موہڈا بن جائو!… دوجیاں دیاں اوکڑاں دور کرو

سمندر دی پر شور لہراں ساحل نال ٹکرا رہیاں سن’ بگلاں دی سریلی آوازاں نے ماحول وچ عجب سرور پیدا کیتا ہویا سی۔ اک بڈھا بندا اوس سارے منظر توں لطف اندوز ہوندے ہوئے چہل قدمی وچ مصروف سی۔ کجھ اگے چل کے اوہنے اک عجیب منظر ویکھیا۔ سمندر دا ساحل سٹار فش مچھیاں نال بھریا ہویا سی۔ ایہہ اوہ مچھیاں سن جہناں نوں سمندر دی لہراں ایتھے لے آئیاں سن تے ہن اوہ پانی وچ واپس جان لئی بے تاب سن۔ اوہناں وچ اک منڈا کھڑا سی جہنے پینٹ دے پائنچے تے شرٹ دے آستین چڑھائے ہوئے سن تے بڑے انہماک نال اپنے کم وچ مصروف سی۔ا وہ اک اک سٹار فش نوں چک کے سمندر وچ سٹ رہیا سی۔ اوہدی دلچسپی تے شوق و ذوق نوں ویکھ کے بڈھے بندے کولوں رہیا نہیں گیا تے بچے دے کول آ کے پچھیا: ایتھے تے سیکڑاں مچھیاں پئی ہوئیاں نیں ‘تسیں کنیاں نوں سمندر وچ واپس سٹو گے تے تہاڈے ایس کم نال سیکڑاں دی گنتی وچ موجود مچھیاں نوں کیہ فرق پوے گا؟ منڈے نے جھکدے ہوئے سر چک کے اوہدے ول ویکھیا۔ فیر اک مچھی پھڑی’ اوہنوے ہتھ وچ چکیا تے سمندر ول اچھال کے بولیا: ایس اک نوں تے فرق پووے گا۔
ایس کرہ ارض اتے زندگی دی بقا دا راز وی ایہو اے کہ ایتھے اک انسان نے دوجے دا ہتھ پھڑیا ہویا اے۔ جے دوجیاں دی مدد دا جذبہ ختم ہو جاوے تے شاید انسانی ارتقا وی رک جاوے۔ ہر انسان جدوں دنیا وچ آندا اے تے مسئلیاں تے وسائل دے پورے اک پیکیج دے نال آندا اے۔ وسائل اتے خوشی تے مسئلیاں دی زیادتی اتے پریشانی شروع ہو جاندی اے۔ درحقیقت ساڈی زندگی وی ساحل سمندر وانگوں اے جہدے اتے بہت سارے مسئلے سٹار فش وانگوں کھلرے ہوئے نیں۔ ہن جہڑا وی انسان ساڈی زندگی وچ آ کے اوہناں وچوں کوئی اک سٹار فش وی چک کے سٹدا اے تے سوال کدی نہیں کیتا جاوے گا کہ ایہدے توں کیہ فرق پووے گا؟ یقینا فرق پووے گا۔ عین ممکن اے کہ اوہ مسئلہ ختم ہو کے اک سنہری موقعے وچ تبدیل ہو جاوے جہدا فیدہ چکدے ہوئے انسان اک وڈا فیصلہ کرے تے اپنی پوری حیاتی نوں ای تبدیل کر لوے۔
دنیاوی نقطہ نظر توں جدوں اسیں کامیاب انسان دی تعریف چاہنے آں تے پتہ چلدا اے کہ ایتھے کامیاب اوہنوں تصور کیتا جاندا اے جہدے کول قابلیت’ مہارت’ عزت’ پیسہ تے شہرت ہووے لیکن جدوں اسیں اسلامی نقطہ نظر نال ایہہ سوال کرنے آں تے سانوں جواب ملدا اے کہ بہترین انسان اوہ اے جہڑا دوجیاں لئی فیدہ منداے۔ ایس اصول دے تناظر وچ ہر عقل مند انسان اپنے علم’ تجربے تے مہارت نال دوجیاں نوں وی فیدہ دینا چاہندا اے کیوں جے اوہ اپنی قابلیت دا حق ادا کرنا چاہندا اے تے اوہدے ذہن وچ ہوندا اے کہ اگرچہ میں ساری دنیا نوں تبدیل نہیں کر سکدا لیکن جے اک شخص نوں وی فیدہ مل گیا تے اوہنوں فرق ضرور پووے گا۔
آکھدے نیں کہ جدوں تک ساہ’ اوہدوں تک چانس۔ انسان دنیا وچ آندا اے تے زندگی گزاردے ہوئے اوہ ایتھے بہت کجھ سکھدا اے۔ زندگی بھر دے حالات و واقعات توں اوہدے کول بہت سارے تجربے آ جاندے نیں۔ اوہدے کول اپنی لائف سٹوری ہوندی اے۔ بھرویں معلومات ہوندیاں نیں۔ وسیع تجربہ تے مشاہدہ ہوندا اے تے عزائم دی کامیابی یا نکامی ہوندی اے۔ اوہدے نال نال جدوں اوہ اپنے لئی اک فیلڈ دا انتخاب کر کے اوہدے وچ مہارت وی حاصل کر لووے تے اوہ ایکسپرٹ کہلاندا اے۔دوجیاں نوں فیدہ دینا تے آسانیاں پیدا کرن دا اک طریقہ اوہ اے جہنوں عرف عام وچ خدمت خلق آکھیا جاندا اے۔ اوہدا تعلق معاشرے دے عام افراد نال اے جد کہ اک طریقہ خاص اے جہدا تعلق کسے خاص فیلڈ یا شعبے دے نال اے۔ اج دے مضمون وچ اسیں اوس خاص قسم اتے گل کراں گے۔
یاد رکھو! کوئی وی انسان جدوںThe One Thing فارمولے اتے عمل پیرا ہو جاوے تے فیر اوہ ایس کم وچ مہارت نامہ حاصل کر لیندا اے۔ اسیں ایہہ دسن دی کوشش کراں گے کہ ماہر تے ایکسپرٹ بنن مگروں پیشہ ورانہ طریقے نال دوجیاں دی مدد تے اوہناں دی حیاتی نوں بہتر کیویں کیتا جا سکدا اے؟
کسے وی ماہر انسان دی مہارت تے تجربے توں دوجے لوکاں نوں فیدہ اوہدوں مل سکدا اے جدوں اوہدے کول تھلے دتیاں چیزاں ہون۔
1:انفرادیت
اوہدی حیاتی دی کہانی’ تجربہ’ مشورہ تے کامیابی یا نکامی دوجیاں توں قطعاً منفرد تے مختلف ہووے۔ جے کوئی شخص ایہہ دسے کہ میں پیدا ہویا’ جوان ہویا’ پڑھائی مکمل کیتی’ نوکری کیتی’ ویاہ کیتا تے دنیا توں چلا گیا تے ایہہ کوئی کہانی نہیں کیوں جے ایہہ ہر انسان دی کہانی اے۔ البتہ اک شخص کوڑا چنن توں آغاز کردا اے تے امریکہ دی لیڈرشپ تک پہنچ جاندا اے۔ اک ہور شخص ددھ ویچن توں شروع کردا اے تے پاکستان دا وزیراعظم (ملک معراج خالد) بن جاندا اے۔ اک شخص رنگ دے کنستراں توں شروع کردا اے تے سب توں وڈا ہائوسنگ پراجیکٹ لانچ کر دیندا اے یا اک انسان مزدوری کردے ہوئے کنداں بناندا اے تے اک ویلے مگروں اوہناں کنداں تھلے اوہدے مشاعرے منعقد ہوندے نیں تے ایہہ کہانی کہلاندی اے۔
انسان دے فیصلیاں توں ثابت ہوندا اے کہ اوہ کنا عظیم انسان اے۔ جے زندگی دے فیصلے تے اوہناں دے نتائج ویسے ای نیں جیویں ساریاں دے ہوندے نیں تے ایہہ کوئی عظمت نہیں اے۔ کہانی اوہدوں بنے گی جدوں زندگی دے مصائب تے مشکلاں نے تہاڈے نال زیرو لایا لیکن تسیں زیرو لگن دے باوجود ہیروبن کے وکھایا۔ اکثر لوک ایہہ شکوہ کرن گے کہ میرے کولوں حالات درست نہیں ہو سکے۔ یاد رکھو! جہڑا انسان اپنے نصیب نوں نہیں بدل سکدا اوہ دوجیاں دے نصیب نوں کیویں بدل سکدا اے؟ جے کسے دی عقل تے ڈگری اوہدی اپنی زندگی وچ انقلاب نہیں لیا رہی تے اوہ ایہہ دعویٰ کر دیوے کہ دنیا دے لوکاں نوں عقل دیواں گا تے ایسی عقل دا کوئی فیدہ نہیں۔ عقل تے اوہ ہوندی اے جہڑی پہلاں انسان دے اپنے کم آ جاوے۔ ایسے طرح اک انسان کولوں اک صفحہ نہیں لکھیا جاندا تے اوہ پوری دنیا نوں لکھنا سکھان چلیا اے تے اوہ کیویں سکھاوے گا؟ فقط خلاصے پڑھ کے تے ادب نوں نہیں جانیاجا سکدا۔ جے کوئی شخص دوجیاں نوں حکمت دینا چاہندا اے تے اوہدے لئی اوہدا کثیر المطالعہ ہونا بہت ضروری اے۔
جدوں مطالعہ دی کثرت ہووے گی اوہدوں انسان داد لکھیا ہویا’ دوجے لوک پڑھن گے۔ اوسے طرح بعض لوکاں نوں ایہہ وی شوق ہوندا اے کہ سانوں سنیا جاوے لیکن اوہناں نے کسے ہور نوں سنیاای نہیں ہوندا۔ جدوں دوجیاں نوں سنیا ہووے گا اوہدوں تسیں بولو گے تے ساری دنیا سنن لئی آوے گی۔ مسئلہ ایہہ اے کہ اج ہرشخص چھیتی وچ کجھ بننا چاہندا اے لیکن اوہ ایہہ بھل جاندا اے کہ چھیتی وچ صرف گوبھی بندی اے درخت نہیں۔ تسیں دوجے لوکاں دی مدد اوہدوں کر سکو گے تے دنیا اوہدوں تہاڈے کول آوے گی۔ جدوں تسیں دوجیاں توں منفرد ہوو’ کیوں جے دنیا منفرد ویکھنا تے سننا چاہندی اے’ جہڑا منفرد ہووے گا اوہو ممتاز وی ہووے گا۔
2.دوجیاں لئی سبق
دوجی چیز ایہہ اے کہ تہاڈے کول جو کجھ وی اے اوہدے وچ دوجیاں لئی سبق ہونا چاہیدا اے۔ بہت سارے لوک K2اتے گئے ہون گے لیکن کے ٹو کہانی لکھن لئی تہانوں مستنصر حسین تارڑ دی اکھ چاہیدی اے۔ محمد بن قاسم نوں ہزاراں لوکاں نے پڑھیا ہووے گا لیکن قاسم دی تلوار بنن لئی نسیم حجازی بننا پیندا اے۔ جدوں تک تسیں کسی کہانی وچ سبق نہیں پاندے تے اوہنوں سبق آموز نہیں بناندے تے لوک وی اوس کہانی نوں سننا پسند نہیں کردے۔
3.اقدار
جے تہاڈی گل بات’ مشورہ’ تجربہ تے لائف سٹوری لوکاں دی حیاتی وچ کجھ اقدار پیدا کر سکدی اے تے اوہدا مطلب اے تسیں اک کامیاب تے ماہر انسان او’ لیکن جے تہانوں سنن تے جانن مگروں کسے دی حیاتی وچ کوئی تبدیلی نہیں آئی تے فیر تسیں فیدہ مند نہیں او۔ ضروری نہیں کہ ہر کہانی ای کامیاب ہووے’ تسیں اپنی نکامی توں وی لوکاں نوں فیدہ دے سکدے او۔ تسیں آکھ سکدے او کہ گڈی چلاندے ہوئے موبائل استعمال نہ کرو کیوں جے میں ایہہ غلطی کیتی سی۔ ہن ٹٹی لتاں دے نال جی رہیا واں۔ تسیں جدوں وی لوکاں دی حیاتیاں وچ اقدار (Values) پیدا کرو گے تے تسیں دوجیاں توں منفرد ہو جائو گے تے فیر جو تسیں بولو گے لوک اوہنوں محفوظ رکھن لئی اپنے کول نوٹ کرن گے۔ خود نوں منفرد بنان لئی اپنی حیاتی وچ رسک لوو’ کیوں جے حیاتی اوہو کامیاب گزار سکدا اے جہڑا وڈے وڈے فیصلے کر سکدا اے۔ جے تسیں عام جئی حیاتی منگو گے تے خاص کدی نہیں بن سکو گے۔ دوجیاں توں منفرد ہون لئی وڈے فیصلے کرنے پیندے نیں۔ دکھ’ درد برداشت کرنا پیندا اے۔ محبتاں قربان کرنی پیندیاں نیں تے اپنے مقام نوں چھڈنا وی پیندا اے کیوں جے اک مقام نوں چھڈے بغیر نویں مقام دی تلاش کرن والا بے وقوف ہوندا اے۔
سوال علم دی راہواں کھولدا اے۔ اپنے علم و فکر وچ ترقی کرن لئی سوال بہت ضروری اے۔ درحقیقت سوال دی کھوج ای انسان اتے نویں راہواں کھولدی اے۔ اوہدے اتے نویں چیزاں آشکار ہوندیاں نیں تے اوہدی تحقیق تے جستجو اک منزل اتے پہنچ کے تمام نہیں ہوندی بلکہ اوہ اگلی منزلاں ول ودھدا اے لیکن ایہہ یاد رکھو کہ سوال اوہو کرسکدا اے جہنے کجھ پڑھیا تے سکھیا ہووے۔ اندروں کھوکھلا شخص سوال نہیں کر سکدا’ ایسے طرح جہدے کول حقیقی سوال نہیں’ اوہنوں جواب وی حقیقی نہیں ملے گا۔جہڑے انسان دے کول سوال نہیں ہوندا اوہ مردیاں وچ شمار ہوندا اے تے کوئی استاد’ مرشد’ لائبریری یا کتاب اوہنوں جواب نہیں دے سکدی البتہ جہڑا سراپا سوال بن جاوے تے ایہہ کائنات خود اوہدے لئی جواب بن جاندی اے۔
اگے ودھو! تحقیق تے جستجو نوں اپنا ہتھیار بنائو تے کسے اک شخص دی حیاتی نوں آسان ضرور بنائو۔ بدقسمتی نال ایتھے لتاں کھچن والے تے بہت نیں لیکن اپنا موہڈھا پیش کر کے اتے چکن والے لوک بہت گھٹ نیں۔ ایہہ دنیا مکافات عمل اتے گردش کر رہی اے۔ ایتھے جہڑا وی شخص جو وی کجھ دیندا اے اوہو چیز اگلے چوک اتے اوہدا استقبال کر رہی ہوندی اے۔ تسیں وی اپنی قابلیت’ علمیت تے تجربے نال دوجیاں لئی اک مضبوط موہڈھا بنا دیو’ تہاڈی اگلی منزلاں دے رستے خود بخود تہاڈے لئی کھلدے جان گے۔