پنجابی دے مہمان لکھاری

ناصر کاظمی (شاعر)
ایہناں دا اصل ناں سیدناصر رضا تے تخلص ناصر سی اوہ پورے ناں دی تھاں ناصر کاظمی دے ناں توں مشہور سن کیوں جے ایہناں دا خاندانی تعلق امام موسیٰ کاظم نال جا ملدا اے۔ ناصر کاظمی ضلع انبالہ پنجاب وچ 8 دسمبر 1925 نوں پیدا ہوئے۔ اوہ اسلامیہ کالج ریلوے روڈ لہور دے قدیم طلبہ وچ شامل سن پاکستان دے قیام دے بعد اوہ ہجرت کرکے لہور آ گئے محکمہ امداد باہمی دے رسالے ”ہم لوگ” تے معروف ادبی رسالے ”ہمایوں” دے ایڈیٹر رہے زندگی دے آخری کجھ ورھے ریڈیو پاکستان لہور نال وی وابستہ رہے۔
ناصرکاظمی دی غزل وچ قدیم رنگ غزل وچ جدید رومانوی رویاں دا امتزاج ملدا اے۔ ترقی پسند تحریک تے قیام پاکستان دی درمیانی مدت وچ جدوں نظم گوئی دا میلان تے ترویج زوراں تے سی ناصرکاظمی نے اوس زمانے وچ غزل دا جھنڈا بلند کیتا اوہناں دے کلام دی رسائی ہلکے تے مترجم لہجیاں توں لے کے تندوتیز خطیبانہ لہجے تک اے ایہ کہیا جا سکدا اے کہ اج دی غزل وچ نویں رویے ناصر کاظمی دی جدت فکر نال پیدا ہوئے۔ ایہ اج دے اوس دور وچ صرف غزل دے نمائندے سن ایہناں دا شعری سرمایہ وی زیادہ تر غزل دی ای صورت وچ اے ایہناں دی تریخ وفات 2مارچ 1972 اے۔ ابدی آرام گاہ قبرستان مومن پورہ میکلوڈ روڈ لہور وچ اے۔ قبر پکی تے سرہانے کتبہ لگا اے۔
مشیر کاظمی (شاعر)
مشیر کاظمی 1920ء وچ مشرقی پنجاب دی ریاست پٹیالہ وچ پیدا ہوئے۔ ابتدائی تعلیم اوتھوں ای حاصل کیتی۔ ایہناں نوں اداکاری دا شوق وی سی۔ اوہناں نے اک فلم ”چنگیز خان” وچ اہم کردار ادا کیتا 1940ء وچ آپ نے بطور ہدایتکار فلم ”بمبے والا” بنائی جو بری طرح فلاپ ہو گئی بطور شاعر اوہناں دے لکھے ہوئے گیت بڑے مشہور ہوئے۔
میں بن پتنگ اڑ جائوں
جگر کی آگ سے اس گھر کو جلتا دیکھتے جائو
چاندنی راتیں سب جگ سوئے ہم جاگیں
پیاری بھابی، بھابی نہیں تو میری ماں ہے
شکوہ نہ کر گلہ نہ کر
دھمال، لعل میری پت رہیو بھلا جھولے لعلن
1965ء دی پاک بھارت جنگ دے موقعے تے لکھیا ہویا قومی نغمہ جو نسیم بیگم نے گایا بڑا مقبول ہویا:
اے راہ حق کے شہیدو وفا کی تصویرو
تمہیں وطن کی ہوائیں سلام کہتی ہیں
آپ نے اردو تے پنجابی دوہاں زباناں وچ گیت تخلیق کیتے۔ ایہناں دا انتقال 1973ء وچ ہویا۔ ابدی آرام گاہ مومن پورہ قبرستان وچ مین گیٹ دے نیڑے سجے ہتھ کندھ دے نال اے۔ قبر پکی تے سرہانے کتبہ لگا اے۔ (جاری اے)