ضمنی انتخابات دے نتیجے تسلیم

پنجاب اسمبلی دی 20خالی نشستاں لئی ضمنی انتخابات دے نتائج نال تحریک انصاف دی واضح کامیابی دا اعلان ہو چکیا اے۔ایہناں انتخابی نتائج دے آن نال پہلاں الیکشن دے سلسلے وچ شفافیت اتے جہڑے شکوک و شبہات دا اظہار کیتا جا رہیا سی اوہدے الٹ حکومت جماعت دے شفاف الیکشن لئی انتظامات تے ایہناں انتخابی نتائج نے سیاست وچ گرما گرمی دے نال نال تحمل تے تسلیم و رضا دے رویے نوں وی عام کرن وچ مدد دتی اے۔ تحریک انصاف دے کول اگرچہ ہن کوئی عذر باقی نہیں تاہم حکمران جماعت نے وی کھلے دل دے نال ایہناں نتائج نوں تسلیم کرن دا اعلان کر دتا اے۔ اک جماعت دی کامیابی بلاشبہ مقابل جماعت نوں اپنی کمی کوتاہی نوں دور کرن دا عزم دے رہی اے’ فیر وی قارئین کرام دے ذہن وچ ایہہ سوال ضرور اٹھیا ہووے گا کہ پی ٹی آئی دی کامیابی ایہناں ساری گلاں دے باوجود کیویں ممکن ہوئی؟
حالیہ ضمنی انتخابات وچ پنجاب وچ بلے دی بلے بلے ہو گئی تے شیر حیرت انگیز طور تے پٹ گیا۔ ایس اپ سیٹ دے محرکات اتے جے ڈونگی نظر پائی جاوے تے گنڈاں کھلدی نظر آندیاں نیں۔ عمران خان نے اقتدار گوا کے اپنی ڈگدی ساکھ نوں نہ صرف سہارا دتا اے بلکہ پنجاب جہدا مطلب پاکستان ای ہوندا اے نوں اپنا قلعہ وی ثابت کیتا اے۔ تحریک انصاف دے رہنما میاں محمودالرشید ‘ میاں اسلم اقبال’ یاسمین راشد دے سر ایس شاندار جت دا سہرا جاندا اے۔ میاں اسلم اقبال نے لہور دے حلقیاں وچ اپنی پوری جان لا دتی تے ایہہ وی ویکھن وچ آیا کہ اک دن میاں اسلم اقبال پیر اتے سٹ لگن پاروں سٹینڈ دا سہارا لیتے ڈور ٹوڈور کمپین کردے رہے گو کہ شبیر گجر دی جت دا کریڈٹ اوہناں دے بھرا خالد گجر نوں ای جاندا اے مگر اوہناں دی جت لئی میاں اسلم اقبال نے وی بہت محنت کیتی اے۔ خالد گجر دے بہترین دوست امجد چیمہ تے اوہناں دے صاحبزادے سکندر چیمہ پلس دی بے پناہ بدمعاشی دے باوجود شبیر گجر دی انتخابی مہم چلاندے رہے۔ اسد کھوکھر اپنی خدمات پاروں اپنی نشست کڈن وچ کامیاب تے ہو گئے مگر نذیر چوہان اپنیاں دے ظلم و ستم د ا ای شکار ہو گئے۔ عثمان اکرم دی کامیابی دا سہرا میاں محمودالرشید نوں جاندا اے تے اصل محرکات کجھ ہور وی نیں جہدے مطابق سانوں کافی سال پچھے جانا پووے گا۔
بعض واقفان حال دے مطابق اصل گل ایہہ اے کہ اسیٹبلشمنٹ نال آصف علی زرادری دے رابطیاں توں لے کے دوجے انتظامات تک ایہہ ساری بساط زرداری دی وچھائی ہوئی اے۔ شہباز شریف دے رابطے وی اسٹیبلشمنٹ نال مستحکم نیں مگر میاں نواز شریف دی پالیسی یا بیانیے دی وجہ نال اوہ ایس نقشے وچ موجود نہیں رہے۔ ساری گل بات آصف علی زرداری ای حکومت ولوں کر رہے نیں تے فیر بس زرداری صاحب نے فائنل ایہہ فیصلہ کر لیا کہ ضمنی انتخابات وچ اسٹیبلشمنٹ نوں نیوٹرل رہنا چاہیدا اے تاں جے پی ٹی آئی اپنی اصل سیٹیاں کڈ سکے۔ زرداری صاحب ایہہ وی جاندے سن کہ (ن) لیگ دے دوراقتدار وچ مہنگائی دا جن بوتل توں باہر آ چکیا اے تے اوہناں دے ووٹ بینک اتے بھرواں ڈنٹ پے چکیا اے۔
سوال ہن ایہہ اے جے آصف علی زرادری ایسے لائن لینتھ اتے بیٹنگ کردے رہے تے وفاقی حکومت دا مستقبل متزلزل ہووے گا مگر جہڑے زرداری نوں میں جاننا واں اوہ اوہی اے جیہدا جیالے نعرے لاندے نیں اک زرداری سب پہ بھاری۔ ایس لئی آصف علی زرداری شہبازحکومت نوں ڈگن تے نہیں دین گے تے نہ ای چلن دین گے۔ (ن) لیگ بند گلی وچ آ ن کھلوتی اے۔ میاں نواز شریف دے خدشات وی درست ثابت ہوئے نیں کہ ایس وقت تے اوہناں نوں حکومت نہیں لینی چاہیدی سی۔ سنیا اے کہ نواز شریف (ن) لیگی قیادت کولوں وی خاصے ناراض نیں۔ اسحاق ڈار نوں اوہ پاکستان نہیں بھیجنا چاہندے۔ نواز شریف ہن اسٹیبلشمنٹ نال ڈیل کرن والے گھوڑے دے منہ ول ویکھ رہے نیں کہ جہڑے وعدے ساڈے نال کیتے گئے سن اوہ وفا ہوندے نظر نہیں آ رہے گو کہ ن لیگ دی حکومت نے پیپلز پارٹی دے نال پہلاں فال کھیڈنا شروع کیتا مگروں آصف علی رداری نے اپنے پتے کھیڈے جہڑے اوہناں دے مستقبل لئی بڑے خطرناک سمجھے جاندے نیں۔
اک واری فیر پارٹی وچ ثابت ہو گیا کہ نواز شریف منجھے ہوئے سیاستدان نیں جہڑے ڈیل دی بجائے ایس گل اتے یقین رکھے ہوئے سن کہ اسمبلیاں توڑ کے آزادانہ عام انتخابات کروائے جان مگر ن لیگ دی مرکزی قیادت نے آصف علی زرداری نال مشاورت مگروں میاں نواز شریف نوں ایس گل اتے آمادہ کیتا کہ سانوں اِن ہائوس تبدیلی لیان لئی عدم اعتماد کرنا چاہیدا اے تے فیر عمران خان ولوں شریف برادران توں ذاتیات اتے مشتمل سیاست دی بھینٹ نواز شریف دا فیصلہ چڑھ گیا تے اخیر اوہ من گئے کہ عدم اعتماد مگروں ان ہائوس تبدیلی لے آنی چاہیدی اے۔ موجودہ انتخابی نتائج مگروں اندازہ ہوندا اے کہ حکومت ولوں تیاری کیتی جا رہی سی کہ صدر نوں گھر بھیجیا جاوے۔ حکومت دا ایہہ پلان وی تریک ہوندا نظر آ رہیا اے۔
ملکی تریخ وچ جدوں وی کدی عام انتخابات کوئی وی پارٹی ہاری اے تے اوہنے دھاندلی دا شور مچایا اے۔ ایہناں انتخابات دی خوبصورتی ایہہ اے کہ ن لیگ دے صوبائی لیڈراں توں لے کے نواز شریف تک نے نتائج کھلے دل نال قبول کیتے نیں۔ ایہہ سیاستداناں لئی اک سبق وی اے۔ 22جولائی نوں وزارت اعلیٰ دا انتخاب ہووے گا تے قوی امید اے کہ چودھری پرویزالٰہی وزارت اعلیٰ پنجاب دا منصب حاصل کر سکن گے۔ چودھری برادران معتبر روایتاں’ اخلاقیات توں مبرہ سیاستدان گردانے جاندے نیں تے اوہناں دے منجھے ہوئے ہون وچ وی کوئی شک نہیں۔ حیرت زدہ ایس لئی آں کہ ایس واری چودھری خاندان دے سب توں چھوٹے سپوت چودھری مونس الٰہی دی حکمت عملی نال چودھری خاندان اک واری فیر وزارت اعلیٰ پنجاب دی پگ سنبھالن لئی تیار اے۔ چودھری مونس الٰہی جہڑے ویلے ایہہ گل کردے سن کہ پرویزالٰہی ای وزیراعلیٰ ہون گے اوس ویلے سارے منجھے ہوئے سیاستدان اوہناں دے تایا چودھری شجاعت تے والد چودھری پرویزالٰہی تے عوام اوہناں دی ایس گل نوں دیوانے دی بڑھ سمجھدے سن۔ ہن عمران خان نوں چاہیدا اے کہ اوہ کسے وی ہیل وحجت دے بغیر وزارت اعلیٰ چودھری پرویزالٰہی دی پکے ہوئے پھل وانگوں جھولی وچ پا دین۔ ایس توں ناصرف پی ٹی آئی بلکہ ق لیگ وی پھلے پھولے گی تے نقصان ن لیگ دا ہووے گا۔ پچھلے تن سال پنجاب دی پگ بزدار دے حوالے کر کے پہلاں ای پارٹی نوں ناتلافی نقصان پہنچ چکیا اے۔ ایس نقصان دا ازالہ چودھری پرویزالٰہی دی صورت وچ ای ممکن اے کیوں جے اوہناں نے اپنے پچھلے اقتدار وچ اینے تعمیری کم کیتے سن جہڑے کوئی ہور حکومت دے کریڈٹ اتے نہیں ہو سکدے۔پنجاب دی عوام لئی پرویزالٰہی دا آنا خوش آئند ثابت ہو سکدا اے۔