سچے انسان دی سچی کہانی

رائے ریاض حسین تے ملک ریاض حسین دے نام بہت ملدے جلدے لیکن ایہناں دونواں بارے تہاڈی رائے کافی وکھری ہو سکدی اے۔ میں ایہناں دونواں نوں بڑی چنگی طرح جاننا واں تے مینوں خوشی ایس گل دی اے کہ رائے ریاض حسین صاحب نے رائے عامہ دے ذریعہ اپنے آپ نوں تریخ دی عدالت وچ پیش کردتا اے۔ ایس عدالت وچ میری حیثیت اک گواہ دی اے۔ رائے ریاض حسین نے اپنی
ایس آپ بیتی وچ جہڑے واقعات بیان کیتے نیں اوہناں وچوں کئی واقعات دا میں عینی شاہد آں۔ رائے ریاض حسین اوہناں واقعات نوں اپنی کتاب وچ محفوظ نہ کردے تے شاید ایہہ واقعات مینوں بھل جاندے لیکن کتاب دے مصنف نے ایہہ واقعات مینوں دوبارہ یاد دوائے تے نویں نسل نوں ایہناں واقعات توں آگاہ کر کے اک قومی فریضہ سرانجام دتا جہدے اتے اوہ شکریے دے مستحق نیں۔ اج ساڈے پیارے وطن نوں جہناں مسئلیاں دا سامنا اے اوہناں مسئلیاں دی کئی وجوہات رائے ریاض حسین نے بیان کر دتیاں نیں۔ اوہناں نے بڑے دکھ دے نال ایہہ لکھیا اے کہ اوہ اک ایسے وزیراعظم دے پی آر اوی وی رہے جہڑا وزیراعظم تے بن گیا لیکن اوہدے کول پاکستان دا شناختی کارڈ نہیں سی۔ جی ہاں! اوس خوش قسمت وزیراعظم دا نام معین قریشی سی۔ رائے ریاض حسین دا تعلق وزارت اطلاعات و نشریات نال رہیا اے۔ اوہ اپنی پروفیشنل لائف وچ صحافیاں نوں ملدے جلدے رہے۔ اک صحافی دی حیثیت نال میں وی وزارت اطلاعات و نشریات دے بہت سارے افسراں نوں بڑے کولوں ویکھیا اے۔ رائے ریاض حسین دی انفرادیت اوہناں دی سادگی تے عاجزی رہی اے۔ میں اوہناں نوں یس سر یس یس کردے نہیں ویکھیا۔ اوہ وزیراعظم دے سامنے بڑے ادب دے نال حق گل آکھ دیندے سن۔ کتاب وچ ایسے کئی واقعات موجود نیں جہناں نوں میں ویکھیا ای نہیں بلکہ میں اوہناں واقعات دا اک کردار وی سی۔ پچھلے وزیراعظم میر ظفراللہ خان جمالی صاحب نے مینوں وی دسیا سی کہ سٹیٹ بینک دے گورنر نے جنرل پرویز مشرف نوں تجویز دتی سی کہ کرنسی نوٹاں اتے قائداعظم دی جگہ مشرف دی تصویر ہونی چاہیدی اے۔ جمالی صاحب نے ایہہ تجویس رد کردتی۔ جمالی صاحب نے مینوں ایہہ وی دسیا کہ مشرف نے ڈاکٹر عبدالقدیر خان نوں امریکہ دے حوالے کرن دا فیصلہ کر لیتا سی لیکن جمالی صاحب ڈٹ گئے تے فیر مشرف صاحب نے اوہناں دی چھٹی کر دتی۔رائے ریاض حسین نے اوہناں واقعات نوں کتاب دا حصہ بنا کے فکری دیانت دا مظاہرہ کیتا اے۔ اک واری میں اک کانفرنس وچ رلت لئی دہلی گیا تے رائے صاحب وی اوتھے آئے۔ میں کانفرنس دی آرگنائزر راجیت کور نوں دسیا کہ رائے ریاض حسین دہلی وچ چلدا پھردا پاکستان اے۔ رائے صاحب دی ایس کتاب نوں پڑھدے ہوئے مینوں بار بار احساس ہویا کہ رائے ریاض حسین سرکاری ملازمت توں تے ریٹائر ہو گئے لیکن اوہناں دی پاکستانیت اجے تک ریٹائر نہیں ہوئی۔ ایہہ کتاب اک سچے انسان دی سچی کہانی اے تے ایسے لئی میں رائے عامہ لکھن اتے رائے ریاض حسین صاحب دا شکر گزار آں۔