فضائل حج: قرآن تے حدیث دے چانن وچ

Islami Edition

امت محمدیہ اتے حج دی فرضیت دا حکم کہڑے ویلے نازل ہویا؟ایہدے بارے وچ اہل علم دے مختلف اقوال تریخ دی کتاباں وچ ملدے نیں۔ پہلا قول ایہہ ہے کہ حج دی فرضیت دا حکم سن پنج ہجری وچ نازل ہویا۔ دوجا قول ایہہ اے کہ سنہ چھ ہجری وچ نازل ہویا۔ تیجا قول ایہہ اے کہ سنہ ست ہجری وچ نازل ہویا۔ چوتھا قول ایہہ اے کہ سنہ اٹھ ہجری وچ نازل ہویا۔ پنجواں قول ایہہ اے کہ سن نو ہجری وچ نازل ہویا۔ تاہم اکثرو بیشتر اہل علم نے دوجے قول نوں ترجیح دتی اے تے فرمایا اے کہ حج دی فرضیت دا حکم سنہ چھ ہجری وچ نازل ہویا۔ (روح المعانی:ج2′ ص230)
قرآن و حدیث وچ جتھے حج دی بہت زیادہ تاکید ‘ اہمیت تے فضیلت بیان فرمائی گئی اے تے اوتھے اوہدے ترک کرن اتے سخت سزاواں تے وعیداں وی ذکر فرمائی گئیاں نیں۔ چنانچہ قرآن مجید وچ اللہ تعالیٰ دا ارشاد اے ۔ ترجمہ: تے لوکاں وچوں جہڑے لوک ایس (بیت اللہ) تک پہنچن دی استطاعت رکھدے ہون اوہناں اتے اللہ لئی اوس گھر دا حج کرنا فرض اے) تے جے کوئی انکار کرے تے اللہ دنیا جہان دے سارے لوکاں توں بے پرواہ اے۔ سورہ آل عمران 97) اک دوجی جگہ قرآن مجید وچ حضرت ابراہیم نوں اللہ تعالیٰ فرماندے نیں۔ ترجمہ: تے لوکاں وچ حج دا اعلان کر دیو کہ اوہ تہاڈے کول پیدل آن تے دودراز دے رستیاں توں سفر کرن والی اوہناں اونٹنیاں اتے سوار ہو کے آن جہڑیاں (لمے سفر نال )دبلی ہو گئیاں ہون۔ (سورہ الحج 27)
چنانچہ ایہو ہویا کہ جدوں حضرت ابراہیم علیہ السلام نے حکم خداوندی نال اعلان فرمایا تے ویکھدے ای ویکھدے زمین دے دوردراز علاقیاں توں حج تے عمرہ دی ادائیگی لئی فرزندان اسلام قطار اندر قطار’ جوق در جوق تلبیہ پڑھدے ہوئے آ پہنچے۔
چنانچہ حضرت عبداللہ بن عباس فرماندے نیں کہ جدوں حضرت ابراہیم علیہ السلام بیت اللہ دی تعمیر توں فارغ ہوئے تے اوہناں نے عرض کیتی: اے میرے رب!کیہ میری آواز (سارے لوکاں تک) پہنچ جاوے گی؟ اللہ تعالیٰ نے فرمایا: تسیں اعلان فرمائو! آواز دا پہنچانا ساڈا کم اے۔ حضرت ابراہیم علیہ السلام نے عرض کیتا: اے میرے رب! میں کیویں اعلان کراں؟ اللہ تعالیٰ نے فرمایا: تسیں ایہہ آکھو کہ اے لوکو!تہاڈے اتے (بیت عتیق )یعنی بیت اللہ (دا حج فرض کیتا گیا اے) جدوں حضرت ابراہیم علیہ السلام نے اعلان کیتا تے (آپ دی آواز نوں زمین و آسمان دے درمیان والیاں ساریاں نے سن لیتا۔ ویکھدے نہیں کہ لوک (اج وی) زمین دے دوردراز علاقیاں توں حج تے عمرہ دا تلبیہ پڑھدے ہوئے کیویں (جوق در جوق) دیوانہ وار چلے آندے نیں؟ایہہ اوسے اعلان دا اثر اے (مستدرک حاکم:3464)
ایسے طرح حدیث شریف وچ وی حج کرن لئی بہت سارے فضائل ہوئے نیں۔ حضرت ابن عمرکولوں مروی اے کہ رسول اللہۖ نے ارشاد فرمایا: اسلام دی بنیاد پنج چیزاں اتے اے (1) ایس گل دی گواہی دینا کہ اللہ تعالیٰ دے علاوہ کوئی اللہ نہیں تے ایہہ کہ حضرت محمدۖ اللہ تعالیٰ دے آخری رسولۖ نیں۔ (2) نماز نوں قائم کرنا (3) زکوٰة دینا (4) بیت اللہ شریف دا حج کرنا (5) رمضان المبارک دے روزے رکھنا (صحیح بخاری 8)
ایسے طرح اک واری حضرت جبرائیل علیہ السلام حضور نبی اکرمۖ دی خدمت وچ حاضر ہوئے تے عرض کیتا:اے محمدۖ! مینوں اسلام دے بارے دسو کہ ایہدی حقیقت کیہ اے؟۔ آنحضرتۖ نے ارشاد فرمایا: اسلام ایہہ اے کہ تسیں ایس گل دی گواہی دیو کہ اللہ تعالیٰ دے علاوہ کوئی اللہ نہیں تے ایہہ کہ حضرت محمدۖ اللہ تعالیٰ دے رسول نیں۔ تسیں نماز قائم کرو۔ زکوٰة ادا کرو’ رمضان المبارک دے روزے رکھو۔ جے بیت اللہ شریف ول رستہ چلن دی استطاعت رکھدے او تے اوہدا حج کرو۔ حضرت جبرائیل علیہ السلام نے عرض کیتا کہ تسیں سچ فرمایا: صحیح مسلم 12
حضرت ابو ہریرہ کولوں روایت اے کہ اک دن رسول اللہۖ نے سانوں خطبہ دتا تے ارشاد فرمایا کہ اے لوکو! تہاڈے اتے اللہ تعالیٰ نے حج فرض کیتا اے لہٰذا حج ادا کرو! (صحیح مسلم1337) حضرت سمرہ بن جندب کولوں روایت اے کہ رسول اللہۖ نے ارشاد فرمایا: نماز قائم کرو تے زکوٰة ادا کرو۔ بیت اللہ دا حج کرو! تے اوہدا عمرہ کرو تے اپنے ایمان و اعمال صالحہ اتے (استقامت) یعنی دوام تے ہمیشگی (اختیار کرو)! ایہدے نتیجہ وچ تہانوں مخلوق دے نال معاملات وچ (استقامت) یعنی دوام تے ہمیشگی) عطا کیتی جاوے گی (المعجم الکبیر للطبرانی:6897حضرت ابوالدردائ کولوں روایت اے کہ رسول اللہۖ نے فرمایا: کیہ میں تہانوں ایسی چیز دے بارے نہ دساں جہڑی درجہ وچ (نفلی) روزے (نفلی) نماز تے (نفلی) صدقے توں وی بوہتی فضیلت والی اے۔ صحابہ کرام نے عرض کیتی: ضرور دسو! آپۖ نے فرمایا: اوہ لوکاں دے درمیان ”صلح صفائی” کرانا اے۔ ایس لئی کہ باہمی ناچاقی تے پھٹ دین نوں ختم کرن والی چیز اے۔ (جامع الترمذی،رقم الحدیث: 2433)
حضرت انس بن مالک کولوں روایت اے کہ سانوں (یعنی شہر دے لوکاں نوں) رسول اللہۖ توں (غیر ضروری) چیزاں بارے سوال کرن توں روک دتا گیا سی ایس لئی اسیں چاہندے ساں کہ کوئی دیہاتی عقل مند شخص آوے تے اوہ رسول اللہۖ نوں سوال کرے تے اسیں اوہدا جواب سنیے۔ چنانچہ اک دیہاتی شخص آیا تے عرض کیتا:اے محمدۖ!ساڈے کول تہاڈا قاصد آیا تے اوہنے سانوں ایہہ گل دسی کہ تسیں ایہہ سمجھدے او کہ اللہ تعالیٰ نے آپ نوں اپنا رسول بنا کے ایس دنیا وچ گھلیا اے۔ آپۖ نے فرمایا کہ اوہنے سچ آکھیا۔
ایس توں علاوہ وی اوس دیہاتی شخص نے آپ کولوں بیسیاں سوال کیتے من جملہ اوہناں وچوں اک ایہہ وی سی کہ :آپ دا قاصد ایہہ یقین ظاہر کردا اے کہ ساڈے وچوں ہر اوس شخص اتے بیت اللہ دا حج کرنا فرض اے جہڑا اوس پاسے رستہ چلن قدرت تے استطاعت رکھدا ہووے۔ آپۖ نے فرمایا کہ :اوہنے سچ آکھیا (صحیح مسلم’12)
حضرت ابو ہریرہ کولوں روایت اے کہ رسول کریمۖ نے ارشاد فرمایا کہ جس شخص نے (خاص)اللہ تعالیٰ لئی حج کیتا ‘ اوہدے وچ نہ کوئی فحش گوئی کیتی تے نہ کوئی گناہ کیتا تے اوہ شخص اوس دن وانگوں اپنے گھر ول واپس لوٹدا اے جہڑے دن کہ اوہدی ماں نے اوہنوں جنیا سی (صحیح بخاری 1521) اک دوجی حدیث وچ آندا اے کہ نبی کریمۖ نے ارشاد فرمایا کہ حج تے عمرہ نوں رلا کے کرو کیوں جے ایہہ دونویں فقر تے گناہواں نوں ایس طرح دور کردے نیں جیویں کہ بھٹی سونے’ چاندی تے لوہے دے میل نوں دور کردی اے تے حج مبرور (یعنی حج مقبول) دی جزا تے اوہدا بدلہ (جنت دے علاوہ)تے (کجھ وی نہیں اے) جامع ترمذی 933
اک دوجی حدیث وچ حضور اقدسۖ دا ارشاد مروی اے کہ حج کرن والے تے عمرہ کرن والے اللہ تعالیٰ دے پروہنے نیں۔ جے اوہ دعا منگن تے اللہ تعالیٰ قبول فرماوے۔ جے اوہ استغفار کرن تے اللہ تعالیٰ اوہناں دی مغفرت کر دیوے تے اوہناں نوں بخش دیوے (سنن ابن ماجہ 2892
حدیث وچ آندا اے حضرت ابو امامہ الباہلی توں مروی اے کہ رسول اللہۖ نے ارشاد فرمایا کہ جہڑے شخص لئی کوئی ظاہری ضرورت حج توں مانع رکاوٹ پان والی نہ ہووے یا کسے ظالم بادشاہ ولوں اوہنوں کوئی روک ٹوک نہ ہووے یا اوہنوں کوئی ایسا مرض لاحق نہ ہووے کہ جہڑا اوہنوں حج توں روک سکے تے اوہ حج کیتے بغیر (اوسے حال وچ) مر جاوے تے چاہے یہودی ہو کے مرے یا نصرانی ہو کے مرے (سنن دارمی 1826)رسول اللہۖ نے فرمایا: سچائی ایسا عمل اے جہڑا نیکی دی راہ اتے چلاندا اے تے نیکی والا رستہ سدھا جنت جاندا اے تے بے شک بندا سچ بولدا رہندا اے ایتھوں تک کہ اللہ تعالیٰ دے کول اوہ ”صدیق” بن جاندا اے تے جھوٹ ایسا عمل اے جہڑا برائی دی راہ اتے چلاندااے تے برائی والا رستہ سدھا جہنم جاندا اے تے بے شک جدوں کوئی بندا جھوٹ دی عادت پا لیندا اے اوہ جھوٹ بولدا رہندا اے ایتھوں تک کہ اوہ اللہ تعالیٰ دے کول کذاب لکھ دتا جاندا اے۔ (صحیح مسلم’ رقم الحدیث:6803)
ارباب سیرو تریخ نے لکھیا اے کہ اک واری حضرت عبداللہ بن مبارک رحم اللہ علیہ حج نوں جا رہے سن۔ رستے وچ اک مقام اتے اک کڑی نوں ویکھیا کہ کوڑے اتوں کجھ چک رہی اے۔ ذرا ہور کول گئے تے کیہ ویکھدے نیں کہ کڑی اک مری ہوئی چڑیا نوں چھیتی چھیتی اک چیتھڑے وچ لپیٹ رہی اے۔ عبداللہ بن مبارک اوتھے رک گئے تے حیرت تے محبت بھرے لہجے وچ اوس کڑی نوں پچھن لگے دھی! ایس مردار چڑیا دا کیہ کریں گی؟اپنے پھٹے پرانے تے میلے کچیلے کپڑیاں نوں سنبھالدے ہوئے کڑی دی اکھاں وچ اتھرو امڈ آئے۔ ریدھی ہوئی آواز وچ بولی:چچا جان! میرے والد ماجد نوں کجھ ظالماں نے قتل کر دتا اے۔ ساڈا سارے مال و اسباب ساڈے کولوں کھوہ لیتا اے۔ ہن اک میں آں تے اک میرا بھرا اے۔ اللہ تعالیٰ دے سوا ساڈا کوئی سہارا نہیں اے۔ ہن ساڈے کول نہ کھان پین لئی کجھ اے تے نہ ای پان لئی۔ بھرا گھر وچ بھک نال نڈھال پیا ہویا اے۔ میں باہر نکلی کہ شاید کھان نوں کجھ مل جاوے ۔ ایتھے آئی تے ایہہ مردار چڑیا پئی ہوئی ملی جہڑی ساڈے لئی کسے وی نعمت توں گھٹ نہیں اے۔ ایہہ آکھدے ہوئے کئی دناں توں فاقے دی ماری ہوئی ننھی پری پھٹ پھٹ کے رون لگی۔
حضرت عبداللہ بن مبارک رحم اللہ علیہ دا دل بھر آیا۔ بچی دے سر اتے ہتھ ر کھیا تے خود وی رون لگ گئے۔ اپنے خزانچی نوں پچھیا: ایس ویلے تہاڈے کول کنی رقم اے؟ خزانچی نے آکھیا: حضرت! اک ہزار اشرفیاں نیں۔ عبداللہ بن مبارک نے فرمایا: میرے خیال وچ مرو پہنچن لئی 20اشرفیاں کافی ہون گئیاں۔ خزانچی نے جواب دتا: جی ہاں! گھر تک پہنچن لئی 20اشرفیاں کافی نیں۔ عبداللہ بن مبارک نے فرمایا: 20اشرفیاں اپنے کول رکھ لو’ اوہدے علاوہ باقی ساری اشرفیاں ایس کڑی نوں دے دیو۔ اسیں ایس سال حج نوں نہیں جاواں گے’ ایہہ حج کعبہ شریف دے حج توں وڈا حج اے۔
واقعی کسی نے سچ آکھیا اے: دل بدست آور کہ حج اکبر است (تاریخ اسلام’ ج4’ص291)
اللہ رب العزت سانوں توفیق حج ‘ فہم مقاصد حج تے جذبہ ایثار جان و مال عطا فرماوے۔

اپنا تبصرہ گھلو