ڈاکٹر سلیم واحد سلیم

ڈاکٹر سلیم واحد 1921ء وچ پیدا ہوئے جہناں نے بڑی خاموشی نال اردو دی ڈھیر خدمت کیتی۔ کشمیری النسل’ خلیفہ عبدالواحد بینک آف تہران وچ جنرل منیجر دے عہدے تے فائز سن۔ ایسے دوران تاجاری شہزادی محترمہ فخرالسادات نال آپ دا نکاح ہویا۔ ایہناں دے بطن چوں ڈاکٹر سلیم واحد سلیم’ محترمہ اختر ملک تے محترمہ شمس پیدا ہوئیاں۔ ڈاکٹر سلیم واحد سلیم جدوں یاراں ورھے دے ہوئے تے ایہ خانوادہ ہندوستان آیا۔ محترمہ فخرالسادات نوں ہندوستان دی آب و ہوا راس نہ آئی تے اوہ چھیتی ای ایس دنیا فانی توں رخصت ہو گئیاں۔ ایہدے بعد تناں بچیاں دی پرورش دا ذمہ اعزہ نے اٹھا لیا۔ ڈاکٹر سلیم واحد سلیم دی کفالت’ تعلیم و تربیت دا ذمہ علی گڑھ مسلم یونیورسٹی’ طبیہ کالج دے تاسیس پرنسپل ڈاکٹر عطاء اللہ بٹ نے میرس روڈ والے بنگلے بٹ کدہ وچ کیتی۔ بٹ کدہ تے رشیداحمد صدیقی دا اک مشہور لطیفہ وی اے۔ علی گڑھ توں ڈاکٹر سلیم واحد سلیم نے بی یو ایم ایس کیتا۔ بعد وچ ڈاکٹر سلیم واحد سلیم اعلیٰ تعلیم لئی لندن گئے۔ جتھوں آپ نے ایم آر اے ایس دی ڈگری حاصل کیتی۔ ایس توں علاوہ بی بی سی وچ فارسی انائونسر دی خدمات وی نبھائیاں۔
ایران وچ اپنی زندگی دے سنہرے دن گزارن مگروں ایس عظیم شاعر نوں لہور ورگی مردم خیز تے علی گڑھ ورگی اردو نواز فضاواں وچ ساہ لین دا موقع وی ملیا تے انگلستان دی خیرہ کن تے ہوشربا تہذیب نے ایہناں دے مشاہدے نوں جلابخشی۔ تقسیم ہند توں پہلاں ہندوستان دے کافی ادبی رسالیاں وچ پابندی نال چھپن والے ایس شاعر نوں قیام پاکستان دے بعد اوتھوں دی سکونت اختیار کرنی پئی۔ ایس توں علاوہ آپ نے تزک جہانگیری دا ترجمہ وی کیتا جو بڑا پسند کیتا گیا۔ مرحوم نے رباعیات عمر خیال دا منظوم ترجمہ کرن توں علاوہ مائوزے تنگ دیاں نظماں تے وکھووکھ زباناں دے گیتاں دے ترجمے وی کیتے۔ مثلاً مائوزے تنگ دی نظم ”دختران چین” ملاحظہ کرو۔
ڈاکٹر سلیم واحد سلیم دیاں ساریاں طبع زاد نظماں اردو ادب دے شاہکاراں وچ شمار کیتیاں جا سکدیاں نیں۔ آپ نے تقسیم ہند دے بعد پاکستان وچ رہنا پسند کیتا کیوں جے آپ دا آبائی گھر تے کافی سارے رشتے دار پہلے توں ای لہور تے دوجے شہراں وچ آباد سن جد کہ آپ دی بیوی حترمہ حبیبہ خاتون (ام حبیبہ بیگم) دے والدین نے اپنی دھی نوں پاکستان جان دی اجازت نہ دتی تے ایس طرح بیگم ام حبیبہ تے مسلم سلیم (بیٹا) ہندوستان وچ رہ گئے تے نہ چاہندے ہوئے وی گھر دے افراد الگ تے متوازی راہواں دے راہی ہو گئے۔ اوہناں دی وفات تے 1981ء وچ مرحوم دا بیٹا مسلم سلیم بھوپال توں لہور اپڑے۔ ڈاکٹر سلیم واحد سلیم اک فعال تے ترقی پسند ادیب سن۔ اوہ اپنے ہم عصر بشمول فیض احمد فیض بہترین مراسم دے حامل سن پر جتھے کافی سارے ترقی پسند حضرات ماڑے حالات وچ لُک ہو گئے یاں سرگرمیاں وچ کمی واقع ہو گئی اوہناں نے جنرل ایوب دی آمرانہ حکومت دے خلاف معرکہ آراء نظم ”خدایان جمہور کا فرمان” قلمبند کیتی۔ ایہدی اشاعت دے بعد حکومت نے ڈاکٹر صاحب تے ظلم و ستم شروع کر دتے۔ ایہدے باوجود ڈاکٹر سلیم واحد سلیم نے ہار نہیں منی تے اکلے بھکھ ہڑتال کر کے حکومت توں گل منوائی۔ ڈاکٹر سلیم واحد سلیم اک صاف ستھری کھری تے سمجھوتیاں توں پاک 60 سالہ زندگی گزارن دے بعد ایس جہانی توں 1981ء وچ خیرباد کہہ گئے پر اپنے بے مثال کم راہیں اوہناں نے اپنی ذات نوں لافانی بنا دتا اے۔ اوہناں دی آخری آرام گاہ شیرشاہ ولی شادمان قبرستان وچ اے۔ جتھے ہور وی ملک دیاں نامور ہستیاں آسودہ خاک نیں۔ ٭٭