ریاض الرحمن ساغر

فلمی کہانی نویس’ نغمہ نگار تے صحافی ریاض الرحمن ساغر ولد مولوی محمد عظیم (مرحوم) یکم دسمبر 1941 مولویاں محلہ بھنڈہ’ ریاست پٹیالہ وچ پیدا ہوئے۔ اوہناں نے بی اے (فاضل پنجابی) ملت ہائی سکول ملتان’ ایمرسن کالج توں تعلیم حاصل کیتی۔ بطور کہانی کار تے مکالمہ نویس دے 75 فلماں لکھیاں۔ فلم ‘ ریڈیو پاکستان’ ٹی وی لئی ڈھائی ہزار دے کول نغمے تخلیق کیتے۔ جہناں نوں مہدی حسن’ نور جہاں’ عدنان سمیع’ احمد رشدی’ مالا’ مسعود رانا’ نصرت فتح علی خاں’ حامد علی خاں’ اے نیر’ وارث بیگ’ انور رفیع’ رونا لیلیٰ’ حمیرا ارشد’ حمیرا چنا’ ناہید اختر’ تصور خانم’ ثریا خانم’ نصیبو لال سنے دوجے نمایاں گلوکاراں نے گایا۔
اوہناں دے تخلیق کردہ مقبول نغمیاں وچ ”ذرا ڈھولکی بجائو گوریو’ بھیگا ہوا موسم پیارا’ تیری اونچی شان ہے مولا’ کبھی تو نظر ملائو’ بھیگی بھیگی راتوں میں’ تیرے سنگ رہنے کی کھائی ہے قسم’ چلو کہیں دور یہ سماج چھوڑ دیں’ کجھ دیر تو رک جائو برسات کے بہانے’ دل لگی میں ایسے دل کو لگی کہ دل کھو گیا’ دیکھا جو چہرہ تیرا’ موسم بھی پیارا لگا’ کل شب دیکھا میں نے چاند جھروکے میں’ ہو سکے تو میرا ایک کام کرو’ جانے کب ہوں گے کم اس دنیا کے غم’ ساون دی بھیگی راتوں میں’ مینوں یاداں تیریاں آئوندیاں نیں’ کسی روز ملو ہمیں شام ڈھلے” شامل نیں۔
ریاض الرحمن ساغر دی تصانیف وچ ‘ وہ بھی کیا دن تھے (سوانح عمری)’ کیمرہ’ فلم اور دنیا (سات ملکوں کا سفر نامہ) لاہور تا ممبئی براستہ دہلی (بھارت کا سفرنامہ) سرکاری مہمان خانہ (جیل یاترا کا احوال) آنگن آنگن تارے (الف سے لے کر ے تک) بچوں کے لیے (گیت) اوہناں نے جہڑے گیت لکھے زیر طبع نیں۔
اوہناں نوں نیشنل فلم ایوارڈ’ پی ٹی وی ایوارڈ’ کلچرل گریجویٹ ایوارڈ’ نگار فلم ایوارد’ بولان ایوارڈ’ ایس دے علاوہ مختلف سماجی تے تعلیمی اداریاں ولوں ڈیڑھ سو توں ودھ انعامات ملے۔
اوہناں نے شاعری سکول دے زمانے وچ شروع کردتی سی۔ اوہناں دے انگریزی دے استاد ساغر علی نے کلاس وچ اک نظم اردو ترجمہ کرن لئی دتی۔ ریاض الرحمن نے اوہنوں اینے عمدہ طریقے نال ترجمہ کیتا کہ استاد نے پوری کلاس دے سامنے بھرواں حوصلہ افزائی کیتی۔ ریاض الرحمن نوں داد پان دا ایہہ آسان طریقہ بہت چنگا لگیا۔ چنانچہ اوہناں نے استاد دے نام ای نوں اپنا تخلص رکھ کے شاعری شروع کردتی۔ نال ای نال استاد شاعراں دے کلام دا مطالعہ وی شروع کر دتا۔ انج کالج پہنچن تک ساغر نوں قدیم تے جدید شاعراں دے سینکڑاں شعر زبانی یاد ہو چکے سن۔
ریاض الرحمن ساغر دی کالم نویسی’ سفر نامے دے قدردان ملک دے طول و عرض توں لے کے بھارت’ چین سنے پوری دنیا وچ جتھے جتھے اردو بولن والے موجود نیں اوہناں نوں قدر دی نظر نال ویکھدے نیں۔ ساغر صاحب اپنی کہانی انج بیان کردے نیں کہ قیام پاکستان وچ انسانی تریخ دی سب توں وڈی ہجرت فسادات وچ میرے پیو دی شہادت ہجرت کردے ہوئے میری والدہ بے سروسامان تے نہایت کسمپرسی وچ مینوں محض چھ سال دی عمر وچ پہلے لہور دے والٹن کیمپ لیان۔ جتھے کجھ دن گزارن مگروں رشتہ داراں دے کول ملتان لے گئیاں۔
ملتان توں ابتدائی تعلیم حاصل کیتی جد کہ ایسے دوران ای شعرو شاعری ولوں راغب ہویا۔ ملتان دے کالج وچ ای سیکنڈ ائیر وچ طالبعلماں نوں جوش تے فیض احمد فیض دی انقلابی شاعری سنان اتے کالج توں کڈ دتا گیا۔ مگروں لہور آ کے فیض صاحب نال ملاقات کیتی۔ اپنا احوال زندگی گوش گزار کیتا۔ اوہناں نے شفقت فرماندے ہوئے مینوں نوکری اتے رکھ لیتا۔ لیکن کجھ عرصہ مگروں نوائے وقت وچ روزگار دا سلسلہ شروع ہو گیا۔
میں اج تک ذومعنی بالچر گانے نہیں لکھے۔ میں دوجیاں لئی ایسے گیت لکھے جہناں نوں گھراں وچ سنن توں عار محسوس نہیں ہوندا۔ ہن تک تن ہزار دے کول گانے لکھ چکے آں۔ نیشنل ایوارڈ’ پی ٹی وی ایوارڈ’ نگار’ بولان سنے ڈیڑھ سو ایوارڈ حاصل کر چکے نیں۔
پچھلے دو سال وچ ”چلو چین چلیں” دے نام نال منظوم سفرنامہ وی شائع ہو چکای اے۔ نصرت فتح علی خان’ مہدی حسن’ ملکہ ترنم نورجہاں’ آشا بھوسلے’ راحت فتح علی خان سنے درجناں گلوکار تہاڈے لکھے ہوئے گیت گا کے شہرت دی بلندیاں اتے پہنچ چکے نیں جد کہ شمع’ نوکر’ سسرال’ عورت ایک پہیلی’ سرگم’ نکاح’ محبتاں سچیاں جئی کامیاب فلماں لکھ چکے نیں۔
اوہناں دی تریخ وفات یکم جون 2013اے تے آخری آرام گاہ کریم بلاک علامہ اقبال ٹائون دے قبرستان وچ اے۔ قبر کچی مگر سرہانے کتبہ نصب اے۔