بجلی دے بل جو بجلی بن کے ڈِگے

Bejli

پچھلے تن چار سال توں پاکستان دے عوام شدید معاشی مشکلاں تے پریشانیاں دا شکار نیں۔ غریباں دی کیہ گل کرئیے متوسط تے سفید پوش طبقے لئی ضروری اخراجات کرنا وی اوکھا ہو گیا اے۔ سبزیاں’ دالاں’ گھیو دی قیمتاں وچ فی کلو اینا وادھا ہوندا اے جہناں کدی اوہناں دی قیمتاں ہوندیاں سن۔ پٹرول تقریباً ڈھائی سو روپے لیٹر ہو گیا۔ گڈی والا’ موٹرسائیکل والا ہر شخص پریشان اے۔ پبلک ٹرانسپورٹ دستیاب نہیں۔ مخصوص روٹ اتے چلن والی میٹرو تے اورنج ٹرین کہنے لوکاں نوں سہولت فراہم کر سکدی اے۔ پرائیویٹ بساں’ رکشے’ ٹیکسیاں دے ای نہیں چنگ چی رکشیاں دے کرائے وی دو تن گنا ودھا دتے گئے نیں۔ جینا اوکھا کردتا گیااے۔ غریب لوک اپنے بالاں نوں بھکا ویکھ کے بالاں سنے خودکشیاں کرن لگے نیں۔ گیس دی قیمتاں وچ وی بے تحاشا وادھا کردتا گیا اے۔ پہلاں کدی گھراں وچ سردیاں دے موسم وچ گیس دی لوڈشیڈنگ ہوندی سی لیکن ہن گرمیاں وچ وی کئی کئی گھنٹے گیس نہیں آندی۔ سلنڈر استعمال کرنا وی ہر کسے دے وَس دی گل نہیں رہی۔ اجے ایہہ ویکھ کے گھٹ نہیں ہوئے سن کہ حکومت نے عوام اتے بہت وڈا بجلی بم گرا دتا اے جہنے عوام دا لک توڑ کے رکھ دتا اے۔ پہلاں ای بجلی دی قیمتاں وچ بہت وادھا کردتا گیا سی لیکن ایس واری حکومت نے عوام اتے ظلم دے پہاڑ توڑے نیں۔ ہر شخص پریشان ہو کے رہ گیا اے جہنے عوام دا لک توڑ کے رکھ دتا اے۔ پہلاں ای بجلی دی قیمتاں وچ بہت وادھا کردتا گیا سی لیکن ایس واری حکومت نے عوام اتے ظلم دے پہاڑ توڑے نیں۔ ہر شخص پریشان ہو کے رہ گیا اے کہ بجلی دے بل جمع کروائے یا بالاں نوں کھانا کھوائے۔ ایس واری بجلی دے بلاں وچ ٹیکساں دی بھرمار اے۔ بجلی دی قیمت جے تن ہزار روپے اے تے مختلف قسم دے ٹیکس پا کے بل 20ہزار روپے تک بھجوایا گیا اے۔ ٹیکس وی مخفف وچ لکھے گئے نیں۔ کجھ پتہ نہیں چلدا کہ کہڑے کہڑے قسم دے ٹیکس پائے گئے نیں۔ اک تنخواہ دار دوست دس رہیا سی کہ اوہنے ہزارروپے مہینے دی کمیٹی پائی سی۔ دو سال کمیٹی دے کے 24ہزار روپے کمیٹی ملنی سی۔ پچھلے مہینے کمیٹی نکلی تے ایس مہینے 22ہزار روپے بجلی دا بل آ گیا۔ کمیٹی توں بل ادا کیتا تے اجے چار کمیٹیاں دین والی رہندیاں نیں۔ ایس توں اندازہ لایا جا سکدا اے کہ ایس واری بلاں نے لوکاں دا کیہ حال کیتا اے۔ سرکاری ملازماں دی تنخواہاں وچ سال وچ دس پندرہ فیصد وادھا ہوندا اے لیکن مہنگائی وچ وادھا ہر سال 50فیصدتوں وی بوہتا ہورہیا اے۔ قیمتاں دوگنا ہو جاندیاں نیں۔ نجی کمپنیاں دے ملازمین تے مالکان دے رحم وکرم اتے ہوندے نیں’ ودھ گئیاں تے ٹھیک نہ ودھے تے کیہ کر سکنے آں سوائے صبر شکر دے! واپڈا تے بجلی دی تقسیم کار کمپنیاں دے ہزاراں ملازمین’ وزرا’سرکاری افسران نوں مفت بجلی تے بجلی چوری وکھری اے۔ بجلی تقسیم کرن والی کمپنیاں دے ملازمین بدعنوانیاں وچ ملوث نیں۔ ماہانہ پیسے لے کے بجلی چوری کرواندے نیں۔ کوئی دس رہیا سی کہ ا ک میٹر ریڈر نے گھر وچ چار اے سی لگوائے ہوئے نیں تے مسلسل چلدے نیں۔ جے پورا بل آوے تے اک لکھ روپے توں ودھ ہووے لیکن اوہ صرف چار ہزار روپے بل دیندا اے۔ مال مفت دل بے رحم دے مصداق جہناںنوں مفت بجلی ملدی اے اوہ ایہدا بے دریغ استعمال کردے نیں۔ مفت سہولت تے بدعنوانیاں توں خرچ ہون والی بجلی دے بل اوہناں غریب عوام اتے پا دتے جاندے نیں جہڑے اپنے خون پسینے دی کمائی نال ہر مہینے بل ادا کردے نیں۔ ایس واری چھوٹے دکانداراں نوں تن توں چھ ہزار روپے بل دے نال وکھرا ٹیکس پا دتے گئے نیں۔
تہانوں حکومتی سطح اتے کوئی ایسے اقدامات نظر نہیں آن گے جہدے تحت لگے کہ حکومت عوام نوں کوئی ریلیف دینا چاہندی اے۔ حکومت تے سرکاری افسران دے گھراں وچ بلاضرورت بجلی استعمال ہو رہی اے۔ غریب بے چارے گرمیاں وچ اک کمرے وچ بیٹھن اتے مجبور نیں تے بھاری بل ادا کرن دے باوجود لوڈشیڈنگ دا عذاب وی سہندے نیں۔ عدالتاں عوام نوں انصاف دین لئی ہوندیاں نیں۔ عوام حصول انصاف لئی عدالتاںوچ کئی کئی سال خوار ہوندے نیں مگر انصاف نہیں ملدا۔ عوام ایہہ سوال کرن وچ حق بجانب نیں کہ بدعنوان تے آئین شکن حکمراناں تے سیاستداناں نوں ریلیف یا مرضی دے فیصلے دین لئی تے عدالتاں ادھی راتی وی کھل جاندیاں نیں تے عوام اتے ہون والے اوہناں ظلماں دے خلاف عدالتاں کیوں نہیں کھلدیاں تے عوام نوں ریلیف کیوں نہیں دتا جاندا۔ وجہ ایہو اے کہ نہ حکومتی ارکان نوں بل دینے پیندے نیں نہ وزرا ججاں تے سرکاری افسراں نوں ایس لئی اوہناں نوں عوام دے دکھ دا احساس ای نہیں۔ بقول فرحت عباس شاہ:
تو ہے سورج تجھے معلوم کہاں رات کا دکھ
تو کسی روز میرے گھر میں اتر شام کے بعد
بلوچستان وچ ہیلی کاپٹر حادثے وچ فوج دے افسران تے نائیک دی شہادت نے پوری قوم نوں افسردہ کردتا اے۔ البتہ بلوچستان جیسے صوبے وچ جتھے حادثے دے علاوہ ات گردی دے امکانات وی بوہتے ہوندے نیںاک ای ہیلی کاپٹر وچ اینے افسراں نوں اکٹھے سوار نہیں ہونا چاہیدا سی۔ ضیا الحق دے طیارے حادثے وچ وی بہت سارے افسر شہید ہو گئے سن۔ ایس حوالے نال خصوصی احتیاط دی لوڑ اے۔ فوج دے اک اک افسر تے جوان دی حیاتی بہت قیمتی اے۔ اللہ شہیداں دے جنت وچ درجے بلند فرماوے تے لواحقین نوں صبر عطا فرماوے۔ (آمین)

اپنا تبصرہ گھلو