ایہہ دوستی نہیں

دوست ملکاں نوں قابو وچ رکھن لئی امریکہ اوہناں نوں سبق سکھاندا رہندا اے لیکن ہن حالات بدل چکے نیں۔ سبق سکھان دی حکمت عملی دے ماضی وانگوں نتیجے برآمد نہیں ہوندے بلکہ گاجر تے چھڑی دی حکمت عملی نال دوریاں ودھن لگیاں نیں تے امریکہ اتے اعتبار دی بجائے شکوک و شبہات دی نظر نال ویکھیا جان لگیا اے۔ دوست اپنے دوستاں نوں سبق سکھاندے بلکہ اوکھی گھڑی وچ ساتھ دیندے نیں۔ ایہہ صحیح اے کہ ریاستاں دے تعلقات مفادات دے تابع ہوندے نیں جہناں وچ اتار چڑھائو آندا رہندا اے لیکن دوست نوں اوکھی گھڑی وچ کلیا چھڈنا یا اپنا وزن اوہدے دشمن دے پلڑے وچ پا دینا وی دوستی نہیں۔مشکل وچ دوست نوں کلیا چھڈن یا دشمن دے نال کھڑا ہون نال جنم لین والی بدمزگی دا اثر چھیتی ختم نہیں ہوندا۔ بدلے حالات وچ تے ہن ایہہ ہور وی نقصان دہ اے کیوں جے ترقی پذیر ملکاں دے کول اک توں ودھ کے انتخاب موجود اے جہدا شاید امریکہ نوں بوہتا ادراک نہیں۔ جے ہوندا تے ماضی جئی پالیسی نہ رکھدا۔ امریکہ تے سعودی عرب تعلقات دے نبض شناس محمد الحمید ایہدی وجہ ایہہ دسدے نیں کہ جوبائیڈن نوں منتخب کرن والیاں دی اکثریت دا تعلق بنیاد پرست بائیں بازو نال سی۔ ایسے لئی منتخب ہوندے اوہناں نے اپنے ووٹراں دی مرضی دے مطابق ایجنڈا تشکیل دتا جہدی زد وچ آ کے امریکہ سعودی تعلقات وی خاص طور تے متاثر ہوئے۔ توانائی دا بحران گھٹ کرن لئی ہن شاید اوہ اندرون ملک دے نال ازسر نو امریکی مفادات دے تحفظ لئی عالمی استحکام اتے توجہ دین کیوںجے سعودی عرب دے نال باہمی احترام اتے مبنی تعلقات دے بغیر مضبوط شراکت داری دا تصور کرنا ممکن نہیں تے ایہہ کہ سعودی عرب سفارتی تعلقات وچ کشیدگی دے باوجود تیل برآمد کرن دا رستہ کڈ سکدا اے۔
جوبائیڈن توں حال ای وچ دریافت کیتا گیا کہ اوہ سعودی عرب دا دورہ کرن والے نیں۔ ایہدا ایجنڈا کیہ ہووے گا؟ تے اوہناں نے واضح کر دتا کہ اجے دورے دا فیصلہ نہیں کیتا جے کیتا تے مملکت دے دورے دا ایجنڈا وسیع ہووے گا ۔ توانائی توں ودھ گل بات وچ دوجے امور اتے توجہ ہووے گی مگر جدوں ایہہ پچھیا گیا کہ کیہ ریاض نال کجھ وعدیاں اتے عملدرآمد دا انتظار کیتا جا رہیا اے تے اوہناں نے معنی خیز لہجے وچ ایہہ آکھ کے گل ٹال دتی کہ سعودیاں دے وعدیاں دا توانائی نال تعلق نہیں بلکہ ایہہ سعودی عرب وچ ہون والی اک وڈی ملاقات اے۔ جوبائیڈن دی ایس گل توں ایہہ مطلب اخذ کیتا جا رہیا اے کہ اوہ توانائی توں ودھ انسانی حقوق بہتر بنان دا مطالبہ کرن گے لیکن ایسا آکھنا جہنا آسان اے عملی طور تے بہت ای اوکھا اے کیوں جے ایسا رویہ اختیار کرن نال امریکہ’ اسرائیل’ عرب امارات تے بھارت دے درمیان تجارتی تے معاشی تعاون دا متوقع معاہدہ وی خطرے وچ پے جاوے گا کیوں جے عرب امارات کسی صورت سعودی پسند دے منافی جا ای نہیں سکدا۔
صدر جوبائیڈن تے سعودی ولی عہد محمد بن سلیمان ملاقات نوں نتیجہ خیز بنان لئی سفارتی حوالے نال دو طرفہ تیاریاں جاری نیں لیکن ایس اک ملاقات نال دونواں ملکاں وچ موجود سفارتی سردمہری کیہ گرمجوشی وچ ڈھل جاوے گی؟ ایس حوالے نال فوری طور تے وثوق نال کجھ آکھنا آسان نہیں حالانکہ زمینی حقائق ایہہ نیں کہ دونویں ای اک دوجے دی کسی حد تک مجبوری نیں۔ چاہے دوجی جنگ عظیم دے اختتام نال دونواں ملکاں وچ دفاعی تعلقات استوار نیں جہناں وچ ویلے دے نال اتار چڑھائو وی آندا رہیا فیر وی دفاعی شراکت داری قائم رہی۔ ایس شراکت داری نوں ڈونلڈ ٹرمپ نے دس ارب ڈالر دے دفاعی معاہدے توں بام عروج اتے پہنچا دتا۔ واشنگٹن تے ریاض دے تعلقات وچ ایس حد تک بہتری آ گئی کہ ترکی وچ موجود سعودی سفارتخانے وچ قتل ہون والے صحافی جمال خاشقجی دا واقعہ وی گرمجوشی متاثر نہ کر سکیا مگر معاملات اوہدوں بہتے وگڑے جدوں اوہ دوجی مدت لئی منتخب ہون وچ کامیاب نہ ہو سکے تے جوبائیڈن انتظامیہ نے دوست ملکاں نوں انسانی حقوق دا درس دیندے ہوئے ماضی دے واقعات توں جواب طلبی شروع کردتی۔ شاید واشنگٹن دا خیال ایہہ سی کہ انج کرن نال روس تے چین نوں وی سخت پیغام ملے گا لیکن توقع دے مطابق نتیجے دے بجائے ایس پالیسی توں ریاض تے واشنگٹن دے تعلقات وچ دراڑ آگئی۔ نال ای روس تے چین نال امریکی تعلقات خراب ہوندے گئے جہڑے ہن معاشی تے تجارتی محاذآرائی تک پہنچ چکے نیں۔ علاوہ ازیں عرب ملکاں وچ روسی مداخلت لئی حالات سازگار ہوندے گئے جہدے توں امریکہ نوں کئی اک سبق ملے۔ پہلاں عرباں نوں کنٹرول کرن لئی صرف اسرائیل اتے انحصار درست نہیں۔ دوجا توانائی دا بحران ایس حد تک سارے امریکہ نوں اپنی لپیٹ وچ لے چکیا اے کہ ریگولر پیٹرول دی قیمت 5ڈالر توں ودھ گئی اے۔قیمت وچ ہون والا وادھا کدوں رکے گا ایس بارے کجھ پتہ نہیں ایسے لئی ریاض نال نرمی اختیار کیتی جا رہی اے۔ سچ تاں ایہہ اے کہ توانائی دا حالیہ بحران جوبائیڈن دے نال حکمران جماعت ڈیموکریٹک دی مقبولیت نوں متاثر کر رہیا اے جہدے توں بچن لئی جوبائیڈن دے کول انسانی حقوق دے حوالے نال سخت گیر رویے نوں نرم کرن دے سوا کوئی دوجا آپشن ہے ای نہیں۔
امریکہ نوں مشرق وسطیٰ وچ کئی اک چیلنج درپیس نیں۔اک تے ودھدی روسی مداخلت اے۔ دوجا چین نے وی عرب ملکاں نال تجارتی رابطے بہتر بنائے نیں۔ سعودی عرب نال ڈالر دے بجائے یوآن کرنسی وچ تجارتی دا معاعہدہ ہون دے کول اے۔ علاوہ ازیں امریکہ توانائی دے ودھدے اخراجات نوں کنٹرول کرن لئی تیل برآمد کرن والے ملکاں دی تنظیم اوپیک دے معاہدیاں نوں اپنے مفاد توں اہم آہنگ کرنا چاہندا اے لیکن کیہ ایہ سب کجھ توقعات دے مطابق آسانی نال ہو جاوے۔ بادی النظر وچ ریاض دی مخالفت دی صورت وچ ایہہ آسان نظر نہیں آندا۔ جوبائیڈن تے ولی عہد ملاقات وچ امریکہ نوں اپنے خراب رویے دی اک تے کجھ وضاحت دینا ہووے گی۔ دوجا سعودی عرب چاہوے گا کہ واشنگٹن انسانی حقوق دی گل کردے ہوئے ریاض دے معاملات وچ دخل اندازی توں گریز کرے۔ دونواں نوں اپنے مفادات دا تحفظ کرنا اے۔ جوبائیڈن دی ساکھ نوں خطرات نیں تے سعودی ولی عہد نوں وی اتحادی امریکہ دی ناراضگی مشکل وچ پا سکدی اے۔ ایس لئی دونویں معاہدے کردے ہوئے محتاط رہن گے کیوں جے ماضی وچ جے واشنگٹن نے سعودی بادشاہت اتے دبائو پایا تے جواب وچ سعودیہ نے ڈالر دی بجائے دوجی کرنسی وچ تجارت دے معاہدے شروع کردتے ایس لئی بظاہر اینی چھیتی دونویں پاسوں اعتماد سازی دی نوبت آن دا امکان گھٹ اے۔
موجودہ سعودی عرب دوجی جنگ عظیم مگروں کافی بدل چکیا اے۔ قدامت پسندانہ اقدار نوں آزادانہ بنان لئی شہزادہ محمد بن سلیمان نے غیر متوقع اقدامات کیتے نیں۔ زراعت ‘ صنعت نوں ترقی دتی اے۔ دفاعی حوالے نال وی بہتر پوزیشن تے اے لیکن سزائے موت دے طریقہ کار اتے امریکہ دے تحفظات ختم نہیں ہو سکے۔ ہن جذبات دی رو وچ بہن دے بجائے واشنگٹن نوں یاد رکھنا چاہیدا اے کہ سعودیہ دے حکمران خاندان السعود دی نسل دے اقتدار نوں خطرہ ہوندا اے تے ایس توں خلیج فارس دے خطے وچ توانائی دی حفاظت دا امریکہ منصوبہ وی بری طرح متاثر ہووے گا ایس لئی سعودی ضروریات اپنی جگہ’ امریکہ نوں اپنی سٹریٹجک پوزیشن بہتر نہیں بناندا تے حماقتاں جاری رکھدا اے تے ایہہ روس تے چین نوں قدم جمان دا موقع دین دے مترادف ہووے گا۔ موجودہ صورتحال ایہہ اے کہ ریاض تے واشنگٹن دونویں ای جنگ عظیم دوم مگروں ہون والے معاہدیاں توں انحراف دے مرتکب نیں جہدے توں نویں قوتاں نوں خطے وچ معاشی تے تجارتی معاہدے کرن دے نال دفاعی تعلقات ودھان دی راہ ہموار ہوئی۔ جے امریکہ عالمی طاقت اے تے سعودیہ وی عرب ملکاں وچ کافی اثرو رسوخ رکھدا اے۔ قطر وغیرہ نال تعلقات بہتر بنان مگروں اوہدی حیثیت ہور مستحکم ہوئی اے۔ ایہناں حالات وچ امریکہ دا نظرانداز کرنا حماقت ای کہہ سکنے آں۔ واشنگٹن دا تہران نال جوہری معاملے وچ رابطے دے باوجود سفارتی تنائو برقرار اے۔ ایس ویلے امریکہ لئی سعودی حمایت ناگزیر ہے۔ ایہدے وچ بائیڈن تے ولی عہد شہزادہ محمد دی ملاقات کتھوں تک معاون ثابت ہوندی اے چھیتی مطلع صاف ہو جاوے گا۔