کیہ اسیں پاکستان چھڈ دیئے؟

مہنگائی دا طوفان تھمدے تھمدے اک واری فیر وسوں باہر ہون والا ے۔ پاکستان وچ سٹاک مارکیٹ تے روپیے دی ویلیو مسلسل ڈگ رہی سی۔ ایہدے وچ اوس ویلے استحکام آیا جدوں چین ولوں 2.3 ارب ڈالر پاکستانی خزانے وچ منتقل ہوئے۔ ایہدے نال کاوباری طبقے نے سکھ دا ساہ لیا تے خوشی دا اظہار کیتا پر ایہ خوشی سپرٹیکس لگن نال فشوں ہو گئی جیویں ای ایس ٹیکس دا نفاذ کیتا گیا سٹاک مارکیٹ کریش ہو گئی وڈیاں انڈسٹریاں تے سپرٹیکس لان دے بعد وزیر خزانہ مفتاح اسماعیل نے وضاحت کیتی کہ سارے سیکٹراں تے چار فیصد تے 13مخصوص سیکٹراں تے 10فیصد سپرٹیکس لایا گیا اے جہدے بعد ایہناں سیکٹراں تے ٹیکس 29 فیصد توں 39 فیصد ہو جاوے گا۔ ایہ ٹیکس بجٹ خسارے وچ کمی لئی اک وار لایا گیا اے۔ ایس توں علاوہ وزیراعظم شہبازشریف نے معاشی ٹیم دے اجلاس وچ کہیا کہ عام بندے نوں ٹیکس توں بچان لئی صنعتاں تے ٹیکس لایا گیا اے۔ سیمنٹ’ سٹیل’ شوگرانڈسٹری’ آئل اینڈ گیس’ ایل این جی ٹرمینل’ فرٹیلائزر’ بینکنگ’ ٹیکسٹائل’ آٹوموبائل’ کیمیکل’ بیوریجز تے سگرٹ ا نڈسٹری تے وی دس فیصد سپرٹیکس لگے گا۔ ورھے وار پندراں کروڑ روپیے توں ودھ آمدن کمان والے تے اک فیصد’ ویہہ کروڑ روپیے ورھے وار توں ودھ آمدن والے تے دو فیصد’ پنجی کروڑ روپیے ورھے وار توں ودھ آمدن والے تے تن فیصد تے تریہہ کروڑ روپیے ورھے وار توں ودھ آمدن والے تے چار فیصد ٹیکس لایا جاوے گا جو غربت وچ کمی دا ٹیکس اے۔
بجلی دی قیمت وچ وادھا ہووے یاں پٹرولیم مصنوعات دیاں قیمتاں ودھن ایہناں نال مہنگائی وچ وادھا ہونا یقینی اے۔ ایسے طرح ٹیکساں وچ وادھا وی مہنگائی وچ وادھے دا کارن بن دا اے اجہے عوامل نال ساڈے ایتھے مہنگائی ایس وجہ نال وی ڈھیر ودھ جاندی اے کہ نظام نقص نال بھریا پیا اے۔ پاکستان وچ کجھ عالمی فیکٹر وی اثرانداز ہوندے نیں ایہدے توں اکھ نہیں پھیری جا سکدی۔ کرونا نے پوری دنیا نوں ہلا کے رکھ دتا ایہدے نال وی مہنگائی دا طوفان آیا تے فیر روس یوکرین جنگ ایہ وی عالمی سطح تے پاکستان سنے اثرانداز ہو رہی اے۔ میں یورپ’ امریکہ تے کینیڈا وچ اک عرصے توں رہ رہیا واں۔ مہنگائی ایتھے وی بہت اے پر لوکاں دی زندگی اینی اجیرن لئی کہ ریاست اجہے وسائل عوامی فلاح لئی ورتدی اے۔ تعلیم تے صحت دیاں سہولتاں بالکل فری نیں غربت دی لکیر دے تھلے تے کیہ کوئی جاوے گا ایہدے نیڑے تک وی کوئی شہری نہیں اپڑدا۔ بیروزگاری الائونس تک دتا جاندا اے۔ ساڈے ایتھے وسیلیاں دی کمی دے نال نال مس مینجمنٹ تے کرپشن وی عوامی عذاب دا کارن بن دی اے۔ اج پٹرولیم مصنوعات تے یکدم سبسڈی ختم کر دتی گئی اے جہدے نال ایہناں مصنوعات دیاں قیمتاں وچ سو روپیے توں ودھ دا اضافہ ہویا تے ایہدے نال مہنگائی دے منہ زور گھوڑے نوں نتھ کس طرح پائی جا سکدی اے۔ مغربی ملکاں وچ میں اک چیز خاص طور تے نوٹ کیتی اے اک ای تھاں توں اک ای جانور دے گوشت دے دو ریٹ نیں’ معیار وچ کوئی فرق نہیں۔ اک نوں گوشت’ دوجے نوں حلال گوشت کہیا جاندا اے۔ حلال گوشت دا ریٹ ودھ اے جو مسلمان خریدے نیں یاں ایس طرح کہوو کہ جدوں گوشت دے پیکٹ تے حلال دا سٹیکر لگ جاندا اے تے اوس گوشت دی قیمت پنجاہ فیصد تک ودھ جاندی اے یاں ایس طرح کہوو کہ مسلمان کسٹمرز نوں مذہب دے ناں تے ایموشنل بلیک میل کیتا جاندا اے۔ ایہ گوشت نیوزی لینڈ’ آسٹریلیا وغیرہ توں آندا اے اوتھے طریقہ کار ایہ وے کہ ذبح دا اکو ای طریقہ اے۔ سارے جانوراں نوں تکبیر پڑھ کے ذبح کیتا جاندا اے کجھ تے حلال دا لیبل لا دتا جاندا اے حالاں کہ جہدے تے لیبل نہیں لگا ہوندا اوہ وی حرام نہیں ہوندا۔ ایسے طرح پٹرولیم مصنوعات نیں۔ روس اوپیک وچ شامل نہیں اوہدے تے اوپیک دے قواعد دا اطلاق نہیں ہوندا۔ روس تیل سستا ویچ رہیا اے پر اوہ اوپیک وچ شامل نہ ہون دی وجہ نال اپنے تیل نوں حلال قرار نہیں دلا سکدا۔ جے روس توں تیل خریدیا جاوے تے ساڈے مسئلے کجھ گھٹ ہو سکدے نیں۔ ایہ بہرحال حکومتی سطح تے کرن دا کم اے تے حکومت نوں ہور وی بہت کجھ کرنا تے سوچنا ہوندا اے۔ روس دا ویسے تیل حرام نہیں۔ چین تے بھارت روس توں تیل خریدے نیں اوہنوں ریفائن کرکے دوجے ملکاں نوں ویچ وی رہے نیں۔
دوستو! وطن نال محبت تے جان دین دا عزم اپنی تھاں حقیقت پر کیہ کوئی ماں یاں باپ اپنے نظراں دے سامنے اپنے بچیاں نوں ننگا تے بھکھ نال نڈھال ویکھ سکدے نیں۔ ایس لئی پاکستان دے سٹھ فیصد نوجواناں نوں میرا مشورہ اے کہ اوہ دنیا دے 210 ملک جتھے روزگار دے موقعے ہے نیں اوتھے ٹر جان۔ بے شک اج کل ویزے دا حصول تھوڑا اوکھا اے پر ناممکن نہیں ایس لئی اپنی سروائیول دی جنگ لڑن لئی ساڈے وچوں ہر کسے نوں ہمت کرنی ہووے گی تے اوہ اک کروڑ پاکستانی جو ایس ویلے ملک چھڈ چکے نیں تے سمندر پار پاکستانی کہلاندے نیں اوہ تے اوہناں دے پاکستان وچ لواحقین کنی آسودگی دی حیاتی گزار رہے نیں۔٭٭