اج تے کل…ریڈیو تے پی ٹی وی

آپ اپنے خوف سے ہے سہما سہما آدمی
اک ہجوم بے کراں ہے اور تنہا آدمی
زندگی سے موت تک کا اک سفر ہے سامنے
اور سوچوں میں ہے بیٹھا ایک الجھا آدمی
کجھ انج دی ای صورتحال’ منظر کھل نہیں رہیا کجھ نہ کجھ بدلدا رہوے تے زندگی چلدی رہندی اے۔ ایس زمین توں اسمان تک سورج دا راج اے۔ ایہ وکھری گل اے کہ ٹی اس ایلیٹ دے بقول آدمی خالی برتن کی طرح’ جو بجتا بہت ہے’ ایہ جو ہالومین اے ایہ صرف علم و ہنر توں خالی نہیں ہویا سگوں عام اقدار تے روایات نال وی ہٹ چکیا اے۔ جدوں اوہنے اپنے آپ نوں دریافت کیتا اے تے اوہ اپنے آپ توں ڈرن لگ پیا اصل وچ اوہنے اپنے آپ نوں روشنی وچ تلاش نہیں کیتا اپنے حواس نوں تے سوچ دی بس اک حد اے۔ انسان تہذیب تے ثقافت توں اگے نکل گیا اے حالات و واقعات نے اوہنوں جگان دی تھاں غفلت وچ پا دتا اے۔ اوہدی خودی تے خودداری جاگنی چاہیدی سی اوہدی خودغرضی تے لالچ نے اوہنوں اپنے حصار وچ لے لیا اے سب توں پہلی چیز جو اوہدے توں وکھ ہوئی اے اوہدا اخلاص سی۔ دوجیاں لئی جینا یاں دوجیاں دے غم لے لینا۔ اوہدے توں ایثار وی رخصت ہو گیا۔ نویں تہذیب نے اک امریکن سسٹم متعارف کروا دتا کہ اپنا حصہ پائو یاں اپنے اپنے تک محدود رہو۔ ظاہر اوہدے توں لوک سوسائٹی وچ رہندے ہوئے وی اکلے ہو گئے۔ اوہی کہ یہ نئے زمانے کے لوگ ہیں ذرا فاصلے سے ملا کرو۔ ظاہر اے اک لاتعلقی وی آ گئی اوہی جو بشیربدر نے کہیا سی:
کوئی ہاتھ بھی نہ ملائے گا
جو گلے ملو گے تپاک سے
یہ نئے مزاج کا شہر ہے
ذرا فاصلے سے ملا کرو
اسیں تے خیر اوتھوں تک اپڑ گئے کہ جتھے خاموشی توں علاوہ کوئی چارا نہیں۔ بس ایس طرح سمجھو کہ جیویں کوئی ناقابل اصلاح ہو جاوے کمال دا شعر پروین شاکر نے کہیا:
یہ دکھ نہیں کہ اندھیروں سے صلح کی ہم نے
ملال یہ ہے کہ اب صبح کی طلب بھی نہیں
ایس تمہید دے بعد آنا واں اوس گل ول جو میں کرنا چاہندا سی پہلے اک شعر منظربھوپالی دا ضرور پڑھ لوو کہ ہم تو پھول جیسے تھے آگ سا بنا ڈالا’ ہم کو اس زمانے نے کیا سے کیا بنا ڈالا۔ اصل وچ میں حدیقہ کیانی دے حوالے نال پڑھ رہیا سی کہ اوہدی فوٹو نیویارک ٹائمز سکوائر تے لائی گئی اے۔ بہرحال ایس خبر پاروں مینوں پی ٹی وی دے شب و روز یاد آ گئے بھاگ پیچھے کی طرف اے گردش ایام تو۔ کیہ سہانے زمانے سن جدوں پی ٹی وی وچ ہوندا سی تے اسیں سارا دن اوتھے ہوندے پروگرام لکھدے تے گیت پروڈیوسر ذوالفقار فرخ نے ساڈا اک گیت حدیقہ کیانی توں گوایا اوہ طالب علم سی اوہدی ماں پرنسپل سن۔ میں تہانوں دس چکیا واں کہ پی ٹی وی وچ بہت زیادہ رونق ہوندی سی اک آ رہیا اے تے اک جا رہیا اے کدھرے ریہرسل ہو رہی اے تے کدھرے ریکارڈنگ۔ ایہ غالباً 1992ء دی گل اے شور ہویا کہ اک پروگرام لہور سنٹر نوں ملیا’ آنگن آنگن تارے آغا ذوالفقار جان پروڈیوسر سن علی اکبر عباس سکرپٹ ایڈیٹر سارے ٹیم دی صورت کم کر رہے سن۔ مسئلہ ایہ پیدا ہویا کہ ایس پروگرام دا ٹائٹل سانگ کون لکھے گا لکھنا وی فوراً سی اسیں اوہناں دے قابو آ گئے اوہناں دوہاں نے مینوں ایوب خاور صاحب دے کمرے وچ بند کر دتا کہ گیت دا مکھڑا لکھو گے تے باہر نکلو گے۔ ساڈے وچ بڑی مان دی دوستی سی تے کم دے نال لگن مختصراً کہ میں مکھڑا لکھ دتا:
ہم ہیں پھولوں جیسے بچے
ہم ہیں سب کو پیارے
اپنے دم سے گھر ہے روشن
ہم ہیں آنگن تارے
آنگن آنگن تارے
ساریاں وچ خوشی پھیل گئی۔ امجد بوبی مرحوم نے ایہدی دھن بنائی تے ارم حسن دا ایہ پہلا گیت سی جو اوہنے ریکارڈ کروایا ایہو گیت فیر حدیقہ کیانی نے گایا تے فیر خلیل صاحب دے میوزک تے حمیراچنا نے گایا۔ بہرحال چار پنج ورھے تک میرا لکھیا ہویا ایہ ٹائٹل سانگ ای چلدا رہیا شاید ایہدے بعد وی جدوں تک گانے والے بچے وڈے نہیں ہو گئے۔ اوہ دور سی جدوں فنکاراں وچ مسابقت سی خاص گل کہ ایہ اودوں پروڈیوسر واہوا پڑھے لکھے ہوندے سن۔ ریڈیو وچ ایس توں وی زیادہ توجہ دتی جاندی سی۔ تسیں اندازا کرو کہ ریڈیو وچ نسرین انجم بھٹی تے شائستہ حبیب ورگیاں دانشور سن ایہ لوک تلفظ تے دھیان دیندے تربیت دا باقاعدہ اک نظام سی۔ خاص طور تے مشاعریاں لئی بڑے چنگے چنگے شاعر آندے۔ ان گنت یاداں نیں صرف اک دا تذکرہ کراں گا۔ ساڈے شجیع صاحب ڈائریکٹر ہوندے سن اوہناں نے مینوں کہیا کہ تسیں جے سیف الدین سیف نوں قائل کر لوو تے اوہناں دا انٹرویو کیتا جاوے۔ میں سیف الدین سیف دے کول گیا میرا اوہناں کول آنا جانا کافی زیادہ سی میں جدوں اوہناں نوں مدعا بیان کیتا تے اوہ مسکرائے تے بولے شاہ صاحب تہاڈا کیہ خیال اے کہ پچھلے اٹھاراں ورھیاں وچ مینوں کسے پروڈیوسر نے انٹرویو لئی نہیں کہیا ہووے گا؟ میں سمجھ گیا میں کہیا یقینا بہت سارے پروڈیوسر آئے ہون گے پر میں خواہش لے کے آیا واں چلو جے میں تہانوں قائل کر لواں تے تسیں انٹرویو دیو گے قہقہ لا کے کہن لگے اچھا تے تسیں مینوں قائل کرو گے مختصراً ایہ کہ میں اوہناں نوں کہیا کہ ساڈی نسل دا کیہ قصور کہ تسیں سانوں اپنے تعارف توں محروم رکھو گے اوہناں نے کجھ لمحے سوچیا تے فیر کہیا ٹھیک اے میں انٹرویو دیواں گا۔ میں پروگرام دا میزبن سی شاہدلطیف پروڈیوسر انٹرویو کرن والیاں وچ شہزاداحمد’ کلیم عثمانی تے ڈاکٹر سلیم اختر شامل سن۔ عبدالرب شجیع صاحب دی خوش دیدنی سی ایہ ایہ انٹرویو دو گھنٹے تے محیط سی بہت ساریاں گلاں نیں کئی کالم چاہیدے نیں سیف صاحب دا اک شعر:
ہم کو تو گردش حالات پہ رونا آیا
رونے والے تجھے کس بات پر رونا آیا