کلیاتِ حفیظ تائب (حمدو نعت)

کون ہووے گا جہڑا حفیظ تائب دی نعت دے حوالے نال خدمات توں واقف نہ ہووے۔ اوہناں دا مقام نعت پڑھن والیاں وچ انتہائی منفرد اے۔ کلیات حفیظ تائب دی اشاعت ایس مناسبت نال اک وڈا کارنامہ اے جہدے تے حفیظ تائب فائونڈیشن مبارکباد دی مستحق اے۔ منے پرمنے ادیب تے شاعر ڈاکٹر خورشید رضوی نے تقدیم دے نام نال کتاب دا تفصیلی دیباچہ تحریر کیتااے۔ ایہدے وچ اوہ لکھدے نیں۔
ساڈے معاصرین وچ جناب حفیظ تائب نوں عرصہ نعت دا نمایاں ترین شہسوار تسلیم کیتا گیا اے۔ اوہناں نے گویا رفتگاں دی روایت توں اپنا سلسلہ متصل کرن لئی نعت گوئی دے بعض اساطین دا ذکر اپنی اک دعائیہ نظم وچ انج کیتا اے:
یا رب ثنا میں کعب کی دلکش ادا ملے
فتنوں کی دوپہر میں سکوں کی ردا ملے
جناب تائب دی دعا قبولیت نال سرفراز ہوئی۔ اوہناں دی زندگی اسے کاروان شوق دی پیروی وچ بسر ہوئی تے بالآخر اوہ اوہدے نال جا ملے۔ تائب صاحب نے شاعری دا آغاز غزل گوئی نال کیتا تے ایس کوچے وچ وی بہت جما کے پیر رکھیا۔ اوہناں دا مجموعہ غزل یا تنسیب ایس رہگزر اتے اوہناں دے نقوش قدم دا امین اے۔ تاہم اوہناں دے ہاں محمل غزل وچ وی سلمائے نعت دی جھلک جابجا برق پس ابر وانگوں کوند کوند جاندی سی۔ خشبو ردیف دی اک غزل دا مقطع ملاحظہ ہووے:
میں نہ کیوں اس پہ جان دوں تائب
جب نبیۖ کو پسند تھی خوشبو
آہستہ آہستہ نسیب تے تشبیب دی ایہہ تمہید ختم ہوئی تے اوہ اپنے قصیدہ حیات دے اصل موضوع یعنی نعت اتے آ گئے تے فیر اوہدے اتے مرتکز ہو کے زندگی تمام کر دتی۔
بس اب ارادہ نہیں کہیں کا
کہ رہنے والا ہوں میں یہیں کا
اوہناں دا پہلا مجموعہ نعت صلو علیہ وآلہ 1978 وچ منظر عام اتے آیا تے اوس ویلے تک نعت گوئی وچ اوہناں دا کمال مسلم ہو چکیا سی۔ چنانچہ اوہدے آغاز وچ تجزیہ دے عنوان نال استاذ الاساتذہ ڈاکٹر سید عبداللہ صاحب دا جہڑا پیش لفظ شامل اے’ اوہدے وچ ڈاکٹر صاحب فرماندے نیں:
ایسے گلشن دا اک بلبل خوش نوا حفیظ تائب اے جہدی نعت ہن زمانے تے اپنا نقش قائم کر چکی اے لہٰذا تعریف تے تعارف دی کوئی سعی اوہدے کمال فن دی تنقیص دے برابر ہووے گی۔
صلو علیہ وآلہ دی نعتاں وچ اوہ سارا فنی سلیقہ صرف ہوندا نظر آندا اے جہڑا جناب حفیظ تائب نے دور غزل گوئی وچ حاصل کیتا سی۔ کتاب دا پہلا قصیدہ آیہ نور خاصے دی چیز اے جہڑا مولانا حالی دے قصیدہ نعتیہ دی زمین وچ اے’ جہدا مطلع اے۔
میں بھی ہوں حسن طبع پر مغرور
مجھ سے اٹھیں گے ان کے ناز ضرور
تائب صاحب دے ہاں گوناگوں مضامین نعت وچ استغاثہ تے فریاد بحضور سید الکونینۖ دا جہڑا رنگ جابجا ابھردا اے اوہ وی اوہناں دی تے مولانا حالی دی مماثلت دا احساس دواندا اے کہ حالی نے:
اے خاصہِ خاصانِ رسل وقتِ دعا ہے
نال جہڑی روش کڈی سی اوہو تائب صاحب دے ہاں نوبہ نو پیکراختیارکردی اے مثلاً ویکھو اوہناں دی نظم پھر اٹھا ہاتھ بہر دعا یانبیۖ جہدے وچ مسدس تے عرض حال دا عکس معنوی جھلکدا وکھائی دیندا اے ۔ تائب صاحب دی اک پنجابی نعت دے مقطع وچ ‘قصد اًیا اتفاقاًتوریہ تے ابہام دے رنگ وچ لفظ حال کیہ خوب اوہناں دے نام دے متصل آیا اے۔
حالی تائب ہور کجھ دن صبر کر
ہور گوہڑا ہون دے چاہت دا رنگ
تائب صاحب دی طبیعت وچ علمی دیانت’ روایت دی صحت تے بیان دی ذمہ داری دی فکر روز بروز ودھدی چلی گئی۔ نعت نوں بیش از بیش علمی پس منظر مہیا کرن لئی اوہناں نے عمیق نظر نال قرآن’ حدیث تے سیرت پاک دا وسیع مطالعہ کیتا تے حاصل مطالعہ نوں اپنے فن وچ سمویا۔ اوہناں دے مجموعہ نعت وہی یٰسین وہی ہو طٰہٰ دا آغاز ایس حمدباری تعالیٰ نال ہوندا اے:
تو خالق ہے ہر شے کا، یا حی یا قیوم
ہر پل تیرا رنگ نیا، یا حی یا قیوم
ڈاکٹر خورشید رضوی اگے چل کے ہور لکھدے نیں تائب صاحب دے نعتیہ کلام دے چند در چند خصائص وچ اک نمایاں خصوصیت ایہہ ہے کہ اوہناں نے نعت نوں بار بار دے دہرائے ہوئے مضموناں توں کڈ کے اوہدے عمق’ وسعت تے تنوع وچ وادھا کیتا۔ جناب احمد ندیم قاسمی نے تائب صاحب دے ایس امتیاز ول اوہناں لفظاں وچ اشارہ کیتا اے: حفیظ تائب نے صنف نعت اتے بعینہ اوہو احسان کیتا اے’ جہڑا غالب’ اقبال تے اج دے بعض نمایاں شاعراں نے غزل اتے کیتا اے۔
ڈاکٹر خورشید رضوی اختتام اتے لکھدے نیں کہ حفیظ تائب فائونڈیشن دے چیئرمین جناب مجید منہاس جہناں نوں اپنے برادر مرحوم نال عشق اے’ ساڈے شکریے دے مستحق نیں کہ اوہناں دی توجہ نال فائونڈیشن دے پربندھ ہیٹھ جناب تائب دا تمام اردو تے پنجابی نعتیہ کلام شائع ہو کے سامنے آیا۔ ایس اشاعت وچ غیر مدون دے عنوان نال تائب صاحب دی 38 ایسی منظومات دا قابل قدر ضمیمہ وی شامل اے جہڑا ایس توں پہلاں کسے مجموعے وچ درج نہیں یا علالت دے آخری دناں وچ وارد ہوئیاں تے ہنوز غیر مطبوعہ نیں۔
کلیات حفیظ تائب دے بیک ٹائٹل اتے اوہناں دی ایہہ شاندار نعت پڑھن نوں ملدی اے۔
شوق و نیاز و عجز کے سانچے میں ڈھل کے آ
یہ کوچہ حبیبۖ ہے پلکوں سے چل کے آ