سیاسی بحران تے سیلابی طوفان، معیشت لئی خطرہ

اج سیاسی اشرافیہ جہڑے سیلاب وچ بہہ جان والیاں دے غم وچ مری جا رہی اے درحقیقت ایہہ اپنی بچی کھچی ساکھ دے بچائو وچ سرگرم عمل اے۔ قیام پاکستان توں لے کے اج تک قائداعظم تے خان لیاقت علی خان دا دور کڈ کے جہناںنوں حالات نے ملک و ملت دی مزید خدمت دا موقع نہ دتا ملوکیت دی طرز اتے مختلف نظام ہائے حکومت پاکستان وچ جاری و ساری نیں کہ جہناں نوں اسیں صرف آمریت تے جمہوریت نہیں بلکہ براہ راست ملوکیت ای آکھ دئیے تے وی اوہدے وچ کوئی مضائقہ نہیں تے ایہناں ملوکیت دے ادوار وچ کوئی ایسا حکمران پیدا ای نہیں ہویا اے جہڑا اپنی نیندر’ سکون تے آرام نوں عوام لئی قربان کردا۔ جے انج ہوندا تے اج سیلاب نال غریب تنکیاں وانگوں نہ رُڑ رہے ہوندے۔ اج اسیں ایہہ نہ آکھدے کہ سیلابی ریلا تباہی دی نویں داستاناں رقم کردا مسلسل اگے ودھ رہیا اے۔ زندگی موت نال نبردآزما اے کہ کسے دا آشیانہ کِھلریا تے کسی دے سفنے’ کسی دا اپنا وچھڑیا تے کسی دا سہارا کوئی پیاراں دے غم وچ تے کوئی پیاریاں نوں بچاندے ہوئے ڈُب گیا۔ قیامت ڈھاندا ایہہ پانی دا ریلا اجے وی زندگیاں دے چراغ گل کرن تے رشتیاں دے بندھن توڑن دے در تے اے۔سینکڑاں پنڈ زیرآب آ چکے نیں۔ مکان بہہ گئے نیں۔ طلاطم خیز موجاں تے بپھری ہوئی لہراں دے سامنے کسی دی اک نہ چلی… موجاں دی چپیڑاں کھاندے جہڑے بچ گئے نیں۔اوہ افلاس تنگی’ بیماری تے ویلے تے امداد نہ پہنچن کارن مر رہے نیں۔
ایسے حالات وچ سیاسی کاریگر بڑے سکون تے اطمینان نال آکھ رہے نیں کہ قدرتی آفات وچ انسان دا زور نہیں چلدا۔ نقصان دا اندازہ اوہدوں ہووے گا جدوں دریا پرسکون ہون گے تے پانی اپنی پچھلی سطح اتے چلا جاوے گا۔ یقینا قدرتی آفتاں تے حادثیاں دے سامنے انسان بے بس اے مگر سوال ایہہ اے کہ اسیں ماضی توں سبق کیوں نہیں سکھدے؟ حکومت فلڈ مینجمنٹ پلاننگ بنان وچ نکام کیوں اے؟
حیرت ایس گل اتے اے کہ سیلاب ہر سال متوقع ہوندا اے تے سیلابی پانی ہر سال ضائع ہو جاندا اے بلکہ جانی تے مالی نقصان ہوندا اے تے متاثرین دی امداد وی تاوقتی ڈھونگ تے ہوا دے جھونکے وانگوں اے۔ کسی تک پہنچنا نہ پہنچنا بس فوٹوسیشن کروان تے جھوٹی شہرت دے جھنڈے گاڑن وچ سارے مصروف رہندے نیں حالانکہ طویل المدت منصوبے بنا کے ایس سیلابی پانی نوں سٹور کیتا جاوے تے ڈیم بنا کے لوڈشیڈنگ ختم کیتی جاوے تے ملکی معیشت تیزی نال سنبھل سکدی اے ہور ایس پانی نال نہری آبپاشی کر کے زرعی اجناس دی پیداوار ودھا کے پاکستان زرمبادلہ کما سکدا اے جہدے توں ترقی تے خوشحالی آ سکدی اے مگر ایسا کہڑا محب وطن ہووے جہڑا ایسی دوررس حکمت عملیاں اختیار کرے کیوں جے انج کرن لئی تے سیاستداناں نوں اپنے مفاد تے ضداں دی قربانی دینا پووے گی جد کہ سارے سیاسی بازیگر مقابلہ بازی تے بیان بازی وچ مدت اقتدار ضائع کردے نیں۔
اوہناں نوں سیاسی اکھاڑ پچھاڑ تے لٹ مار توں فرصت ملے تے ویکھن کہ تنکیاں وانگوں بہن والے سالہا سال توں اوہناں دے پچھے نعرے لاندے چلے آ رہے سن۔ ایسے لئی میں آکھنی آں کہ تسیں سازشاں توں تے بچ سکدے او مگر ایہہ خموش آہواں تہانوں لے ڈبن گئیاں۔ جے اوہناں دے درد دا درمان نہ کیتا۔
بہرحال جدوں تک سیاسی استحکام نہیں ہووے گا اوہدوں تک ایہہ سب چلدا رہوے گا۔ جیویں کہ اک نویں لیکس سامنے آ گئی اے جہدے مطابق پی ٹی آئی قیادت اتے لائے گئے مبینہ الزام ممنوعہ فارن فنڈنگ دی توثیق ہو چکی اے۔ مزید براں تردید نہیں آئی تے سارے جاندے نیں کہ فنانشل ٹائمز برطانیہ دا اک معتبر اخبار اے تے جہناں ثبوتاں دے نال سٹوری شائع کیتی گئی اے اوہدے توں تحریک انصاف دے امیج نوں بہت وڈا دھچکا لگیا اے کیوں جے خان صاحب نے کدی تسلیم نہیں کیتا کہ اوہ فارن فنڈنگ نال پارٹی چلا رہے نیں یقینا انتہا داانجام برا ہوندا اے تے دو دن پہلاں تے خان صاحب نے اپنی تقریر وچ پی ٹی آئی دا ساتھ چھڈن والیاں نوں بکائو نہیں بلکہ سدھا مشرک ای آکھ دتا سی جہدے اتے سیاسی ای
نہیں عوامی حلقیاں وچ وی بحث چھڑ چکی اے کہ سیاسی پوائنٹ سکورنگ نوں مذہب نال جوڑ کے مذہبی جذبیاں نوں برانگیختہ کرنا کس قدر خطرناک ہو سکدا اے۔ ایس لئی لفظاں دے چنائو وچ احتیاط دی لوڑ اے۔ سیاست نوں جنگ نہ بنائو ایہنوں خدمت ای رہن دیو تے ایہہ نوشتہ دیوار اے کہ جے اخلاص اتے مبنی منصوبہ بندیاں نہیں ہون گئیاں تے سیاسی بحران تے سیلاب ملکی معیشت لئی ہر گھڑی خطرناک ثابت ہون گے۔ ہُن الیکشن کمیشن ولوں فارن فنڈنگ ایسے گھمبیر حالات وچ ساڈی خوش قسمتی اے کہ ساڈی پاک فوج آئین دی پاسداری لئی پرعزم نیں مگر ساڈے لیڈر اوہناں دے کول مخلص ہون لئی فی الحال کوئی عزم نظر نہیں آندا۔ جے ہر کوئی پاک فوج وانگوں عزم و استقلال دا پیکر ہو جاوے تے اوہ دن دور نہیں جدوں پاکستانی کہلانا پوری دنیا وچ باعث عزت و افتخار ہوویگا۔ اسیں کیوں نہیں سوچ رہے کہ اج بہت جگ ہنسائی ہو رہی اے کیہ ساڈا عزم صرف برسراقتدار رہنا’ کاوش حصول اقتدار کرنا یا فیر کسی دا اقتدار بچانا ری رہ گیا اے؟ ملک وملت نال اخلاص ساڈے کول کتھے اے؟ اج عوام سراپا سوال نیں کہ
اک طرف طوفان ہے تو اک طرف سیلاب
بول اے جمہوریت! کس کی طرف داری کریں