آئی ٹی صنعت دا کیہ کریئے

ایس ویلے ڈیجیٹل معیشت دا عالمی حجم باراں ٹریلین ڈالر دے نیڑے اے۔ یعنی ساڑھے پندراں فیصد عالمی معیشت ڈیجیٹل اے تے اگلے پندراں ورھیاں وچ اندازا اے کہ تقریباً پنجاہ فیصد معیشت ڈیجیٹل ٹیکنالوجی تے کھڑی ہووے گی۔ روایتی شعبیاں دے روایتی دماغاں لئی بھاویں ایہ چنگی خبر نہ ہووے پر دنیا کسے دے بدلن دے انتظار وچ اپنی راہ تھوڑا کھوٹی کردی اے۔ ایس کایا کلپ نوں پنجواں انقلاب وی کہیا جاندا اے تے صنعتی انقلاب دی تھاں لین والا ایہ انقلاب نویں علوم تے اوہناں دی مہارت دی بنیاد تے کھڑا اے۔ ایہو وجہ اے کہ دنیا وچ کرونا دی مارا ماری دے دوورھے دوران ہر شعبہ پسیا ہویا سوائے ڈیجیٹل انقلاب دے۔ سگوں ایہ بیماری ڈیجیٹل معیشت دے تیز رفتار فروغ لئی اک نعمت ثابت ہوئی۔ پاکستان جتھے پچھلے چار ورھیاں توں معیشت دے ہر شعبے نوں کسے دی نظر لگی ہوئی اے۔ ڈیجیٹل ٹیکنالوجی تے اوہدی برآمد واحد شعبہ اے جنہے حیرت انگیز ترقی کیتی اے تے سفر مسلسل جاری اے۔
پاکستان معیار زندگی دی عالمی انڈیکس وچ بھاویں سب توں تھلے پائداناں تے ٹکیا ہویا اے پر قبولیت عامہ دے پاروں چوٹی دے اوہناں دس ملکاں وچ شامل اے جتھے ڈیجیٹل خواندگی وچ وادھے دی شرح سب توں ودھ اے۔ ایس ویلے بائی کروڑ وچوں دس کروڑ آبادی اجہے فون استعمال کر رہی اے جو انٹرنیٹ نال جڑے ہوئے نیں۔ ایہناں وچ ساڑھے چار توں پنج کروڑ بندے سوشل میڈیا دے وکھووکھ پلیٹ فارماں توں واقف نیں یاں فائدہ چک رہے نیں۔ زیادہ تر نوجوان نیں کرونا توں پہلاں ڈیجیٹل رابطہ کاری بھاویں شوق تے تعیش دے دائرے وچ سمجھی جاندی ہووے پر ہن ایہ اک بنیادی لوڑ بن گئی اے۔ پہلی واری پاکستان دی ڈیجیٹل برآمدات نے پچھلے ورھے وچ ڈھائی ارب ڈالر توں ودھ کما کے دتے۔ جد کہ مقامی ڈیجیٹل مارکیٹ دا حجم وی ایس عرصے وچ ودھ کے تقریباً ڈیڑھ ارب ڈالر تک اپڑ گیا اے۔ انفارمیشن ٹیکنالوجی دا شعبہ اپنی ترقی لئی دوجے شعبیاں نوں دتی جان والی سرکاری سبسڈی یاں مراعات دے الٹ اپنی مدد آپ تے بھروسا مند رہیا اے۔ ایس ویلے پاکستان وچ چھ لکھ توں ودھ آئی ٹی پروفیشنلز نیں ایہناں وچوں تن لکھ وکھووکھ کمپنیاں تے اداریاں نال وابستہ نیں جد کہ باقی فری لانسز خدمات دے رہے نیں۔
پاکستان وچ آئی ٹی دی ترقی لئی کجھ ورھے پہلاں اک وکھری وزارت قائم ہوئی جد کہ پاکستان سافٹ ویئر ایکسپورٹ بورڈ وی فعال اے۔ 2018ء وچ پہلی قومی آئی ٹی پالیسی متعارف کروائی گئی۔ ایہدے وچ ایہ ہدف مقرر کیتا گیا کہ 2025ء تک پاکستان وچ آئی ٹی دا صنعتی حجم ویہہ ارب ڈالر تک اپڑایا جاوے گا۔ ایہ اندازا وی لایا گیا کہ جے پالیسی تے اخلاص تے تسلسل برقرار رہوے تے پاکستان دی آئی ٹی صنعت دا حجم ساڑھے اٹھ ارب ڈالر تک اپڑایا جا سکدا اے۔ ایس پالیسی دے تحت نوزائیدہ آٹی ٹی انڈسٹری نوں ٹیکس توں چھوٹ دتی گئی۔ سو فیصد ایکٹویٹی حاصل کرن دی رعایت ملی تے ایکسپورٹ لئی انفرادی تے کمپنی دی سطح تے فارن کرنسی اکائونٹس کھولن دی سہولت وی ملی تے کہیا گیا کہ ایہناں اکائونٹس وچ جو وی رقم ہووے گی اوہنوں باہر لے جان یاں مقامی سطح تے ہور سرمایہ کاری لئی استعمال دی کھلی آزادی ہووے گی۔ ایس پالیسی توں حوصلہ پا کے ای 2020-21ء وچ ایس صنعت دے حجم وچ 47 فیصد وادھا ہویا۔ اینی ورھے وار بڑھوتری دی مثال کسے ہور صنعت وچ نہیں ملدی۔
ایس ویلے اک پاکستانی کسان دی کمان دی سالانہ صلاحیت چار سو ڈالر دے نیڑے اے۔ جد کہ آئی ٹی نال وابستہ اک کارکن سالانہ پنجی توں چالھی ہزار ڈالر کما کے دے سکدا اے۔ ایہ پیسے کیوں جے سٹیٹ بینک دے راہیں آ رہے نیں ایس لئی دستاویزی معیشت دا وی حصہ نیں پر ساڈے ٹیکس بابو اج وی ڈیجیٹل اکانومی نوں اوسے روایتی صنعت دی اکھ نال ویکھ رہیا اے جہدے تے جناں چاہے ٹیکس لایا جا سکدا اے۔ حالاں کہ نوزائیدہ ڈیجیٹل انڈسٹری نوں روایتی مقامی صنعت دی تھاں گلوبل ویلج دی اکھ نال ویکھنا ضروری اے۔ عام کارخانے نوں کسے ہور ملک وچ منتقل کرن لئی بھاری مشینری پٹ کے منتقل کرنی پیندی اے جد کہ ڈیجیٹل انڈسٹری دی عالمی ہجرت بڑی سوکھی اے۔ بس اک لیٹ اپ کچھ وچ دبایا تے کسے اجہی تھاں چلے گئے جتھے نہ صرف مراعات زیادہ نیں سگوں حوصلہ افزائی وی دونی اے۔ ہن انتخاب حکومت نوں کرنا اے کہ کیہ اوہ کجھ لکھ ڈالر ٹیکس اکٹھا کرنا پسند کرے گی یاں آئی ٹی ایکسپورٹ دے راہیں آن والے کروڑاں ڈالرز دے بہائو نوں جاری رکھن لئی خصوصی مراعات برقرار رکھنا پسند کرے گی۔
کہن نوں پچھلی کجھ سرکاراں توں لے کے موجودہ حکومت تک سارے ای آئی ٹی دی صنعت ورگے کمائو پوت دی ترقی لئی ملک بھر وچ تیراں آئی ٹی انڈسٹریل پارکس بنان تے اوہناں وچ ضروری سہولتاں دین دے وعدے دی گردان کردے رہے نیں پر عملی کم اینے ورھے گزرن دے بعد وی مکمل نہیں ہو سکیا۔ اک ہور وڈا مسئلہ میعاری تعلیم دے بحران دا اے۔ ایس ویلے آئی ٹی توں ہر وادھو اک ارب ڈالر سالانہ کمان لئی گھٹو گھٹ چالھی ہزار کوالیفائیڈ گریجویٹس دی ضرورت اے۔ مقامی سطح تے پ نجی توں پینتی ہزار گریجویٹس سالانہ پیدا ہو رہے نیں پر چار ورھے تک پڑھائی کرکے ڈگری حاصل کرن دے باوجود ایہناں وچوں صرف ڈھائی توں تن ہزار نوجوان ای ایس قابل ہوندے نیں جہناں نوں آئی ٹی دی جاب مارکیٹ قبول کر سکے۔ مطلب ایہ ہویا کہ نصاب نوں مسلسل اپ ڈیٹ کرن تے ایہ نصاب پڑھان والے روایتی ذہن دے استاداں نوں ترقی تے ترقی دین دی تھاں فعال تے انڈٹری نال جڑے ماہرین نوں تعلیم دے شعبے وچ چنگی تنخواہ تے لیان دی ضرورت پر جو کاغذی فوج ظفر موج ایہناں اداریاں نے پیدا کر دتی اے اوہدا کیہ ہووے۔ ایس لئی آئی ٹی دی وزارت تے سافٹ ویئر ایکسپورٹ بورڈ دی فنڈنگ نال ہن پاکستان سافٹ ویئر ایسوسی ایشن اجہے بوٹ کیمپ منعقد کر رہی اے جہناں وچ ڈگری یافتہ لوکاں نوں چھ مہینے اندر عملاً ایس قابل بنایا جا سکے کہ اوہ کسے کمپنی وچ ملازمت دے اہل ہو سکن۔ ٭٭