کمزور بنیاد تے بنی عمارت

کیرزما دا طلسم صرف کھیڈ تے کھڈاریاں تے فن تے فنکاریاں تک محدود نہیں ہوندا۔ امریکی ادب دے بے مثال افسانہ نگار تے ناولسٹ ارنیسٹ ہیمنگوے نوں انتظامیہ ولوں ہدایتاں دتیاں گئیاں سن کہ اوہ اپنے سفری پروگرام نوں حتمی الامکان مخفی رکھن۔ ہیمنگوے جدوں وی سفر کردے سن لوک دیوانہ وار اوہناں نوں گھیر لیندے سن۔ اوہناں نوں ویکھن’ اوہناں نوں ملن’ اوہناں توں آٹوگراف لین لئی اینی وڈی گنتی وچ اکٹھے ہو جاندے کہ ایئرپورٹس’ ریلوے اسٹیشنز’ ٹرمینلز’ شاپنگ مالز دے اپنے ٹائمنگز تے معاملے ابتر ہو جاندے سن۔ اپنے ہاں’ میں احمدفراز تے عابدہ پروین دا کیرزما ویکھیا اے۔ انج دی کشش کہ لوک جوق در جوق اوہناں دے کول کھچے چلے آندے سن۔ ایہ کوئی اچنبھے دی گل نہیں۔ ہر شعبے وچ کیرزماتی لوک ہوندے نیں۔ لوک اوہناں نوں بڑا پسند کردے نیں۔ اوہناں ول کھچے چلے آندے نیں۔ کیرزما خدادا شے اے۔ اوہدا تہاڈی کارکردگی یعنی پرفارمنس تے انحصار نہیں ہوندا’ تہاڈی کارکردگی تہاڈے کیرزما دا اک جز تے ہو سکدی اے پر مکمل طور تے تہاڈے کیرزما دا کارن نہیں ہوندی۔
عمران خان جدوں دوجے دس کھڈاریاں دے نال اک ٹیم وچ کھیڈدے سن اودوں ایسے دور وچ’ جہانگیر ترین خان اکلے سکواش کھیڈ دے بے تاج بادشاہ سمجھے جاندے سن۔ عمران خان 1992ء دا ورلڈکپ جتے سن۔ اوہ عمران خان دے اکلے دا کارنامہ نہیں سی۔ اوہ ٹیم دے یاراں کھڈاریاں دا کارنامہ سی۔ جے میں یادداشت دے ہتھوں دھوکھا نہیں کھا رہیا مینوں یاد پیندا اے کہ جہانگیرخان ویہہ واری ورلڈ چیمپن شپ جتے سن اوہ وی اکلے۔ اکلے سر’ وائے قسمت! کیرزما دا ہما عمران خان دی قسمت وچ لکھیا سی۔ ویہہ بائی ورھے ورلڈچیمپن رہنا مذاق’ یاں اتفاق دی گل نہیں۔ کرکٹ دس یاں باراں تیراں ملکاں دا کھیڈ اے۔ سکوائش دنیا دے پنجاہ توں ودھ ملکاں وچ کھیڈی جاندی اے۔ 20 واری دنیا دے چیمپئن جہانگیرخان گھروں نکلدے تے جذباتی تے جنونی چاہن والیاں دے بے قابو ہجوم دے نرغے وچ نہیں سن آندے۔ ٹریفک جام نہیں سی ہوندا دور توں لوک اوہناں نو ںایئرپورٹ تے شاپنگ مالز وچ ویکھدے سن تے ودھ توں ودھ ہتھ ہلا دیندے سن۔ دیوانہ وار اوہناں تے اپنی چاہت دا ہلا نہیں سن بولدے۔
جہانگیر خان بے مثال عزت’ احترام تے شہرت دے مالک سن۔ جے کدی سارے کھیڈ تے کھڈاریاں نوں ملا کے پاکستان دی تریخ وچ اک اعلیٰ کھڈاری دی نشاندہی کیتی جاوے تے جہانگیر خان توں وڈا معتبر تے غیرمعمولی کھڈاری پوری تریخ وچ ہور کوئی وکھائی نہیں دیندا۔ پر کیرزما کجھ ہور اے۔ کیرزما دے حامل کھڈاری دا خوبرو ہون نال کوئی واسطہ نہیں۔ فضل محمود توں ودھ خوبرو تے خوش رو کھڈاری اسیں اج تک نہیں ویکھیا۔ اوہناں دی شخصیت تے انفرادیت ویکھ کے لوک دنگ رہ جاندے سن۔ کیرزما دا انحصار تہاڈی شخصیت تے خوبرو ہون تے نہیں۔ ایس لحاظ نال عمران خان اپنے کزن ماجدخان توں چنگے کھڈاری تے ہینڈسم وجیہہ نہیں سن تے نہ ہن تک نیں’ عمران خان اپنی بول چال وچ ماجدخان ورگے باوقار وکھائی نہیں دیندے۔ پر کیہ کریئے کہ کیرزما عمران خان دے حصے وچ آیا’ ماجدخان دے حصے وچ نہیں۔
ساڈے ساریاں وچ مثبت تے منفی رویے ہوندے نیں۔ اک قابل’ لائق تے ذہین بندے دی پچھان ایہ ہوندی اے کہ اوہ اپنے منفی رویاں نوں اپنے مثبت رویاں تے حاوی نہیں ہون دیندا۔ ایہ اعلیٰ بندے دا وصف ہوندا اے۔ کیرزما دا طلسم جے کسے دے سر چڑھ کے بولن لگے’ تے فیر اجیہا بندہ آپے وچ نہیں رہندا۔ اوہ اپنے منفی تے مثبت رویاں وچ توازن نہیں رکھ سکدا۔ ویکھدیاں ای ویکھدیاں اوہ بندہ گھمنڈی’ خودسر’ مغرور’ خودپرست تے اپنے آپ نوں اعلیٰ تے دوجے لوکاں نوں نیواں سمجھن لگ پیندا اے تے فیر اوہ بندہ اپنے واسطے’ اپنی ذات واسطے تے اپنے فدائیاں لئی مصیبت دا کارن بن جاندا اے۔ عزت تے شہرت نوں منصبی ذمہ داری سمجھن دی تھاں اوہنوں ذاتی تے سطحی مفادات حاصل کرن لئی استعمال کردا اے۔ لبھ لبھ کے اپنے زوال دے کارن اکٹھے کردا اے۔
کجھ کرشماتی لوکاں نوں طاقتور لوک تے اقتدار دے دھنی برباد کر دیندے نیں۔ اوہ کرشماتی کھڈاری دی شہرت نوں اپنے مقصد پورے کرن لئی استعمال کردے نیں۔ اقتدار دے دھنی یاں تے بے خبر ہوندے نیں یاں فیر ایس گل نوں بالکل وی اہمیت نہیں دیندے کہ کسے اک شعبے وچ نمایاں کارکردگی وکھان والے بندے دی شہرت کسے دوجے شعبے وچ کارگر ثابت نہیں ہوندی۔ پاکستان وچ کھیڈاں دی تریخ دے سب توں وڈے کھڈاری جہانگیرخان’ فاسٹ بالر عمران خان وانگوں کرشماتی نہیں سن نہیں تے اوہناں نوں وی پاکستان دی خستہ حال سیاست وچ سٹ دیندے۔ اک مشہور ڈاکٹر نوں تسیں ملک وچ انجینئرنگ نوں فروغ دین لئی استعمال نہیں کر سکدے۔ تریخ دے پروفیسر نوں تسیں ملک وچ سائنس تے ٹیکنالوجی دے فروغ تے ترقی لئی استعمال نہیں کر سکدے۔ تسیں اک شعبے دے نامور بندے توں اوہدی شہرت توں بالکل وکھرے شعبے نوں بہتر بنان لئی استفادہ نہیں کر سکدے۔ تسیں اوس بندے نوں عمران خان وانگوں ضائع کر دیو گے۔ چنگے خام مال توں چنگے نتیجے حاصل کر سکدے او۔ کمزور تے ناقص خام مال توں ناقص کمتر تے مایوس کن نتیجے تہاڈے حصے وچ آندے نیں۔ چنگے ذہین تے پڑھے لکھے لوک چنگے لوکاں نوں ووٹ دے کے حکومت تے مامور کردے نیں۔ تسیں اپنے خام مال یعنی عام بندے نوں پڑھائو’ لکھائو’ تعلیم و تربیت دیو’ اوہناں دی آبیاری کرو۔ ذہین تے پڑھے لکھے لوک’ ذہین تے پڑھے لکھے حکمران دا انتخاب کردے نیں۔٭