ذہنی بیمار سیاستدان

بطور پاکستانی ساڈا کیہ قصور اے۔ کیہ ساہنوں تے ساڈے بالاں نوں ہمیشہ ایہہ زہریلے سیاستدان انج ای ہیجانی کیفیت وچ مبتلا رکھن گے؟۔ کیہ ساڈے وانگوں پاکستان دی آن والی نسلاں وی ایسے کشمکش تے پریشانی وچ زندگی گزارن گیِاں کہ پاکستان دی پارینہ حکومت سارا نقصان کر گئی۔ حد ہو گئی اے۔ قوم نوں شعور توں تاں پہلے ای دور رکھیا ۔سانوں تعلیم نال روشناس نہ ہون دتا گیا۔ کئی کئی ضلعیاں’ قصبے تے شہراں نوں تعلیمی لحاظ نال پسماندہ رکھیا۔ آگاہی ای نہ دتی کہ کیہ بھلا’ کیہ برا۔ تعلیمی اداریاں وچ بچیاں دی پڑھائی دی جگہ بااثر افراد دے مویشی بنھے جاندے نیں۔ ہن نویں توں نویں تماشا روز لگیا ہوندا۔ ٹی وی اتے پریس کانفرنساں وچ ۔ نہ میں ایہہ سوال کرنی آںکہ پاکستانی عوام نال جہنا جھوٹ بولیا جاندا اے سیاستداناں ولوں اوہدے اتے عدلیہ ازخود نوٹس کیوں نہیں لیندی۔ ہر بندہ برابر نہیں ہوندا۔ لوگ دل چھڈ دیندے نیں ‘ شدید پریشان ہو جاندے نیں۔ لوک ایس طرح دے ملکی حالات توں پریشان نیں کہ جتھے اگلے لمحے اگلے دن دا پتہ نہیں ہوندا کہ کیہ ہون جا رہیا اے تے کمزور دل حضرات کئی طرح دی ذہنی پریشانیاں تے بیماریاں وچ مبتلا ہو رہے نیں مگر ایہناں زہریلے سیاستداناں نوں کیہ کدی خیال آیا کہ عوام نوں کدی حرف تسلی وی دینا ضروری ہوندا اے کہ ملکی خزانہ بھریا اے’ پریشانی دی کوئی گل نہیں۔ کدی نہیں جی۔ بس جدوں جہڑی پارٹی دی حکومت ہووے فیر ملک وچ ددھ تے شہد دی نہراں بہندیاں نیں وگرنہ اک پارٹی آندی اے بیان جاری کردی اے کہ عوام ہن تے مر ای جاوے گی نعوذ باللہ کہ پاکستان آخری ساہواں اتے چلا گیا اے۔ نال ای دوجی سیاسی پارٹی آندی اے۔ اوہ اعلان کردی اے خاکم بدہن کہ جی پاکستان دی تے فاتحہ پڑھ لوو… ایہہ جہڑا تماشا لگیا ہویا اے کوئی ایہناں سیاستداناں نوں لگام پان والا نہیں جہڑے ساڈے لوکاں وچ مایوسی تے ناامیدی بھر رہے نیں۔ صرف تے صرف اپنی انا دی تسکین لئی اپنی الیکشن کمپین لئی’ اپنی حکومت دی واری لین لئی۔ ہن تے چلو تحریک انصاف نے تن سال وچ تباہی مچا دتی ‘ ملک دا بیڑہ غرق کر دتا… تے پہلے 30ورھیاں دا کون حساب دیوے گا۔ پیپلزپارٹی تے ن لیگ اک دوجے اتے طرح طرح دے گندے گھٹیا الزام لا لا کے الیکشن کمپین کامیاب بناندے سن جدوں ایہہ پارٹیاں سیاست وچ آئیاں اک دوجے دی مخالفت دے کارن اقتدار دے مزے لٹدیاں رہیاں نیں۔ ہن سوال ایہہ ہے کہ آن والے الیکشن وچ دونویں پارٹیاں دی الیکشن کمپین لئی عمران مخالف بیان کافی ہون گے۔ ایہہ سیاستدان کدوں تک عوام نال جھوٹ بولن گے۔کدی مذہبی کارڈ استعمال کرن گے ‘ کدی لسانی یا صوبائی’ کیہ عوامی کارڈ اتے کوئی آواز نہیں بلند کرے گا۔ عوامی کارڈ توں مراد کہ سارے ملک دی عوام لئی اِکو جیا بہتر سوچن دا کارڈ ۔ کاش کوئی سیاسی پارٹی ایہہ کارڈ وی کھیڈے۔ ایس موجودہ صورتحال وچ چھوٹے وڈے بچے بڈھے ایس قدر پریشان نیں۔ سیاستداناں نے ساڈی سوچ تے سمجھ نوں یرغمال بنایا ہویا اے۔ اج دھرنا ہو رہیا اے کل جلسہ ہو رہیا اے۔ ایہہ کیہ پیغام اے باہر دے ملکاں وچ کیہ چہرہ پاکستان دا جاوے گا۔کجھ سیاسی خانداناں تے لوٹیاں نے قوم نوں ذہنی تنائو تے ذہنی امراض وچ مبتلا کر چھڈیا اے۔ کیہ اوہناں نوں ایس جھوٹ وچ عوام نوں رکھن اتے کوئی ایسا قومی ادارہ نہیں جہڑا حساب منگ کے سخت سزا دیوے۔ کیہ جھوٹ تے الزام تراشی دی سیاست توں عام عوام دی نجات ممکن نہیں۔ پاکستان دے لوکاں دا کیہ قصور اے کہ سیاسی جماعتاں دے ہر ویلے دے جھوٹ تے دوجی جماعتاں اتے الزام تراشیاں سندے جائو۔ سپریم کورٹ اوہناں دے جھوٹاں دا تے عوام نال غلط بیانی اتے ازخود نوٹس لووے تے ساڈی ایہناں جھوٹ دے پلندیاں توں جان چھڈاوے۔ عوام دے گھریلو مسئلے کھان کمان دی ذمہ واریاں تے دوجی مشکلاں کیہ گھٹ نیں جہڑی ایہناں سیاستداناں دی جھوٹ تے فراڈ نال بھری ہر ویلے دی تقرریاں وی سنیے تے اپنا دماغ خراب کرئیے۔قرضے عوام نے تے نہیں لے کے کھادے جہڑے عوام نوں سنان آ جاندے نیں کہ ہن پاکستان اتے اینا قرضہ چڑھ گیا اے۔ ہن دیوالیہ ہون لگا۔ عدلیہ تے متعلقہ ادارے ایہناں سیاستداناں کولوں پچھ گچھ کرن کہ قرضے کتھے جاندے۔ عوام لیندی اے قرضے جہڑے سانوں دسن آ جاندے نیں۔ پٹرول دا حساب لین کہ ہن کہڑی مصیبت نال عوام نے ایس 30روپے دا بوجھ چکنا اے۔ اجے وی ایہہ لوک ایہہ لوٹے بدنام زمانہ سیاستدان باز نہیں آ رہے۔ اجے وی کسے دی آڈیو ریلیز ہو رہی اے تے کسے دی ویڈیو ریلیز ہو رہی اے۔ عوام نوں بیرونی قرضیاں دے بوجھ تھلے دبا کے مہنگائی تے دو ویلے دی روٹی کماند ے چکر وچ الجھا کے شعور تے سمجھ بوجھ تے کھوہ لئی اے ہن اپنی سیاسی تسکین لئی عوام دے سامنے نویں نویں جھوٹ نہ روز لیا لیا کے غلط بیانی کیتا کرن ورنہ جے ایہہ قوم نوں ہور ذہنی تکلیفاں دین گے تے عدلیہ کولوں گزارش اے کہ ازخود نوٹس لوے تے ایہناں سیاسی لوٹیاں تے جھوٹیاں نوں سخت سزاواں دے کے ساڈی ناامیدی تے بے یقینی کولوں جان چھڈوان۔