بہبود آبادی دے عالمی دن دے موقعے اتے سیمینار

محکمہ بہبود آبادی تے پلاک دے تعاون نال بہبود آبادی دے عالمی دن دے موقع اتے اک سیمینار دا انعقاد کیتا گیا جہدی صدارت پروفیسر طارق محمود جٹالہ نے کیتی جد کہ ڈائریکٹر جنرل پلاک ڈاکٹر صغرا صدف بطور مہمان خصوصی رلت کیتی۔ دوجے مقررین وچ ڈاکٹر طاہر احمد صدیقی، ڈاکٹر مظہر، میاں امجد فاروق، مولانا محمد نعمان، رانا نور، کشور، بشریٰ، شبانہ رفاقت، احسن رمضان تے عامر یوسف شامل سن۔
مقررین نے آکھیا کہ ایس ویلے دنیا نوں سب توں ودھ جہناں مسئلیاں دا سامنا اے اوہناں وچ سرفہرست آبادی وچ وادھا اے۔ کسے وی ملک دی ترقی دا دارومدار اوہدی آبادی تے وسائل وچ توازن دے نال جڑیا ہوندا اے۔اوہناں چیزاں وچ توازن نہ ہون دی وجہ نال صحت’ صفائی’ خوراک’ تعلیم تے روزگار دے مسئلے جنم لیندے نیں۔ آبادی وچ بے ہنگم وادھے کارن زرعی زمین قصبیاں تے شہراں وچ تبدیل ہو رہی اے۔ انسان نوں اللہ تعالیٰ نے عقل سلیم عطا کر کے اشرف المخلوقات دے منصب اتے فائز کیتا۔ ہر انسان نوںکنبہ ودھان توں پہلاں ایہہ سوچنا چاہیدا اے کہ کیہ میں اپنے خاندان نوں اوہ سہولتاں بہم پہنچا سکنا واں جہڑی کہ معاشرے دا اک مفید شہری بنن لئی ضروری نیں۔ اولاد دی تعلیم و تربیت دی اولین ذمہ داری اوہدے والدین اتے عائد ہوندی اے۔ وسائل دی کمی دے کارن اولاددی ٹھیک تربیت دا نہ ہونا والدین لئی پریشانی دی وجہ بن سکدا اے۔ آبادی وچ وادھے دی سب توں وڈی وجہ اولاد نرینہ دا حصول اے۔
ایہناں سارے مسئلیاں دے حل لئی ضروری اے کہ معاشرے دا ہر فرد اپنی ذمہ داری نوں محسوس کرے۔ لوکاں لئی تفریح دے موقعے فراہم کیتے جاون۔ اخباراں’ ٹی وی تے سوشل میڈیا اتے آگاہی دی مہم چلائی جاوے۔ ٹاک شوز’ ڈرامے تے شارٹ ویڈیوز دے ذریعے بہبود آبادی دے پیغام نوں عام کیتا جاوے۔ بوہتے بچے پیدا کرن والیاں لئی جرمانے دا نفاذ کیتا جاوے۔ا ولاد نرینہ دے حصول لئی حکومتی سطح اتے صحت دی سہولتاں فراہم کیتیاں جان۔
ایس موقعے اتے ڈاکٹر صغرا صدف ڈائریکٹر جنرل پلاک نے آکھیا کہ اولاد لئی صرف خوراک دا انتظام کرنا کافی نہیں ہوندا بلکہ اوہناں دی تعلیم و تربیت جے صحیح پیمانے اتے نہ کیتی جاوے تے والدین لئی باعث پریشانی ہوندا اے۔ ایسے طرح جے تسیں بچیاں نوں اپنی شفقت توں محروم رکھدے او تے اوہ اگے چل کے نفسیاتی مسئلیاں دا شکار ہو کے معاشرے دے ذمہ دار شہری نہیں بن سکدے۔ اوہناں نے آکھیا پلاک تے ایف ایم 95ہمیشہ قومی ایشوز اتے آگاہی دے پروگراماں نوں اہمیت دیندا رہندا اے۔