ملک وچ ہو کیہ رہیا اے

خدائے بزرگ و برتر دی ایس کھلی ڈلھی کائنات وچ جہڑا بندہ کسے وی حربے نال’ غلط یاں ٹھیک’ اخلاقی یاں غیراخلاقی’ قنونی یاں غیرقنونی’ آئینی یاں غیرآئینی’ غرض کسے وی طریقے نال جے عمران خان نوں اقتدار توں ہٹان لئی سب توں ودھ بے تاب تے بے چین ہو رہیا سی’ اوہ مولانا فضل الرحمن صاحب سن پر ہن اوہ منظر توں بالکل غایب نیں’ پچھلے کئی دیہاڑیاں توں بالکل وی وکھائی نہیں دے رہے۔ شاہ جی توں مولانا صاحب دی اینی چپ تے پرسکون طبیعت بارے پچھن تے شاہ جی فرمان لگے کہ مولانا صاحب سکون پاروں نہیں سگوں صدمے پاروں چپ بیٹھے نیں سگوں گمان غالب اے کہ اوہ سکتے دے عالم وچ نیں۔ اوہناں دا خیال سی کہ جس طرح شتابی نال تحریک عدم اعتماد پاس ہوئی اے اوسے طرح جھٹ پٹ نال صدر مملکت دا مواخذہ وی ہو جاوے گا تے اوہ 1973ء دے آئین دے تناظر وچ مملکت خداداد پاکستان دے صدر بن جان گے۔ ایس سلسلے وچ اوہ پچھلے کافی عرصے توں اپنی رضاکار فورس انصارالاسلام توں گارڈ آف آنر لین دی وی پریکٹس کر رہے سن تاں جے عین موقعے تے اوہناں توں کوئی غلطی نہ ہو جاوے پر ستیاناس ہووے ایس معاشی ابتری دا’ کہ ایہدی وجہ نال دوجے ان گنت منصوبیاں وانگوں اوہناں دا صدر پاکستان بنن دا منصوبہ نما خواب وی ادھورا رہ گیا تے ہن اوہ ایس صدمے دے مارے گنگ نیں۔ دوجے پاسے سید یوسف رضا گیلانی دا منصوبہ وی پایہ تکمیل تک نہیں اپڑ سکیا۔ عدم اعتماد دی تحریک پیش ہون توں وی پہلے اوہناں دے فرزند ارجمند نے ساڈے اک دوست نوں کہیا سی کہ والد صاحب ہن اسلام آباد توں چیئرمین سینٹ دا حلف چک کے ای پرتن گے پر اوہ جو سینٹ دی چیئرمینی ”وٹ” تے پئی ہوئی نظر آ رہی سی اجے تک پہنچ توں دور اے تے اک واقف حال توں پچھیا تے اوہنے کہیا کہ ایس قسم دا فیصلہ کرن تے ایہدی منظوری عطا فرمان والیاں نوں اپنے پہلے فیصلے پاروں اپنی پئی ہوئی اے بھلا اوہ ہن ہور ایس قسم دا رسک کیویں لے سکدے نیں؟ انج وی کافی عرصے توں ایس ملک وچ جمہوری طاقت دا توازن ایس طرح قائم رکھیا جا رہیا اے کہ ایہنوں تھوڑے بہت فرق نال برقرار رکھیا جاوے تے جدوں دل کرے ایس فرق نوں اتے تھلے کیتا جا سکدا اے اجہے وچ بھلا اوہ سب کجھ کسے اک فریق دے ہتھ وچ کیویں دے سکدے نیں ایس لئی ایہو ہووے گا کہ صدر عارف علوی اپنے عہدے تے موجود رہن گے تے چیئرمین سینٹ صادق سنجرانی وی اپنی سیٹ تے بیٹھن گے۔ زرداری صاحب وی اوسے تنخواہ تے کم کردے رہن گے تے شہبازشریف وی اوسے طرح وزارت عظمیٰ دے منصب تے فائز رہن گے۔
ایس سارے خرابے وچ صنعتکار وزیراعظم نے اک کم بہرحال بڑی کامیابی نال کر لیا اے تے اوہ ایہ کہ اوہناں نے اپنے سارے کارپوریٹ تجربے دا فائدہ چکدے ہوئے حزب اختلاف نوں اپنی پاکٹ یونین وچ بدل لیا اے تے کسے وی صنعتکار دی ایہ سب توں وڈی کامیابی ہوندی اے کہ اوہ اپنی ملز وچ پاکٹ یونین قائم کرے۔ پاکٹ یونین دی اصطلاح اصل وچ صنعتی اداریاں وچ اجہی لیبر یونین لئی استعمال ہوندی اے جو صنعتی اداریاں دے مالکان دی ای نمک خوار تے تنخواہ دار ہوندی اے تے بظاہر اوہناں دے خلاف زبانی کلامی بیاناں دی حد تک مزدوراں نوں بہلائے رکھدی اے۔ راجہ ریاض دی شکل وچ اوہناں نے قومی اسمبلی وچ لیڈر آف دی اپوزیشن دی کرسی تے اپنی پاکٹ یونین دا نمائندہ بٹھا دتا اے تے ایس طرح اوہناں نے چیئرمین نیب توں لے کے عبوری حکومت دے قیام تک اپنے طور تے اپنی باہمی مرضی نال طے کرن دا پروگرام بنا لیا اے پر اجے راہ وچ کنے سخت مقامات آندے نیں اوہناں دا شاید اوہناں نوں بالکل اوسے طرح کوئی اندازہ نہیں جس طرح اوہناں نوں وزارت عظمیٰ سنبھالدے ہوئے اوہناں مشکلات تے مسئلیاں دا اندازا نہیں سی جو سر منڈاندے ای اولیاں وانگوں اوہناں تے برس پئے نیں۔
کسے نے اک عرب سردار توں پچھیا کہ اوہ اپنے قبیلے دا سردار کس طرح بنیا؟ عرب سردار نے دانائی دے نال انکسار دا مظاہرہ کردے ہوئے جواب دتا: قبیلے وچ میرے توں وڈے ارے لوک مر گئے سن سچ تے ایہہ وے کہ راجہ ریاض تے ایہ وی نہیں کہہ سکدے۔ اوہ ”مرزا یار” تے بالکل نہیں جے اوہناں نوں گلیاں بہرحال اوسے طرح ”سُنجیاں” ملیاں نیں جو بقول حافظ برخوردار:
گلیاں ہو جان سُنجیاں
تے وچ مرزا یار پھرے
دیدہ دلیری دا اندازہ کرو کہ جو بندہ اگلے الیکشن وچ مسلم لیگ (ن) ولوں قومی اسمبلی دے ٹکٹ دا امیدوار اے اوہ مسلم لیگ (ن) دی موجودہ حکومت وچ قائد حزب اختلاف اے۔ اینی دیدہ دلیری تے ملز وچ بنن والیاں پاکٹ یونینز وی نہیں وکھاندیاں۔ اوہ وی تھوڑا بہت پردہ تے رکھ رکھائو دا مظاہرہ کردیا ںنیں۔ ایس پاکٹ یونین نے تے حد ای مکا دتی اے۔
دوجے پاسے مہنگائی مارچ کرن والے تے غریباں دی نمائندگی دے دعویدار پاکستان پیپلزپارٹی دے چیئرمین بلاول بھٹو زرداری ہن تے قرنطینہ وچ نیں پر ایس توں پہلاں اوہ اک اجہے سرکاری دورے تے گئے سن جو ختم ہون وچ ای نہیں سی آ رہیا۔ کسے نے سید عطاء اللہ شاہ بخاری توں پچھیا کہ شاہ جی! سنیا اے ملتان وچ بڑیاں آندھیاں نیں شاہ جی نے جواب دتا نہیں زیادہ تے نہیں آندیاں’ بس اک ای آندھی آندی اے جو اپریل توں جولائی تک چلدی رہندی اے۔ ایسے طرح اپنے بلاول بھٹو زرداری وی اک اجہے دورے تے روانہ ہوئے سن جو اوہناں دے وزیر خارجہ بن دیاں ای شروع ہویا تے تقریباً اک مہینے تک چلدا رہیا پر باراں روپیے پٹرول دی قیمت ودھن تے مہنگائی مارچ کرن والے ارب پتی زادے نوں اک ہفتے دے اندر اندر پٹرول دی قیمت سٹھ روپیے فی لٹر ودھن تے مہنگائی یاد نہیں آ رہی۔ بقول چوہدری بھکن’ اجہیاں چیزاں صرف اپوزیشن وچ ہوو تے وکھائی دیندیاںنیں۔ حکومت وچ آندے ای ایس قسم دی فضولیات وکھائی دینا بند ہو جاندیاں نیں۔٭٭