غلام مصطفی آزاد نقیبی دِی یاداں دَا پرَاگا

جہناں نے پنجابی زبان وادب دِی سیوا وچ اپنی ساری حیاتی گذار دتی تے پنجابی ادب دے دامن نوں مالا مال کرکے ایہدی وسعت نوں ہور وھان لئی اپنے قلم نوں کتے وِی رُکن نہ دتا۔
آزاد نقیبی ہوراں دِی اک خوبی ایہ وِی اے کہ اُونہاں دِی شاعری بڑی سادہ ،عام فہم ، تے ثقیل لفظاں توں پاک اے تے نالے دوجے شاعراں دِی طرحاں لفظاں نوں تروڑ مروڑ کے لکھن دے بالکل وی عادی نہیں۔آزاد نقیبی ہوراں دِی شاعری پڑھ کے ہر بندے دا ذہن قوس وقزاح دِی طرحاں رنگ برنگا ہوجاندا اے۔
ہتھلی کتاب ”یاداں دا پراگا” آزاد نقیبی ہوراں دا پہلا پنجابی شعری پراگا اے جہدے اِچ اُونہاں نے نعتاں ،غزلاں ، گیتاں ،نظماں تے ماہیے راہیں اپنے داخلی تے خارجی وچاراں دا اظہار کیتا اے۔ اینہاں دِی اک نعت ملاحظہ فرمائو ذرا :
آ گلاں کرئیے پیار دیاں
اس جگ توں سوہنے یار دیاں
اوہ سوہنا سب توں سوہنا ایں
کیا باتاں نیں سرکار دیاں
ہر ویلے رحمت وسدی اے
واہ شاناں اُس دربار دیاں
عمر، عثمان، صدیق، علی
ایہہ بانہواں نیں منٹھار دیاں
کیہ صفت آزاد بیان کرے
رب صفت کرے خود یار دیاں
اپنے اُستاد محترم حکیم علی محمد راز لئی ایناں جذبات دا اظہار کر دے نیں کہ:
مینوں قلم نہ پھڑنا آئوندا سی
مینوں قلم پھڑایا راز ہوراں
میں علم ادب توں واقف ناں
مینوں سبق پڑھایا راز ہوراں
ایہہ راز دیاں سب گلاں نیں
کیہ راز سکھایا راز ہوراں
بے ادباں وچ شمار ساں میں
مینوں ادب سکھایا راز ہوراں
آزاد اُونہاں دِی شفقت اے
مینوں شاعر بنایا راز ہوراں
(جاری اے)