شش وپنج وچ پئی بیوروکریسی

پنجاب وچ پچھلے کئی مہینیاں توں جاری سیاسی کشمکش دا فیدہ سب توں ودھ بیوروکریسی نے چکیا اے ۔ خصوصی طور تے اوہ بیوروکریٹس جہناں دے اتے بدعنوانی بدانتظامی دے سنگین الزام سن ایسے افسران دی تے چاندی ہو گئی۔ چیف سیکرٹری پنجاب ڈاکٹر کامران افضل جہڑے کہ اک ایماندار افسر گردانے جاندے نیں اوہناں نوں ملک دی اعلیٰ ترین شخصیت دے قریبی عزیز دی سفارش اتے چیف سیکرٹری پنجاب دا منصب حاصل ہویا سی جہدا واضح ثبوت ایہہ اے کہ بزدار حکومت دے خاتمے مگروں حمزہ حکومت نے پی ٹی آئی دور وچ تعینات تقریباً سارے افسراں نوں ٹرانسفر کر دتا سی۔ کجھ اوہ افسران جہڑے طاقتور حلقیاں دے حصار وچ سمجھے جاندے نیں اوہناں نوں اپنی پوسٹنگ توں نہیں ہٹایا گیا سی۔ حمزہ شہباز سیاسی صورتحال دا مقابلہ کرن لئی ہر ویلے مصروف عمل رہے تے اوہناں دی نک تھلے ایسے افسراں نوں پنجاب اتے مسلط کرد تا گیا جہناں دے متعلق انتہائی تحفظات پائے جاندے نیں مگر ایہناںتعیناتیاں دا سہرا بیوروکریسی سیاسی حکومت دے سر اتے ای سجاوے گی۔ پنجاب دے اہم ترین شہر گوجرانوالہ وچ تعینات سی پی او رائے اعجاز حال ای وچ گوجرانوالہ نال ملحقہ ضلع گجرات توں بطور ڈی پی او کروڑاں دی کرپشن غبن اتے نیب وچ گرفتار رہے۔ رائے اعجاز نوں سی پی او گوجرانوالہ تعینات کردتا گیا سی جہناں نوں پچھلے دناں تبدیل کیتا گیا۔ سینئر پلس افسر سہیل ظفر چٹھہ دے متعلق کروڑاں دے غبن دا ریفرنس نیب وچ زیر سماعت سی۔ حال ای وچ سہیل ظفر چٹھہ نوں وزیراعظم ولوں ایگریمنٹ سٹاپ دی بحالی دا نوٹیفکیشن وی موصول ہویا سی۔ پی ایچ اے دے پربندھ ہیٹھ گریٹر اقبال پارک وچ 40دے غبن اتے نیب کیس بھگتن والے میاں شکیل نوں پی ایچ اے دے پیرنٹ ڈیپارٹمنٹ وچ بطور سیکرٹری ہائوسنگ پوسٹ کر دتا گیا۔ سپورٹس بورڈ پنجاب وچ گھپلیاں دے الزام وچ ملوث سینئر بیورو کریٹ ڈاکٹر عثمان انور نوں جہناں دا کیس نیب وچ چل رہیا اے بطور کمشنر ڈی جی خان تعینات کردتا گیا۔ سیف سٹی پراجیکٹ وچ ارباں روپے دی کرپشن اتے مبینہ طور تے ملوث کیتے گئے ڈی آئی جی اکبر ناصر دی ڈیپارٹمنٹل انکوائری تے ختم کردتی گئی مگر نیب وچ انکوائری زیر سماعت اے۔ اوہناں نوں آئی جی اسلام آباد تعینات کردتا گیا۔ حال ای وچ ڈی جی اینٹی کرپشن دے عہدے توں تبدیل ہون والے رانا جبار سانحہ ماڈل ٹائون وچ مین ملزم سن۔ چکوال وچ زمیناں دی کرپشن دے مقدمے وچ ملوث احسن وحید نوں سیکرٹری ٹرانسپورٹ لا دتا گیا۔ سیکرٹری ہائر ایجوکیشن نجف اقبال جدوں بطور ڈپٹی کمشنر نارووال تعینات سن تے سکول ایجوکیشن ولوں سارے اضلاع نوں فرنیچرز لئی فنڈز فراہم کیتے گئے۔ نجف اقبال اتے الزام اے کہ اوہ فنڈز خردبرد کر لیتے گئے جہدے اتے اوس ویلے دے سیکرٹری سکولز عبدالجبار شاہین نے نہ صرف نجف اقبال دے خلاف تحریری شکایات کیس بلکہ اینٹی کرپشن وچ مقدمات وی درج کروائے۔ اک لمے عرصہ نجف اقبال کرائسس دا شکار رہے۔ ن لیگ دی حکومت آن مگروں اوہناں نوں گریڈ 19وچ ہون دے باوجود صرف ایس لئی سیکرٹری ہائر ایجوکیشن لایا گیا کہ اوہ وفاقی وزیر احسن اقبال دے نہ صرف انجینئرنگ یونیورسٹی وچ کلاس فیلو رہے بلکہ قریبی دوست وی نیں۔ شنید اے کہ چیف سیکرٹری پنجاب ڈاکٹر کامران افضل نے کجھ دناں پہلاں ظہور الٰہی روڈ اتے واقع چودھری ہائوس جا کے نہ صرف چودھری پرویزالٰہی نال صلح صفائی کر لیتی اے بلکہ ماضی دے اپنے رویے اتے معذرت وی کیتی اے۔ ڈاکٹر کامران افضل دا خیال اے کہ چودھری صاحبان اوہناںکولوں ناراض نیں تے اوہناں دی ست اٹھ سال نوکری وی بقایا اے تے اوہناں دے سفارشی دا وی ظاہری طور تے آخری سال اے ایس لئی اوہ کسے سیاسی خاندان توں ذاتیات اتے ناراضگی افورڈ نہیں کر سکدے۔ لگدا اے کہ چودھری پرویزالٰہی ہن چیف سیکرٹری لئی ڈاکٹر کامران افضل دے نال ای گزارا کرن گے۔ جے اوہ چاہن وی تے وفاق اوہناں دی ریکوسٹ اتے چیف سیکرٹری تبدیل نہیں کرے گا۔
آئی جی پنجاب حال ای وچ پنجاب توں جا چکے نیں اوہناں دے تحفظات وی اوسے طرح دے سن۔ جے آئی جی پنجاب نوں تبدیل کرن دی سفارش کیتی گئی تے من لیتی گئی تے ق لیگ سینئر پولیس آفیسر عامر ذوالفقار خان نوں بطور آئی جی پنجاب تعیناتی دی کوشش کرے گی۔ سی سی پی او لاہور بلال صدیق کمیانہ نوں حمزہ شہباز دے کول ہون دی وجہ نال فوری تبدیل کیتا گیا۔ ہن پچھلے سی پی او لاہور غلام محمود ڈوگر نوں دوبارہ سی سی پی او لاہور تعینات کردتا گیا اے۔بزدار حکومت نے غلام محمود ڈوگر نوں پچھلے آئی جی پنجاب تے اوہناں دے قریبی دوست ڈی جی آئی بی ڈاکٹر سلمان دی انا تے ضد دی بھینٹ چڑھا دتا سی۔ غلام محمود ڈوگر دی تعیناتی نال لہور پلس وچ خوشی دی لہر دوڑ گئی ا ے۔
اصول پسند بیورو کریٹس توں متعلق مختلف حکومتاں دی پسند ناپسند وی ملک لئی لمحہ فکریہ اے۔ وفاق وچ مبشر حسن نوں مستقل بنیاداں اتے پرنسپل انفارمیشن آفیسر تعینات کرنا وی حکومت دا احسن اقدام اے۔ مبشر حسن نہایت محنتی’ پروفیشنل آفیسرز وچ شمار ہوندے نیں۔ بہرحال کوئی افسر کسے پارٹی نال نہیں ہوندا بلکہ اوہ ہر برسراقتدار پارٹی دی پالیسی لے کے اگے چلدا اے ایس لئی کسی وی قابل افسر نوں صرف ایس الزام اتے سزا دا مستوجب نہیں سمجھ لینا چاہیدا اے کہ اوہ فلاں حکومت دے دور وچ چنگی پوسٹنگ اتے رہیا اے۔
ایہہ تے ساریاں دے علم وچ اے کہ موجودہ بساط جناب آصف علی زرداری دی وچھائی ہوئی اے مگر ہن نویں اطلاعواں ایہہ وی نیں کہ آصف علی زرداری دی دبئی وچ ملک دی اک اہم شخصیت نال جہڑی آئندہ مختصر عرصہ تک نہایت اہم منصب اتے آ سکدی اے’ ملک دی اہم ترین شخصیت دی ہدایت اتے ملاقات ہوئی اے۔ ملاقات وچ طے پاگیا اے کہ چھیتی توں چھیتی عام انتخابات دا اعلان کیتا جاوے گا تے ساری اسمبلیاں تحلیل کردتی جان گئیاں۔ بیورو کریٹس تے پلس افسران کسے دے جھانسے وچ نہ آن تے فی الحال بابر حیات تارڑ وانگوں حیل و حجت نال کم لین تاں جے آن والی مستقل حکومت اوہناں اتے جانبداری دا الزام عائد کر کے عتاب دا نشانہ نا بناوے۔