محسن پاکستان تے ایٹم بم

اسیں ایٹمی قوت آں’ دشمن ساڈے کولوں ڈردا اے تے دنیا حیران تے پریشان سی کہ ایسا ملک جتھے غربت اپنے عروج اتے سی ‘ سیاسی عدم استحکام سی۔ اسیں لوک سوئی تک نہیں بنا سکنے ساں مگر ایٹم بم بنا دتا۔ نہ صرف ایٹم بم بلکہ ناقابل یقین زمین توں زمین تک میزائل تے جے ایف تھنڈر جنگی جہاز وی بنا لیتا مگر بدقسمتی نال اج وی اسیں بجلی’ صحت تے پانی جئی بنیادی سہولتاں توں بہت دور آں تے جہنے پاکستان نوں ایٹمی ملک بنایا اوہدا جو حشراسیں کیتا اوہ وی ساریاں دے سامنے اے۔مینوں محسن پاکستان دے نال کافی ویلا گزارن دا موقع ملیا۔ اوہناں اتے لکھن توں پہلاں میں ایٹی ملک دی تازہ دو خبراں لکھنا چاہنا واں۔ پہلی ایہہ کہ ایٹمی ملک دے سب توں وڈے صوبے دے ضلع لیہ دے نواحی علاقے ٹبہ سلطان پور دے رورل ہیلتھ سنٹر گڑھ موڑ وچ طبی عملے دی بے حسی تے غفلت پاروں حاملہ زنانی نے واش روم وچ بچے نوں جنم دے دتا۔ ویلے اتے آکسیجن نہ ملن کارن نومولود بچہ جاں بحق ہو گیا۔ ہسپتال عملے نے زنانی نوں طبی امداد دین دے بجائے اپنے کمرے دا بوہا بند کر کے ستے رہے۔دوجی خبر صوبائی دارالحکومت لہور دی اے جتھے پیو وزیراعظم تے پتر وزیراعلیٰ اے تے ایس شہر دے واسی پین والے صاف پانی نوں ترس رہے نیں۔ کئی علاقیاں وچ فلٹریشن پلانٹ بند ہون تے ن لیگ دی رکن سعدیہ تیمور نے پنجاب اسمبلی وچ قرارداد جمع کرواندے ہوئے لکھیا اے کہ ہربنس پورہ’ تاج باغ’ داروغہ والا’ شالیمار’ مغلپورہ’ گڑھی شاہو سنے لہور دے کئی علاقیاں دے فلٹریشن پلانٹ بند پئے نیں جہدی وجہ نال شہری پین دے صاف پانی دی بوند نوں ترس گئے نیں۔ پاکستان نوں ایٹمی طاقت بنے 24ورھے پورے ہو گئے۔ بھارت دے ایٹمی دھماکیاں دے جواب وچ پچھلے وزیراعظم نواز شریف دے دور حکومت وچ پاکستان نے 28مئی 1998 نوں بلوچستان دے علاقے چاغی دے مقام اتے 5 کامیاب ایٹمی دھماکے کیتے جہدے مگروں اوس دن نوں ”یوم تکبیر” دے نام نال منایا جاندا اے۔ ہاں چیتا آیا ایس دن نوں یوم تکبیر دا نام دین والا ساڈا دوست محبتی رفیق اجے تک ایس انعام دا منتظر اے جہڑا اوس ویلے دی حکومت نے نام تجویزکرن اتے دینا سی۔ ایس ایٹمی پروگرام دا خالق ڈاکٹر عبدالقدیر خان سی جہڑا ہن ساڈے وچ نہیں رہیا۔ اللہ تعالیٰ اوہناں نوں جنت الفردوس وچ اعلیٰ مقام عطا فرماوے (آمین) ڈاکٹر صاحب نے جدوں اپنی اک سیاسی جماعت تحریک تحفظ پاکستان بنائی تے مینوں اوہناں نے ایہدے وچ چار عہدے دتے۔ مرکزی ایڈیشنل سیکرٹری اطلاعات’ سیکرٹری اطلاعات پنجاب’ انچارج میڈیا سیل پنجاب تے مگروں اپنا تے پارٹی ترجمان دا عہدہ وی دے دتا۔ ایس حوالے نال میری ڈاکٹر صاحب نال قربت کافی ودھ گئی۔ الیکشن دے دناں وچ سپرمارکیٹ دے سامنے نواب کیفی نے اپنی کوٹھی ڈاکٹر صاحب نوں بطور دفتر استعمال کرن لئی دے دتی جتھے میرے دن رات گزرن لگے۔ الیکشن دی مصروفیت کارن ڈاکٹر صاحب نال تقریباً ہر روز ملاقات اوہناں دے گھر وچ ہوندی سی جتھے مختلف سیاسی رہنماواں نال ملاقات دا شیڈول بندا سی۔ اوس ویلے وی ڈاکٹر صاحب تقریباً اپنے گھر اتے نظر بندی دی زندگی گزار رہے سن۔ الیکشن وچ جتھے لوکاں نے اپنے محسن نوں ووٹ نہیں دتا اوتھے ساڈے میڈیا ہائوسز نے وی ڈاکٹر صاحب تے اوہناں دی پارٹی نوں نظرانداز کیتے رکھیا۔ آخری دناں وچ ڈاکٹر صاحب نے خود الیکشن لڑن توں معذرت کر لیتی مگر اپنے اپنے ٹکٹ ہولڈراں نوں پورا سپورٹ کیتا۔ انتخابی نشان میزائل دے نال نال ڈاکٹر عبدالقدیر خان دی تصویراں والے پوسٹر’ بینر تے جھنڈے پورے ملک وچ لائے گئے۔ لائوڈ سپیکراں دے ذریعے ڈاکٹر صاحب دا پیغام گھر گھر پہنچایا گیا مگر جدوں نتیجہ آیا تے ساڈے سارے امیدوار ہار گئے جہدے مگروں ڈاکٹر صاحب نے انتہائی دکھ تے افسوس دے نال اعلان کیتا کہ میں اپنی پارٹی ختم کرنا واں تے الیکشن کمیشن وچ درخواست دے کے پارٹی نوں ختم کر دتا۔ ایہدے مگروں جدوں وی کدی میں ڈاکٹر صاحب نوں ملن جاندا تے اسیں اکثر اوہناں دے گھر دے برآمدے وچ بیٹھ کے گلاں کردے۔ سامنے دی دیوار ٹَپ کے اندر ڈاکٹرصاحب دے پیراں وچ آ کے بیٹھ جاندے۔ ڈاکٹر صاحب اوہناں نوں مونگ پھلیاں پان دے نال نال آکھدے کہ ویسے تے لوک میرے ہتھ چمدے نیں۔ مینوں محسن پاکستان آکھدے نیں تے میں پاکستان دے غریب لوکاں لئی بہت سارے پروگرام دتے۔ ملک نوں بجلی دے بحران توں کڈن لئی ایٹمی بجلی گھر بناناچاہندا سی مگر ووٹ نہیں دتے۔ ڈاکٹر صاحب نے اپنی کتاب داستان عزم وچ لکھیا اے کہ اسیں 1984 وچ ایٹمی قوت حاصل کر لیتی سی تے میں 10دسمبر نوں اوس ویلے دے صدر جنرل ضیا الحق نوں لکھیا سی کہ جدوں تسیں آکھو گے اسیں ایٹمی دھماکے لئی بالکل تیار آں۔ پاکستان نوں ایٹمی قوت بنان وچ ذوالفقار علی بھٹو’ ضیاء الحق ‘ غلام اسحاق خان ‘ آغا شاہی’ جنرل امتیاز’ بینظیربھٹو’ میاں نواز شریف’ جنرل مرزا اسلم بیگ’ جنرل عبدالوحید کاکڑ نے نہایت کلیدی کردار ادا کیتا جد کہ پاکستان نوں ایٹمی قوت بنان وچ ذوالفقار علی بھٹو دا کردار سب توں نمایاں اے جہناں نے آکھیا سی کہ جے بھارت نے ایٹم بم بنایا تے اسیں وی بناواں گے خواہ سانوں گھاہ کھا کے ای کیوں نہ گزارا کرنا پووے۔تریخ دا ایہہ سچ اے کہ جے ذوالفقار علی بھٹو ایٹم بم بنان وچ دلچسپی نہ لیندے تے شاید اج وی اسیں ایٹمی قوت نہ ہوندے۔ ڈاکٹر صاحب اپنی کتاب وچ لکھدے نیں کہ جدوں مینوں ایٹم بم بنان دی ذمہ واری دتی گئی تے پچھلے چیئرمین انرجی کمیشن ڈاکٹر عشرت حسین عثمانی نے پچھلے وزیر خارجہ ریاض محمدخان نوں امریکہ وچ مذاق اُڈاندے ہوئے آکھیا سی کہ اک منڈا آیا اے تے قوم نوں بیوقوف بنا رہیا اے کہ مکھن بنان والی مدھانی نال ایٹم بم بنا کے دیوے گا۔ آخرکار اوسے منڈے نے پاکستان نوں ایٹمی طاقت بنا کے دنیا دے نقشے اتے ناقابل شکست ملک بنا دتا تے اسیں اوسے محسن نوں تادم مرگ نظر بند رکھیا۔ اوہ عدالت وچ وی گئے جتھے تریخ اتے تریخ دے کے اوہناں دا کیس لٹکایا گیا۔ اسیں اوہناں دی کسے تجویز اتے عمل کیتا تے نہ ای اوہناں نہ ای اوہناں نوں کسی ذمہ واری نال نوازیا۔ دشمن نے اوہناں دے گھر وچ گھس کے مارن والا بیلسٹنگ میزائل غوری دے کے پاکستان نوں ناقابل تسخیر بنان والا محسن پاکستان اپنیاں کولوں ہار گیا۔ اخیر وچ ڈاکٹر عبدالقدیر خان دا اپنا اک شعر
گذر تو خیر گئی ہے تیری حیات قدیر
ستم ظریف مگر کوفیوں میں گذری