کنول فیروز دی نویں کتاب ”شہرِ صلیب و گل”

مشہور تے منے پرمنے شاعر احسان دانش کنول فیروز دی کتاب شہر صلیب و گل دا دعوت نامہ ملن تے لکھدے نیں کہ مینوں جہڑا ایس تعارفی جلسے دا دعوت نامہ ملیا اوہدے وچ لکھیا سی کہ دورجدید دے مشہور شاعر کنول فیروز دے مجموعہ شہر صلیب و گل دا تعارفی جلسہ۔
دور جدید دے مشہور شاعر توں میرا خیال اوہناں شاعراں ول گیا جہڑے پرانی روش
توں ہٹ کے ہیئت شعری دے علاوہ اشاریت تے ایمائیت دا جھنڈا لے کے میدان وچ آئے نیںتے اوہناں دے جلو وچ ابہام دے ایس قدر ہنگامے نیں کہ خواہ مخواہ دماغ ایہہ سوچن تے مجبور ہو جاندا اے کہ کیہ ایس دور وچ سانوں ایس تمثیلی’ بیانی تے اشاراتی تے کنایاتی شاعری دی لوڑ واقعی لاحق اے؟ جد کہ ساڈی زندگی دے چاروں پاسے علمی’ تحقیقی’ معاشرتی’ مذہبی تے سیاسی مسئلیاں دا میلہ لگیا ہویا اے جہناں نوں حل کرن تے سمجھن سمجھان دی لوڑ اے۔ جے اوہناں نال بے التفاتی ورتی گئی تے ساڈی تہذیب’ ساڈا تمدن تے موجودہ معاشرہ پتہ نہیں کہناں پستیاں وچ جا کے ساہ لوے گا۔
ایس ویلے ساڈے ملک وچ دو طبقے نمایاں نیں۔ا ک تے اوہ جہناں دی نظر وچ تہذیب و تمدن’ انسانیت تے شرافت
دا معیار بے معنی اے۔ اوہناں دے آفتاب و مہتاب تے گھراں دے ماحول توں نکل کے بینک بیلنساں دے چانن ویکھدے ہوئے میکدیاں’ قمارخانیاں تے جسماں دے نیلا م گھراں وچ جاکے ڈبدے نیں۔ اوہناں دی معنی خیز نگاہواں تے مفہوم انگیز لہجیاں وچ اوہناں دی نیتاں دی شقاوت تے انسان دشمنی دے دفتراں دا پتہ چلدا اے۔ ایہہ لوک سوسائٹی دی بیماریاں تے عوام دی تکلیفاں دا سدباب سوچن دے عادی نہیں۔ا وہناں دے کن سکیاں دی جھنکار دے علاوہ ہر آواز نوں صدائے صحرا قرار دیندے نیں۔ اوہناں دی فصلاں جہالت دی زمین وچ اگدی تے پکدیاں نیں تے ایہہ افراتفری دے موسم وچ کھلیان چکدے نیں۔
دوجا طبقہ اوہ اے جہنوں محنت کش دانام دتاجاندا اے۔جہدے وچ لوک حشرات الارض وانگوں پیدا ہوندے نیں تے 32,30 ورھیاں تک ملاں وچ آتش و آہن نال جنگ کر کے پروانیاں وانگوں اپنی ساری اذیت نوں شیاںورثہ وچ اپنی اولاد نوں دے کے اللہ نوں پیارے ہو جاندے نیں۔
ایہناں دونواں طبقیاں دے علاوہ اک تیجا طبقہ عوام دا اے جہڑا سفید پوش شرفا دی جماعت اے۔ اوہدے وچ سکولاں تے کالجاں دے علاوہ معلم’ دفتراں وچ کم کرن والے قلم کار’ شاعر’ ادیب تے دوجے درجے دے دکاندار تے دستکار وی شامل نیں۔ اوہناں وچ مذہب وی اے تے تہذیب وی۔ غیرت وی اے تے جرات و شرافت وی۔ روحانی اور جسمانی خساریاں اتے اوہناں دی نظر اے لیکن خموش۔
ساڈی جدید شاعری موسیقی توں باغی’ ہیئت تے اشارات و کنایات دے ذریعے اپنے مافی الضمیر دے اظہار نال ایسے طبقہ اول دے تعیش پسند لوکاں لئی دماغاں دا سکون تے نگاہواں دا ناشتہ تے مہیا کردی اے لیکن عوام لئی کوئی مواد فراہم نہیں ہو سکدا۔ ایہدے وچ شک نہیں کہ نویں نسل دے شاعر کجھ آکھنا چاہندے نیں۔ بعض کجھ کہندے وی نیں۔ سمبل ازم دے ہلکے ہلکے اشارے اپنے مضمون دا پتہ وی دیندے نیں لیکن ایہہ تے چند افراد نیں تے اک سیل بے پناہ’ معنی اظہار ول ودھدا چلیا جا رہیا اے۔ اخیر قاری اتے ایس قسم دے ادب دا کیہ اثرہوندا اے؟ تے اوہدے توں ساڈی اجتماعی زندگی وچ کوئی ترقی یا تغیر دی لہر دوڑدی اے یا نہیں؟
ایہہ وی غلط نہیں کہ تنوع پسندی ذہین تے طباع لوکاں دا طرہ امتیاز اے لیکن ساڈے ملک وچ کیہ واقعی ایس قدر ذہین لوکاں دا جوار بھاٹا آ گیا اے کہ اپنی سدھی سادی تے پاکیزہ اقدار حیات نوں نظرانداز کر کے ایجاد بندہ اتے مصر نیں تے اوہناں نوں جانچن پرکھن والا کوئی نظر نہیں آندا۔
جواب وچ ایہہ آکھیا جا سکدا اے کہ شعر جے قاری دی سمجھ وچ آ جاوے تے شاعر اپنے فرض توں سبکدوش ہو جاندا اے۔ نتیجہ یا تاثر توں اوہدا کوئی واسطہ نہیں۔ جے ایہہ درست اے تے میں پچھنا آں کہ فیر شاعر تے زاکر یا سانگی تے لیڈر وغیرہ قسم دے لوکاں وچ کیہ فرق ہووے گا تے شاعر نوں معاشرہ وچ کہڑا مقام دتاجاوے گا؟ اگرچہ میرے پیش نظر کنول فیروز دے شعری مجموعہ شہر صلیب و گل اتے تبصرہ اے لیکن گل نال گل نکلدی چلی آ رہی اے ایس لئی ہن میں ایس مجموعہ ول آنا واں۔
میں جدوں ایس مجموعے نوں ویکھیا تے مینوں ایہدے وچ نہ تے جدید شاعری ملی تے نہ اوہ الجھیا ہویا ابہام جہنوں میں ادب لئی مفید خیال نہیں کردا ۔ اوان وبحور دی ساحل بندی وچ ایس مجموعے وچ چنگے تے شگفتہ شعراں دی کمی نہیں۔ ایہدے شاعر نے لفظاں دی دروبست وچ ایسے چوکنے ادراک نال کم لیتا اے کہ کسے رخ توں وی معنی آفرینی رکدی نہیں تے ایس وبائی ابہام دی الجھن دے خلاف کدھرے شاعر دا مفہوم فی البطن شاعر نہیں ہویا۔
ایہدے وچ شک نہیں کہ روایتی تے قدیم شاعراں دے ہاں وی بجھارتاں تے معمائی شعر پائے جاندے نیں لیکن جہڑی بجھارتاں نیں اوہ بجھارتاں ای چلی آ رہیاں نیں تے جہڑے معمائی شعر نیں اوہ ہنوز معمہ ای کہلاندے نیں۔ شہر صلیب و گل دے شاعر دے خیالات انھیریاں توں کھلی فضا وچ جھانک رہے نیں تے شاعر نے نویں روشنیاں اتے ٹکٹکی بنھی ہوئی اے۔