں باغ وچ ویکھیا جاندا اے۔ ایہدی وجہ ایہہ ہے کہ ساڈے ملک دا موسم امب دے درخت اگان تے پھلاں دی افزائش لئی بہترین اے۔
تسیں اپنے گھر وچ لگے امباں توں یا بآسانی بازار وچ دستیاب مزیدار جوس’ شیک تے شربت وی بنا سکدے او تے اپنے دوستاں تے اہلخانہ دے نال ایس توں بھرواں لطف چک سکدے او۔