مہبط جبرائیل دے تھلے

در یتیم توں مراد اوہ موتی اے جو سیپ چوں اک ای نکلیا ہووے اوہنوں گوہر یک دانہ وی کہندے نیں۔ بیت العتیق حرم نبی پاکۖ دا اوہ دروازہ جہدے توں صرف باہر جان دی اجازت اے۔ ایس دروازے چوں اندر وڑن دی اجازت نہیں۔ دیوانے درود پڑھدے جالیاں دے اندر تکدے شرطیاں توں بچ کے مطہرجالیاں نوں ہتھ لان دی تمنا لئے ایس دروازے چوں باہر نکل جاندے نیں۔ عشاق دوبارہ اک چکر کٹ کے منبر نبی پاکۖ ریاض الجنہ نال اکھاں نوں ٹھنڈا کردے اوہناں جالیاں دے نیڑے اک پل رکن دی کوشش کردے نیں کہ کسے طرح جالیاں نوں چم لیے پر ہن عشاق تے جالیاں دے وچکار گز دو گز دا فاصلہ بنا دتا گیا اے اوتھوں باب العتیق چوں نکل جاندے نیں۔ بیت العتیق دی وجہ تسمیہ شاید ایہو اے کہ ایہو سب توں قدیم دروازہ اے۔ دروازے دے کھبے پاسے مہبط جبرائیل اے جتھوں ایہ مقرب فرشتہ نبی پاکۖ دی خدمت وچ حاضر ہوندا سی۔ ایتھوں اوہ پر جہناں نے ساری دنیا نوں گھیرے وچ لیا ہویا اے ریاست مآب دی مجلس وچ حاضر ہوندے تے ایہناں پراں سنے سمٹ کے آندا وحی نازل ہوندی۔ ہن ایس مہبط دا کوئی نشان باقی نہیں۔ زیارت کروان والا ای دس سکدا اے۔ ایہ گنبد خضریٰ دی پربت والی کندھ اے حرم نبیۖ وچ مینوں سمتاں دا پتہ نہیں گدا مینوں اوہ کندھ پربت ول لگدی اے شاید انج ای ہووے شاید انج نہ ہووے۔ میںاپنے اندازے دے مطابق اوہنوں پربت ول سمجھنا واں۔ گنبد خضریٰ یعنی نبی پاکۖ دا روضہ مسجد نبوی تو ںباہر سی۔ نبی پاکۖ دا پہلا حجرہ مبارک جہدے وچ آنحضرت بی بی عائشہ دے نال رہندے سن۔ مسجد نال جڑیا سی بعد وچ ایہدے وچ دو حجریاں دا وادھا ہویا۔ اک وچ ام المومنین بی بی سودہ تے تریجے وچ فاطمتہ الزہرا مقیم سن۔ مسجد دی حدود وچ اضافہ شیخین دے دور وچ وی ہویا پر ایہ حجرے مسجد توں وکھرے سن تاوقتیکہ اموی خلیفہ ابوالملوک دے بیٹے ولید بن عبدالملک دے زمانے وچ ایہنوں مسجد دے اندر کر دتا گیا۔ سبز گنبد عثمانی خلیفہ عبدالمجید نے بنوایا۔ ام المومنین حضرت عائشہ آپۖ دے وصال دے بعد اوتھے مقیم رہیاں تے جدوں شیخین دی ایس حجرے وچ تدفین ہو گئی اودوں وی اوہناں نے رہائش اوتھے رکھی پر درمان وچ کندھ تعمیر کر دتی گئی۔ ایسے حجرے دے باہر اک تھاں سی جتھے ہن شرطے کھڑے ہوندے نیں تے اسیں جالیاں وچ نبی پاکۖ ہوراں نوں سلاام عرض کرنے آں ایسے تھاں تے اوہ غرفہ سی جتھے نبی پاکۖ آرام فرماندے تے رات نوں استراحت فرماندے سن۔ ایسے حجرے دی پشت تے اوہ مہبط جبرائیل اے جتھوں سب توں مقرب فرشتہ نبی پاکۖ ہوراں دی خدمت وچ حاضر ہوندا سی۔ ہن مہبط جبرائیل دا نشان نہیں۔ ایہ حجرے دے مغربی شمالی کونے وچ واقع اے۔ اج جدوں مسجد نبی پاکۖ وچ حاضر ہون دا شرف حاصل ہویا تے مہبط جبرائیل دی زیارت دا قصد نہیں سی۔ میں اصحاب صفہ تے کافی دیر بیٹھا رہیا۔ عشاقان رسولۖ اوہناں دے صحابہ دے تھڑے تے خاموش بیٹھے سن تھڑا بھرا پیا سی اوتھے بیٹھن دی گنجائش ای نہیں سی اک پاسے تھوڑی جہی تھاں ملی نصیب اوج ثریا تے سی بالکل نال بی بی فاطمتہ الزہرا دا گھر سی جہدے ہن نشانات باقی نیں۔
میرے ٹور اپریٹر نے ایس متبرک مقام دی نشاندہی کیتی دو رکعت نفل ادا کیتے۔ اپنی قسمت تے رشک کیتا۔ اک اوگن ہارا بی بی دے گھر وچ نفل پڑھن دی سعادت حاصل کر رہیا سی۔ اپنے آپ توں بے نیاز کسے دنیاوی مقصد توں بے نیاز عشق دی کوئی خاص گھڑی سی بخت دی بلندی دی گھڑی سی۔ نفل ادا کیتے جو دعاواں یاد سن اک اک کرکے نبی پاکۖ دی مقدس خدمت وچ پیش کیتیاں۔ گل کرن دا یارانہ سی نظر چکن دی ہمت نہیں سی۔ اک پاسے دو بندیاں نوں آپس وچ بحث کردے ہوئے ویکھیا۔ انج لگدا سی اوہ دوویں اک دوجے دے نقطہ نظر نال اختلاف ای نہیں رکھدے سن آپس وچ کوئی دشمنی سی۔ دوویں بحث وچ الجھے ہوئے سن اوہناں وچ اک سندھ دے کچے علاقے دا تریہہ سالہ نوجوان سی جو حکومتی موقف تے ڈٹیا ہویا سی اوہ دوویں نزاعی موضوع تے بحث کر رہے سن۔ اک دوجے دے کول اپنے اپنے دلائل سن اپنے اپنے نکات سن۔ اینے وچ اک تریجا بندہ وی آ کے ایس بحث وچ شامل ہو گیا۔ اوہ دوہاں دیاں گلاں سن دا تے کج بحثی دے بعد کہندا پر سائنس تے ایہ کہندی اے۔ جیویں ایہ اوہدا تکیہ کلام سی۔ دوویں ہار منن والے نہیں سن۔ ایہ اوہ تھاں سی جتھے بی بی پاک دا گھر سی تے ایسے تھاں میں ہنے ہنے نفل ادا کیتے سن۔ گل آ کے ترک خلیفیاں تے رکی کہ ایہ سونے دے پانی نال لکھی آیتاں تے کیوں سونے دا گاڑھا پانی پھیر کے ایہناں آیتاں نوں چھپایا گیا۔ تن بندیاں دے ذرا نیڑے ہویا تے پتہ لگا اک ساڈے ٹور اپریٹر دے صاحبزادے نیں اوہناں اگے گزارش کیتی کہ بحث دی تھاں نہیں اگے چلو تے اگلی زیارت گاہ تے رکنا’ فرمان لگے ٹھہرو ایہدا مکو ٹھپ لواں۔ نال نال آواز آندی سائنسی نقطہ نظر نال ایہناں زیربحث موضوعات نوں ویکھنا چاہیدا اے تے نال ای سائنس دا حوالا دین دی کوشش کردے۔ اسیں دوبارہ اپنے ساتھی اگے عرض کیتی تے معاملہ وچے ای رہ گیا۔ اک سندھ کچے علاقے دا نوجوان سی اوہ سعودی حکومت دا ملازم سی۔ دوویں بحث وچ الجھے ہوئے سن میں تھوڑا جیہا اوتھے نکل کے اپنے ٹور اپریٹر دے بیٹے دا انتظار کراں کہ تریجا بندہ میرے پچھے لپکیا تے کہیا کہ اوہ دوویں ٹھیک کہندے نیں پر سائنس تے ایہ کہندی اے۔٭