منشیات توں انکار… زندگی نال پیار

پاکستان سنے دنیا بھر وچ انسداد منشیات دا عالمی دن 26جون نوں منایا جاندا اے جہدا مقصد معاشرے دے لوکاں وچ منشیات دے مضر اثرات نوں اجاگر تے آگاہی دینا اے۔ ایس حوالے نال پاکستان دے مختلف شہراں وچ واکس’ مذاکرے تے تقریباں منعقد کیتی جاندیاں نیں۔ دنیا بھر وچ لکھاں’ کروڑاں افراد مختلف قسماں دی منشیات استعمال کر رہے نیں جہناں وچ گھٹ عمر بچیاں توں لے کے 65 سال دے بزرگ افراد تے زنانیاں وی شامل نیں۔ دنیا بھر وانگوں پاکستان وچ وی منشیات استعمال کرن والے افراد دی تعداد وچ ہر سال وادھا ہوندا اے۔ طبی تے نفسیاتی ماہراں دے مطابق نویں نسل وچ نشہ آور اشیا دے استعمال دی بہت ساری وجوہات ہو سکدیاں نیں۔
آخر کیہ وجہ اے کہ لوک نشہ نوں اپنا دشمن سمجھن دے باوجود اوہدا آسانی نال شکار ہوندے نیں۔ ماہراں دا آکھنا اے کہ ایہدے کئی اک کارن نیں۔ سب توں عام کارن مایوسی اے۔ اپنی زندگی توں’ حالات توں مایوسی۔ عدم تحفظ دا شدید احساس’ ناانصافی’ مہنگائی ایس دے علاوہ دولت دی انتہائی فاروانی یا انتہائی غربت’ دوستاں دی بری صحبت’ جنس مخالف دی بے وفائی’ اپنے مقصد وچ نکامی’ حالات دی مار’ معاشرتی عدم مساوات ناانصافی وغیرہ ‘ نویں نسل اک دوجے دی نقل وچ منشیات دا استعمال فیشن دے طور تے وی شروع کردی اے۔
دولت دی انتہائی فراوانی یا انتہائی غربت ہووے’ دونویں صورتاں وچ انسان دے بہکن تے ایس طرح دی خرافات وچ پین دے امکانات ودھ جاندے نیں۔ بوہتی دولت انسان نوں مادیت پرست بنا دیندی اے تے غربت کفر تک لے جاندی اے۔ ایسے طرح دوستاں دی بری صحبت’ اپنے مقصد وچ نکامی’ حالات دی بے چینی تے مایوسی’ معاشرتی عدم مساوات ناانصافی’ والدین دے گھریلو تنازعات وی نشہ دے آغاز دے کارن ہو سکدے نیں۔
پاکستان وچ منشیات استعمال کرن والے 80لکھ افراد وچوں 78فیصد مرد جد کہ 22فیصد زنانیاں شامل نیں۔ دنیا بھر وانگوں ہر سال پاکستان وچ وی منشیات دے عادی افراد دی تعداد وچ وادھا ہو جاندا اے جہدے توں پاکستان دنیا بھر وچ منشیات استعمال کرن والا سب توں وڈا ملک سمجھیا جاندا اے۔ ہر لنگدے دن دے نال منشیات دے استعمال وچ وادھا عام گل بن چکی اے۔ کم و بیش دس لکھ افراد نشے دے مکمل طور تے عادی ہو چکے نیں۔
منشیات اک ناسور دی صورت اختیار کر چکیا اے۔ منشیات دی لعنت دی وجہ نال سماجی’ معاشرتی تے معاشی مسئلے جنم لیندے نیں۔ ایہدا دھندہ کرن والے انسانیت دے قاتل نیں تے منشیات دا مکروہ کاروبار کرن والیاں دی جگہ صرف جیل اے۔ تعلیمی اداریاں دے اندر تے باہر منشیات دا کاروبار کرن والیاں تے نوجوان نسل دی رگاں وچ زہر گھولن والیاں نوں سخت سزاواں ملنی چاہیدیاں نیں۔
منشیات دے عادی افراد نوں نہ صرف نظرانداز کیتا جاندا اے بلکہ بدقسمتی نال اوہناںنوں کسے توجہ دا مستحق نہیں سمجھیا جاندا۔ منشیات دے عادی افراد نوں بے چارگی تے کسمپرسی دی حالت وچ مرن لئی چھڈ دتا جاوے تے ایہہ ظلم دے مترادف ہووے گا۔ منشیات دی عادت دا شکار لوگ نفرت توں ودھ تہاڈے پیار’ محبت تے ہمدردی دے مستحق ہوندے نیں۔
منشیات دنیا دے پسماندہ’ ترقی پذیر تے ترقی یافتہ ملکاں دے نوجواناں نوں یکساں طور تے شکار کر رہیا اے۔ منشیات دا کاروبار اینا منظم ہو چکیا اے کہ حکومتاں توں وی طاقت ور مافیا بن چکیا اے۔ ایہدے باوجود پاکستان نے انسداد منشیات تے ایہدی سمگلنگ دی روک تھام لئی دنیا دے کسے وی ملک دے مقابلہ وچ سب توں ودھ کم کیتا اے۔ خاص طور تے اینٹی نارکوٹکس فورس نے منشیات دی نقل و حمل نوں روکن دے حوالے نال نمایاں کردار ادا کیتا اے۔ ایسے وجہ نال پاکستان نوں بین الاقوامی معیار دے مطابق ڈرگ فری ملک قرار دتا گیا اے۔
دنیا بھر وچ منشیات دا استعمال دوز بروز ودھدا جا رہیا اے۔ ایہدی روک تھام لئی عوام نوں ایہدے نقصاناں توں آگاہ کرن لئی اقوام متحدہ نے ہر سال 26جون نوں منان دا فیصلہ کیتا اے۔ ایس دن دے منان دا ایہہ وی مقصد اے کہ ایہناں اسباب دا سراغ لایا جاوے تے فیر اوہناں نوں دور کیتا جاوے جہدی وجہ نال نویں نسل منشیات دی لعنت دا شکار ہوندی اے۔
عالمی ادارہ صحت دی اک رپورٹ دے مطابق ایس ویلے دنیا بھر وچ 31کروڑ 50لکھ افراد منشیات دا استعمال کر رہے نیں۔ اوہناں وچ زیادہ تر 15 سال دے نوجوان توں لے کے 65 سال دے افراد نیں۔ ایہناں وچ زنانیاں وی شامل نیں جد کہ دنیا بھر وچ ہر سال 35 توں 40لکھ افراد منشیات دے استعمال دی وجہ نال ہلاک ہو جاندے نیں۔ پاکستان وچ وی منشیات دے عادی افراد دی تعداد وچ مسلسل وادھا ہو رہیا اے۔ایسے افراد دی صحیح تعداد معلوم کرن لئی پورے ملک وچ اک سروے کران دی لوڑ اے تاں جے اوہناں دا علاج کیتا جا سکے تے ہور لوکاں نوں منشیات دے نشہ کرن توں بچایا جا سکے۔
حکومت تے منشیات دے خاتمے لئی اپنا کم کر رہی اے تاہم ایہہ صرف حکومت دی ذمہ واری نہیں بلکہ منشیات دے خاتمے لئی حکومت دے نال معاشرے دے دوجے طبقیاں نوں وی اگے آنا ہووے گا تے منشیات توں پاک معاشرے لئی ساریاں نوں رل کے جدوجہد کرنی ہووے گی۔
اک عام اندازے دے مطابق کم و بیش 95لکھ افراد منشیات دا استعمال کردے نیں جہناں وچوں 22فیصد دیہاتی آبادی تے 38 فیصد شہری آبادی شامل اے۔ جہدے وچ زیادہ تر نوجوان شامل نیں جد کہ مرد حضرات دے علاوہ ہن نوجوان زنانیاں دی وڈی تعداد وی ایس لت دا شکار ہو رہی اے بلکہ ہو چکی اے۔ ایہناں وچ اکثریت اوہناں زنانیاں دی اے جہڑی بہت امیر نیں یا جہناں دا کم جسم فروشی اے۔ پاکستان وچ ہر سال سگریٹ تے شراب دے علاوہ صرف منشیات (چرس’ افیون’ ہیروئن وعیرہ) اتے 50 ارب توں ودھ روپے خرچ کیتے جاندے نیں۔
پاکستان وچ اسلام آباد’ کراچی تے کوئٹہ وچ اک اک ڈرگ ٹریٹمنٹ سنٹر بنایا گیا اے جتھے نشے دے مریضاں دا علاج وغیرہ کیتا جاندا اے۔ ایہناں ہسپتالاں وچ ہر سال تقریباً تن ہزار توں ودھ نشے دے مریضاں دا علاج کیتا جاندا اے۔ ایہناں سنٹراں وچ مفلس تے نادارا فراد دا علاج مفت وی کیتا جاندا اے۔
تقریباً سارے مذہباں دی کتاباں مثلاً گیتا’ رامائن’ تورات تے انجیل تے قرآن کریم وچ حرمت شراب دے خاص حوالے ملدے نیں۔ دین اسلام وچ شراب (نشہ) حرام قرار دے کے زنا’ چوری’ جوئے’ صنم پرستی تے شرک جئے گناہ کبیرہ وچ شامل کیتا اے (سورة البقرہ) نبی کریمۖ نے شراب دے بنان’ لبھن’ ویچن ‘ خریدن تے اوہدی قیمت کھان وغیرہ توں متعلق ہر کم اتے لعنت فرمائی اے۔ ہر نشہ آور شے خمر اے تے ہر خمر حرام اے۔ا یس حدیث شریف دی رو توں ہر نشہ حرام اے۔
ایس لئی ”منشیات توں انکار” کرنا چاہیدا اے تے اپنی خوبصورت ”زندگی نال پیار” کرنا چاہیدا اے کیوں جے منشیات دے استعمال توں صرف اک بندے دی زندگی تباہ نہیں ہوندی بلکہ اوہدی ماں دی تربیت’ بھین دا پیار’ بھراں دی دوستی’ پیو دی محبت تے بیوی بچیاں دی زندگی بھر دی خوشیاں سب کجھ ختم ہو جاندا اے کیوں جے منشیات دا دوجا نام ”موت” اے۔