کوک سٹوڈیو دی پسوڑی

کوک سٹوڈیو اک اجہیا موسیقی دا پروگرام اے جتھے موسیقی نوں نویکلے ڈھنگ نال ریکارڈکیتاجاندااے ایس رِیت نوں لوکائی ولوں سراہیاجاندااے ایہوکارن اے کہ پچھلے دِنیں اک گانا پسوڑی ریکارڈکیتا گیا جہنے سپوٹی فائی دی ٹاپ 50 گانیاں دی عالمی لِسٹ وچ اپنی تھاں بنائی اے عالمی پدھرتے ایس گانے نوں بہت زیادہ سنیا جارہیااے۔ کوک سٹوڈیودی تاریخ کوئی بوہت پرانی نہیں نویں مِلینیم توں بعد ایس پروگرام نوں برازیل توں شروع کیتا گیا جہنوں ملٹی نیشنل کمپنی کوکاکولادی مارکیٹنگ ٹیم داشاندارآئیڈیا خیال کیتاجاندااے کیوں جے ایہدے راہیں کمپنی دی برانڈنگ اتے مارکیٹنگ ہوئی تے کمپنی دی وِکری وچ بڑھوتری وی ویکھی گئی تے اگلے ہی سال 2008 وچ پاکستان اندرروحیل حیات ورگے پروڈیوسرنے اپنے جادوئی فن داوکھالاکیتا تے پاکستانی ورژن دے کوک سٹوڈیونے عالمی سطح تے اپنی ہوندثابت کیتی۔ کوک سٹوڈیودے تقریباً ہرپروگرام وچ پنجابی موسیقی نوں اچی تھاں ملی اوہدے کئی وڈے کارن نیں جہناں وچوں اک وڈا کارن پنجابی موسیقی اے جہڑی اپنے اندرکھِچ رکھدی اے تے ایہدے سنن والے دنیاوچ کروڑاں توں وی ودھ نیں معاشی طورتے ایہ اک نفع دا سودا اے جتھے گانا ریلیزہون توں کجھ ہی چِرمگروں ایہداوائرل ہوجانا کوئی ان ہونی گل نہیں ہوندی جے اسیںموسیقی دی تاریخ ول جھات پائیے تاں پنجابی اندربوہت زیادا کم ہویا کلاسیک شاعری ہوئی کئی پنجابی شاعراں نوں نویں راگ بناون دا سہراوی جاندا اے ایہووجہ اے کہ کئی گلوکارایہناںکلاسیک شاعراں دے گیت گاونڑتوں عالمی شہرت وی پا چکے نیں ربی شیرگِل نے بلھے دا کلام “کیہہ جانا ;میں کون” گا کہ عالمی پدھراتے دھماں پائیاں ایہ لسٹ بوہت لمبی اے
ہالینڈ دی مشہورسِنگرایما واٹسن نیوی ،،پسوڑی،، گا کہ میلا لٹیا ایس گانے دے تخلیق کار علی سیٹھی تے شے گِل نوں عالمی پہچان ملی دنیا دے ہروڈے اخبار وچ ایس گانے بارے لکھیا جاچکیا اے گارڈینز، بی بی سی، نیویارک ٹائمزتے ہندوستان ٹائمز ورگے میڈیا ہائوس وی لکھ چکے نیں پنجابی موسیقی داکھِلاربہت زیادا اے پنجابی زبان نوںبولن تے سمجھن والے دنیا وچ وڈی گنتری وچ نیں پاکستانی کوک سٹوڈیو اپنے نویکلے پن توں جنوبی ایشیا دامشہورپروگرام بن چکیا اے۔ کجھ لوکاں داخیال اے کہ ایس پروگرام راہیں علاقائی ثقافت تے موسیقی نوں اگے ودھن دا موقع ملیا تے ہن کئی فنکارانجانونہیں رہے۔ جتھے لوک موسیقی نوں نویں ڈھنگ نال پیش کیتا گیا ایس کوک سٹوڈیو دی چودھویں سیزن دی کامیابی داسہرا پروڈیوسرزلفی نوں جاندا اے جہنے بلوچ گانا “کنایاری” دونوجواناںکڑی ، منڈے کولوں مقامی تے بلوچ وہاب بگٹی کولوں گوایا تے اج ایہ بلوچی گانا پاپ اتے مقامی محفلاں وچ سنیا جارہیا اے ایہدے وچ اِیوا بی نے ریپ(موسیقی دی اک صنف)کیتا تے اک انٹرویوراہیں پتہ چلیا کہ اوہناں دا ناں اِیوا ۔۔۔ایس دنیا اندرپہلی عورت حوا دے ناں اتے اے تے بی اوہناں دی بلوچ شناخت اے۔ ایسے طراں شے گِل اک عام پڑھیارسی جہڑی شغل وچ اپنے گانے انسٹاتے چاڑھدی سی تے اج دنیا اندر اپنی پہچان رکھ دی اے۔
کوک سٹوڈیو نے پنجابی، پشتو، بلوچی اتے سندھی تے ہورعلاقائی زباناں دی لوک موسیقی نوں نویں نسل تک اپڑایا ہندوستان دے موسیقی دے وڈے ناں ایس پروگرام دی تعریف کردے نہیں تھکدے پنجاب دی کلاسیک شاعری نوں جدیدیت راہیں اگے ودھایا جاسکدا اے کیوں جے تبدیلی اِک اٹل حقیقت اے تے اوہی نسلاں ، زباناں زندارہندیاں نیں جہڑیاں زمانے دے نال جڑت رکھ کے اگے ودھدیاں نیں۔ آرٹ ہمیشا توں نفرتاں مکاوندا تے بھائی چارے داکارن بندا رہیا اے تے اج پاکستان ہندوستان وچ تنائو ہون دے باوجود پسوڑی گانا پل داکم کررہیا اے کیوں جے تسی فنکاراں دے آون جاون تے پابندیاں لاسکدے او پرفن تے پابندی لاونی ممکن نہیں ایسے لئی ہندوستان اندرنصرت فتح علی خان، غلام علی، عاطف اسلم ، راحت فتح علی اپنے فن پاروں موجود نیں تے ساڈے ایتھے اے آررحمان دے چاہون والے موجودنیں جے سرکاراں چاہون تاں فن راہیں امن وسلامتی لیائی جاسکدی اے کیوں جے ایسے راستے توں چل کہ غربت مکائی جاسکدی اے جنگی ماحول نوں گھٹ کرکے انساناں تے سرمایہ کاری کیتی جاوے تاں برصغیرپاک وہند دی ترقی مثالی ہوسکدی اے ایہدے لئی لگن تے خلوص دی لوڑ اے۔پاکستان دی دھرتی نے اجہے موسیقارتے فنکارجمے نیں جہناں پوری دنیا وچ پاکستان داناں اچاکیتا تے اج لوڑ اے کہ اسیں فنکاراں لئی اجہیاماحول بنائیے جتھے اوہ اپنے تخلیقی کم کرسکن تے سماج دی ترقی وچ اپنی رلت کرن۔٭٭