احساس

جے دل دنیاداری دے کماں بشمول کالم لکھن تے راضی ہوندا تے لکھن نوں بہت کجھ سی پر جتھے میں سی اوتھے دل نے اجیہا کوئی کم کرن توں صاف انکار کر دتا۔ اک دوست نے کہیا کہ سیاست یاں ایسے قسم دے موضوع تے لکھن دی تھاں دل دا حال ای لکھ دیو۔ اوہنوں کہیا کہ بھلا دل دا حال لکھنا قلم دے وَس دی گل کتھے اے؟ ہن آیا واں تے حال ایہ وے کہ پیر سُجے ہوئے نیں’ نک تے کن بند نیں’ تریجے درجے دا فلو اے’ بخار اے تے تھکن اے پر دل شاد اے۔
کجھ دیہاڑ پہلاں ملک نوں جہڑے حالاں وچ چھڈ کے گیا سی واپسی تے اوہو جیہا اے۔ مجال اے کہ رتی برابر بہتری آئی ہووے۔ ہاں’ ایہ ضرور ہویا کہ ملک توں ٹرن دے ویلے سعودی ریال پنجاہ روپیے پندراں پیسے تے خریدیا سی واپسی تے بونجا روپیے نوے پیسے تے واپس کیتے نیں۔ صرف کجھ دیہاڑیاں وچ خریدوفروخت دے آپسی فرق توں علاوہ تن روپیے پچھتر پیسے فی ریال ساڈا روپیہ ہور بے وقعت ہویا اے۔ پچھلے والے نااہلاں دے زمانے وچ ستائی بجلی گھر بند سن’ پر لوڈشیڈنگ نہ ہون دے برابر سی۔ نویں حکومت نے آ کے اپنی تیز رفتار کارکردگی نال ایہناں ستائی بجلی گھراں وچوں ویہہ بجلی گھر چالو کر دتے نیں تے لوڈشیڈنگ اپنے عروج اُتے اے۔ چار ورھے پہلاں جس طرح معاشی ارسطو اسدعمر حساب لا کے دسدا سی کہ مسلم لیگ ن والے پٹرول تے ٹیکساں دی مد وچ جناں لوکاں نوں لٹ رہے نیں ایس طرح پوری دنیا وچ کسے قوم نوں نہیں لٹیا جا رہیا تے جدوں پی ٹی آئی دی حکومت آوے گی تے پٹرول سستا ہو جاوے گا تے بجلی دی فی یونٹ قیمت وی گھٹ جاوے گی پر جدوں پی ٹی آئی حکومت وچ آئی تے اوہدی معاشی ٹیم نوں پتہ لگا کہ مسلم لیگ تے عالمی منڈی وچ پٹرول دے ریٹ دے حساب نال سستا ویچ رہی سی۔
ایسے طرح جدوں پی ٹی آئی دی حکومت وچ تیل دیاں قیمتاں ودھیاں تے مفتاح اسماعیل سنے مسلم لیگ ن دے سارے ماہرین اقتصادیات یک زبان ہو کے رولا پارہے سن کہ تحریک انصاف دی حکومت غریباں دا استحصال کر رہی اے تے پاکستانی لوکاں نوں لٹ رہی اے جد کہ عالمی سطح تے تیل دیاں قیمتاں ڈھیر تھلے آ چکیاں نیں۔ ہن جدوں آپ آئے نیں تے اک واری فیر اوہناں نوں پتہ لگا اے کہ تیل دیاں قیمتاں تے اسمان تے اپڑ چکیاں نیں تے عمران خان سستا پٹرول ویچ کے اوہناں لئی معاشی طور تے بارودی سرنگاں وچھا گیا اے تے ایس قیمت تے ہور پٹرول ویچنا ملکی معیشت نوں برباد کرن دے مترادف اے تے پٹرول دیاں قیمتاں نہ ودھائیاں گئیاں تے اللہ نہ کرے ملکی معیشت دا بھٹھہ بہہ جاوے گا تے ملک دیوالیہ وی ہو سکدا اے۔ ایہ گلاں عام بندہ نہیں سگوں اوہ لوک کر رہے سن جو معیشت تے عالمی منڈی وچ تیل دیاں قیمتاں توں چنگی طرح واقف سن۔ ایہ لوک تھڑے تے بہہ کے لمیاں لمیاں چھڈن والے نہیں سگوں پڑھے لکھے تے عالمی معاشی اشاریاں توں بڑی چنگی طرح واقف سن پر صرف سیاسی پوائنٹ سکورنگ’ اپنے مخالفین نوں خوار کرن لئی لوکاں نوں گمراہ کردے رہے نیں۔
ملک وچ اک عجیب بے یقینی دی کیفیت اے تے کوئی فریق وی ملکی معاشی صورتحال نوں سامنے رکھدے ہوئے کسے طور تے اپنی ہٹ دھرمی تے ضد توں پچھے ہٹن لئی تیار نہیں۔ حکومت توں لے کے حکومت مخالف سیاستداناں تک’ سارے اقتدار بچان یاں حاصل کرن دی بھج نس وچ نیں تے ایس جنگ نے ملکی اقتصادی صورتحال نوں خطرناک حد تک برباد کر دتا اے۔ ڈالر دو سو روپیے دی حد کراس کر چکیا اے۔ درآمدات تے ایہدا ایناں بھیڑا اثر پوے گا کہ لوکاں دے کڑاکے نکل جان گے۔ سامان تعیش دی درآمد تے پابندی نال کوئی خاص اثر نہیں پین والا کہ بھائی لوک ایہدا کوئی نہ کوئی توڑ کڈھ لین گے پر ضروری تے مجبوری والی درآمدات دی ملکی کرنسی وچ قیمتاں تے جو بھیڑے اثرات پین گے ایہدا اجے کسے نوں وی اندازا نہیں’ پر آن والے دیہاڑیاں وچ ساری صورتحال سامنے آ جاوے گی۔ سولاں’ ستاراں فیصد مارک اپ’ دو سو روپیے توں ودھ دا ڈالر تے آئی ایم ایف دیاں سخت شرطاں نال ایس ملک وچ مہنگائی دا جو سیلاب اجے متوقع اے اوہدے بارے سوچنا واں تے ٹھنڈے مڑھکے آن لگ پیندے نیں۔
ایمانداری دی گل اے کہ مستقبل دا نقشہ کجھ زیادہ خوشگوار وکھائی نہیں دے رہیا۔ نہ سیاسی طور تے نہ ای معاشی طور تے۔ ہٹ دھرمی’ انا’ ضد’ اپنی خواہشات دی غلامی نے ایس ملک وچ گل بات’ مذاکرات تے درمیانی راہ کڈھن دے امکانات ہور گھٹ کر دتے نیں تے اسیں ہولی ہولی بند گلی ول ودھ رہے آں۔ سیاست وچ تلخی ہن ایس حد تک آ گئی اے کہ ایہدے اثرات معاشرے توں لے کے گھراں دے اندر تک نظر آنا شروع ہو گئے نیں۔ برداشت’ تحمل تے درگزر نامی چیزاں گھٹدیاں جا رہیاں نیں تے جس امت نوں اعتدال دے راہ تے دنیا دی قیادت کرنی سی اوہ قیادت تے خیر نال کیہ کردی’ اوہ تے چنگی پیروکار وی ثابت نہیں ہوئی۔
سب دے سب تنزلی ول جا رہے نیں تے ایس توں ودھ افسوس دی گل ایہ وے کہ کسے نوں وی ایس صورتحال تے نہ افسوس اے نہ ای دکھ’ سگوں افسوس تے دکھ کیہ’ کسے نوں ایس تنزلی دا احساس ای نہیں۔ افسوس’ دکھ تے رنجیدگی اودوں ہوندی اے جدوں احساس باقی ہووے۔ ایدھر تے احساس ای رخصت ہو چکیا اے۔٭٭