کیہ صوبے پاکستان دی لوڑ نیں؟

ریاست پاکستان دے فیصلے کرن دا حق ہر ادارے تے ہر طبقے نوں حاصل اے بناں تھلے والے طبقے دے’ سیاست بالائی طبقیاں دا کھیڈ اے۔ جہدے وچ عام بندے دا کردار نعرے لان’ جلسے بھرن تے ووٹ دین تک محدود اے۔ بالائی سیاستدان اپنے ووٹر نوں بااختیار بنان دے حق وچ نہیں۔ دلیل بڑی روشن ایہ کہ کوئی حکومت بلدیاتی انتخابات کران تے تیار نہیں ہوندی۔ اٹھارویں ترمیم دے نتیجے وچ صوبیاں نے مرکز توں اختیار تے وسیلے حاصل کر لئے نیں پر ہن اوسے طرح ایس خزانے تے سپ بن کے صوبائی حکومتاں بیٹھیاں نیں جیویں مرکز بیٹھا ہویا سی۔
سٹی گورنمنٹ تے سٹی سٹیٹس دا تصور یونان وچ لاگو رہیا اے۔ ٹرائے روم ایتھنز سپارٹا وغیرہ سٹی سٹیٹس سن۔ فیر فلورنس وینس تے میلان ورگیاں ریاستاں ابھریاں۔ درمیانی عہد نوں اک پاسے رکھ کے جائزہ لیے کہ جنرل پرویزمشرف نے سٹی گورنمنٹ دا جو بلدیاتی نظام دتا اوہنے تھلڑی سطح تے عام بندے دے کنے مسئلے حل کر دتے سن۔ خانداناں تے بالائی طبقیاں نے سیاسی طاقت نوں اپنی مٹھی وچ کر رکھیا اے اوہ نہیں چاہندے کہ عام بندے نوں طاقتور ہون دا احساس ہووے۔ سطحی تجزیہ کاراں نوں پڑھن والے تے اوہناں دی گل بات سنن والے مخصوص فریم دے اندر معاملے ویکھن دے عادی ہو جاندے نیں۔ ایہ اوسے طرح اے جیویں کجھ طالب علم ہو بہو اپنے کسے استاد وانگوں سوچن لگدے نیں۔ کئی واری استاد توں متاثرہ طالب علم اوسے طرح لباس پاندے نیں کجھ تقریر کردے ہوئے مائیک گراندے نیں۔ آئوٹ آف باکس سوچ ساڈے ایتھے ایس وجہ نال غیرمقبول تے اکثر اوقات حوصلہ شکنی دا ہدف رہی اے کہ ایہ مسئلیاں نوں حل کرن دا اجیہا راہ وکھاندی اے جو نظام تے مسلط طبقے نوں قبول نہیں۔
پاکستان دے قیام ویلے وڈیاں علاقائی ثقافتاں نوں قومی دھارے وچ لیان لئی صوبے تشکیل دتے گئے۔ امام غزالی نے تعصب نوں اک مثبت خصوصیت دے طور تے بیان کیتا اے۔ ایہ کسے گروہ دا اپنی ثقافتی علاقائی تے نسلی خوبیاں تے مان ہو سکدا اے۔ تحریک آزادی دوران فکری معاملیاں تے اکثر اوقات رائے عامہ کسے اک فریق دے ردعمل وچ پروان چڑھی۔ مثال دے طور تے شمال مغربی سرحدی صوبہ (کے پی کے) وچ خان عبدالغفار خان نے پشتون قوم پرستی نوں ابھار کے کانگرس دے نال اتحاد کیتا۔ ایس پراپیگنڈے دے اثرات اینے گہرے نیں کہ اج وی بھارتی فلماں وچ ہندو دا مسلمان دوست کردار پٹھان وکھایا جاندا اے۔ سندھ وچ وی اجہے بہت سارے عناصر موجود سن جو مسلماناں نوں باور کراندے رہندے کہ وکھرا ملک بنن نال اوہناں دی سندھی پچھان ختم ہو جاوے گی۔ پنجاب وچ حیران کن طور تے مسلماناں دی تھاں سکھاں وچ ایہ سوچ ابھری کہ پاکستان بنیا تے اوہ تقسیم تے کمزور ہو جان گے۔ پراپیگنڈا نال پھیلائے ایس تاثر دی نفی لئی قدرتی طور تے بانیان وطن نے علاقائی نسلی تے ثقافتی وحدتاں نوں صوبے بنا کے مطمئن کیتا۔
مشترکہ مفادات کونسل 1973ء دے آئین نے دتی۔ ہر صوبے دا وکھرا ٹیکسٹ بک بورڈ بنیا سرکاری ٹی وی نے ہر صوبائی دارالحکومت وچ اپنا مرکز بنایا تے مقامی ثقافت تے دوجے معاملیاں نوں قومی دھارے وچ شامل کرن دا فریضہ نبھایا۔ صوبیاں وچ پانی دی ونڈ دا طریقہ کار طے کر دتا گیا تے اوہدے انتظام لئی ارسا دا ادارہ بن گیا۔ ایہ چاروں ادارے مرکز تے وفاق دے وچکار عوامی تے انتظامی ہم آہنگی برقرار رکھن لئی شاندار کردار ادا کر سکدے سن پر ہولی ہولی اوہناں ساریاں نوں غیرموثر تے کمزور کر دتا گیا۔ مشترکہ مفادات کونسل دا سربراہ وزیراعظم ہوندا اے۔ سارے صوبیاں دے وزرائے اعلیٰ تے اعلیٰ سرکاری افسران اوہدا حصہ ہوندے نیں۔ صوبیاں دے وچکار یاں مرکز تے صوبیاں دے وچکار کوئی تنازع کھڑا ہو جاوے تے مشترکہ مفادات کونسل ایہدا فیصلہ کردی اے۔ طرفہ تماشا اے کہ جے مرکز تے کسے صوبے وچ اک ای جماعت دی حکومت ہووے تے اوہ صوبہ اپنے جائز معاملیاں لئی وی اپنے لوکاں دے حق وچ آواز نہیں اٹھاندا تے جے مرکز تے کسے صوبے وچ وکھووکھ جماعتاں برسراقتدار ہون تے ایہ کونسل مفلوج ہو کے رہ جاندی اے۔ انج نہیں کہ پاکستان وچ انتظامی تجربے نہیں کیتے گئے۔ آخر ون یونٹ دا تجربہ وی تے مرکزی حکومت نوں مضبوط کرن دی خاطر کیتا گیا سی۔ ہن جے ملک وچ صوبائی تعصب منفی شکل وچ ابھر چکیا اے۔ صوبے اپنی مقامی ثقافتاں تے آبادی دے نال مساوی سلوک نہیں رکھ سکے۔ اٹھارویں ترمیم مہم دے بعد مرکز توں جو اختیار تے مالی وسیلے حاصل کیتے نیں اوہ اگے تھلڑی سطح تے منتقل نہیں کیتے تے صوبیاں دی افادیت باقی نہیں رہندی۔ صوبے پاکستان وچ آئینی انتظامی تے عوامی اوکڑاں دا کارن بن چکے نیں۔ ایہ صرف بالائی طبقیاں دی مقامی شاخاں دے اقتدار دا ذریعہ نیں۔ عوام تے مسلط نااہلی تے غالب طبقات دی فرنچائز نیں۔ صوبیاں دی نکامی کئی علاقیاں وچ علیحدگی پسندی تے قوم پرستی دیاں تحریکاں نوں مضبوط کر رہی اے۔
شہری حکومتاں یاں سٹی گورنمنٹ مرکز توں اختیار تے وسیلے حاصل کرکے براہ راست تھلڑی سطح تے کم کر سکدیاں نیں۔ ایہدے نال عام بندے دے مسئلے حل ہو سکدے نیں۔ ایہنوں سینکڑوں کلومیٹر دا سفر کرکے اک درخواست کسے دفتر وچ جمع کران دی افادیت توں نجات مل سکدی اے۔ ایہدا میئر ہر ویلے اوہدی رسائی وچ ہووے گا۔ ملک وچ گلاں دی جمہوریت دی تھاں عمل دی جمہوریت فروغ پائے گی سرکاری وسیلیاں تے بالائی طبقیاں دی پرورش دا عمل رک سکدا اے۔٭٭