مستانہ ۔۔۔ تھیٹرتے ٹی وی دا بے مثال اداکار

تھیٹر تے ٹیلی ویژن دے منے پرمنے مزاحیہ اداکار مستانہ دا پیدائشی نام مرتضیٰ حسن سی تے اوہناں دا تعلق پہلواناں دے شہر گوجرانوالہ توں سی۔ اوہ ملبوسات اتے کڑھائی دا کم کردے سن۔ اوہناں دی حاضڑ جوابی تے دلچسپ گل بات اتے اوہناں دے دوست احباب اوہناں نوں سٹیج ڈرامیاں نال وابستگی دا مشورہ دیندے۔ مستانہ نے 1973 وچ سٹیج دی دنیا وچ قدم رکھیا تے 38 سالہ لمے کیرئیر دے دوران بطور کامیڈین کم و بیش ڈیڑھ ہزار سٹیج ڈرامیاں وچ یادگار کردار نبھائے۔ اوہناں دے مقبول ڈرامیاں وچ بشیرا ان ٹربل’ بابا ڈانگ’ عاشقو غم نہ کرنا’ کوٹھا’ شاباش بیگم تے شرطیہ مٹھے قابل ذکر ہین۔
مستانہ نوں پی ٹی وی دی ڈرامہ سیریز ”شب دیگ” وچ ”انکل کیوں” دے کردار توں ملک گیر پذیرائی ملی۔ مستانہ تے ببوبرال دی جوڑی نوں بہت پسند کیتا گیا تے سارے پروڈیوسر اوہناں نوں اکٹھے کاسٹ کرن نوں ترجیح دیندے سن۔ اوہ دو سالاں توں بہاولپور وچ بھرا دے گھر گوشہ نشینی دی زندگی بسر کر رہے سن جد کہ داڑھی رکھ کے پنج وقت دی نماز شروع کردتی سی۔ اوہناں دی جمع پونجی جوہر ٹائون لہور دا پلاٹ سی جہدے اتے جعلی عامل نے قبضہ کر رکھیا اے۔ اوہ پلاٹ واگزار ہو جاندا تے اوہنوں ویچ کے علاج کرایا جا سکدا سی۔ مستانہ کجھ سال سٹیج نوں خیرباد کہن مگروں بہاولپور منتقل ہو گئے سن۔ پنج سال پہلاں سٹیج ڈرامیاں وچ فحاشی اتے قابو پان لئی جدوں پلس نے تھیٹراں اتے چھاپے مارنے شروع کیتے تے ناز تھیٹر وچ اک پولس اہلکار نے ڈرامے دے دوران شائقین دے سامنے اوہناں نوں چپیڑ ماری تے گالاں کڈھیاں جہدے تے اوہ خاصے دلبرداشتہ ہوئے تے پلس حراست توں چھٹن مگروں سٹیج نوں ہمیشہ لئی خیرباد کہہ دتا۔
مستانہ دا آکھنا سی کہ میں ساری عمر فن دی خدمت کیتی لیکن جس طرح دا سلوک پلس والیاں نے میرے نال کیتا اوہدے مگروں ہور کم کرنا میرے بس وچ نہیں۔ میں اوہ کم نہیں کر سکدا جہدی عزت نہ ہووے۔ اوہدے مگروں اوہ بہاولپور منتقل ہو گئے تے سپورٹس دے سامان دی دکان کر لیتی سی۔ اوہناں نوں شوگر’ بلڈ پریشر تے ہیپا ٹائٹس دے مرض نے گھیر لیتا سی۔ 38 سال تک شائقین دے چہریاں اتے مسکراہٹاں بکھیرن والا ورسٹال فنکار مستانہ 11اپریل 2011 نوں وفات پا گیا۔ اوہدی آخری آرامگاہ بہاولپور دے قبرستان نور شاہ بخاری وچ اے۔ اوہناں نے اپنے پسماندگان وچ اک بیوہ تے حافظ قران پتر چھڈیا اے۔
اداکار مستانہ دے والد پلس ملازم سن۔ اوہ نہیں چاہندے سن کہ مستانہ اداکاری کرے مگر اوہناں دا بے شمار شوق اوہناں نوں اداکاری ول لے گیا۔ اوہناں نے گوجرانوالہ دے تھیٹر توں اپنے فن سفر دا آغاز کیا۔ تھیٹر دے منے پرمنے رائٹر تے ڈائریکٹر شاہد اعجاز نے اوہناں نوں تھیٹر اتے متعارف کرایا تے اپنے ڈرامے ”پیسہ بولتا ہے” وچ کاسٹ کیتا۔ مستانہ اپنے پہلے ڈرامے توں ای ہٹ ہو گئے۔ کجھ عرصہ گوجرانوالہ تھیٹر اتے کم کرن مگروں اوہ لہور آ گئے تے تھیٹر دی منی پرمنی شخصیت فخری احمد نال اوہناں دی ملاقات ہوئی جہڑے اوہناں نوں الحمرا وچ منے پرمنے رائٹر تے ڈائریکٹر ناہید خانم دے کول لے گئے جہدے مگروں مستانہ نے لہور وچ سٹیج ڈرامے شروع کر دتے۔
تھیٹر دے نال نال مستانہ نے کجھ ٹی وی ڈرامیاں وچ وی کم کیتا جہناں وچ ڈرامہ ”شب دیگ” بہت مقبول ہویا۔ ایہہ ڈرامہ منے پرمنے کالم نگار’ ڈرامہ نویس عطاء الحق قاسمی نے پی ٹی وی لئی لکھیا۔ مستانہ نے اداکار ببوبرال دے نال رل کے ”شرطیہ مٹھے” دے نام توں اک فلم وی پروڈیوس کیتی جہڑی باکس آفس اتے کامیابی حاصل نہ کر سکی۔