ضمنی الیکشن ، ہن کیہ ہووے گا؟

کجھ چر پہلاں بچپن وچ فلم ویکھی سی ”دلہن ایک رات کی”۔ اج دے ضمنی انتخابات دے نتیجے تے سرسری نظر ماری جاوے تے اوہ فلم تے حمزہ شہباز دی حکومت وچ اک مطابقت جہی نظر آندی اے۔ تریخ وچ تے صدیاں تے ورھیاں دی وی کدی کوئی اہمیت نہیں رہندی۔ کجھ دیہاڑ تے کجھ مہینے دی تے قوماں دی زندگی وچ حیثیت ای نہیں۔ شہبازشریف ودھ توں ودھ اک سال وزیراعظم رہ سکن گے۔ ایہدا امکان وی اجے نہیں۔ معروف کالم نگار تے سیاسی تجزیہ نگار نصرت جاوید نے امید دا اظہار کیتا اے کہ شہبازشریف اپنی دستبرداری دی تقریر تیار کر رہے ہون گے تے فوری طور تے ایہدا اعلان کر دین گے۔ ایس حکومت دی جنی مدت رہی اے ایس دوران اوہناں نے بہت کجھ کر لیا پر بہت کجھ کردے کردے رہ وی گئے۔ ایہ مصرعہ اوہناں تے منطبق ہوندا اے۔
حسرت تو ان غنچوں پہ ہے
جو بن کھلے مرجھا گئے
جہڑے مقصداں لئی آئے سن’ مقدمیاں دے خاتمے’ نیب دے پر کٹن’ ای وی ایم تے اوورسیز پاکستانیاں دے ووٹ دے حق نوں واپس لین ورگے قنون رد کر دتے۔ ای وی ایم ہوندی تے کیہ ہوندا۔ ایس توں برا رزلٹ پی ڈی ایم دے نکتہ نظر نال ہور کیہ آ سکدا سی۔ مسلم لیگ ن نوں اینی وڈی شکست دا سامنا اج تک کسے وی الیکشن وچ نہیں ہویا۔ ویہہ سیٹاں تے ضمنی الیکشن ہویا’ حکومت پنجاب تے مرکز وچ مسلم لیگ ن دی’ جہنوں پی ڈی ایم دی دس جماعتاں دے نال عمران خان دا ساتھ چھڈ کے پی ڈی ایم دے نال مل جان والے اتحادیاں دا ساتھ وی حاصل سی پر الیکشن وچ شرمناک شکست دا سامنا کرنا پیا۔ صرف چار سیٹاں حاصل کر سکی۔ اک سیٹ پنڈی والی تے دوبارہ گنتی دا امکان اے۔ راجہ صغیر صرف 49 ووٹاں توں جتے نیں۔ پی ٹی آئی نوں 16 تے اک تے آزاد امیدوار کامیاب ہویا۔ لہور ن لیگ دا گڑھ تے گھر سی جتھوں چار وچوں صرف اک سیٹ اوہدے حصے وچ آئی۔ ہن پی ٹی آئی دے کول پنجاب وچ 189 ارکان نیں تے حمزہ کل دے ہون والے وزیراعلیٰ دے الیکشن توں باہر نظر آ رہے نیں۔ سیاسی اصولاں دا تقاضا تے اوہناں ولوں وزارت اعلیٰ توں فوری مستعفی ہونا اے پر اینے اصول ساڈے ایتھے سیاست وچ گھٹ ای نظر آندے نیں۔ اصولاں دی گل کریئے تے اوہ کجھ نہ ہوندا جو پنجاب وچ حکومت سازی لئی ہویا۔ ایس کالم دی اشاعت تک پاکستان دی سیاست وچ کوئی وڈی تبدیلی آ سکدی اے۔ حمزہ شہباز تے اوہناں دے ساتھیاں ولوں ہتھ پیر مارن دی کوشش کیتی جا سکدی سی پر مریم نواز دے ایس بیان نے حکومتی مشینری دے ہتھ پیر بنھ دتے کہ لوکاں دے فیصلے سامنے سر جھکانا چاہیدا اے۔ مریم نواز نے آکھیا کہ سیاست وچ ہار جت ہوندی رہندی اے۔ دل وڈا کرنا چاہیدا اے۔ جتھے جتھے کمزوریاں نیں اوہناں دی نشاندہی کرکے اوہناں نوں دور کرن لئی محنت کرنی چاہیدی اے انشاء اللہ خیر ہووے گی۔
پنجاب وچ ہون والے ایہ ضمنی انتخابات عمران خان تے نوازشریف دے بیانیے دی جنگ سی۔ نوازشریف نے بھاویں ایہ کہیا اے کہ مشکل فیصلیاں دی قیمت ادا کرنی پئی۔ مشکل فیصلے کیوں تے کہدے کہن تے کیتے؟ پٹرول سو روپیے لٹر مہنگا کرکے اٹھاراں روپیے سستا کیتا تے کریڈٹ انج لیا کہ جیویں کشمیر فتح کر لیا اے۔ مسلم لیگ ن نوں بیانیے توں یوٹرن دا خمیازہ بھگتنا پیا۔ ووٹ نوں عزت دیو دے بیانیے تے قائم رہندے تے ضمنی الیکشن دی نوبت ای نہ آندی۔ ودھ توں ودھ ایہو ہوندا کہ پنجاب وچ مسلم لیگ دی حکومت نہ بن سکدی۔ ووٹ نوں عزت دیو دے بیانیے نوں ایناں دھچکا نہ لگدا کہ مسلم لیگ ن دی سیاست وچ انج دا چب پے گیا جہدی مرمت اجے ممکن نہیں۔ انتخابات والے دن ادارے غیرجانبدار نظر آئے پر الیکشن توں پہلاں حکومتی مشینری سرگرم نظر آئی۔ پی ٹی آئی ایس وائی زیڈ دی گل کردی اے۔ الیکشن دے دن پی ٹی آئی دے خلاف اداراتی توپاں خاموش نظر آئیاں جہدے نال اداریاں دے وقار دی بحالی وچ پیش رفت ہو رہی اے۔
زین قریشی تے نعیم وچکار ملتان وچ سخت مقابلہ سی۔ نعیم نے ہارن دے بعد زین قریشی نوں اوہناں دے نال ملاقات کرکے مبارکباد دتی۔ مسلم لیگ ن دے کجھ لیڈراں نے وی پی ٹی آئی نوں ایس جت تے مبارکباد دتی اے۔ تحریک انصاف دی قیادت ولوں ایس فتح تے متکبرانہ رویے دا اظہار نہیں کیتا گیا۔ عمران خان نے تے فاتحانہ تقریر وی نہیں کیتی۔ سیاستداناں لئی ملتان دے نوجوان نعیم دا رویہ قابل تقلید ہونا چاہیدا اے۔ ہن مینوں سیاست وچ اک نویں صف بندی نظر آ رہی اے۔ بلاول بھٹو تے اوہناں دے سیاست وچ ماہر تے شاطر والد آصف علی زرداری اجہے گھوڑے توں اتر آن گے جو ریس دے آخر تک وی نہ جا سکے۔ اوہ سولوفلائٹ دی کوشش کرن گے۔ اج توں پنجاب وچ تبدیلیاں دا آغاز ہو جاوے گا۔ پنجاب وچ ہون والی تبدیلی دے اثرات مرکز تے وی پین گے تے معاملے الیکشن ول جاندے ہوئے نظر آ رہے نیں۔ میری نظر توں اک ٹویٹ گزریا جہدے وچ کہیا گیا اے کہ پی ٹی آئی نے منحرف ارکان تے اسٹیبلشمنٹ دے خلاف اپنے بیانیے توں بھاری گنتی وچ ووٹ حاصل کیتے نیں۔ عمران خان نوں وفاق توں ہٹان تے پنجاب وی اوہناں دے ہتھوں چلا گیا اے۔٭٭