آرٹیکل6 تے رائے عامہ

اجکل آرٹیکل 6دی گونج اے تے دوجے پاسے ملک پانی وچ ڈبیا ہویا اے تے سیاسی مکرو فریب عروج تے اے۔ بلوچستان تے سندھ وچ سینکڑاں افراد سیلاب دی نذر ہو گئے۔ سندھ حکومت دے ناقص انتظامات پاروں کراچی وی ڈبیا ہویا اے۔ ایہدے تے سوشل میڈیا اتے چل رہیا اے کہ پیپلز پارٹی نے کراچی دی عوام نوں گھر گھر پانی پہنچان دا وعدہ کیتا سی کیوں جے کراچی وچ صاف پانی دی شدید کمی اے تے ٹینکر مافیا دونویں ہتھاں نال لٹن وچ مصروف نیں تے ایسے وعدے دی تکمیل وچ ہن ہر گھر وچ پانی ای پانی اے۔ ایہدے اتے لکھن دے نال نال رائے ریاض دی کتاب جہڑی قلم فائونڈیشن نے لکھی اے اوہدے اتے وی اخیر وچ لکھاں گا پہلاں آرٹیکل 6اتے گل کر لینے آں جہدا فیصلہ اجے عدالت نے کیتا اے تے حکومت رسہ ہتھ وچ پھڑے غداراں نوں لٹکان دی تیاریاں وچ مصروف اے۔ عدالت عالیہ دے ایس فیصلے دی خوبصورت تشریع پیپلز پارٹی
دے سینئر رہنما اعتزاز احسن نے کیتی اے جد کہ دوجے نمبر تے فواد چودھری دا بیان اے۔ایس سلسلہ وچ چودھری اعتزاز احسن دا آکھنا اے کہ آرٹیکل 6ایسا ہتھیار نہیں کہ ہر کسے اتے چلا دئیے۔ سپریم کورٹ ججمنٹ دی صحیح تشریح نہیں کیتی جا رہی جد کہ آئین مجروح کر کے ڈکٹیٹر شپ لان والیاں اتے آرٹیکل 6لگدا اے۔ سپیکر تے دوجیاں نے آئین نوں ختم نہیں کیتا۔ خلاف ورزی کیتی اے تے آئین دی خلاف ورزی روزانہ دی بنیاد اتے ہو رہی ہوندیاں نیں۔ بعض اوقات عدالتاں وی غلط فیصلے دے دیندیاں نیں کسے جج دا فیصلہ کالعدم ہو جاوے تے کیہ اوہدے اتے آرٹیکل 6لگ جانا چاہیدا اے؟ آرٹیکل 6نوں مذاق بنایا جا رہیا اے۔ آئین نوں مکمل طور تے معطل تے منسوخ کرن اتے آرٹیکل 6لگدا اے۔ ایسے فیصلہ اتے پی ٹی آئی دے پچھلے وزیر اطلاعات فواد چودھری نے تے اک ای جملے وچ گل مکمل کر دیتی کہ جے آرٹیکل 6لگیا تے ملک وچ رسے گھٹ تے گردناں بوہتیاں ہون گئیاں تے ایہو حقیقت وی اے۔ ہن آنے آں روشنیاں دے شہر کراچی ول جتھے ہر پاسے پانی ای پانی اے۔ ایہناں حالات نوں ویکھ کے انج محسوس ہوندا اے کہ کراچی لاوارثاں دی بستی اے۔ ویسے کمال دا شہر اے ایہہ کراچی وی لوک اوہنوں کسے گدھ وانگوں نوچ کے کھا رہے نیں تے ایہہ اے کہ ہن وی لوکاں دے سر اتے سایہ کرن دی فکر وچ اے لیکن ایہہ سلسلہ ہن بوہتی دیر نہیں چل سکدا اے کیوں جے گدھاں نے اوہدے جسم توں سارا گوشت نوچ لیتا اے تے ہن محض اک ڈھانچہ باقی رہ گیا اے جہدی قیمت دی وصولی لئی سیاسی گدھ تے نام نہاد سماجی رہنما تے تنظیماں بولی لا رہیاں نیں۔ حد تاں ایہہ اے کہ ایتھے رہن والے وی سمجھ توں بالاتر ہوندے جا رہے نیں۔ اینے بے حس تے شاید دنیا دے کسی شہر دے لوک نہیں ہون گے کہ جہنے کراچی د ے نیں۔ اوہناں دے کول الیکشن دے دوران ڈرامے باز آندے نیں۔ اوہناں نوں بے وقوف بناند ے نیں تے چل دیندے نیں تے ایہہ اینے بیچارے نیں کہ ایہناں دے کناں وچ جوں تک نہیں رینگ رہی اے۔ ”اپنوں کا ووٹ اپنوں کے لیے” دا نعرہ لان والی ایم کیو ایم دی باقیات تن وزارتاں اتے وفاقی حکومت دا حصہ اے بلکہ ایہہ آکھنا غلط نہیں ہووے گا کہ ایہہ ہر برسراقتدار دا حصہ ہوندے نیں۔ معاہدے اتے معاہدے کردے نیں جہڑے کدی پورے نہیں ہوندے۔ایہہ کراچی نوں نوچن والے سب توں وڈے گدھ نیں تے جہناں دے ایہہ اتحادی بنے ہوئے نیں اوہ پیپلز پارٹی 14 سال توں کراچی لئی ایسٹ انڈیا کمپنی بنی ہوئی اے۔ لگدا اے ایہناں دا مشن بس کراچی نوں لٹددے جائو لیکن اوہنوں واپس کجھ نہ لوٹائو دا اے۔ ایسی دلی تے نادر شاہ نے وی نہیں لٹی ہووے گی جیویں بھٹو دے ایہناں وارثاں نے کراچی نوں لٹ لیتا اے۔ بلاول صاحب دا فرمان اے کہ ”جب بارش آتا ہے تو پانی آتا اور جب زیادہ بارش آتا ہے تو زیادہ پانی آتا ہے” کاش اوہناں نوں کوئی آکھ دیوے کہ جدوں وی مینہ آندا اے تے کراچی ڈب جاندا اے۔ ایہہ کیسی حکومت اے جہڑی 14 سال وچ شہر نوں ایس قابل ای نہیں بنا سکی کہ ایہہ کجھ ملی میٹر مینہ دا بوجھ ای سہہ سکے۔ کراچی بلاشبہ ہن لاوارثاں دی بستی اے۔ بارشاں ہو رہیاں نیں’ شہر ڈب رہیا اے لیکن حکمران بھرواں پروٹوکول دے مزے لے رہے نیں۔ شہر وچ پانی دا ریلا بستیاں نوں ڈبو رہیا اے۔ لوکاں دی املاک تباہ ہو رہیاں نیں۔ جاناں دا ضیاع ہو رہیا اے’ کوئی سنن والا نہیں اے۔ شہر کراچی دے باسیاں نوں بس اپیل ای کیتی جا سکدی اے کہ اپنی بے حسی توں جان چھڈوائوںتے ایس برساتی پانی توں ہمیشہ لئی نجات لئی ایہناں سیاسی گدھاں نوں خدا حافظ آکھ دیو۔ بصورت دیگر ایہہ تہاڈا ڈھانچہ وی ویچ دین گے۔ اجے محکمہ موسمیات نے کراجی وچ گرج چمک دے نال ہور تیز بارش دی پیش گوئی کردے ہوئے سارے اداریاں نوں پیشی اقدامات لئی الرٹ جاری کر دتا اے۔ مون سون دا اک ہور وڈا طاقتور سسٹم بھارت توں سندھ وچ داخل ہووے گا جہدے توں کراچی’ ٹھٹھہ’بدین تے میرپور خاص سنے مختلف علاقیاں وچ مینہ متوقع اے۔ چیف میٹرولوجسٹ سردار سرفراز دا آکھنا اے کہ بارشاں دا ایہہ سلسلہ 18 جولائی تک جاری رہوے گا۔
مشرقی بلوچستان دے اضلاع وچ وی تیز بارشاں متوقع نیں۔ بلوچستان دے ساحلی علاقیاں وچ وی تیز مینہ پووے گا تے جولائی وچ اینی بوہتی بارش دا ہونا غیر معمولی اے ایس لئی موسمی صورتحال دے پیش نظر دوران سفر خصوصی احتیاطی تدبیراں اختیار کرو۔
چلدے چلدے اخیر وچ پاکستان دے چار وزرائے اعظم دے پریس سیکرٹری رہن والے پچھلے سرکاری افسر رائے ریاض حسین دی خود نوشت سوانح عمری رائے عامہ دے نام توں چھپ کے مارکیٹ وچ دستیاب اے۔ اقتدار دے ایواناں دے سربرستہ رازاں نوں بے نقاب کردی ایہہ خودنوشت سوانح پاکستان دے منے پرمنے تے وڈے اشاعتی ادارے قلم فائونڈیشن انٹرنیشنل نے خاص اہتمام تے خصوصی توجہ نال شائع کیتی اے۔جہدے وچ لاتعداد دلچسپ واقعات’ بے رحم حقائق تے پاکستانی سیاست دے نشیب و فراز دی ایسی پوشیدہ کہانیاں رقم نیں جہناں توں پاکستانی عوام ہمیشہ لاعلم رہندی اے۔ رائے ریاض حسین نے بہت دلیرانہ انداز وچ محلاتی سازشاں دا پردہ چاک کیتا اے۔ اوہ اپنی سروس دے دوران پاکستان دے چار وزرائے اعظم دے پریس سیکرٹری تے تن ملکاں جاپان’ سری لنکا تے بھارت وچ پریس دی ذمہ
داریاں نبھاندے رہے نیں۔دوران ملازمت اوہناں نے اقتدار دی راہداریاں وچ کھیڈے جان والے بہت سارے کھیڈ اپنی باشعور اکھاں تے باوقار سماعتاں نال ویکھے تے سنے۔ ایس خود نوشت وچ جتھے رائے ریاض نے ملکی سیاست’ سفارتی تعلقات وزرائے اعظم دے نال اپنی ملازمت دے مشاہدے تے تجربے بیان کیتے نیں اوتھے اوہناں نے اپنی ذاتی زندگی دے شب و روز نوں وی بلا جھجک لکھ کے اک سچے تے کھرے قلم کار ہون دا ثبوت دتا اے۔ ایس اہم تے دلچسپ کتاب وچ تہانوں جہناں اہم تے منے پرمنے لوکاں دا تذکرہ تے احوال پڑھن نوں ملے گا اوہناں وچ میاں نواز شریف’ کیپٹن صفدر’ شہباز شریف’ چودھری شجاعت تے چودھری نثار علی خان’ میر ظفر اللہ خان جمالی’ محمد سعید مہدی’ رائے ریاض حسین دی والدہ محترمہ تے دوجے بہت سارے ایسے لوکاں دے نام شامل نیں جہناں نوں اسیں تے تسیں دوروں ویکھدے رہے آں لیکن فاضل مصنف نے ایہناں نوں بہت کولوں ویکھیا تے اوہناں دے نال کم کیتا اے۔تریخ دے ورقیاں نال سجی ایس خودنوشت وچ اکتوبر نوں پیش آمدہ واقعات وی ملدے نیں تے محسن پاکستان ڈاکٹر عبدالقدیر نال حکمراناں دے ناروا سلوک دا نوحہ وی سرابیاں دے پچھے نسدے عوام لئی پیغام وی اے تے طاقت تے کرسی دے فریب وچ مبتلا حکمراناں لئی سبق وی۔ ایہہ دلچسپ سوانح حاصل کرن لئی تسیں قلم فائونڈیشن دے دفتر توں وی ایہہ نایاب کتاب حاصل کر سکدے او۔