عہدِ فاروقی تے عہدِ حاضر

محرم الحرام اوہناں چار محترم مہینیاں وچ شامل اے جہناں نوں قرآن کریم نے قابل احترام قرار دتا اے۔ حسن اتفاق ویکھو کہ اسلامی سال دے آغاز وچ اللہ دے نام اتے قربانی دی کہانیاں رقم نیں تے اسلامی سال دے اخیر وچ وی قربانی دا سبق موجود اے۔ تریخ وچ دو ایسے واقعات پیش آئے نیں جہناں توں سانوں معاشرتی زندگی گزارن دی بہت ساری گلاں دا عملی سبق ملدا اے۔ پہلا واقعہ خلیفہ دوم سیدنا عمر فاروق دی شہادت جد کہ دوجا واقعہ نواسہ رسول سیدنا حسین دی شہادت دا اے۔
حضرت عمر دی زندگی دے کجھ پہلوواں اتے چانن پایا جاندا اے جہناں دا ساڈی عملی زندگی نال بہت گہرا تعلق اے۔ ایہہ تذکرہ ایس لئی کیتا جا رہیا اے تاں جے اسیں وی اوہناں دے نقش قدم اتے چلن دی کوشش کرئیے۔
قیامِ امن دی عملی کاوشاں:اسلام وچ امن نوں بہت زیادہ اہمیت حاصل اے۔ آپ دے دور خلافت وچ جہڑے علاقے اسلامی سلطنت دے زیرنگیں آئے یا جہڑے پہلاں توں موجود سن اوہناں وچ عدالتی نظام نوں فعال کیتا۔ مفتوحہ علاقیاں وچ بنیادی طور تے دو کم کیتے جاندے اوتھے دے واسیاں نوں دین اسلام دی تعلیم نال آشنا کیتا جاندا تے دوجا اوتھے عدالتاں قائم کر کے قیام امن تے انصاف دی فراہمی نوں یقینی بنایا جاندا۔ آپ نے قنون دے علمی ماخذ دے طور تے قرآن و سنت مگروں قضائے صالحین نوں درجہ دتا۔ سنن نسائی وچ آپ دا اوہ خط وی موجود اے جہڑا آپ نے قاضی شریح دے نام لکھیا سی تے اوہدے وچ قنون دے علمی مآخذ دے طور تے قرآن و سنت تے قضائے صالحین دا تذکرہ موجود اے۔
فیدہ:ایس توںسانوں قرآن و سنت مگروں صالحین یعنی دین دے ماہراں دے فیصلیاں اتے عمل کرن دا سبق ملدا اے۔
کمال دیانت تے بلندی اخلاق
اسلام باہمی مشاورت اتے زور دیندا اے تاں جے خیر دے پہلو ودھ توں ودھ سامنے آن تے نقصان دہ پہلو توں بچیا جا سکے۔ حضرت عمر دی زندگی اوہدی عملی نمونہ سی۔ خلیفہ وقت وچ عدالت ‘ دیانت’تقویٰ’ علم دین نال واقفیت’ انتظامی امور وچ اہلیت تے احکام شریعت دے نفاذ دی صلاحیت موجود ہوندی اے جہڑی اوہنوں عوام وچ ممتاز کر دیندی اے لیکن اوہدے باوجود آپ اپنے مشیراں دی گل نوں اہمیت دیندے سن تے اوہناں دی حوصلہ افزائی لئی ایسے لفظ ذکر فرماندے جہدے توں آپ دی کمال دیانت تے عاجزی جھلکدی ہوئی نظر آندی اے۔
سنن دار قطنی’ کتاب النکاح وچ اے کہ حضرت ابو سفیان آکھدے نیں کہ مینوں میرے مشائخ نے بیان کیتا اے کہ اک شخص حضرت عمر دی خدمت وچ آیا تے آکھن لگیا اے امیر المومنین! میں اپنی اہلیہ توں دو سال غائب رہیا واں تے جدوں واپس آیاواں تے اوہ حاملہ اے (ایس وجہ نال میری اہلیہ شرعی سزا دی مستحق قرار پاندی اے) حضرت عمر نے دوجے صحابہ کرام نال اوہدے رجم بارے مشورہ کیتا۔
حضرت معاذ بن جبل فرمان لگے امیر المومنین! آپ نوں عورت دے رجم کرن دا تے حق اے لیکن اوہدے ڈھڈ وچ جہڑا بچہ اے اوہدے اتے تہانوں اختیار حاصل نہیں ۔ اوہ بے گناہ اے لہٰذا ایس حکم نوں بچے دی ولادت تک موخر کر دیو۔ حضرت عمر نے اوہنوں بچے دی ولادت تک موخر کردتا فیر اوس زنانی نے بچے نوں جنم دتا۔ جدوں اوس بچے دے سامنے دند نکل آئے تے اوس شخص نے اوس بچے وچ اپنی مشابہت پائی تے آکھن لگیا رب کعبہ دی قسم! ایہہ بچہ میرا ای اے۔ ایہدے تے حضرت عمر نے فرمایا: زنانیاں معاذ بن جبل جیا شخص پیدا کرن توںعاجز ہو چکیاں نیں۔ لولا معاذ لھلک عمر تے جے معاذ نہ ہوندے تے عمر ہلاک ہوجاندا۔
ایسے طرح لولا علی لھلک عمر دے الفاظ وی ملدے نیں کہ جے علی نہ ہوندے تے عمر ہلاک ہو جاندا۔ ایہہ الفاظ آپ دے کمال دیانت’ انصاف پسندی’ بلندی اخلاق دی علامت نیں باوجودکہ آپ وڈے سن لیکن چھوٹیاں دی جہڑی گل درست نظر آئی اوہنوں قبول فرمایا۔ اوہدے وچ ساڈے لئی ایہہ سبق اے کہ اسیں وی چھوٹیاں دی آرا نوں اہمیت دئیے جے اوہ زیادہ بہتر ہون تے اوہناں نوں قبول کرئیے۔
فیدہ: ایس توں سانوں دیانت تے انصاف پسندی دا سبق ملدا اے۔
سربراہ دا عام معیار زندگی: سربراہ دے طرز زندگی دے اثرات رعایااتے پیندے نیں۔ جے حکمران انصاف پسند’ قناعت پسند تے سادگی پسند ہووے تے عوام وچ ظلم و تشدد’ خواہش پرستی تے فیشن پرستی جنم نہیں لیندی جہدی وجہ نال معاشرہ سکون تے راحت دی زندگی بسر کردا اے۔ حضرت عمر باوجودیکہ بہت وڈی سلطنت دے فرمانروا سن لیکن مزاجاً سادگی تے قناعت پسندی دے خوگر سن۔ تریخ ایسے کئی واقعیاں دی شہادت دیندی اے چنانچہ ہر مزان سلطنت اہواز دا حکمران جدوں قید ہو کے آیا تے اوہنے ویکھیا کہ آپ مسجد دے فرش اتے لیٹے ہوئے آرام فرما رہے نیں۔
بیت المقدس دی فتح دا مشہور واقعہ سیرت تے تریخ دی کتاباں وچ منقول اے۔ سن 46ھ وچ جدوں حضرت عمرو بن عاص بیت المقدس دا محاصرہ کیتا تے اوتھے دے اہل کتاب علما نے آکھیا: تسیں بلاوجہ تکلیف چکدے او’ بیت المقدس نوں فتح کرن والے دا حلیہ تے علامتاں ساڈی کتاباں وچ موجود نیں۔ جے تہاڈے امام وچ اوہ ساری گلاں موجود نیں تے اسیں تہانوں بیت المقدس حوالے کر دیاں گے چنانچہ آپ نوں ایس بارے اطلاع کیتی گئی۔ آپ اپنے اک غلام دے نال اک اونٹ اتے سوار ہو کے عازم سفر ہوئے۔ زادراہ وچ چھوہارے تے جو دے سوا کجھ نہیں سی۔ اونٹ اتے سوار ہون دی واریاں مقرر کیتیاں۔ کدی آپ خود سوار ہوندے تے غلام پیدل چلدا تے کدی غلام سواری اتے سوار ہوندا تے آپ پیدل چلدے۔ آپ نے جہڑا کرتہ زیب تن کیتا ہویا سی اوہدے وچ پیوند لگے ہوئے سن’ جدوں بیت المقدس دے کول پہنچے تے مسلماناں نے تہاڈے لئی اک عمدہ جوڑے تے
گھوڑے دا انتظام کیتا۔ آپ نے نواں لباس پایا’ گھوڑے اتے سوار ہوئے چند قدم مگروں فرمان لگے کہ میرے نفس اتے ایہدا بھیڑا اثر پے رہیا اے لہٰذا مینوں میرے اوہو کپڑے تے اونٹ واپس کرو چنانچہ اوہدے اتے سوار ہوئے تے بیت المقدس پہنچے۔ اہل کتاب علما نے آپ دا حلیہ مبارک تے علامتاں ویکھی تے برملا آکھ اٹھے کہ ہاں فاتح بیت المقدس ایہو نیں تے آپ دے لئی اوہدے بوہے کھول دتے۔
فیدہ: ایس توں سانوں سربراہ دے عام زندگی’ سادہ مزاجی تے صبرو شکر دا سبق ملدا اے۔
انسانی حقوق وچ مساوات:آپ نے اسلام دی نافذ شدہ تعلیم مساوات نوں ہور اگے ودھایا چنانچہ کسے علاقے دے حاکم’ گورنر بلکہ خود خلیفة المسلمین نوں ایہہ اجازت نہیں سی کہ اوہ اپنے آپ نوں دوجیاں اتے ترجیح دیوے جہڑا وظیفہ بدریاں نوں ملدا اوہو آپ لیندے سن۔
فیدہ: ایس توں سانوں مساوات دا سبق ملدا اے۔
حقوق نسواں دا حقیقی تصور
اسلام وچ زنانیاں نوں بہت اچا مقام حاصل اے تے زنانیاں وچ سب توں اہم عنصر حیا تے تقدس دا اے۔ آپ نے اوہناں دے عزت تے حقوق نوں محفوظ کرن لئی حجاب نوں لازمی سمجھیا تے اللہ تعالیٰ نے آپ دی رائے دی موافقت وچ قرآن کریم نازل فرما کے حجاب نوں ضروری قرار دتا۔ زنانیاں لئی رائے دی آزادی وی حقوق نسواں دے ذیل وچ آندی اے چنانچہ اک واری جدوں آپ نے دوران خطبہ زنانیاں دے مہنگے مہنگے حق مہر بارے ناپسندیدگی دا اظہار فرمایا تے اک زنانی نے آکھیا: اے عمر!تسیں ساڈے مہراں نوں کیویں گھٹ کر سکدے او حالانکہ اللہ تعالیٰ نے سانوں سونے ڈھیر تک مہر لین دا حق دتا اے تے قرآن کریم سورة النسا دی آیت نمبر20 وی تلاوت کیتی۔ حضرت عمر ایہدے تے بہت خوش ہوئے تے زنانی نوں عزت بخشدے ہوئے فرمایا: مدینہ دی زنانیاں عمر توں ودھ دین دی سمجھ رکھدیاں نیں۔
فیدہ: ایس توں سانوں حجاب’ آزادی اظہار رائے تے زنانیاں دی سماجی عزت و احترام دا سبق ملدا اے۔
مفتوحہ علاقیاں دے نظم و نسق
آپ22لکھ 51 ہزار 30مربع میل زمین اتے حکمرانی کرن والے انصاف پرور حکمران سن۔ اوہدے باوجود آپ مفتوحہ علاقیاں دی کثرت اتے زور دین دے بجائے اوہناں دے باسیاں دی تربیت نوں ترجیح دیندے۔ آپ نے دمشق’ بصرہ’ بعلبک’ شرق’ اردن’ یرموک’ قادسیہ’ ہاوز’ مدائن’ ایران’ عراق’ تکیت’ انطاکیہ’ حلب’ بیت المقدس’ نیشاپور’ الجزیرہ’ قیساریہ’ مصر’ اسکندریہ’ نہاوند تے دوجے علاقیاں نوں فتح کیتا۔ اوہناں وچ تربیتی تے تعلیمی مرکز قائم کیتے۔ کھلی کچہریاں لگوائیاں’ فوری انصاف نوں یقینی بنایا’ عوام الناس دی شکایتاں نوں دور کرن لئی احکامات جاری کیتے۔ روٹی’ کپڑا تے مکان جئی بنیادی ضرورتاں نوں عوام دی دہلیز تک پہنچایا۔
فیدہ: ایس توں سانوں اپنے نظام زندگی وچ نظم و نسق دا سبق ملدا اے۔
اقلیتاں نال حسن سلوک
ایسے کفار جہڑے مسلماناں نال نہیں لڑے اسلام اوہناں نال حسن سلوک دی تعلیم دیندا اے۔ حضرت عمر نے حمص نوں حاصل کرن لئی بطور سپہ سالار حضرت ابو عبیدہ نوں مقرر فرمایا۔ اوہناں نے اوہنوں فتح کیتا تے غیر مسلماں کولوں جزیہ وصول کیتا لیکن جدوں اوہناں نوں جنگ یرموک لئی حمص چھڈنا پیا تے اوہناں نے ایہہ آکھ کے جزیہ واپس کردتا کہ ہن جدوں اسیں آپ دے جان و مال دی حفاظت دی ذمہ داری پوری نہیں کر سکدے تے سانوں جزیہ لین دا وی حق نہیں۔ جدوں مسلمان حمص توں واپس آن لگے تے اوتھے دے غیر مسلم وی ایس عادلانہ نظام توں محروم ہون تے رون لگے۔
بیت المقدس فتح ہویا تے حضرت عمر نے اہل کتاب دے مذہبی پیشوا دے نال شہر دی متعدد عبادتگاہواں نوں ویکھیا’ آپ معائنہ فرما رہے سن کہ اتفاق نال نماز دا ویلا ہو گیا۔ اوہناں نے آپ تے آپ دے رفقا لئی صفاں وی وچھا دتیاں کہ آپ ایتھے نماز ادا کر لوو لیکن آپ نے ایہہ آکھ کے انکار فرما دتا کہ جے اسیں ایتھے نماز پڑھ لیتی تے کل نوں کوئی ایتھے مسجد بنانا نہ شروع کر دیوے ۔ میں نہیں چاہندا کہ غیر مسلماں دی عبادت گاہواں وچ اسیں کسی طرح دا حق قائم کریے۔
ایسے طرح اہل ایلیا دے غیر مسلماں نال آپ نے معاہدہ امن کیتا کہ ایہہ امن جہڑا اوہناں نوں دتا جاندا اے’ اوہناں دی جاناں’ مالاں’ اوہناں دے گرجے تے اوہناں دی صلیباں’ اوہناں دے بیماراں’ تندرستاں تے اوہناں دے جملہ اہل مذاہب لئی اے تے اوہ ایہہ اے کہ اوہناں دے گرجا گھراں وچ رہائش نہ رکھی جاوے ‘ اوہناں نوں سٹیا نہ جاوے’ اوہناں نوں تے اوہناں دے احاطیاں نوں نقصان نہ پہنچایا جاوے تے نہ ای اوہناں اتے دین بارے جبر کیتا جاوے۔
فیدہ: ایس توں سانوں اقلیتاں نال حسن سلوک دا سبق ملدا اے۔
نوٹ: جے اقلیتاں اپنی حیثیت نوں تسلیم کرن تے آمادہ نہ ہون تے فیر اوہناں نوں قنون دے شکنجے وچ جکڑنا ضروری اے۔
دوجی سماجی تے رفاہی خدمات:قرآن کریم دی تعلیم لئی مکاتب و مدارس قائم کیتے’ قاری صاحبان تے ائمہ مساجد دی تنخواہاں مقرر فرمائیاں۔ اسلامی تقویم دا آغاز ہجرت نبویۖ توں شروع فرمایا تے اوہدی ابتدا محرم توں فرمائی۔ مسجد حرام تے مسجد نبویۖ دی توسیع فرمائی۔ عرب و عجم دے سنگم اتے مرکز علم کوفہ نوں آباد فرمایا۔ دریائے نیل نوں بحیرہ قلزم نال ملان لئی نہر سویز کھدوائی جہدی وجہ نال نفع بخش تجارت نے فروغ پایا۔ محکمہ ڈاک قائم کیتا۔ شہر دے اندرونی حالات نوں درست رکھن لئی محکمہ پولیس قائم کیتا۔ فوج نوں سرحداں تے محاذ سپرد کیتے۔ بیت المال تعمیر کرائے۔ اپاہج’ معذور تے ضعیف لوکاں دے وظائف بیت المال توں مقرر فرمائے۔ مسافراں لئی شاہراواںتے مسافر خانے تعمیر کرائے۔ لاوارث بچیاں دے تربیتی مرکز قائم کیتے۔ دریائے نیل دے نام خط جاری فرمایا تے قیصرو کسریٰ جئی سپرپاور طاقتاں پاش پاش ہوئیاں۔ مورخین دے محتاط اندازے دے مطابق آپ دے زمانہ خلافت وچ 3600 علاقے فتح ہوئے۔ 900 جامع مسجداں تے 4000 عام مسجداں تعمیر ہوئیاں۔
فیدہ:ایس توں سانوں تعمیر وطن ‘ خوشحالی تے ترقی’ اہل علم دی قدر’ مستحق افراد دی معاونت’ یتیماں دی کفالت دا سبق ملدا اے۔
خلاصہ ایہہ اے کہ جے اسیں مزاج فاروقی نوں اپناواں گے تے ساڈی دنیا وی سنور جاوے گی۔ ‘ ترقی وی کراں گے’ ہدایت وی عام ہووے گی’ ضرورت منداں دی معاونت وی ہووے گی تے معاشرے وچ انصاف وی عام ہووے گا۔ اللہ تعالیٰ سانوں مزاج فاروقی اپنان دی توفیق دیوے۔ ساڈے معاشرے نوں انصاف پسند معاشرہ بناوے۔ آمین’ یارب العالمین بجاہ النبی الکریم صلی اللہ علیہ وسلم۔