سندھ دا مقدمہ

اوس زمانے وچ ایہ بہت وڈی رقم سی۔ میرپور خاص ضلع سندھڑی امب لئی وی مشہور اے۔ ایہ گل مشہور اے کہ میرپور خاص امباں دا مرکز اے۔ بھاویں آل دوالے دے دوجے علاقیاں وچ وی امب پیدا ہوندے نیں پر مرکزی حیثیت میرپور خاص نوں ای حاصل اے۔ صرف میرپور خاص وچ امب دیاں 36قسماں ملدیاں نیں۔ پاکستان وچ امب دے موسم وچ سب توں پہلاں سندھڑی امب ای آندا اے باقی امب بعد وچ آندے نیں۔
عمرکوٹ وچ پیدا ہون والے مغل بادشاہ اکبراعظم دی ماں حمیدہ بانو سندھی راجپوت سن۔ سندھ دے راجپوت گھرانے نال تعلق رکھن والی حمیدہ بانو ضلع دادو دے قصبے پاٹ دی رہن والی سی۔ پہلے جہڑی داستان مومل تے رانودی بیان کیتی اے ایس عشقیہ داستان دا انجام دردناک ہویا کیوں جے مومل تے رانو دوویں سڑ کے مٹی ہو گئے سن۔ عمرکوٹ صرف انساناں دے ملاپ دا کارن ای نہیں بنیا سگوں ایہنے علاقیاں نوں وی ملوایا۔ کھوکھرا پار والی ریلوے لائن عمرکوٹ توں ای لنگھ کے جاندی اے۔
سابق وزیراعلیٰ سندھ سید مظفرحسین شاہ دا تعلق عمرکوٹ ضلع نال اے۔ ایس طرح سید سردار علی شاہ توں علاوہ نواب یوسف تالپور تے تیمور تالپور دا تعلق وی ایتھوں نال اے۔ عمرکوٹ دے حوالے نال اک ہور تذکرہ کردا جاواں کہ اسلامی دنیا دے سائبر سکیورٹی تے ڈیجیٹل فورینزکس دے پہلے پی ایچ ڈی ڈاکٹر دا تعلق عمرکوٹ نال اے۔ جی ہاں! ڈاکٹر فاتح الدین اسلامی دنیا دے پہلے بندے نیں جہناں نے سائبر سکیورٹی تے ڈیجیٹل فورینزکس وچ پی ایچ ڈی کیتی۔ ڈاکٹر فاتح ایف آئی اے دے سائبر کرائمز ڈویژن دے بانیاں وچوں نیں۔ اوہناں نے سائبر کرائمز ڈویژن ایف آئی اے چیف دے طور تے خدمات نبھائیاں۔ ایہ قابل فخر پاکستانی اج وی عالمی سطح تے قنون لاگو کرن والے اداریاں’ بینکاں’ مالیاتی اداریاں تے حساس اداریاں نوں خدمات دے رہیا اے۔ آئی ٹی دنیا تے دھاک بٹھا چکی اے تے اجہے وچ پاکستانی ادارے اپنے ایس سپوت توں بہت سارا کم لے سکدے نیں کیوں جے دنیا ایس توں کم لے رہی اے۔ اسیں اپنے ٹیلی فون’ واٹس ایپ تے ایسے طرح دیاں دوجیاں چیزاں نوں دنیا توں محفوظ رکھ سکنے آں تاں جے ساڈا دشمن ساڈیاں چیزاں تک رسائی حاصل نہ کر سکے۔
ہن اسیں گل کرنے آں ضلع تھرپارکر دی۔ واضح رہوے کہ اک زمانے وچ میرپور خاص تے عمرکوٹ دے ضلعے تھرپارکر دا حصہ سن۔ ایہ دوویں ضلعے تھرپارکر وچوں نکلے نیں۔ ایس ویلے جو ضلع تھرپارکر اے اوہدے مشرق وچ بھارتی ضلعے بارمیر تے جیسل میر نیں۔ مغرب وچ ضلع بدین تے جنوب وچ رن کچھ دا متنازعہ علاقہ اے جد کہ شمال وچ میرپورخاص تے عمرکوٹ دے ضلعے نیں۔ ضلع تھرپارکر دا صدر مقام مٹھی اے۔ ایس ضلعے دیاں ست تحصیلاں یعنی تعلقے نیں ایہناں وچ ڈیپلو’ چھاچھرو’ مٹھی’ ننگرپار’ کلوئی’ ڈھلی تے اسلام کوٹ شامل نیں۔ ضلع تھرپارکر دا کجھ علاقہ صحرائے تھر تے مشتمل اے۔ ایس ضلعے دے جنوب وچ رن کچھ دے دلدلی علاقے تے نمکین جھیلاں نیں کراچی توں بھارت جان والی ریلوے لائن ایتھوں لنگھدی ہوئی بذریعہ کھوکھراپار مونابائو جاندی اے۔
ریکارڈ دے مطابق تھرپارکر 1882 توں ضلع چلیا آ رہیا اے۔ 1906 تک ایہدا ضلعی ہیڈکوارٹرعمرکوٹ سی۔ 1906 وچ میرپور خاص نوں ضلعی ہیڈکوارٹر بنا دتا گیا جد کہ ہن دو تن عشریاں توں تھرپارکر دا ضلعی ہیڈکوارٹر مٹھی اے۔ مٹھی ای پورے ضلعے دا سب توں وڈا شہر اے۔ تحصیل مٹھی وچ سترفیصد ہندو آبادی اے۔ انج پورے ضلع تھرپارکر وچ 64فیصد ہندو تے 36فیصد مسلم آبادی اے۔ پنڈاں وچ 58فیصد مسلمان تے 42فیصد ہندو آباد نیں جے ضلع دیاں تحصیلاں تے غور کیتا جاوے تے پتہ لگا کہ مٹھی’ اسلام کوٹ تے ننگرپارکر تناں تحصیلاں وچ ہندو اکثریت وچ نیں۔ باقی چار تحصیلاں یعنی تعلقیاں ڈھلی’ ڈیپلو’ چھاچھرو تے کلوئی وچ مسلمان اکثریت وچ نیں۔ کراچی تو ںاسلام کوٹ تک شاندار سڑک اے میڈیا عام طور تے ایہدے خلاف منظرکشی کردا اے۔ مٹھی وچ بچیاں دی صورتحال تے وی ٹھیک تصویر نہیں دکھائی جاندی سگوں بہت ساریاں سماجی تنظیماں نے تھر’ تھر کھیڈ کے خوب مال بنایا اے۔
ہن حکومت سندھ نے جدوں ایہناں این جی اوز دے آڈٹ دا کہیا اے تے پراپیگنڈا شروع کر دتا گیا۔ کجھ این جی اوز چنگا کم وی کر رہیاں نیں اوہناں وچ الخدمت اے’ تھرڈیپ’ ہینڈز تے تھرڈویلپمنٹ ایسوسی ایشن اے۔ حکومت نے ایتھے پین دا صاف پانی دین لئی پلانٹس لائے نیں۔ ایس علاقے وچ شاندار ہسپتال وی بنائے گئے نیں۔ اسلام کوٹ وچ وی پین دے صاف پانی دا پلانٹ اے۔ حکومت سندھ نے ایس پورے ضلعے وچ باراں سو پلانٹس لائے تاں جے لوکاں نوں پین دا صاف پانی مل سکے۔ سٹیزن فائونڈیشن سکول اسلام کوٹ دا بڑا چرچا اے۔ انج پورے ضلعے وچ ٹیکنیکل کالج تے یونیورسٹی دا کیمپس وی بن چکیا اے۔ تھر وچ امن و امان دی صورتحال بڑی ودھیا اے۔ ایہدا اندازہ تسیں ایس گل توں لا سکدے او کہ پورے ضلع تھرپارکر وچ پچھلے 22 ورھیاں وچ صرف باراں مقدمے درج ہوئے نیں۔ ایہناں مقدمیاں وچ قتل دا اک مقدمہ اے۔ تحقیق کیتی گئی تے پتہ لگا کہ قاتل دا تعلق تھرپارکر نال نہیں سی سگوں اوہ ٹنڈومحمدخان توں آیا ہویا بندہ سی۔ ایتھے چوری نہیں ہوندی’ تھر وچ تقریباً 75لکھ جانور نیں۔ زیادہ بکریاں نیں جو بائی لکھ نیں’ باراں لکھ بھیڈاں نیں’ گاواں تے مجھاں وی نیں۔ ہٹھ پاکستان وچ سب توں ودھ تھر وچ پائے جاندے نیں۔ تقریباً دو لکھ ہٹھ ضلع وچ نیں۔ تھر دے ہر گھر وچ اوسطاً اٹھ جانور نیں کیوں جے ایتھوں دی معیشت مال مویشی تے مشتمل اے۔ (جاری اے)