بلوچی لوک کہانڑیاں …… حضرت علی دِی سخاوت

اک دن حضرت علی المرتضیٰ گھر تشریف رکھدے سن کہ اک سائل دروازے تے آیا ہور فریاد کیتی جناب میں اپنی تئیاں دِی منگنی کیتی اے ہن وئیاہ کرنا چاہندا واں میری کجھ امداد کیتی جائوے حضرت امام علی نیں اپنے غلام قمبرنوں بلایا ہور کہیا اک وڈی جئی چٹی پگ لیا ہور ایس سائل دے سر تے بندھ دے ،قمبر نیں کافر دی دکان توں پگ دا کپڑا خریدیا تے سائل نوں دے دیتا۔حضرت امام علی نیں فرمایا میرے کول ہور کوئیی دولت نیں اے بس میں آپ آں مینوں اپنے نال لے چل ہور کسی دے ہتھ ویچ دے ہور اپنہیاں تیاں دا وئیاہ کر دے۔
فیر او کافراں دے شہر دے اندر لے گئیا ہور اعلان کیتا کہ میں اینہوں ایسے بندے دے ہتھ ویچاں گا جیڑا مینوں سو بندیاں دی قیمت دے گااک کافر نیں حضرت علی توں پوچھیا کہ تیرا ناں کی اے؟ ہور کِی کم کر سکدا اے؟ جو تیرا مالک سو بندیاں دی قیمت منگ رہیا اے۔
حضرت علی نیں فرمایا میرا ناں عبد اے جیڑا کم مینوں دسو گے سب میں کراں گا ۔ اے سن کے ہندو نیں قیمت دے کے خرید لیا ہور سو بندیاں دِی قیمت اد اکیتی۔ سائل او رقم لے کے ٹر گئیا۔
اک دن کافر نیں حضرت امام علی نوں اک کواہڑی دیتی ہور کجھ کھوتے دیتے ہور کہیا کہ جا کے لکڑیاں کٹ کے لیا،حضرت امام علی لکڑیاں جمع کردے کردے تھک گئے تے نیند آ گئیی آپ سو گئے اینے چہ شیر آ گیے اُونہاں نیں کھوتیاں تے حملہ کرکے اُونہاں نوں مار دیتا جد حضرت علی دِی اَکھ کھلی تے آپ نیں شیراں نوں للکاریا شیر خوفزدہ ہوگئے آپ نیں اُونہاں چاراں شیراں تے لکڑیاں لدیا تے کافراں دے شہر نوں واپس آ گئے۔
جدوں بازار چہ پہنچے تے شیر دھاڑن لگے حضرت امام علی نیں وِی نعرہ لایا تے شہر دے لوک ڈر گئے ،وڈے سیٹھ نیں کہیا اسی مسلمان ہوندے آں ایس طراں او پورا شہر مسلمان ہوگیا اُونہاں نوں پتہ چل گیا کہ اے تے مسلماناں دے حضرت امام علی نیں ۔
اک واری حضرت امام علی اک ہزار اُونٹاں تے سونے چاندی تے ہور بہت سارا قیتمی سامان لدے مدینہ توں ٹرے منزل تے منزل چلدیاں ہویاں آ رہے سن کہ رستے چہ اک اندھا فقیر ملیا فقیر نیں کہیا ایس قافلے دا سردار کون اے؟
حضرت امام علی نیں جواب دیتا میں علی آں فقیر نیں کہیا میں بھوکا واں مینوں بھوک لگی اے مینوں کجھ کھان نوں دیو حضرت علی نیں قمبر نوں کہیا فقیر نوں کوئیی روٹی دیو۔
قمبر نیں کہیا روٹیاں تے اُونٹ تے لدیاں ہویاں نیں ہور او اُونٹ دوسرے مال دے نال بندھیا ہویا اے، اُونہوں کڈنا مشکل اے۔
حضرت امام علی نیں فرمایا اُوس اُونٹ نوں لدے ہوئوے سامان دے نال ایس فقیر نوں دے دیو ۔
قمبر نیں کہیا سرکار او اُونٹ تے اُونٹاں دے لائن دے ویچکار بندھیا ہویا اے۔
حضرت امام علی نیں فرمایا ،او اُونٹ دِی لائن اِی ایس بندے نوں دے دیتی جائوے ۔قمبر نیں جلدی نال اُونٹ توں تھلے چھال مار دیتی تے زور نال تھلے آ کے ڈیگیا ۔حضرت امام علی مسکرائے ہور پوچھیا قمبر تینوں کِی ہویا تھلے آکے کیوں ڈیگیا اے؟۔
قمبر نیں جواب دیتا آقا میں ڈر گئیا سی کہ کیتے ایس طراں مینوں وِی ایس اندھے بندے نوں نہ بخش دیو و۔
فیر قمبر نیں او اُونٹاں دِی پوری لائن فقیر نوں دے دیتی فقیر نیں کہیا میں تے روٹی منگی سی تسی پوری اُونٹاں دِی لائن اِی مینوں بخش دیتی اے ۔
فقیر دِی اکھیاں دِی بینائیی واپس آ گئیی اُوہنے ویکھیا کہ اک لنمبی لائن اُونٹاں دی اے جیدے تے بہت سارا سامان لدی اہویا اے او فقیر حضرت سخی سرور سن مال ہور دولت ساری خیرات کر دیتی تے گھر بنایا ۔
ہُن بلوچستان چہ مشہور اے کہ او اندھا فقیر سخی سرور سی قمبر دِی اُولاد خان ہو گئیی اے ہور براہوئیاں چہ ہن وِی قمبرانی دے ناں توں اے قبیلہ مشہور اے۔