”تلاوتِ نعتۖ ” دا شاعرامجد حمید محسن

نعت کہنا’ نعت پڑھنا تے نعت سننا’ ایسی سعادتاں نیں جہڑی زور بازو نال حاصل نہیں ہو سکدیاں۔ ایہہ اللہ تعالیٰ دے حبیب کریمۖ دی گلاں نیں جہڑی اوہنوں کہنا’ کرنا’ پڑھنا تے سننا نصیب ہوندیاں نیں جہنوں اوہ توفیق دیوے جہنوں اوہ اعزاز بخشے تے جہنوں اوہ ایہناں سعادتاں لئی چن لووے۔
اہل نظر تے اہل فیض آکھدے نیں کہ ”نعت دراصل رسول اکرمۖ دے دلی عقیدت تے روحانی محبت دا والہانہ اظہار اے تے ایہہ قرینہ نعت تے سلیقہ مدحت ہر کسی دے نصیب وچ نہیں آندا”۔ نعت گوئی دا باقاعدہ آغاز رسول اکرمۖ دے دور وچ حضرت حسان بن ثابت’ابو طلحہ’ ابو عبیدہ تے کعب بن زبیرتوں شروع ہویا جہڑا کئی صدیاں گزر جان مگروں اج وی جاری وساری اے۔ نعت گوئی موجودہ صدی دے اصناف اردو ادب وچ اک وسیع تر مقام رکھدی اے تے ایس دورانیے وچ نعت نے اپنے اندر سارے خصائص تے اوصاف نوں رسول اکرمۖ دی نسبت نال جہڑا مقام تے مرتبہ حاصل کیتا اوہدی مثال ادب دی دوجی اصناف سخن وچ نہیںملدی۔
ایسے طرح موجودہ عہد وچ وی شاعر سارے اصناف سخن وچ نعت دی خشبو بکھر کے شاعری دے دامن نوں ہور باثروت بنا رہے نیں۔ جہناں وچ امجد حمید محسن دا نام تے کم خصوصی اہمیت دا حامل اے۔ اوہناں دا شمار عہد حاضر دے معتبر شاعراں وچ ہوندا اے۔ اوہناں دے تن عدد شعری مجموعے شائع ہو چکے نیں جہناں وچ ”درد سمندر”(1981)”گواچے سفنے” (1987) تے ”دھند کے شہر میں” (1993) شامل نیں۔
زیر نظر نعتیہ شعری مجموعہ ”تلاوت نعتۖ” امجد حمید محسن دی نعتاں دا پہلا گلدستہ اے جہڑا اک لمی مدت مگروں منصۂ شہود اتے بڑے خوبصورت پربندھ دے نال اشاعت پذیر ہویا اے۔ ایس نعتیہ شعری مجموعہ ”تلاوت نعتۖ” وچ امجد حمید محسن دی آقائے دو جہاںۖ نال سچی محبت تے دلی عقیدت نوں تسیں انج محسوس کرو گے۔ ”تلاوت نعتۖ” دے ہر اک شعر نال عقیدت و محبت دا نور جگمگاندا وکھائی دیندا اے۔ امجد حمید محسن دے نعتیہ شعری مجموعے دی خاص خوبی ایہہ اے کہ ایہنوں پڑھدے ہوئے سانوں اوہناں دے کمال فن’ شاعرانہ دسترس تے قادرالکلامی دا وی معترف ہونا پیندا اے جہنوں تسیں اوہناں دی ادب نال گہری وابستگی تے وسیع مطالعے دی دلیل سمجھ سکدے او۔ ”تلاوت نعتۖ” دے آغاز وچ سانوں پروفیسر ڈاکٹر ریاص مجید دے ہجری قطعہ سال اشات پڑھن نوں ملدے نیں۔ بارگاہ رسالت مآب حضرت محمدۖ وچ ”تلاوت نعت” عقیدت و محبت نال لبریز گلدستہ پیش کردے ہوئے بڑے ای اختصار تے احترام دے نال ڈاکٹر بشیر عابد مرحوم اپنے دیباچہ وچ لکھدے نیں کہ ”امجد حسین محسن نے اپنے تازہ مجموعہ نعت”تلاوت نعتۖ” وچ اوہ سارے موضوعات تے مضمون مثلاً شوق دیدار روضہ سرکار دو عالم گنبد خضریٰ دا نظارہ’ مسجد نبویۖ دے روشن مینار’ مواجہ شریف وچ حاضری’ سنہری جالیاں دا طواف’ عشق رسولۖ وچ تڑپ’ کسک ‘ محبت عقیدت’ واسطہ’ استغاثہ’ آرزو’ حضوری اطباع و اطاعت’ وظیفہ درودوسلام تے ایسے ہور بہت سارے جذبیاں تے احساساں دے شعری پیکر جہناں توں ذات رسالت مآبۖ نال والہانہ وابستگی تے شگفتگی دی خشبو مہکی۔
دل تے روح نوں معطر کردی کیفیات نوں نہایت عمدگی نال جامہ ہائے اشعار وچ آشکار کیتا اے”۔ ایہناں ساریاں پہلوواں نوں سمجھن لئی ”تلاوت نعت” وچ شامل ہر اک لفظ تے شعر اتے بڑی واری سوچیا تے غور کرنا ازحد ضروری اے کیوں جے نعت لکھن وچ حزم تے احتیاط لازم اے تاں جے حضور اکرمۖ دی شایان شان کلام بحضور بارگاہ رسالتۖ وچ بطور نذرانہ پیش ہو کے بخشش تے نجات دا پیش خیمہ بن سکے۔ ”تلاوت نعت” توں کجھ شعر ملاحظہ کرو۔
میرے نصیب میں ہو مدینے کی حاضری
پلکوں سے چوم لوں گا تربت رسولۖ کی
………
تعریف کروں میں کیا اس پاک گھرانے کی
اک نعت سناتا ہوں حسنین کے نانے کی
امجد حمید محسن اپنے قلم نوں وی ہر گھڑی باوضو رکھدے نیں کیوں جے اوہ جاندے نیں ورد نبیۖ نوں لباں اتے سجانا’ اتھروواںنال وضو کرنا تے اپنے تصور وچ گنبد خضریٰ دے نظاریاں نوں ویکھنا’ سر اتے نعلین نبیۖ نوں چکنا’ نبیۖ دی چھوکھٹ اتے غلاماں وانگوں پیا رہنا۔ رات سفنیاں وچ دیدار مصطفی نوں بے چین رہنا’ نماز وچ درود ابراہیم آقاۖ اتے کثرت نال بھیجنا تے بے شمار خواہشاں نال بھریا ایہہ انسان ہر گھڑی بارگاہ رسالت مآبۖ کولوں اجازت منگن دی کوشش وچ مگن رہندا اے۔ امجد حمید محسن دی نعت لکھن دی کیفیت بہت پاکیزہ اے ایسے لئی اوہناں دے کلام وچ دلکشی’ تاثر آفرینی’ ٹھاس’ دلپذیری ‘غنایت تے محبت دی خشبو بھرواں ملدیاں نیں۔
”تلاوت نعت” دے تیجے دیباچہ نگار پروفیسر ریاض احمد قادری اے جہدے وچ امجد حمید محسن دی حیاتی اتے بھرواں چانن پایا گیا اے۔ایس دے علاوہ ”تلاوت نعت” وچ اشفاق غوری دی وی رائے نوں شامل کیتا گیا اے جد کہ ایس نعتیہ شعری مجموعے دا انتساب سید الانبیاء سرور کائنات’ محبوب رب العالمین’ خاتم النبیین پیارے آقا حضرت محمدۖ دے نام کیتا گیا اے۔ ”تلاوت نعت” دا ایہہ شاعر خود نوں بہت خوش قسمت تصور کردا اے کیوں جے اوہ جاندا اے کہ:
میری قسمت کا بلندی پہ ستارہ جائے
مجھ کو آقاۖ کے غلاموں میں پکارا جائے
”تلاوت نعت” دا سرورق بہت خوبصورت اے۔ انج لگدا اے جیویں سونے دے ورقیاں اتے نگینیاں وانگوں لفظ پئے ہون تے اوہناں نوں آب زم زم سے غسل کروا کے سجیا ہووے۔ اوہناں دے زیر طبع شعری مجموعے اردو ادب دے تریخی و تحقیقی کارنامیاں دا انمول تحفہ نیں۔ ”تلاوت نعت” جیسے معیاری تے خوبصورتی نعتیہ شعری مجموعے اتے امجدحمید محسن ڈھیراں مبارکباں دے مستحق اے تے اللہ تعالیٰ اوہناں دے کلام وچ ہور خوبصورت رنگ پیدا کرے تے اوہ نعت دی وادیاں وچ انج ای محبت تے عقیدت دے گلدستے پیش کردے رہن۔ ایس شعری مجموعے نوں گوجرانوالہ دے منے پرمنے اشاعتی ادارے فروغ ادب کادمی نے پبلش کیتا اے جہدے روح رواں ممتاز شاعر محمد اقبال نجمی نیں۔ اخیر وچ اوہناں دے کلام توں کجھ شعر پیش کردا چلاں کہ:
ہے وقت مختصر سا ملا نعت کے لئے
شکوہ رہا ہے مجھ کو یہ عمرِ قلیل سے