صوفیاں دی زبان پنجابی

زبان انسان دا ذریعہ ء اظہار ہوندی اے۔ سب توں موثر اظہار دا ذریعہ ماںبولی ہوندا اے جس دے ذریعے اپنی گل موثر طریقے نال دوسرے تک پہنچائی جا سکدی اے۔ پنجاب دی زبان پنجابی اے اس دا شمار دنیا دی دس وڈیاں زباناں وچ ہوندا اے۔ دنیا بھر وچ ٢٠٠ ملین توں زیادہ لوگ پنجابی بولدے نیں ۔ایہ برصغیر اور عالم اسلام دی تیسری وڈی جد کہ پاکستان دی سب توں وڈی زبان اے۔پنجابی زبان تقریبا ً ٢٥ لہجیاں وچ بولی جاندی اے۔
پنجاب ہک وسیع،سرسبز وشاداب اور خوشحال خطہ اے، جتھے پہاڑ،دریا ،ندیاں نہراں،ہرے
بھرے کھیت اور صحرانیںاور چاروں موسم نیں،ہر طرح دے اناج اورپھل اس دی ذرخیز دھرتی پیدا کر دی اے۔ اس دھرتی دی ذرخیز ی اور اناج ہی شاید اس د اقصور اے جس دی وجہ نال وسطی ایشیا توں حملہ آور لٹ مار کرن لئی آندے رئے نیں ۔ ایہ سلسلہ اج وی کسے نہ کسے طریقے نال لیکن کسے ہور صورت وچ جاری وساری اے ۔ہک کروڑ افغان مہا جرین گزشتہ چالیس سال وچ پنجاب اور پاکستان وچ آباد ہو چکے نیں اور سلسلہ بند نہیں ہو ریا جس وی وجہ نال امن وامان اور دہشتگردی جیسے مسائل دا سامنا کرنا پے ریا اے ۔ افغان مہاجرین نے پنجاب اور پاکستان دی ڈیموگرافی تبدیل کر دتی اے۔
پنجاب دا پہلا نام سپت سندھو سی یعنی ست دریاواں دی سرزمین ، دریائے ہاکڑہ خشک ہو چکیا اے باقی چھ دریا آب وتاب نال چل رئے نیں۔پیشاور،ہزارہ تے جموں ڈویژن وی سپت سندھو یا پنجاب دا حصہ ہوندے سان ۔پشاور دی بولی ہندکو پنجابی سی لیکن ہزار سال توں جاری افغانی پختوناں دی آبادکاری دے کارن اس دی ڈیموگرافی بدل چکی اے ہون پختون اکثریت وچ ہوچکے نیں۔ انگریز نے ١٩٠١ دے وچ پنجاب نوں تقسیم کر کے پشاور اور ہزارہ ڈویژن تے مشتمل الگ صوبہ سرحد قائم کر کے پنجاب دا جغرافیہ وی تبدیل کر دتا سی۔چکوال توں مولوی سلیمان نے ١٨٩٩ وچ معراج نامہ وچ اپنے اس شعر دے ذریعے پنجاب اور پنجابی زبان دا حدود اربعہ کچھ اس طرح بیان کیتا اے۔
پیشاور تھیں جمنا تائیں ، چنبہ تھیں تا ڈیرہ بولن سبجھن لوک پنجابی سچا سخن اے میرا
١٩٤٧ دی تقسیم اور کٹ وڈ توں بعد چڑھدے پنجاب نوں ہندوستان نال اور لہندے پنجاب نوں پاکستان دا حصہ بنا دتا گیا اے۔دس لاکھ مذہب دے نام تے پنجابی قتل ہو گئے ۔١٧ ملین توں زائد جبری ہجرت کرن تے مجبور کر دتے گئے۔ہندپنجاب دی تاریخ وچ اس توں وڈا قتل عام کدی نہیں ہویا سی۔ بدقسمتی نال پنجاب اور پنجابی دے خلاف اج وی سازشاں جاری نیں ۔ اپنے اور غیر سب اپنے سیاسی مفادات لئی پنجاب اور پنجابی زبان دے مزید ٹکرے کرناں چاہندے نیں۔ پنجابی زبان دے لہجیاں نوں پنجابی توں الگ کر کے علیحدہ زبان قرار دتا جا ریا اے ۔اگر پنجابی دے سٹینڈرڈ لہجے نوں پنجاب دے سکولاں وچ لاگو نہ کیتا گیا تے پنجاب اور پنجابی دی تقسیم دا سلسلہ بند نہیں ہوئے گا۔ اس توں وڈی بدقسمتی ہور کی ہو سکدی اے کہ پنجابی اپنی دھرتی تے کالا باغ دے مقام تے انتہائی کارآمد ڈیم نہیں بنا سکے جس دا فائدہ نہ صرف پنجاب بلکہ پورے پاکستان نوں ہونا سی کیونکہ اس دی جگہ پنجاب وچ ایس لئی پنجاب مخالف اس نوں بنن نہیں دے رئے حالانکہ اس دی feasibility بنیاں وی ٤٠ سال ہو چکے نیں۔
پنجاب پیراں فقیراں ، صوفی درویشاں تے گوو رواںدی دھرتی اے جنھاں انسانیت اور بھائی چارے دا پیغام لوکائی دی زبان پنجابی وچ دتا اے ۔اج اگر اسی مسلمان آں تے ایناں رب دے ولیاں دی تعلیمات اور تبلیغ دی بدولت آں۔ساڈے صوفی شعرا جیہڑے کے عربی اور فارسی دے عالم سان لیکن اوناں نے شاعری اور ادبی کام اس دھرتی دی زبان پنجابی وچ کیتا سی۔
ہزار سال تک ہند تے پنجاب تے افغان ترک نژادفارسی بولن والے حکمراناں دی حکمرانی رئی جناں نے دور وچ اٹھ سو سال تک پنجاب دی سرکاری درباری زبان پنجابی دی بجائے فارسی سی ۔ انگریزنے پنجاب تے قبضہ کرن تو بعد فارسی دی جگہ تے انگریزی نوں سرکاری زبان بنایا جیہڑی اج وی ساڈی سرکاری تے درباری زبان اے جد کہ ذریعہ تعلیم اور قومی زبان اردو اے لیکن ہزار سال توں جاری مسلسل پابندی دے باوجود پنجابی زبان اج وی زندہ اے کیونکہ ایہ لوکائی دی زبان اے اور پنجاب دی پہچان اے اور پاکستان دی سب توں وڈی زبان اے۔
بابا فرید،شاہ حسین،سلطان باہو،بلھے شاہ،وارث شاہ،علی حیدر ملتانی ،مولوی غلام رسول،قادر یار،ہاشم شاہ ،خواجہ غلام فرید اور میاںمحمدبخش جیسے پنجابی کلاسیکل شاعر پیدا
ہوئے نیںجنہاں دا ادبی مقام بہت اوچا اے۔ ایناں دی ادبی تخلیقات دا مقابلہ دنیا دی کسے زبان دی ادبی تخلیق نال کیتا جا سکدا اے، پنجاب اور پنجابی ایناں دی ادبی تخلیقات تے فخر کر سکدے نیں ایہ صوفی شعراپنجابی ادب دا فخر نیں۔وارث شاہ نوں پنجابی زبان دا شیکسپئیرکہیاجاندا اے۔ہیر رانجھا دا قصہ لکھ کے اس لوک داستان نوں امر کر دتا اے ایس قصے دے وچ وارث شاہ نے اس زمانے دی پنجاب دی تاریخ ،رہتل وہتل، رسم ورواج،تصوف،روحانیت،عشق حقیقی،فلسفہ غرض زندگی دے ہر پہلو نوں موضوع سخن بنایا اے۔وارث شاہ دا شعری اسلوب ایناں نویکلا اور اعلی اے کہ او بلا شبہ پنجابی سخن دے وارث نیں۔بلھے شاہ اورشاہ حسین دیاں کافیاں،بابا فرید دے ا شلوک ،کلام غلام فرید میڈا عشق وی توں مینڈی جان وی توں،مولوی غلام رسول دا قصہ یوسف زلیخامیاں محمد بخش دی سیف الملوک ہر کس وناقص زبان زد عام اے۔
گزشتہ دو سو سال توں انگریزی اور اردو پنجاب دے سکولاں وچ رائج نیں۔ سکولاں دے وچ ذریعہ تعلیم پنجابی دی بجائے اردو دی
وجہ نال اردو ادب نے بہت ترقی کیتی اے ۔ گزشتہ ڈیڈھ سو سال وچ اردو دے اینے وڈے شاعر تے ادیب یو پی اور دلی نے نہیںپیدا کیتے جنے پنجاب نے پیدا کیتے نیں۔ علامہ اقبال، فیض احمد فیض،حفیظ جالندھری،ظفر علی خان،سعادت حسن منٹو،ساحر لدھیانوی،احمد ندیم قاسمی اور دیگر مہان اردوشاعر تے ادیب پنجاب نے پیدا کیتے نیں ۔پنجابی مسلسل نظر انداز ہوون دے کارن گزشتہ سوسال توں لہندے پنجاب وچ وڈے پنجابی شاعر نہیں پیدا ہورئے۔ البتہ چڑھڈے پنجاب وچ کجھ صورت حال بہتر اے کیونکہ اوتھے سکولاں دے وچ پنجابی لازمی مضمون دے طورپڑھائی جا رئی اے۔ مسلسل پابندی دے باوجود پنجابی زبان وچ ایناں زور اے کہ اج وی زندہ اے اج پنجاب وچ ہک احساس وی پیدا ہو ریا کہ پنجابی نوں فروغ دتاجائے حقیت ایہ وے کہ پنجابی نوں جناں نقصان پنجابی الیٹ نے پہنچایا اے اوناں نقصان کسے غیر نے نہیں پہنچایا اے۔پچہتر سال توں پنجابی نال سوتیلا سلوک کیتا جا ریا اے۔اس تے سرکارے دربارے پابندی اے ۔بدقسمتی نال طبقاتی تفریق دی نمائندہ الیٹ کلاس نے ذریعہ تعلیم وچ وی طبقاتی تقسیم پیدا کر دتی اے۔لیکن اس دے باوجود اس قحط الرجالی دور وچ وی بہت سارے شاعر پیدا کیتے نیںجناں تے فخر کیتا جا سکدا اے۔
سکھاں دی مذہبی کتاب گرنتھ صاحب وی پنجابی زبان وچ اے اس طرح پنجابی اک لحاظ نال مذہبی زبان وی اے ۔سکھ اپنی مذہبی تعلیمات پنجابی زبان وچ لیندے نیں ۔جس دا رسم الخط گورمکھی اے جد کہ لہندے پنجاب وچ مسلمان پنجابی شاہ مکھی وچ پڑھدے نیں۔ اگر چہ پنجابی زبان دے دو رسم الخط نیں جس دی وجہ نال پنجابی ادب دی ترویج وچ کجھ مشکلاں حائل نیں لیکن فیر وی پنجابی زبان ادبی لحاظ نال اینی امیر اے کہ ہزار سال توں جاری سرکاری درباری پابندیاں وے باوجود زندہ اے۔میں سمجھنا آں کہ پیراں فقیراں تے گرواں دا روحانی فیض وی اے۔میں پر امید آں کہ اج نہیں تے کل ضرور صوفیا دی زبان پنجابی پنجاب دی کورٹ کچہری زبان ضرور بنے گی اورپنجاب دے سکولاں وچ وی اس نوں بطور لازمی مضمون ضرور لاگو کیتا جائے گا۔
ْمحمد ظاہر پنجابی پرچار لاہور