احمقانہ تشدد توں گجھی مار تک

جدوں تسیں کسے وڈے بندے نوں اپنے پسندیدہ بندے نوں یاں اپنے آئیڈیل نوں پہلی واری ملدے او تے تسیں بھاویں میرے وانگوں سن’ مہینہ تے تریخ بھل جائو پر ایس پہلی ملاقات دی جزئیات’ یاداں تے کیفیت کدی نہیں بھل پاندے پر ایس گل دی امید رکھنا کہ اوس وڈے بندے نوں وی اوہ پہلی ملاقات یاد ہووے گی۔ سوائے حماقت دے ہور کجھ وی نہیں۔ جدوں دن وچ ان گنت چاہن والے محبت تے عقیدت نال مل رہے ہون تے فیر اجہے وچ یاد رکھنا کسے وی انسان لئی ممکن نہیں۔ ہاں مرحوم پروفیسر سیداقبال عباس نقوی ورگی حیران کن یادداشت اک انگریزی جملے دے مطابق اللہ تعالیٰ صرف ”ون ان اے ملین” نوں ای نصیب کردا اے۔
مینوں ایازامیر نال اپنی ملاقات ماہ و سن توں ہٹ کے انج یاد اے کہ جیویں کل دی گل ہووے تے ایہ منظرنامہ میں جدوں چاہنا واں یاداں دے دریچے کھول کے ویکھ لینا واں۔ سچ تے ایہہ وے کہ میں عشریاں بعد اج وی اپنی اوہ بچگانہ خوشی محسوس کر سکنا واں جو مینوں ایس پہلی ملاقات وچ محسوس ہوئی سی۔ میں اجہی خوشی نوں بچگانہ خوشی ایس لئی کہنا واں کہ کسے لوبھ’ لالچ’ مقصد یاں بناوٹ دے بناں محسوس کیتی جان والی خوشی بچیاں دا نصیب ہوندی اے۔ جدوں اجہی خوشی تہانوں ملے تے اوہدے توں بچیاں وانگوں لطف اندوز ہونا چاہیدا اے تے میں ایس خوشی نوں اودوں وی بچیاں وانگوں ای انجوائے کیتا سی۔
برادر عزیز رئوف کلاسرا نوں اودوں ملتان توں ایس طرح سمجھو کہ دھکا دے کے اسلام آباد گھلیا سی اوہ تے اللہ دا کرم ہویا کہ کبڑے نوں لت ماری تے اوہدا سارا کب ای نکل گیا۔ رئوف کلاسرا دیاں خفیہ صلاحیتاں نوں وڈا میدان ملیا تے کھل کے سامنے آئیاں۔ ملتان تے اوہدے ورگے بندے لئی انج سی کہ کسے اولمپک لیول دے کھڈاری نوں کسے کلب لیول دی ٹیم دے نال بنھ دتا جاوے۔ رئوف اوہناں دیہاڑیاں نواں نواں اسلام آباد آیا سی تے زیروپوائنٹ دے نال ڈان دے دفتر وچ بیٹھدا سی۔ زیرو پوائنٹ اسلام آباد دا اجیہا پوائنٹ اے کہ کوئی آوارہ گرد تے سیلانی بندہ ایس مقام توں گزرے بناں رہ نہیں سکدا ایس لئی جدوں وی ایدھروں گزردا رئوف نوں ملن لئی ڈان دے دفتر دا چکر لا لیندا۔ انگریزی صحافت دے بہت وڈے ناں ضیاالدین صاحب نال ایدھر ای ملاقات ہوئی۔ میرا ایس دفتر وچ رئوف دے کول دوجا یاں شاید تریجا چکر سی۔ ایہ عصر دے بعد دا ویلا سی جدوں سفید کاٹن دے کلف لگے سوٹ وچ مچھاں نوں اپنے خاص انداز وچ تائو دتے ایازامیر دفتر دے مرکزی داخلی دروازے توں اندر آئے۔ میں رئوف نوں ہولی جہی کہیا: رئوف! ایازامیر صاحب آئے نیں۔ رئوف نے پرت کے بوہے ول ویکھیا تے مینوں ہتھ توں پھڑ کے اوہناں ول چل پیا۔ خوشی نال میرا برا حال سی۔
ٹاٹاں والے سکول توں پرائمری کرن والا ایہ طالب علم جدوں سرکاری ہائی سکول وچ اپڑیا تے صرف گھر وچ پڑھائی گئی اے بی سی دے نال جملے بنان دی تھوڑی بہت شدبد سی پر چھیویں کلاس وچ علی تے نسیمہ والی کتاب اینی مشکل لگدی سی کہ ایس افتاد نے باقی ساری عمر ایس عاجز دے تعلقات انگریزی نال ایس حد تک خراب کر دتے کہ اج تک بحال نہیں ہو سکے پر اجہے وچ وی ایہ عالم سی کہ بھاویں باقاعدگی نال سہی’ پر مہینے وچ اک ادھ واری ایازامیر تے اردشیرکائوس جی دے کالم نال دل بہلا لیندے سن۔ ایہ ہور گل کہ ایس دوران بار بار ڈکشنری ویکھنی پیندی سی۔ سچ تے ایہہ وے کہ انگریزی چوں کڈھے تے ابتر تعلقات نوں جو تھوڑا بہت بہتر کیتا ایہدے وچ ایہناں دوہاں بندیاں دا بہت ہتھ اے۔
مینوں اودوں ایہ بڑا عجیب جیہا لگ رہیا سی کہ میں اوہناں نوں ایہ کہواں کہ تسیں کالم بڑا چنگا لکھدے او۔ ایہ جملہ دن وچ سینکڑوں بار تے سن دے ای ہون گے۔ ہن بھلا ایس جملے دی اوہناں لئی کیہ اہمیت رہی ہووے گی؟ رئوف نے اوہناں نال میرا تعارف کروایا۔ میں اودوں خبریں وچ کالم لکھدا سی۔ تعارف دے بعد میں ہس کے ایاز امیر صاحب نوں کہیا کہ تہاڈے کالم دے طفیل میرے ورگے نالائق دے تعلقات انگریزی نال تھوڑے بہت بہتر ہوئے نیں تے ایہ کوئی معمولی گل نہیں۔ ایازامیر صاحب ہس پئے تے ساڈے دل دی کلی کھل گئی۔
فیر ایس طرح ہویا کہ ایازامیر دا انگریزی کالم پہلے پہل اردو وچ ترجمہ ہو کے اردو اخبارات وچ آنا شروع ہویا تے اوہنوں ترجمہ کردے ہوئے ڈکشنری تے لغت وغیرہ دے استعمال دی ذمہ داری ایس کالم دے مترجم دے ذمہ ٹھہری تے اسیں ایس مشقت توں بچ گئے۔ فیر انج ہویا کہ انگریزی اک شاندار کالم نگار توں محروم ہوئی تے ساڈے ورگیاں دی آسانی دے نال نال اردو صحافت نوں اک بڑا شاندار سگوں تابدار کالم نگار مل گیا۔ کسے لاگ لپٹ’ مصلحت تے منافقت توں اُکا پاک۔ اوہناں موضوعات تے کھل کے لکھن والا جو اردو وچ عموماً تے پاکستان وچ خاص کر شجرممنوعہ سن لکھن دااجیہا سلیقہ کہ کدھرے پکڑ وی نہ آوے تے گل ساری دی ساری سوفیصد تے مکمل سمجھ وچ آ جاوے۔ نازک موضوعات تے انج لکھن کہ اک پاسے تے آبگیناں نوں وی ٹھیس نہ لگے تے دوجے پاسے مکمل تباہی کرکے رکھ دین۔ قلم توں اجہی بمباری کرن کہ اپنی یادش بخیر والی کپتانی دے زمانے دی آرٹلری دی کارکردگی نوں وی پچھے چھڈ دین تے ایہدے تے ٹی وی پروگرامز وچ اوہناں دی مدلل’ سدھی تے غنیم دے قلب وچ جا کے لگن والی گل بات۔ ساڈے ایتھے بھلا انج دیاں گلاں نوں تادیر برداشت کرن دی روایت کتھے اے؟۔٭