سیدعابدعلی عابد تے شبنم شکیل

دو مئی نوں ڈاکٹر خواجہ محمد ذکریا دا سیدعابد علی عابد دے بارے اخبار وچ مضمون چھپیا۔ سید عابدعلی عابد نال میری کدی ملاقات نہیں ہوئی پر اوہناں دی دھی شبنم شکیل نال لہور تے فیر اسلام آباد وچ کجھ ملاقاتاں ہوئیاں۔ سیدعابدعلی عابد اردو دے نامور شاعر’ ادیب’ نقاد’ محقق’ مترجم تے ماہر تعلیم سن۔ اوہناں دی دھی شبنم شکیل معروف شاعرہ سن۔ ویاہ توں پہلاں شبنم عابدعلی دے ناں توں لکھدیاں سن۔ شکیل احمد نال ویاہ دے بعد شبنم شکیل ہو گئیاں۔ اوہناں دے شوہر شکیل احمد بیوروکریٹ سن۔ شبنم شکیل لہور دے اک کالج وچ اردو دی پروفیسر سن۔ شوہر دی پوسٹنگ اسلام آباد وچ سی ایس لئی اوہناں نے اسلام آباد ٹرانسفر کرا لئی۔ شبنم دی والدہ بلقیس عابدعلی مشہور افسانہ نگار سن۔ اوہ اپنے والد تے فخر محسوس کردی تے اوہناں توں متاثر سن۔ اپنے والد دی شخصیت دے منفی تے مثبت دوویں اثرات قبول کیتے۔ لہور شہر اوہناں نوں پسند سی۔ اوہناں دا کہنا سی جے سوہنے قدرتی نظاریاں دی تلاش اے تے اسلام آباد دے کول تہانوں پیش کرن لئی بہت کجھ اے جے روحانی یاں ذہنی تسکین چاہیدی اے تے لہور بہتر اے۔ شبنم شکیل دے والد نے اک توں ودھ شادیاں کیتیاں۔ ایہدے توں اوہناں نوں عدم تحفظ دا احساس رہیا۔ اوہناں دا کہنا سی مینوں انج محسوس ہویا کہ جیویں میرے پیراں دے تھلیوں کوئی زمین کھچنا چاہندا اے۔ ایس سلسلے وچ اوہناں نے اپنا اک شعر سنایا:
اب اس کی تپش مجھ کو ٹھہرنے نہیں دیتی
حسرت تھی میرے پائوں کے نیچے بھی زمیں ہو
شبنم دا بھائی سید مینوچہر وی بیوروکریٹ سی۔ اوہناں نال وی میریاں کجھ ملاقاتاں رہیاں۔ سیکرٹری اطلاعات’ گورنمنٹ پرنٹنگ پریس دا سربراہ’ ممبر بورڈ آف ریونیو توں علاوہ متعدد سرکاری عہدیاں تے فائز رہے۔ اوہناں دا کہنا سی کہ میرے والد بڑے رعب والے سن۔ اسیں بھین بھائی ہر گل امی نال کردے سی۔ میرے اباجی اگے جے کوئی شکایت کردا کہ میں نصاب دی تھاں کہانیاں دیاں کتاباں پڑھنی آں تے اوہ کجھ نہیں سن کہندے۔ شبنم شکیل دے والد دی دوستی ڈاکٹر تاثیر’ صوفی تبسم’ پطرس بخاری تے فیض احمد فیض نال سی۔ اپنے والد تے اوہناں دے دوستاں دے بارے اک واقعہ مینوں شبنم نے سنایا۔ پطرس بخاری گورنمنٹ کالج لہور دے پرنسپل’ ڈاکٹر تاثیر اسلامیہ کالج دے پرنسپل تے میرے اباجی دیال سنگھ کالج دے پرنسپل سن۔ اک دن ایہ چاروں ریڈیو تے آئے’ اوتھے کوئی پروگرام سی۔ میں وی اوس ویلے بچیاں دے پروگراماں وچ حصہ لیندی سی۔ واپسی تے میں اوہناں دے نال گئی۔ گرمی دا موسم سی’ راہ وچ اوہناں نے لیمن پین دی خواہش ظاہر کیتی۔ اوہناں دیہاڑیاں لیمن دی بوتل اٹھ آنے وچ آندی سی۔ اوہ سارے اک دکان دے سامنے رک گئے۔ فیض صاحب نے پنج بوتلاں دا آڈر دتا۔ جدوں اسیں بوتلاں پی چکے تے پیسے دین دی واری آئی۔ فیض صاحب دے کول پیسے نہیں سن۔ فیر اوہناں نے ڈاکٹر تاثیر صاحب تے صوفی تبسم توں پچھیا پر اوہناں دے کول وی پیسے نہ نکلے۔ اودوں اوہناں نے ڈاکٹر تاثیر صاحب نوں بطور ضمانت دکان تے بٹھا کے گھروں پیسے لیا کے دتے۔ اوہ دن تے اج دا دن’ میں اج تک کوئی چیز پرس وچ پیسے دیکھے بناں نہیں خریدی۔
اباجی نے مینوں اپنے دوستاں وچ بیٹھن دی اجازت تے نہیں سی دتی پر دور بہہ کے اوہناں دیاں گلاں سن دی سی۔ کدی حصہ دین دے بہانے اوہناں دے نیڑے بہہ جاندی سی۔ میرے اباجی تے صوفی تبسم صاحب حقہ پیندے سن مینوں اردو بولن تے ثقیل لفظ استعمال کرن دا بڑا شوق سی۔ اک واری پطرس بخاری صاحب دا فون آیا۔ اوہناں نے پچھیا کون بول رہیا اے؟ میں کہیا عابدعلی عابد صاحب دی دخترنیک اختر بول رہی آں۔ ایس گل دا خوب ریکارڈ لگا۔ بخاری صاحب جدوں وی ساڈے گھر آندے تے پچھدے۔ بھئی’ دخترنیک اختر کتھے اے؟ شبنم نوں بچپن وچ شبو دے ناں توں پکاردے سن۔ بچپن وچ اوہ صرف گڈیاں نال کھیڈدی سی۔ اوہنے مینوں دسیا کہ بچپن وچ سائیکل چلان دا شوق سی۔ میرے ابا جی نے سائیکل لیا کے نہیں دتی پر ملازماں دی سائیکل چلاندی سی۔ میں شبنم نوں پنجابی دا اک مصرعہ سنایا۔ عمر گزری پباں بھار ایس ناں توں میرا اک پنجابی شعری مجموعہ وی اے۔ اوہدے توں پچھیا کہ تہاڈے نزدیک زندگی دا تصور کیہ اے؟ اوہناں دا کہنا سی۔ میرے خیال وچ اصل زندگی وی ایہو اے۔ سدھی سادی آسان زندگی نوں میں شمار نہیں کردی۔ سچ پچھو تے مینوں ہمیشہ ایس دنیا وچ انج دے لوک پسند آندے رہے نیں جہڑے ذرا مشکل پسند سن۔ عام روش توں ہٹ کے’ پٹڑی توں اترے ہوئے’ اک وکھرا تے نواں راہ لبھدے ہوئے لوک۔ میں اج تک کسے نوں وی بنے ب نائے’ ڈھلے ڈھلائے اصولاں دے مطابق جانچیا یاں پرکھیا نہیں۔ مینوں وی جے سکہ رائج الوقت دے حساب نال پرکھیا جاوے تے پوری نہیں اتراں گی۔٭٭