بشیر احمد ……مہان گلوکارتے موسیقار

MR Shahid

ھماضی دے منے پرمنے موسیقار’ گلوکار’ گیت نگار بشیر احمد 1939 نوں کلکتہ دے اک اردو زبان بولن والے خاندان وچ پیدا ہوئے تے اوہناں نے کلکتہ ای وچ انٹر تک تعلیم حاصل کیتی۔ اوہناں نوں بچپن ای توں موسیقی نال لگائو سی ایس لئی 15 سال دی عمر وچ استاد ولایت حسین خان دے شاگرد ہو گئے تے اوہناں کولوں موسیقی دے نال نال گلوکاری دی تعلیم وی حاصل کیتی۔ فیر کجھ عرصہ مگروں جدوں ممبئی پہنچے تے استاد وڈے غلام علی خان صاحب دی سرپرستی وچ موسیقی دا گیان حاصل کردے رہے۔
بشیر احمد بنگالی نہیں سن۔ اوہناں دا تعلق دہلی دی سوداگران برادری دی اک فیملی نال سی۔ 1960 وچ بشیر احمد ڈھاکہ آ گئے جتھے اوہناں دے بہنوئی عشرت نے اوہناں دا تعارف روبن گھوش نال کروایا۔ ایہہ اوہ دور سی جدوں ڈھاکہ وچ اردو فلماں بننا شروع ہوئیاں تے بشیر احمد بطور گلوکار فلمی دنیا وچ آگئے تے سب توں پہلاں اوہناں نوں ہدایتکار مستفیض نے اپنی فلم ”تلاش” وچ گلوکاری دا موقع دتا۔ اوس فلم دے گیت بشیر احمد دے بہنوئی لکھ رہے سن جہڑے کہ مشہور فلمی گیت نگار سن تے اوہناں دا اصل نام روشن علی عشرت سی۔ فلم تلاش وچ بشیر احمد نے پہلی واری روبن گھوش دی موسیقی وچ اپنی آواز دا جادو جگایا تے اوس فلم دا ٹائٹل سونگ ”کچھ اپنی کہیے کچھ میری سنئے” فردوس بیگم دے نال گایا۔ ایہہ گیت اپنے دور دا اک یادگار تے مقبول گیت سی۔ اج وی لوکاں دے ذہن وچ محفوظ اے۔ ایس دے علاوہ اک ہور گیت ”میں رکشہ والا متوالا” وی مشہور ہویا سی۔ ایہہ اوہناں دی شروعات سی۔
بشیر احمد دی آواز نوں خدا نے اوہ صلاحیت تے تاثیر بخشی کہ اوس آواز نے لکھاں انساناں دے دلاں نوں سرور بخشیا۔ اوہناں دی سریلی آواز نے بے شمار گیتاں وچ جادو دی تاثیر پیدا کردتی تے اوہ کناں وچ رس گھولن لگی۔ بشیر احمد اپنے ہم عصراں وچ ایس لئی ممتاز سن کہ اوہ نہ صرف اک چنگے تے سریلے گلوکار سن بلکہ بہت چنگے موسیقار تے اک چنگے گیت نگار سن۔ تناں شعبیاں وچ خدا نے اوہناں نوں بے پناہ صلاحیتاں عطا کیتیاں سن۔ اک شاعر دی حیثیت نال اوہناں نے کئی گیت لکھے۔ اوہ اپنا تخلص ”بی اے دیپ” لکھیا کردے سن۔ ہدایتکار مستفیض نے اپنی فلم ”ساگر”لئی بطور نغمہ نگار بشیر احمد کولوں اک گیت لکھوایا جہڑا کہ گایا وی بشیر احمد نے خود سی۔ اوہدے بول سن ”جا ویکھ لیا تیرا پیار” ایہدی دھن موسیقار خان عطا الرحمن نے بنائی سی تے ایہہ گیت اوس دور وچ کافی مقبول ہویا۔
1964 وچ روبن گھوش نے فلم ”کارواں” کیلئے بشیر احمد کولوں گیت گوائے تے اوہناں کولوں ای گانے لکھوائے وی۔ فلم ”کاررواں” لئی اوہناں نے گیت تحریر کیتا جہدے بول سن ”جب تم اکیلے ہو گے ہم یاد آئیں گے” اوہناں نے ایہہ گیت اپنی خوبصورت آواز وچ گا کے امر گیتاں وچ شامل کر دتا۔ ایہہ گیت کافی پسند کیاگیا۔ نہ صرف گلوکاری دے حوالے نال بلکہ شاعری دے لحاظ نال وی ایہنوں پزیرائی ملی۔
1964 وچ جدوں اداکار رحمان نے اپنی ذاتی فلم ”ملن” شروع کیتی تے اوہدی موسیقی عطارالرحمن نے ترتیب دتی۔ فلم ”ملن” جہدے وچ رحمان نے اپنی اک لت گوائی سی اوس فلم لئی دوجے فنکاراں وانگوں بشیر احمد نے وی بلامعاوضہ گانے گائے تے لکھے سن۔ ایس فلم وچ بشیر احمد دے نال ملکہ ترنم نورجہاں نے بڑا خوبصورت ڈوئیٹ گایا سی جہڑا بہت مشہور ہویا سی۔ ایس گانے دے بول سن ”تم ملے پیار ملا’ دل کو قرار آگیا” ایہہ گیت سرور بارہ بنکوی مرحوم نے لکھیا سی۔
1967 وچ جدوں اداکار رحمان نے اپنی فلم ”درشن” شروع کیتی تے اوہناں دی نظر انتخاب بشیر احمد اتے سی جہڑے کہ ہن تک بطور گلوکار تے نغمہ نگار اپنی پہچان بنا چکے سن۔ رحمان نے اوہناں نوں پہلی واری بطور موسیقار اپنی فلم ”درشن” وچ موقع دتا۔ پچھلے مشرقی پاکستان دے حوالے نال فلم درشن اک ممتاز مقام رکھدی اے۔ ایس فلم دے سارے گیت بے حد مقبول ہوئے۔ ایس فلم دی خاص گل ایہہ سی کہ فلم دے گیت بشیر احمد نے بی اے دیپ دے نام توں تحریر کیتے سن تے اوہناں دی دھناں وی اوہناں نے خود کمپوز کیتیاں سن جدکہ ایہہ گیت گائے وی اوہناں نے خود ای سن۔ بشیر احمد فلم درشن وچ پہلی واری بطور موسیقار متعارف ہوئے سن۔اوہ اپنے ایس تجزیے وچ بہت کامیاب رہے۔ ہن ایہناں نوںگلوکار’نغمہ نگار دے نال نال موسیقار وی تسلیم کر لیتا گیا سی۔ درشن نہ صرف مشرقی پاکستان بلکہ مغربی پاکستان وچ وی بڑی کامیاب رہی۔ ایس فلم دی کامیابی وچ بشیر احمد دے کدی نہ بھلن والے گیت دا وی کمال سی۔ اوہناں نے بہت خوبصورت گیت گائے سن جہناں وچ ”یہ موسم یہ مست نظارے پیار کرو تو ان سے کرو’ تمہارے لیے اس دل میں کتنی محبت ہے’ دن رات خیالوں میں تجھے یاد کروں گا’ ہم چلے چھوڑ کر تیری محفل صنم’گلشن میں بہاروںمیں توہی شامل” ہین۔ وہ گانا ”چن لیا ایک پھول کو” اوہناں نے میڈم نورجہاں دے نال گایا سی۔ فلم درشن نے مقبولیت دے ایسے جھنڈے گڈے کہ ہر پاسے ایس فلم دا چرچا تے ایہدے گیتاں دی گونج سی۔ اج وی ایہناں گیتاںدا شمار بہار گیتاں وچ ہوندا اے۔ بشیر احمد اپنے گیتاں وچ پیانو’ بانسری’ ستار تے سارنگی جئے مشرقی سازاں دا استعمال بوہتا کردے سن۔ اوہ گٹار جئے اُچے سازاں دا استعمال گھٹ کردے سن۔ فلم درشن وچ گانے ”ہم چھوڑ کر تیری محفل صنم” وچ اچے سر ہون دے باوجود بشیر احمد نے پیانو نال کم لیتا تے بہت خوب لیتا۔ فلم درشن مگروں بشیر احمد نے مشرقی پاکستان وچ بنن والی ہور پنج فلماں دی موسیقی ترتیب دتی۔ جہناں وچ ”جہاں باجے شہنائی” (1968)’ کنگن (1969)’ چلو مان گئے (1970)’ مینا (1970) تے مہربان (1971) شامل نیں مگر افسوس ایہہ ساری فلماں نکام رہیاں تے اوہناں دا کوئی وی گیت مقبول نہیں ہویا۔
1970 وچ مشرقی پاکستان وچ حالات خراب ہوئے تے بشیر احمد لہور آ گئے تے ایتھے اپنی گلوکارہ بیوی مینا دے نال 1975تک رہے۔ ایس دوران اوہناں نے لہور تے کراچی دی کئی فلماں وچ گیت گائے۔ 70ء دی دہائی وچ بنن والی فلم ”سنگرش” جہڑی ڈھاکہ وچ بنی سی ایس فلم وچ بشیر احمد دے گائے ہوئے گیت سن مگر اوس ویلے پاکستان وچ جنرل ضیاء الحق دا دور آ چکیا سی۔ فلم ساز دی بے حد کوششاں دے باوجود ایہہ فلم ایتھے ریلیز نہ ہو سکی۔ 1975 وچ بشیر احمد وی مشرقی پاکستان جہڑا کہ بنگلہ دیش بن چکیا سی’ واپس چلے گئے۔
اوہ فلم دے نال نال سٹیج اتے وی گاندے رہے۔ اوہناں دا شمار لیجنڈ گلوکاراں وچ ہوندا سی۔ بشیر احمد دے مقبول گیتاں وچ ”تم سلامت رہو’ گیت گائو’ ہنسو’ میں تمہارے لیے گیت گاتا رہوں گا’ پھر ایک بار وہ نغمہ گنگنا ذرا۔ ذرا کتابوں سے نظر اٹھائیے۔ میرا دل نہ جانے کب سے تیرا پیار ڈھونڈتا ہے’ میرے سینے پہ سر رکھ دو’ میرے دل میں سما جائو” وی شامل نیں۔ بشیر احمد دا انتقال 19اپریل 2014 نوں ڈھاکہ وچ ہویا تے اپنے آبائی قبرستان وچ آسودہ خاک نیں۔

اپنا تبصرہ گھلو