پِلاک دے پربندھ ہیٹھ ڈاکٹر سعادت سعید ولوں

پنجاب انسٹیٹیوٹ آف لینگوئج’ آرٹ اینڈ کلچر (پلاک) ‘ محکمہ اطلاعات و ثقافت پنجاب دے پربندھ ہیٹھ ڈاکٹر سعادت سعید نے ”وحدت الوجود تے اج دا سماج” دے موضوع اتے لیکچر دتا۔ اوہناں نے آکھیا کہ وحدت الوجود دا نظریہ سب توں پہلاں شیخ ابن العربی نے پیش کیتا۔ ایس نظریے دے تحت ساری مخلوقات دے اندر اللہ دی روح موجود اے۔ ایس نظریے دے پیش کرن دا مقصد طبقاتی نظام دی نفی’ استحصال دا خاتمہ’ انساناں نوں اک دوجے دے کول لیانا تے محبت امن تے روداری دی فضا قائم کرنا سی۔
انسان دی تخلیق توں پہلاں اللہ تعالیٰ دی عبادت لئی فرشتے موجود سن۔ انسان دی تخلیق دا مقصد اللہ دی عبادت دے علاوہ اوہدی بنائی ہوئی مخلوق نال پیار کرنا اے جہڑا اوہدی مخلوق نال بوہتا پیار کردا اے اوہ اوہنا ای اللہ تعالیٰ دے کول ہو جاندا اے۔ اج دے دور وچ انساناں وچوں انسانیت ختم ہوندی جا رہی اے۔ سوچنا چاہیدا اے کہ ہر انسان نوں پیدا کرن والی ذات اللہ تعالیٰ دی اے تے اسیں سارے حضرت آدم علیہ السلام دی اولاد آں۔ فیر کیوں اسیں انساناں وچ نفرت دے بیج بو رہے آں۔ ساڈے اندر دوجیاں دا درد محسوس کرن والا دل کیوں نہیں اے۔ہر انسان اپنے مفاد لئی دوجے نوں ظلم تے زیادتی دا نشانہ بنا رہیا اے۔ دنیا وچ امن قائم کرن لئی ضروری اے کہ وحدت الوجودی نظریے دا پرچار کیتا جاوے۔