2021-22 ء وچ چھپن والیاں پنجابی کتاباں دی انعامی ادبی بیٹھک

ورلڈ پنجابی فورم تے روزن ادبی فورم دی چھتر چھاویں، گجرات چیمبر آف کامرس اینڈ انڈسٹری تے محکمہ اطلاعات و ثقافت (حکومت پنجاب) دی باہمی سانجھ نال 2021 ء وچ چھپن والیاں پنجابی (شاہ مکھی) کتاباں دی انعامی بیٹھک دا پربندھ کیتا گیا۔ ایہہ انعامی بیٹھک گجرات چیمبر آف کامرس اینڈ انڈسٹری دے خوبصورت جناح ہال وچ منعقد کیتی گئی۔ جہدے وچ پنجابی نال محبت کرن والے سوجھواناں تے شاعراں نیں بھرپور رلت کیتی تے اپنی ماں بولی نال اپنی عقیدت دا اظہار کیتا۔ گرمی دا موسم ہون دے باوجود ہال دا ماحول بڑا پرسکون تے ٹھنڈا سی۔
‘ ‘روزن ادبی فورم” تے ”ورلڈپنجابی فورم ” دے صدر ، چئیرمین لٹریری سٹینڈنگ کمیٹی گجرات چیمبر آف کامرس اینڈ انڈسٹری ، پرائیڈ آف پنجاب ڈاکٹر محمد افضل رازجی ولوں پنجابی زبان وچ ادب تخلیق کرن والے لکھاریاں دی حوصلہ افزائی تے لوکائی وچ اوہناں دیاں لکھتاں دی پہچان کران لئی انعامی ادبی بیٹھکاں دا سلسلہ اج توں22 ورھے پہلاں شروع کیتا گیا۔ ایہہ تقریب اپنی مدد آپ دے اصولاں دے تحت منعقد کیتی جاندی اے۔ کسے ویلے کجھ بانہہ بیلی وی اس دا حصہ بن جاندے نیں۔
اج دی بیٹھک دی صدارت گجرات چیمبر آف کامرس اینڈ انڈسٹری دے صدر نعیم امتیاز گوندل نے کیتی جدکہ اچیچے پروہنے پنجابی سوجھوان پنجابی میڈیا گروپ دے چیف ایگزیکٹو تے قائدتحریک،پنجابی قائد مدثر اقبال بٹ سن۔ ڈاکٹر احسان اللہ طاہر تے ڈاکٹرمحمدافضل رازنیں نظامت دیاں ذمہ داریاں نبھائیاں۔
بیٹھک دی خاص گل اے وے کہ ایس سال پچھلے سال توں ودھ بہتر کتاباں مقابلے لئی موصول ہوئیاںسن۔جنہاں وچوں 22 کتاباں انعام دیاں حقدار چنیاں گئیاں۔ جیہڑیاں کتاباں انعام حاصل نئیں کر سکیاں ایہدا مطلب ایہہ نئیں کہ او کسے توں گھٹ نیں۔اوہناں دا مواد تے فکری خوبصورتی اپنی جگہ اے۔ اوہ وی مبارکباد دی مستحق نیں ۔ اوہناں دے وچاراں توں وی ساڈی موجودہ تے اؤن والی نسل بھرپور فیض حاصل کرسکے گی۔ بیٹھک دے پہلے حصے وچ انعام دے حقدار 22 نثر نگاراں ،کھوجکاراں،ترجماکاراںتے شاعراں نوںانعام دتے گئے۔ایس توں اڈ پنجابی دے ودھا تے چڑھا لئی اچیچی خدمت کرن والے سوجھوان نوں لائف اچیومنٹ ایوارڈ دی تقسیم سی ۔ ایس واری ایہہ ایوارڈ پنجابی دے اُچ کوٹی مہان لکھاری،شاعر شارق مان ہوراں دے حصے وچ آیا۔
بیٹھک دا مڈھ پنجابی سیوک محمد عمر ندیم نیں تلاوت قرآن پاک تے عارف شاہد گوندل ہوراں نعت رسول مقبول ۖ پیش کیتی۔ بیٹھک دے مجمان پرائیڈ آف پنجاب ڈاکٹرمحمدافضل راز جی نے ادبی انعامی بیٹھک بارے دسیاتے سارے رلت کرن والیاں دا شکریہ ادا کیتا ۔
گجرات چیمبر آف کامرس اینڈ انڈسٹری دے صدرنعیم امتیاز گوندل نے اپنے صدارتی خطاب وچ انعامی بیٹھک وچ رلت کرن والے دانشوراں، لکھاریاں تے پنجابی نال محبت کرن والیاں نوں جی آیاں نوں آکھیا۔اوہناں نیں کہیا کہ پنجابی بڑی مٹھی زبان اے پر ساہنوں ایہدا احساس نئیں کیوں جے ایہہ ساڈی مادری زبان اے۔ ساہنوں ایس دی قدر تے عزت کرنی چاہی دی اے۔ جیہڑیاں قوماں اپنی مادری زبان دی عزت تے قدر نئیں کردیاں۔ اوہ کدی ترقی نئیں کر سکدیاں۔ میں تمام انعام حاصل کرن والیاں لکھاریاں نوں مبارکباد پیش کرناں واں۔ا سی امیدکرنے آں کہ ساڈی ادبی سٹینڈنگ کمیٹی دے چئیرمین افضل رازجی ایس طراں دیاں ادبی محفلاں سجاندے رہن گے ۔
اس بیٹھک دے اُچیچے پروہنے پنجابی میڈیا گروپ دے چیف ایگزیکٹو تے قائدتحریک،پنجابی قائد مدثر اقبال بٹ نے اپنے خطاب وچ آکھیا کہ دور حاضروچ پنجابی لئی کم کرنا بڑی عبادت اے ۔ ایس سلسلے وچ گجرات توں بڑی ٹھنڈی ہوا اؤندی اے ۔جتھے افضل راز جئے بندے پنجابی زبان دے ودھا تے کھلار لئی کم کر رہیے نیں ۔ او ہ ہمیشہ مادری زبان لئی کم کردے آ رہئے نیں۔ ایہدے نال ای گجرات چیمبر آف کامرس تے ایس دے صدرنعیم امتیاز گوندل وی مبارکباد دے مستحق نیںجنہاں ماں بولی لئی ایہہ محفل سجائی اے۔ تے ایس طراں اوہ اپنے ادارے ولوں پنجابی زبان لئی اپنا حصہ پا رہئے نیں ۔ اوہناں آکھیا کہ پنجابی ولیاں تے صوفیاں دی زبان اے ایس لئی وی ایس دا زندہ رہنا ضروری اے ۔ جے کر پنجابی ساڈے نصاب دا حصہ ہو وے گی، تے اسیں پنجابی پڑھ سکاں گے، ایہنوں سمجھ سکاں گے تے بول سکاں گے۔ فیر ساہنوںبلھے شاہ، شاہ حسین ، بابا فرید تے دوجے سارے ولیاں تے صوفیا ں دے کلام نوں پڑھ وی سکاں گے تے سمجھ وی سکاںگے۔ جنہاں دی تعلیم دا سنیہا صرف محبت، امن تے رواداری اے۔ میں سمجھناں واں کہ جے ساڈی نویں نسل پنجابی نال واقف ہووے گی تے اوہ اولیا تے صوفیا دے کلام نوں سمجھ وی سکے گی تے امن تے محبت دی پرچارک وی بنے گی ۔ اوہ غنڈہ گردی، بدمعاشی تے دہشت گردی توں دور ہٹ جائے گی ۔ ایس لئی ایس گل دی لوڑ اے کہ اسی نویں نسل تک پنجابی دا سنیہا پہنچائیے ۔ ساڈی تحریک دی کوشش اے کہ پنجابی نوں نصابی تعلیم دا حصہ بنایا جائے۔ بالکل انج ای جیویں صوبہ سندھ تے صوبہ پختونخواہ وچ کوئی بچہ میٹرک پاس نہیں کر سکدا جدتیک او ہ سندھی تے پشتو زبان وچ امتحان پاس نئیں کر لیندا۔ ساڈی تحریک وی ایہو اے تے ساڈا مطالبہ وی اایہو ای اے۔ جس دے ہراول دستے دا کردارڈاکٹرمحمد افضل راز ادا کر رہئے نیں۔ کہ اسیں ایس خطے وچ اپنی ماں بولی نوںنافذ کر سکئے۔ ایہنوں تعلیم دا ذریعہ بنا سکئے ۔ ایسے طراں ای ساڈی نویں نسل پنجابی نال رشتہ جوڑ سکدی اے تے ساڈی ماں بولی پنجابی زندہ رہ سکدی اے۔
گوجرانوالہ توں تشریف لیائے شاعر جان کاشمیری نے اپے وچار سانجھے کردیاں آکھیا کہ میں افضل راز نوں اج دا نئیں بلکہ بہت عرصے توں جان دا واں۔ پنجابی زبان دے ودھا تے ترقی لئی جیہڑیاں ایہناں دیاں کوششاں نیں اوہناں دی جنی وے تعریف کیتی جائے گھٹ اے۔ اوہناں آکھیا کہ جیہڑا بندا نفعے نقصاں توں ہٹ کے اپنے مؤقف تے ڈٹ جاندا اے اوہو ای کامیاب ہوندا اے تے افضل راز پنجابی دے ودھا تے کھلار لئی ڈٹیا ہویا اے۔ اوہناں دی جنی وے تعریف کیتی جاوے گھٹ اے۔ ساہنوں چاہی دا اے کہ اسی دامے درمے قدمے سخنے ڈاکٹرمحمدافضل راز دا ساتھ دئیے ۔ تاں جے او جیہڑا پنجابی زبان دی ترقی تے ودھا لئی کم کر رہیا اے۔ اوس وچ اسی اوہدا ہتھ ونڈھائیے۔
سابق ڈائریکٹر پاسپورٹ اخلاق قریشی نے اپنے مختصر خطاب وچ آکھیا کہ مینوں ایتھے رلت کر کے پنجابی ادب دے دانشوراں تے لکھاریاں نال مل کے بڑی خوشی ہوئی اے۔ مینوں ایتھے آ کے بہت کجھ سکھن دا موقع ملیا اے ۔ میں افضل رازدا شکریہ ادا کرناں واں ۔ انج دیاں محفللاں تے بیٹھکاں ثابت کردیاں نیں کہ پنجابی زبان ودھ رہئی اے تے ترقی کررہئی اے۔
اس یادگار ”انعامی ادبی بیٹھک” وچ پنجابی لکھاریاں، دانشوراں تے سوجھوانوں دیاں22 منتخب کتاباں تے انعامات تقسیم کیتے گئے ۔ انعام حاصل کرنے والے ہر لکھاری نوں نقد انعامی رقم، سرٹیفیکیٹ ا تے یادگاری شیلڈ دتی گئی ۔دو تن انعامی لکھاری اپنی سرکاری تے نجی مصروفیت دی وجہ نال تقریب وچ رلت نہ کر سکے تے اوہناں دا انعام ، سرٹیفیکیٹ تے یادگاری شیلڈ اوہناں دے مقرر کیتے ہوئے نمائندیاں نوں دتے گئے۔ خاص گل ایہہ وے کہ ” دینی ادب” وچ دوجا انعام مرحوم شاعر طاہر وزیر آبادی نوں اوہناں دی کتاب”جس دا اندر نور الٰہی” تے دتا گیا سی۔ اوہناں دا انعام وصول کرن لئی اوہناں دے پُتر نے ایس تقریب وچ رلت کیتی جنہاں نوں پورے اعزاز نال انعام ، سرٹیفیکیٹ تے یادگاری شیلڈ دتی گئی ۔
ایس یادگار ”انعامی ادبی بیٹھک” وچ گزشتہ سال وانگوں پنجابی ادب وچ نمایاں کردار ادا کرن تے لائف اچیومنٹ ایوارڈ دا وی اعلان کیتاگیا۔ ایس سال ایہہ انعام (پنجی ہزار روپیے)، شیلڈ تے سرٹیفیکیٹ پنجابی دے مہان لکھاری ،اُچ کوٹی شاعرشارق مان دے ناں کیتا گیا۔
سن 2021 ء وچ چھاپے چڑھن والیاں پنجابی کتاباں تے انعامات دی ونڈ ویتر کجھ انج اے :
پہلا کھیتر”دینی ادب”
١۔ پہلا انعام محترمی قمر محمود عبداللہد دی کتاب”سردا ر ۖ خلقت نے ”
٢۔دوجا انعام محترمی طاہر وزیر آبادی دی کتاب”جس دا اندر نور الٰہی”
٣۔ تیجا انعام محترمی ڈاکٹر محمد مشرف حسین انجم دی کتاب ”سلاماں دی خوشبو”
٤۔چوتھا انعام محترمی عبدالمجید صابری دی کتاب”نوری چمکاں”
دوجا کھیتر ”نثری ادب”
٥۔پہلا انعام محترمی زاہد حسین دی کتاب ”کہانی اک ماں دی (ناول)”
٦۔دوجا انعام محترمی آکاش دی کتاب ”اوم پریم کُٹیا”
٧۔تیجا انعام محترمی جاوید بوٹادی کتاب ”چَولاں دی بُردی”
٨۔چوتھا انعام ڈاکٹر عرفان پاشا دی کتاب”پرتن (کہانیاں)”
تیجاکھیتر”شعری ادب”
٩۔ پہلا انعام محترمی گُر شرن سنکھ عجیب دی کتاب”پشپانجلی”
١٠۔دوجا انعام محترمہ شکیلہ جبیں دی کتاب”اکھیاں دی جوگ”
١١۔ تیجا انعام چوہدری محمد اسماعیل چیچی دی کتاب ”ماپے”
١٢۔چوتھا انعام محترمہ پروین سجل دی کتاب ” جاچڑ”
چوتھا کھیتر ”کھوج پرکھ ادب”
١٣۔پہلا انعام محترمہ ڈاکٹر نگہت خورشید دی کتاب”پنجابی ریڈیو ڈرامہ”
١٤۔ دوجا انعام محترمی صفدروامق دی کتاب ”منظور جھلا حیاتی تے فن”
١٥۔تیجا انعام ڈاکٹر سونیا اللہ رکھا دی کتاب”اجوکا تھیٹردے پنجابی ناٹک”
١٦۔چوتھا انعام محترمی صغیر تبسم دی کتاب ”اساں چُپ نہیں وٹنی دھرتی تے”
پنجواں کھیتر ”ترجما،لپی انتر، التھا، جوڑنہار ادب”
١٧۔ پہلا انعام محترمہ ثروت سہیل دی کتاب”مسیحا دی اُڈیک (لکھاری سیموئل بیکٹ)”
١٨۔دوجا انعام محترمہ منجیت کور/ آصف رضا دی کتاب ”رُوح دی اکھ وچوں”
١٩۔ تیجا انعام محترمی انور ندیم علوی/شیخ ایاز دی کتاب ”تھل ترہیائے نین”
٢٠۔ چوتھا انعام محترمی طارق علی/ زبیر احمد دی کتاب”20 ویں صدی دی وار”
چھیواں کھیتر ”بال ادب”
٢١۔ پہلا انعام ڈاکٹر محمد ایوب دی کتاب”باتاں دادی دیاں ۔ بال لوک باتاں”
٢٢۔دوجا انعام محترمی حنیف راجہ دی کتاب ”پھُل، تتلی، خشبو”
ایس تقریب دی اک ہور خاص گل ایہہ وے کہ ایس دفعہ دو ایوارڈ دا اضافہ کیتاگیا۔پہلا ایہہ کہ پنجابی زبان دے ودھا تے کھلار لئی کم کرن والیاں نمایاں شخصیتاں نوںپنجابی سیوک ایوارڈ ، سرٹیفیکیٹ تے اک چیک دتا گیا۔اوہناں دے ناں کجھ انج نیں :
١۔ محمد عمر ندیم،٢۔صوبیدار(ر) رشید مرزا،٣۔مرزا محمد آصف،٤۔منیر صابری کنجاہی،٥۔ایم فاروق حیدر قاضی،٦۔محمد یعقوب فردوسی،٧۔عارف یار سوہلوی، ٨۔احسان اللہ طاہر،٩۔ڈاکٹر انوار احمد اعجاز
دوجا اہم ایوارڈ ایس تحریک وچ نمایاں ساتھ دین والیاں دی خدمات دا اعتراف کر دیاں ہوئیاں اوہناں نوں ”بانہہ بیلی شیلڈز” دتی گئی۔ اوہناں وچ شامل نیں :
١۔عامر قیوم بھٹی،٢۔محمد عبدالرحمان ارشد، ٣۔محمد اشفاق ایاز،٤۔خموش چیچیانوی، ٥۔ محمد ارشد،٦۔عامر قیوم بھٹی،٧۔عبداللہ بیگ، ٨۔توقیر شبیر،٩۔محمداکرام سجاد، ١٠۔ شاہد اقبال گھمن
بیٹھک دے آخر وچ ڈاکٹر محمد افضل راز نے اک قرار داد پیش کیتی تے آکھیاکہ ایس قراردادپیش کرن دا اک مقصد اے تے لوکائی نوں دسنا اے کہ ایہہ قرارداد اک اجیہی شخصیت بارے پیش کیتی جارہی اے جنہیں اپنی ساری حیاتی پنجابی زبان دی بڑھوتری لئی وقف کردتی اے تے اوہ اپنے عمل نال ایس گل نوں ثابت وی کر رہیا اے۔ اوہ پنجابی نوں عملی طور تے اگلی نسل نوں منتقل کر رہیا اے ۔ میری مراد پنجابی میڈیا گروپ دے چیف ایگزیکٹو مدثراقبال بٹ جی نیں۔میں اج ایس بھرویں انعامی ادبی بیٹھک دے اکٹھ وچ رلت کرن والیاں اگے بنتی کردا واں کہ اوہ مدثراقبال بٹ ہوراں نوں اوہناں دی خدمات دے اعتراف وچ اگوں توں ” قائد تحریک ،پنجابی قائد ”لکھن ،پڑھن تے بولن۔ اس قرارداد نوں انعامی بیٹھک دے سارے رلتیاںنیں ہتھ چُک کے نالے مونہوں بول کے اس دی تائید کیتی ۔ جس تے ڈاکٹرمحمدافضل رازہوراں سارے رلتیاں دا شکریہ ادا کیتا۔
بیٹھک دے آخر وچ حسب روایت مہماناں دی تواضع پرتکلف ظہرانے نال کیتی گئی ۔