افواج پاکستان زندہ آباد

اسلامی جمہوریہ پاکستان دے سیاسی تے ملکی حالات جیسے وی ہون’ افواج پاکستان ساڈی قومی سلامتی دی علامت ہی رہوے گی۔ ساڈے دشمنوں دے دلاں اتے اوہدی دھاک بیٹھ چکی اے۔ ساڈے سربکف مجاہداں دے پیراں دی دھمک جدوں زمین اتے پیندی اے تے فضاواں وچ عوام دا نعرہ تکبیر گونجن لگدا اے۔ ساڈے وطن لئی خاکی وردی دی شان تے آن جان ومال توں ودھ کے اے۔ وطن دا جھنڈا دنیا بھر دے جھنڈیاں وچ اپنی اک حیثیت’ عظمت تے پہچان رکھدا اے۔ جغرافیائی سرحداں دی حفاظت اتے مامور ساڈے جوان انج سینہ بجا کے دشمن دا سامنا کرندے نیں کہ اوہناں دے نعرہ تکبیر توں دشمن دہل جاندا اے۔ اپنی جان ہتھیلی اتے رکھ کے وردی’ وطن’ اللہ تے اپنی ماں نال کیتا گیا وعدہ نبھان لئی ساڈی سپاہ ساری عسکری قیادتاں دے نال جنگلاں’ بیاباناں’ پہاڑاں’ وادیاں’ گلیشیرز’ سمندر تے فضاواں وچ اپنی خدمات جیویں انجام دیندیاں نیں اوہ نہ صرف قابل تحسین نیں بلکہ بے مثل وی نیں۔ قوماں دی زندگی وچ اہم فیصلیاں دے بہت سارے موقعے آندے نیں۔ صحیح ویلے تے صحیح فیصلہ تے اوہدے اتے عملدرآمد ای قوماںتے وطن دی سربلندی دا پیش خیمہ ہویا کردا اے۔ ایسے طرح بہترین عسکری قیادت جو کہ نہ صرف ویلے دی لوڑ لئی فہم و فراست نال بھرواں اک فیصلہ کیتا گیا۔ اوس فیصلے وچ ملک و قوم دی جغرافیائی حدود دی حفاظت تے شاطر وعیار دشمناںتوں ملک دی عظمت’ قوم دی جان و مال و عزت دا ذمہ نہ صرف اپنے سر لیتا بلکہ اپنی فقیہہ الذہنی’ جفاکشی’ جوانمردی تے قائدانہ صلاحیتاں نال عملدرآمد کرن تے کران وچ لمحہ بھر ضائع نہیں کیتا۔
زندگی دے سفر وچ کامیابی نال ودھدے ہوئے فوجی افسر دے خیالات تے جذبات تے فہم و فراست دی بہت شاندار مثالاں سامنے آندیاں نیں جہناں توں اوہناں دے وقار وچ وادھا ہوندا تے اعلیٰ افسراں دی نظراں اوہناں دی صلاحیتاں نوں ہو روی پرکھن تے جانچن لئی حکمت عملی بنان لگدیاں نیں۔ نہ صرف پاکستان دے اندر نظریاتی حدود اتے وی دشمن قدغن لان نوں بھیڑیے وانگوں موقعے دی تاک وچ بیٹھیا ہویا اے۔ افواج پاکستان تے اوہدی قیادت بخوبی واقف اے کہ اوہناں دے آسے پاسے اگ دا الائو تے اوہنوں بجھان لئی اوہناں نوں پانی نہیں بلکہ اپنے لہو دا چھڑکائو کرنا ہووے گا لیکن جہدی رگاں وچ شہیداں تے غازیاں دا لہو دوڑدا ہووے جہدے سر اتے اوہناں بھیناں دا آنچل ہووے جہڑی ہر پل دعاواں دی مشعلاں جلان لئی باوضو رہندیاں نیں اوس ماں دی محبت اوہدا آسرا ہووے وطن عظیم دی سربلندی دا کارن بنیا ہووے تے فیر اوہ اقبال دا شاہین’ اللہ دے نبیۖ دا سپاہی’ رحمن و رحیم داداعی بن جاندا اے۔ ات گردی دی کئی عشریاں توں لڑی جان والی جنگ وچ کنے ہزارہا شہاداتاں دی تریخ رقم ہوئی۔ اوہدے توں قوم دا ہر بندا واقف اے۔ ایہہ جنگ ساڈی جنگ وی نہیں ایہہ تے اسیں دشمن دی شاطرانہ شطرنج دی وچھائی ہوئی بساط کھیڈرہے آں فیر افواج تے قوم نے اک عزم آہن لے کے ارادہ کیتا کہ اوہ معصوم بے گناہ قوم نوں ات گرداں دی بربریت تے ستم ظریفی دا نشانہ نہیں بنن دیاں گے۔ بے یقینی دی ایس کیفیت توں قوم نوں اوس ویلے کڈنا ناممکن جیا نظر آندا سی باوجود اوہدے کہ وردی دی عظمت دا مینار اچا سی مگر قوم ڈری تے سہمی ہوئی۔ زندگی دی نظراں کسی اتے وی مرکوز نہیں کر سکدیاں سن۔ اوہ رات نوں ایہہ سوچ کے سوندے سن کہ نجانے سویرے اوہناں دی زندگی ہووے گی یا نہیں تے ایہہ اندیشہ اوہناں دے دلاں وچ پلدا سی کہ ٹی وی آن کردے ای کوئی نہ کوئی دل دہلان دین والی خبر توں آگاہ ہونا پووے گا۔ انج دے مرحلے وچ عسکری قیادت لئی سفنے نوں شرمندہ تعبیر کرنا جوئے شیر لیان دے برابر سی مگر اوہناں نے کیتا تے (ضرب عضب تے ردالفساد) جئی جنگاں دا آغاز ہو گیا۔ اوہ جنگی قیادت توں لے کے ملک دشمن عناصر دا ملک دے اندر انتشار پھیلان تک اوہناں نے ایسی حکمت عملی بنائی کہ زلزلے’ سیلاب ‘ طوفان تے دوجی آفتاں وچ وی وطن تے معصوم قوم نوں کلیا نہ چھڈیا۔ سانحہ پشاور مگروں افواج پاکستان نے جیویں متاثرہ خاندان نوں اوہناں دے بچیاں دے نال بہیمانہ تے سفاکانہ سلوک روا رکھن تے اوہناں نوں اپنے سینے نال لایا تے اوہناں دے بچیاں دی عظیم شہادت اتے جیویں اوہ پوری قوم دے نال عزم آہن دا پیغام لے کے اگے ودھی اوہدی کوئی مثال نہیں ملدی۔ ایہہ اوہو عزم تسی جہڑا کہ ماواں دی اکھاں وچ عیاں سی۔ بہادر ماں دی آرزوئے شہادت دی دعاواں مہک رہیاں سن۔ اندرونی بیرونی دشمناں توں مختلف تنظیماں تے تحریکاں توں سازباز کر کے بزدلانہ حملیاں توں سانوں ڈران یا قوم نوں فیر توں بے یقینی دی کیفیت وچ لا کھڑا کرن دے درپے اے لیکن افاوج پاکستان نے اوہناں دے ناپاک عزائم دی ریڑھ دی ہڈی نوں توڑ دتا اے۔ ایہہ بہت وڈی کامیابی اے۔ ملک دی دو قیادتاں ہویا کردیاں نیں اک عسکری تے دوجی سیاسی اوہناں قیادتاں دے باہمی صلح تے مشورے ذہنی ہم آہنگی فہم و فراست تے اتحاد دے نال چلن وچ کسی وی ملک دی ترقی تے سربلندی دا سہرا ہوندا اے تے عوام دا اوہناں دونوواں قیادتاں اتے یقین مشکل ترین حالات وچ وی حوصلہ مندی تے عزم و ہمت نوں ڈگمگان نہیں دیندا۔