انتخابی ڈپریشن دے اثرات

کیہ تسیں ضمنی انتخابات دے ممکنہ نتائج بارے اپنی رائے ٹی وی تے بیٹھے تجزیہ کاراں نوں سن کے بنائی سی۔ کیہ انتخابی نتائج نے خوشی یاں مایوسی ورگے جذبات نال تہانوں مغلوب کیتا اے؟ ن لیگ دے حمایتی او تے ڈپریشن وچ ہوو گے’ پی ٹی آئی والے او تے جوش نال بھرپور۔ ایہ وی ہو سکدا اے کہ تہاڈے ملن ملان والے سیاسی کارکناں نے اپنی جماعت دی جت دے بارے کجھ حیران کن کارکردگی دے دعوے کیتے ہون۔ سوشل میڈیا تے 17جولائی دی دوپہر تے شام تک بہت سارے لوکاں نے اپنے تجزیے دے ناں تے خواہشات تے مبنی جت ہار دے اعدادوشمار پیش کر رکھے سن۔ عدم اعتماد دی تحریک دے معاملے تے اپنا انداز غلط ہون دے بعد میں واہوا محتاط ہو چکیا واں۔ ایس احتیاط پاروں 17 جولائی نوں فیس بک تے تن پوسٹاں وچ حتمی پارٹی پوزیشن تے گل نہ کیتی۔ کجھ پولنگ سٹیشناں تے آپ ویکھ آیا سی کہ نذیر چوہان تے امین چوہدری دی حالت پتلی سی۔ ابتدائی نتیجے وچ پی ٹی آئی دے امیدوار شبیرحسین گجر تے ظہیرعباس کھوکھر لیڈ لے رہے سن پر اصل رزلٹ تے رات گئے آندے نیں جدوں لیڈ لین والا اچانک ہار جاندا سی۔ ایس واری حیرت انگیز طور تے جتن والیاں نوں جہڑی لیڈ شروع وچ ملی اوہ حتمی نتیجے آن تک ودھدی چلی گئی۔ تحریک انصاف قومی سیاست دی مقبول ترین قوت بن کے ابھری اے۔ ایس سچ نوں مریم نواز تے پی پی قیادت من چکے نیں۔
ماہرین نفسیات نے لمے عرصے توں ڈپریشن نوں بار بار نقصان اپڑان والے ردعمل دے طور تے منیا اے۔ ماہرین نے ایہنوں انکار’ غصہ’ سودے بازی تے بالآخر قبولیت دے نال غ دے پنج مرحلیاں وچوں اک دا ناں دتا اے۔ ایس توں علاوہ دوجی تحقیقات نے انتخابی ڈپریشن دے ایس تصور تے سوال اٹھایا اے۔ پتہ لگدا اے کہ گھٹ لوک ای ایس کیفیت دا تجزیہ کر پاندے نیں تے انتخابی ڈپریشن دے نقصان توں بچن دی تدبیر کردے نیں۔ ماہرین نے سیاسی معاملیاں وچ غصے تے انکار دے بارے لکھیا اے پر اسیں ڈپریشن دی ایس قسم دے بارے بڑا گھٹ جاننے آں۔ مریم نواز دا گوشہ نشین ہو جانا ایس ڈپریشن توں بچن دی تدبیر اے۔ اوہ سمجھدار نیں پر اوہناں دے غریب تے ناسمجھ حمایتیاں نوں ڈپریشن چوں کوئی کڈھے نتیجہ ایہ کہ اوہ بحث تے سیاسی جھگڑیاں وچ وقت ضائع کر رہے نیں۔ ساڈے ایتھے سیاست صدمے دیندی اے پر ایہناں دے نفسیاتی اثرات نال نبڑن دی تربیت موجود نہیں۔
2004ء دے پیوریسرچ سنٹر دے سروے وچ پتہ لگا کہ جارج بش دے دوبارہ منتخب ہون دے بعد کیری دے حمایتیاں وچوں 29فیصد افسردہ ہوئے تے 2008ء دے ایسوسی ایٹڈ پریس دے سروے وچ پتہ لگا کہ باراک اوباما دے انتخاب دے بعد 25فیصد ری پبلکن پریشان سن۔ 2010-12ء تے 2016ء دے پولنگ ڈیٹا توں ایسے طرح دے نتیجے ظاہر ہوندے نیں۔ ساڈے ایتھے جہڑے لوک گھٹیا قسم دا پراپیگنڈا منصوبے بنا کے مسلم لیگ ن نوں ٹھگ رہے نیں اوہناں نے سارا زور عمران خان’ فرح گوگی’ بشریٰ بیگم دی کردارکشی تے لا دتا۔ عمران خان نے خارجہ پالیسی غیرملکی مداخلت تے سازش اینٹی اسٹیبلشمنٹ موقف تے تجزیہ کار ٹیم دی بدانتظامی دے معاملات اٹھائے۔ پاکستان وچ بھاویں مڈل کلاس دے کول موقعے دی کمی اے پر اوہ ایہ تمیز کرن دے قابل ہو چکی اے کہ انتخابات دے دوران اوہناں نوں سنجیدہ ایجنڈے دی حمایت کرنی چاہیدی اے۔
سیاستدان ہار جاوے تے پچی نہیں ہوندا۔ اوہ اپنی غلطیاں تے کوتاہیاں لئی بڑی چھیتی اجیہا بہانہ لبھ لیندا اے جہدے توں اوہدا کردار گھٹ توں گھٹ قصوروار وکھائی دیوے۔ مداخلت یاں سازش ضرور ہوئی اے پر ایہ وی سچ اے کہ عمران خان بہت سارے معاملیاں وچ گلاں زیادہ تے کم گھٹ کر رہی سی۔ ہن ضمنی انتخابات وچ کئی تجزیہ کار مسلم لیگ ن دی شکست نوں ودھ توں ودھ پروقار وکھان لئی تجزیے دے رنگ برنگے کبوتر کڈھ رہے نیں۔ کجھ کہندے نیں لیگی کارکناں نے لوٹیاں نوں قبول نہ کیتا کجھ کہندے نیں حمزہ تے مریم وچکار پارٹی تے قبضے دی جنگ ا چانک ودھ گئی اے کجھ دا خیال اے مریم نواز نے انتخابی مہم ناقص بنیاداں تے چلائی کجھ دا خیال اے مہنگائی نے مسلم لیگ نوں غیرمقبول کر دتا اجہے وی نیں جہناں دی رائے وچ آصف علی زرداری نے مسلم لیگ نوں حکومت بنان تے مجبور کیتا ایس طرح لیگ دے مسئلیاں دا ذمہ دار وچارے زرداری نوں قرار دتا جا رہیا اے ایہدے نال سیاسی نفسیات وچ جھوٹ شامل ہو رہیا اے۔
میاں جاویدلطیف شیخوپورہ توں منتخب رکن قومی اسمبلی نیں۔ اوہناں نے اک پریس کانفرنس وچ گلا کیتا اے کہ نوازشریف نے اسٹیبلشمنٹ دے خلاف آواز اٹھائی تے اوہناں تے طیارہ سازش کیس بنا دتا گیا اوہناں نوں معزول کرکے جیل وچ سٹ دتا گیا اوہناں دے خاندان تے مقدمے بنائے گئے اوہناں نے ووٹ نوں عزت دیو دی گل کیتی تے اوہناں نوں غدار کہیا گیا جد کہ ایس طرح دیاں گلاں عمران خان تے دوجے سیاستداناں نے کیتیاں پر لوک اوہناں دے نال تے اسٹیبلشمنٹ اوہناں دی سرپرست اے۔ میاں جاویدلطیف یکطرفہ سیاسی نفسیات ورت رہے نیں ساریاں جماعتاں والے انج ای سوچدے نیں۔ عمران خان دی بیرون ملک جائیداد نہیں اوہ اسٹیبلشمنٹ دے نال رہے نیں پر جدوں سول بالادستی لئی اٹھے تے کوئی سمجھوتہ نہ کیتا ضمنی انتخابات جتن دے بعد وی اوہناں دے موقف وچ تبدیلی نہیں آئی۔
جمہوری معاشرے ووٹنگ راہیں رہنماواں دا انتخاب کردے نیں۔ ایس عمل دا اک ناخوشگوار حصہ ایہہ وے کہ بہت سارے شہریاں نوں اوہناں دا پسندیدہ نمائندہ نہیں ملدا۔ انتخابات وچ ہار توں نظام تے عدم اعتماد تے جمہوریت توں عدم اطمینان پیدا ہو سکدا اے۔ تحقیق توں پتہ لگدا اے کہ سیاسی عمل وچ حد توں ودھ دلچسپی سانوں جذباتی طور تے وی متاثر کردی اے۔ خلاف توقع نتیجے ساڈی نفسیات نوں مسلسل تباہ کر رہے نیں۔ شفاف انتخابی عمل یقینی ہو جاوے تے قوم دی نفسیات دا تحفظ ممکن ہو سکے گا۔ ٭٭