غلام مصطفی آزاد نقیبی دِی یاداں دَا پرَاگا

پورے ملک چہ اپنی ادب دوستی دے حوالے نال شہرت رکھن والے غلام مصطفی آزاد نقیبی دا تعلق پنجاب دے صنعتی شہر لائلپور یعنی فیصل آباد نال اے اینہاں نے اپنی سروس دا اک وڈا عرصہ بلوچستان دے صوبائی دارالحکومت کوئٹہ تے ایشیاء دے سب توں گرم ترین مقام سبی چہ گزاریا اے ،اینہاں نال اپنی یاد اللہ 1995ء توں اے تے اُوس ویلے توں لے کے ہن تک اینہاں نوں ادب لئی ہمیش سرگرم ویکھیا اے اینے مخلص تے بے لوث لوک ہن بہت گھٹ ویکھن نوںملدے نیں ایہ ہر سال پورے پاکستان چہ مختلف زباناں چہ لکھن آلیاں شاعراں تے ادیباں نوں ایوارڈ دین دے معاملے چہ بڑی شہرت رکھدے نیں ،اُردو ،پنجابی تے دوجیاں زباناں دے پتر کار اینہاں نوں اپنی نگارشات گھلدے نیں تے اینہاں دی اک کمیٹی اُونہاں کتاباں دِی خوبیاں تے نقص لبھدے نیں تے فیر حقدار لیکھک داناں اینج سامنے آندا اے ایہی وجہ اے کہ اینہاں نوں پورے پاکستان دے ادبی حلقیاں چہ بڑی قدر دِی نگاہ نال ویکھیا جاندا اے۔
غلام مصطفی آزاد نقیبی4اکتوبر 1957ء نوں تحصیل جڑانوالہ منڈی روڈ الہ روڈ فیصل آباد چہ پیداہوئے ابتدائی تعلیم تے میٹرک گورنمنٹ ہائی سکول چک نمبر 282گ ب شہامند توں 1974ء نوں کیتا۔ قرآن پاک دِی تعلیم حافظ محمد شان توں تے دینی دوجی تعلیم علامہ نور احمد توں پائی۔ عملی زندگی دا آغاز کوئٹہ بلوچستان توں واپڈا چہ بطور اسسٹنٹ لائن مین توں کیتا فیر1980ء چہ واپڈا دِی نوکری چھڈ دتی تے محخمہ ٹی اینڈ ٹی ( ٹیلی فون اینڈ ٹیلی گراف ) چہ بطور ٹیلی فون آپریٹر کیتی 2008ء چہ ایس محکمے توںریٹائرمنٹ لئی۔
1972ء توں شاعری دا شوق سی1977ء نوں صوفی ازم دِی تعلیمات توں متاثر ہوکے صوفی محمد نقیب اللہ شاہ دے ہتھاں تے بیعت کیتی سلسلہ نقیبیہ چہ، اُوس ویلے توں اپنے ناں دے نال ( صوفی ) لکھنا شروع کیتا ۔
شاعری دِی اصلاح بشیر احمد انجان تے حکیم علی محمد راز توں لیتی ،اُردو تے پنجابی دوزباناں چہ اظہار کر دے نیں ۔ایس توں علاوہ ایہ اُردو تے پنجابی دے بڑے قد آور تخلیق کار نیں ایہناں داپنجابی شعری پراگہ ”یاداں دا پراگا” دے ناں توں حال ای چہ چھپیا اے تے ڈاکٹر محمدایوب اینہاں دے شعری پراگے بارے رائے دیندیاں ہویاں لکھدے نیں کہ :
مکدی گل اے کہ ایس کوتا پراگے چہ او سارا کجھ موجود اے جہڑا پڑھن والے دِی کھچ دا کارن بنے وکھو وکھ خیال رکھن والے لوکاں لئی وکھو وکھو سرناویں بیان ہوئے نیں۔ اوہناں پرانی ریت توں مکھ نہیں موڑیا تے نویں ریت دِی پالنا وِی کیتی اے، جو اُونہاں دے کامیاب کوی ہون دِی دلیل اے۔
اشرف اشعری لکھدے نیں کہ فیصل آباد دِی پنجابی شاعری بارے جیکر گل کیتی جاوے تے بڑے بڑے اگھڑویں ناں ساڈے سامنے آوندے نیں۔ (جاری)