عیب تے عیب

ناصر اقبال خان

جہڑے ویلے پارلیمنٹ وچ ”نیب” دے حریف ایس نحیف ادارے دا پوسٹ مارٹم کر رہے سن’ نیب زدگان دا مخصوص طبقہ نیب دی بوٹیاں نوچ رہیا سی۔ اوس ویلے میرے سنے سینئر کالم نگار ڈاکٹر شوکت ورک تے سعید احمد ملک وی ایوان وچ بیٹھے ہوئے سن۔ ساڈے تناں سنے کروڑاں پاکستانیاں نے ایہہ دلخراش منظر اپنی اکھاں نال ویکھیا تے قومی چوراں دے بے رحم احتساب داسفنا اوہناں دی اکھاں وچ عذاب بن کے اتر آیا۔ نیب قوانین وچ ترامیم دے نام تے ایس خودمختار ریاستی ادارے دے قلب تے قومی ضمیر اتے کاری ضرب لائی گئی۔ اوہناں دے نزدیک نیب اک آسیب سی جہنوں بوتل وچ بند کردتا گیا تے ہن ایہہ کسے بدعنوان نوں نہیں چمٹ سکدا۔ جے اوس دن کپتان اپنے ٹیم ممبراں دے نال ایوان یا میدان وچ ہوندا تے شاید نیب دا جنازہ نہ اٹھدا۔ کجھ تونداں قنون دے نشتر تے گردناں احتساب دے پھندے توں بچان لئی نیب دے ہتھاں تے پیراں نوں وڈ دتا گیا۔ بیسیاں نیب زدگان نے نیب دی اکھاں پھوڑ دتیاں تے اوہنوں زندہ دیوار وچ گاڑن مگروں قنون دے حکمرانی دا مژدا سنایا۔ نیب قوانین وچ جہڑی ترامیم کیتی گئیاں نیں اوہ جائز نیں تے نہ اوہناں دا کوئی جواز سی۔ اوس دن ایوان وچ جہڑے ارکان ”نیب” دے عیب تے اوہنوں فوجی آمر دی باقیات دس رہے سن اوہناں نوں لگدا اے ایس طرح اوہ اپنے کالے ”عیب” تریخ دے ورقیاں توں ”غیب” کر سکدے نیں۔ نیب وچ نقب لاندے ویلے ایوان وچ موجود بوہتے ارکان پارلیمنٹ جہڑے انداز نال آپس وچ گپ شپ کر رہے سن اوہدے توں صاف ظاہر سی اوہناں نوں وفاقی وزیر قانون اعظم نذیر تارڑ دی تقریر سنن وچ کوئی دلچسپی نہیں۔ اوہ نامعلوم موضوعات اتے گل کردے ہوئے قہقہے لا رہے سن۔ مہنگائی تے کرپشن توں نجات دی دہائی دین والے وچارے عوام دی اوتھے کسے نوں پرواہ نہیں سی۔ اوہ مقروض پاکستان دی نیم مردہ معیشت نوں درپیش چیلنجاں توں بے نیا زسن۔ ایوان وچ براجمان متعدد شوگر ملز مالکان وچوں کسے نے چینی دی قیمت وچ کمی اتے زور نہیں دتا لیکن نیب نوں نکیل پانا تے اوہنوں یرغمال بنانا اوہناں دا متفقہ ایجنڈا سی۔ سپیکر قومی اسمبلی راجہ پرویز اشرف نیب وچ ترامیم دے ناں نال دوجے بل اتے ارکان نوں ”ہاں یا ناں” دا آپشن دیندے تے اگلے لمحے اوہ بل پاس ہو جاندا یعنی حکمران اتحاد دے پارلیمنٹرینز نوں اختلاف رائے دی اجازت نہیں سی۔ انڈے نوں آملیٹ بنان وچ کجھ دیر لگدی اے لیکن نیب وچ ترامیم دا بل پاس ہون وچ اینا ویلا وی نہیں لگیا۔ مینوں لگیا ایوان وچ ارکان نہیں بلکہ کوئی بے زبان تے بے جان ”روبوٹ” بیٹھے ہوئے نیں تے اک خودکار سسٹم دے تحت اوہناں دا سر اثبات وچ ہلدا اے۔ عوام نے نیب وچ ترامیم دا بل ”پاس” کرن والے ارکان نوں ”فیل” قرار دے دتا کیوں جے کسے نے نیب اتے شب خون مارے جان دے خلاف مزاحمت نہیں کیتی تے نہ کسی نے احتجاجاً واک آئوٹ کیتا۔
2018 وچ ہون والے عام انتخابات دے دوران کسے سیاسی یا مذہبی جماعت نے اپنے اپنے انتخابی منشور وچ نیب وچ ترامیم دا عندیہ تے ووٹراں نے مسلم لیگ (ن) تے پیپلز پارٹی سنے کسے جماعت نوں نیب وچ نقب لان دا مینڈیت نہیں دتا سی۔ میں سمجھنا واں نیب زدگان نے اپنے اتحادی نیب زدگان نوں بچان لئی نیب نوں قربان تے پاکستان وچ کرپشن دا رستہ ہموار کردتا۔ کسے قومی چور دے خلاف چارج شیٹ دے حق وچ ناقابل تردید شواہد پیش کرن وچ نکامی دی صورت وچ نیب افسراں لئی پنج سال سزا دا قنون بنن مگروں کون جسارت کرے گا۔ نیب وچ حالیہ ترامیم مگروں محتسب نوں خاندان دے واحد ”کفیل” توں اوہدے بیوی بچیاں دے نام بیش قیمت جائیداد یا بینک بیلنس بارے سوال پچھن دی اجازت نہ دینا اک بھونڈا مذاق اے۔بار شواہد ملزم دے بجائے مدعی یا محتسب اتے پانا قنون تے انصاف دا خون کرن دے مترادف اے۔ جہدے قصر وچ پئی تجوری یا اوہدے ”چپڑاسی” دے بینک اکائونٹ توں ارباں روپے برآمد ہون تے اوہ محتسب نوں دسن دا پابند اے۔ ایہہ کتھوں آئے۔ منشیات فروش یا ”جہاز” دی جیب توں ”پڑیاں” برآمد ہون تے سرکاری اہلکار نہیں ملزمان جوابدہ ہوندے نیں۔ ملزم اپنی بے گناہی دے حق وچ شواہد تے شہادت دیوے گا۔ قوی امید اے پنجاب وچ ڈی جی نیب شہزاد سلیم تے ڈی جی اینٹی کرپشن رانا عبدالجبار اپنی اپنی خداداد صلاحیت تے پیشہ وارانہ مہارت دے نال کرپشن دے خلاف کامیاب آپریشن کردے ہوئے معاشرے دا وجود ایس ناسور توں پاک کر دین گے۔ کرپشن دے خلاف جاری جہاد وچ شہزاد سلیم’ رانا عبدالجبار تے اوہناں دے ٹیم ممبر کلے نہیں بلکہ پورا معاشرہ اوہناں دے پچھے اے۔
جتھے قومی سیاست وچ سرگرم قومی چوراں نے احتساب دا سامنا کرن دے بجائے الٹا نیب نوں نکام تے بدنام کرن لئی ہر طرح دے ناجائز ہتھکنڈے استعمال کیتے اوتھے نیب دے اندر موجود مخصوص”خواجہ سرا” وی ایہناں قومی چوراں دا محاسبہ کرن دے بجائے الٹا ایہناں نوں خوش تے ایہناں لئی آسانیاں پیدا کردے رہے۔ ایہناں مخصوص مفاد پرست افسراں نے مستقبل وچ منفعت بخش تقرریاں لئی نیب زدگان نوں مجرم بنان دے بجائے اپنا محرم بنا لیا۔ میں سمجھنا واں جس طرح کوئی انسان اپنے اندر کسے ناسور دا خود آپریشن نہیں کر سکدا اوس طرح نیب زدگان نوں نیب وچ نام نہاد اصلاحات دے نام اتے احتساب کلچر دا کچومر بنان دی اجازت نہیں دتی جا سکدی۔ میں انتہائی یقین نال آکھنا واں جے آئندہ انتخابات شفاف ہوئے تے آن والی تازہ دم حکومت قومی چوراں نوں ”بے حال” کرن لئی نیب دے اختیارات ” بحال کر دیوے گی لہٰذا نیب زدگان اپنی حالیہ کامیاب واردات اتے بوہتے خوش نہ ہون۔ عوام ڈیل تے ڈھیل دی بنیاد اتے ایس ویلے اقتدار وچ شریک متعدد نیب زدگان نوں رد کر دین گے۔ اشرافیہ دے شعبدہ باز یاد رکھن جے احتساب دا در بند ہویا تے خونی انقلاب کسے سیلاب وانگوں اوہناں نوں اپنے نال بہا لے جاوے گا۔ مال دار اپنے اعمال دے جوابدہ نیں۔
فاروق اعظم حضرت عمر منبر اتے تشریف فرما نیں تے اک نوجوان نمازی نے اوہناں کولوں سوال کیتا۔ اے امیرالمومنین آپ نے جہڑا ”کرتا” پایا ہویا اے اوہ اک چادر نال تیار نہیں ہو سکدا کیوں جے آپ سنے سانوں ساریاں نوں مال غنیمت توں اک اک چادر ملی سی۔ حضرت عمر نے نوجوان دی ایس جسارت اتے غضبناک ہون دے بجائے اپنے صاحبزادے نوں حقیقت دسن لئی آکھیا۔ اوہناں دے فرزند نے دسیا کہ میں اپنی چادر اپنے بابا جان دی خدمت وچ پیش کردتی سی تے انج دو چاداراں نال اوہناں دا کرتا تیار ہویا۔حضرت عمر نے سوال کرن والے نوجوان نوں انتقام دا نشانہ بنان دی بجائے اوہنوں شاباش دتی۔ رسول اللہۖ دے عہد مبارک وچ فتح مکہ دی جنگ ویلے اک زنانی نے چوری کر لیتی۔ اوس قوم دے لوک گھبرا کے حضرت اسامہ بن زید دے کول آئے کہ اوہ اوہدی سفارش فرما دین جدوں حضرت اسامہ نے آپۖ کولوں معافی لئی استدعا کیتی تے رسول اللہۖ دے چہرہ اقدس دا رنگ بدل گیا۔ آپۖ نے فرمایا: کیہ تو ں اللہ تعالیٰ دی حدود وچوں اک حد دے بارے سفارش کرنا ایں۔ حضرت اسامہ نے عرض کیتی رسول اللہۖ ‘میرے واسطے استغفار فرمائو۔ نماز ظہر مگروں رسول اللہۖ خطبہ لئی کھڑے ہوئے تے اللہ تعالیٰ دی حمدوثنا فرمائی جہڑی اوہدے شایان شان اے۔فیر فرمایا ”اے لوکو تہاڈے توں پہلاں لوک ایس بنا اتے تباہ ہوئے کہ جدوں اوہناں وچ کوئی طاقتور شخص چوری کردا تے اوہنوں چھڈ دیندے تے جدوں کوئی کمزور شخص چوری کردا تے اوہدے اتے حد نافذ کردیندے” قسم اوس پاک ذات دی جہدے ہتھ وچ محمدۖ دی جان اے۔ جے بالفرض فاطمہ بنت محمدۖ چوری کردی تے میں اوہدا وی ہتھ وڈ دیندا۔ فیر رسول اللہۖ دے حکم تے اوہدا ہتھ وڈ دتا گیا۔ تاہم اوہدے مگروں زنانی نے توبہ کر لیتی سی۔
یاد رکھو معبود برحق دی رحمت ”عطاواں” تک محدود نہیں بلکہ قنون قدرت بندیاں دی ”خطاواں” اتے سخت ”سزاواں” دا حامی اے جتھے سزاواں دا ڈر نہیں ہوندا اوتھے خطاواں دا سلسلہ دراز ہو جاندا اے۔ ڈر انساناں دا دوست تے ابن آدم نوں غلطیاں یا گناہواں توں روکدا اے۔ دین فطرت اسلام ہر سطح اتے احتساب دا حامی اے اوہ معاشرے جتھے ملزمان تے بالخصوص بدعنوان آزاد ہون اوتھی معیشت دا شٹرڈائون ہو جاندا اے جد کہ معاشرے اتے نحوست دے کالے بدل چھا جاندے نیں۔ ساڈی بدصورت جمہوریت دے مضرات ویکھو۔ کجھ مہینے پہلاں جہڑے ”اشرافیہ” نیب دے ریڈار اتے سی اج نیب اوہناں دے رحم و کرم اتے اے۔ مخصوص سیاستداناں دے ”زر” ”زور” تے انتقام انتقام دے ”شور” نے نیب نوں ناکارہ کر دتا۔ اسیں ”بلے باز” دے خلاف ”گیند باز” نوں تے میدان وچ اپنی مرضی نال فیلڈنگ سیٹ کردے ہوئے ویکھنے آں۔ ہن شعبدہ باز اپنے مخصوص انداز نال شب و روز بدعنوانی کرن جدکہ اپنے بچائو لئی اپنی مرضی نال نیب قنون دی نوک پلک سنوار رہے نیں۔ پاکستان وچ شہباز شریف تے آصف زرداری توں مستند ایماندار’ دیانتدار تے امانت دار حکمراناں دا دم غنیمت اے جہڑا محتسب دا وی احتساب کر سکدے نیں ۔ جہڑے ماضی وچ اک دوجے نوں میداناں وچ گھسیٹن دا دعویٰ کیتا کردے سن اوہ ہن نیب نوں ایواناں وچ گھسیٹ رہے نیں۔ واشنگٹن دی ڈکٹیشن اتے اک ”اناڑی” کپتان نوں ہٹان والے بیسیاں ”تجربہ کار” اقتدار وچ آئے تے اوہناں نے الٹا مہنگائی دے ہنٹراں نال عوام نوں چمڑی تے دمڑی توں محروم کر دتا۔ پٹرول بم دی صورت وچ عوام اتے بار بار شب خون مارن والے نام نہاد نجات دہندہ اپنے بیرونی آقاواں دی مدد نال اوہدے اتے آشوب دور نوں بوہتا طول نہیں دے سکدے۔