محمد نوید قلندری دی ” پیار دی کھیڈ”

ڈاکٹر یونس احقر ہوریں محمد نوید قلندری دی شاعری بارے لکھدے نیں:
نوید قلندر دی شاعری دا مطالعہ یقین دواندا اے کہ اپنی حیاتی دے حوالیوں اوہ صرف وقت نہیں گزار رہیا اے سگوں اوہدی نظر اپنے سارے آل دوالے نوں بڑی گوہ نال ویکھ رہی اے۔اوہ اپنے قاریاں نوں ہر معاشی کوجھ توں آگاہ وی کر رہیا اے۔”
اَج دا شاعر اپنے آل دوالے نوں گوہ وچ لیائے بغیر نہیں رہ سکدا اے ایسے لئی ایس شاعر نے ویسبھ توں ودھ مشاہدے توں کم لیا اے تے اپنے آل دوالے جو واپر رہیا اے اوس نوں لفظاں دا رُوپ دِتا اے۔پیار دی جو کھیڈ ایس سنسار وچ ہو رہی اے اوہ وی نوید قلندر دے اکھوں پروکھے نہیں ہوئی اے ایسے لئی اوہناں نے کتاب دا ناں وی ” پیار دی کھیڈ” رکھیا اے تے ایس نوں کھیڈن والیاں دی نفسیات توں وی چنگے جانو نظر آندے نیں:
اِک سوہنی کُل سنسار دی کھیڈ
ہے بندیاں دے کردار دی کھیڈ
اِس جگ دے اُتے یار نوید
بس کھیڈاں گے ہُن پیار دی کھیڈ
محمد نوید قلندری اپنی ماں بولی نال وی پیار کردے نیں تے اوس دے سیوک ہوون دے وی دعوے دار نیںجویں کہ اپنی نظم ”ماں بولی” وچ لکھدے نیں:
سیوا کار پنجابی زبان دا ہاں
تائیوں بھیت میں ایس دے کھولنا واں
ایسے لئی نوید قلندری میں اپنی
ماں بولی سدا بولنا واں
دیس پیار دی گل ” میں تے رہنا پاکستان” وچ نظر آندی اے
اوہناں نے جو دُنیا دے روپ ویکھے نیں اوس دا ذکر وار وار کردے نیں
ہار کے بیٹھ جاون دی تھاں اوہ ہمت تے حوصلے دا سبق دیندے نیں تاں جو رہندی دُنیا وچ مثال بن سکن۔
جیکر ساڈی دھرتی اُتے گُھپ ہنیرا ہویا تے
اَسماناں توں جا کے روشن تارے توڑ لیاواں گے
ودھدے انھیر نوں ذاتاں پاتاں دے فرق نوں تے ظلم و ستم نوں محمد نوید قلندری مٹدا ویکھنا چاہندے نیں اوہ چاہندے نیں ساڈی بھاگاں والی دھرتی دی ہر ہر ڈالی مہکدی ہووے تے ایسے ای گل دا اظہار” لائو نعرہ تکبیر” وچ کردے نیں۔
” دُنیا کھیل تماشا” وچ دُنیا دے عارضی پن نوں تے انسان دے فانی ہوون نوں بیان کیتا گیا اے ایہ دُنیا اجہیا کھیل تماشا اے جتھے ہر کوئی آندا اے تے اپنا اپنا کردار وکھا کے ٹُر جاندا اے ایسے ای موضوع نوں شیکسپئر نے وی بیان کیتا اے۔محمد نوید قلندری عشق دی بازی لاون والیاں دا وی ذکر کردے نیں جو جِت ہار وچ نیں تے چنگے عمل کردے اوہ لوک وی ایس کھیل تماشے وچ رُجھے ہوئے نیں پر اوہناں دی نظر ایس دُنیا توں بعد والی دُنیا تے اَکھ اے۔
مزاحیا نظم ” مُلاں” توں وکھ کئی نظماں نے جہناں وچ ہلکا پھلکا مزاح ویکھیا جا سکدا اے پر اوہناں نوں بیانن وچ فنی پکیائی دی جہڑی لوڑ سی اوہ وکھالی نہیں دیندا جس کر کے ایہو جہیاں نظماں وچ تاثر دی گھاٹ ملدی اے۔
ایس شعری پراگے نوں تِن بھاگاں وچ ونڈیا گیا اے پہلے بھاگ اندر نظماں ، دوجے بھاگ وچ غزلاں جد کہ تیجے بھاگ وچ چومصرعے شامل کیتے گئے نیں۔پنجابی نظم تے غزل دی جے ادبی سفر نوں ویکھیے تاں ایہ شاعر ادبی لحاظ نال اجے تیکر چالھی پنجاہ ورھے پہلاں دے دَور وچ جیندا پیا اے۔پر پتا نہیں کیوںزاہد بُخاری انج کہندے نیں:نوید قلندری نے وکھ وکھ عنواناں دیاں نظماں تے چھوٹیاں وڈیاں بحراں دیاں غزلاں لکھ کے قادرالکلام شاعر ہون دا ثبوت دتا اے”
جے مجموعی طور تے ایس شاعر دے موضوعات ول ویکھے تاں ایہ پتا چلدا اے کہ اوہ نویکلے موضوعات دی گھاٹ دا شکار نیں۔محمد نوید قلندری نے ایس کتاب دا انتساب اپنے اُستاد و مُرشد محمد اکرم قلندری دے ناں کیتااے۔ ایہ کتاب 2021وچ چھاپے چڑھی اے ،ایس کتاب دے کُل صفحے160نیں تے مُل تِن سو روپے اے ایس دے پبلشر مکتبہ فیضان قلندریہ نیں۔٭