ناول

جد اوہنوں ”وکھاون” لئی آکھیا گیا تاں اوہنے فٹ اگوں موکی چُک دِتی۔ لوکاں کانی اکھ نال اودھر ویکھیا تے فیر جھینپ کے مونہ پھیر لئے۔ اوہدے کول مسلمان ہوون دا ”سرٹیفکیٹ” ہے سی۔ لوکاں اوہدی گیل چھڈ دِتی۔
اج میں لوکاں دی عقل تے حیران ہونا آں۔ بندا پُچھے انڈیا والے جیکر کوئی جاسوس گھلن گے تاں کیہ اوہ بے سُنتا بندا گھلن گے۔ اوہناں لئی ختنے کرنے کہڑے اوکھے سن۔
اصل اوکھیائی تاں پاکستان نُوں سی اوہ سنت بیٹھا بندابے سُنتا کِنج کرن گے؟
تے گل ہوندی پئی سی جہاز شاہ دی۔ اوہدی ”مسلمانی” ویکھن دی منگ کسے نہ کیتی۔ اصلوں فوجی اوہنوں تھوڑا بہتا جاندے سن تے دابا پئے لاندے سن۔ اوہناں جہاز شاہ نوں ڈراوا دے کے اپنا کم کڈھنا سی۔ جد جہاز شاہ دسیا کہ اوہ موجاں نوں جاندا اے سگوں اوہناں دے پنڈ دا ای اے تاں اِک فوجی نے اوہنوں موجاں تک اپڑاون لئی اِک خط دِتاتے کُجھ نقد پیسے وی دِتے۔
ظاہر جہی گل اے موجاں دا اودھر کوئی حساب کتاب چلدا ہونا ایں۔ جد موجاں نہ اپڑی تاں ”سجناں” سمجھیا لین دین وچ جہڑی کوتاہی ہوئی اے’ اوس پاروں اوہ غُصا کر گئی اے تے ہُن نہ خط پئی گھلدی اے تے نہ ای ملن پئی آندی اے۔
اوہناں پیسے گھل کے ویہار دے کھرے ہوون دا ثبوت دیون دی کوشش کیتی۔
اگوں جہاز شاہ سی۔
ویکھیا گیااے کملیاں رملیاں نوں وی پیسیاں دی اہمیت دا پتا ہوندا اے۔ تے بندا بھاویں جہازہووے تے بھاویں شاہ اکھواندا ہووے۔ ہوندا تاں بندا ای اے۔ تے بندا بُنیادی طوراُتے حریص تے لالچی ہوندا اے۔ تے سِدھڑ بندا نتیجے دی پروا نہیں کردا۔ اصلوں اوہنوں شاید اینی عقل ای نہیں ہوندی کہ نتیجے توں ڈرے۔ اوہ تاں اپنے فوری فایدے نوں ویکھدا اے۔ بعد دیاں ماریاں کھُچاں اُتے۔
جہاز شاہ خط نہر وچ سٹ دِتاتے پیسے خُد رگڑ گیا۔ اپنی کم عقلی پاروں اوہنے سمجھیا کہ ایہ بھیت کدے کھُلھے گا ای نہیں۔ اُنج اینی سیانف اوہنے کیتی کہ جدھر فوجی رہندے سن اودھر جانا بند کر دِتا تے دریا وچ رہ کے تُسیں مگر مچھ کولوں کد تائیں بچ سکدے او۔ فوجی کہڑا سو کوہ تے رہندے سن۔
کُجھ چِربعد موجاں دی اپنے سجناں نال ملاقات ہوئی تاں اوہناں پیسیاں دے اپڑان بارے پُچھ پرتیت کیتی۔ اگوں موجاں حیران ہوئی کہ کہڑے پیسے؟
گل دو تے دو چار تے چِٹے دن وانگوں نِتر کے ساہمنے آ گئی کہ جہاز شاہ پیسے ڈکار گیااے۔
ہُن جہاز شا ہ چوہے دی کھُڈ وچ وی وڑ جاندا تاں فوجیاں اوہنوں کڈھ لیاونا سی تے اوہ تاں اوہناں نُوں باہر ای لبھ گیا۔ اوہ ورچا کے اوہنوں اِک لا ہمے لے گئے تے اوہدے نال گھسُن مُکّی ہو گئے۔ گھُسّن ماریاں جے کم سُوتر ہوندے ہوون یاں لہنا تردا ہووے تاں سارے ای انج ای کرلین۔ سُنیا اے گھُسن ماریاں کم سُوتر ہون دی بجائے وِگڑدا اے تے لہنا ترنا تاں دُور’ اصلوں ای ڈُب جاندا اے۔
اوہناں نوں گھُسن مارنے پکے رہے تے پیسے جہاز شاہ نوں پکے ہوگئے۔ ہُن اِل دے آلھنے وچ ماس کِتھے سی؟
اصلوں جہازشاہ کُجھ زیادا ای بے وقوف سی۔ جے اوہ کاروباری ذہن دا مالک ہوندا تے فوجیاں دی مستقل خدمت لئی تیار ہو جاندا۔ فیر مار کھاون دی بجائے پیسے وی کھاندا تے ہور شیئاں نال وی رجدا۔ فیر اوہنوں اوہ جُوہ وی نہ چھڈنی پیندی۔
آخر بہت سارے سیانے ا ِنج ای عیشاںکردے رہے نیں تے کردے پئے نیں۔
فوجی اک سال دو مہینے تک اوتھے رہے تے ایس دوران ایس قسم دے نِکے موٹے واقعات وی ہوندے رہے۔ انسان جِتھے وسدا اے’ اوتھے اپنیاں ساریاں خوبیاں تے خامیاں تے گھاٹاں سمیت وسدا اے تے فوجی وی تاں انسان سن فیر اوہ تاں گھروں بے گھر وی سن۔ اِک دو فوجیاں دِیاں یاریاں زیادا گُوڑھیاں ہوئیاں تاں اوہناں ایتھے ویاہ وی کروائے۔ (جاری اے)