یاداں ڈاکٹر اخترشمار دیاں

اس کے دل میں نظم بھی تھی اور تھا اک افسانہ بھی
سامنے اس کے شمع تھی روشن اجلا ہوا پروانہ بھی
بچھڑا ہے وہ ہم سے لیکن اک احساس تو زندہ ہے
ایک صدا سی پیدا ہوئی اور ٹوٹ گیا پیمانہ بھی
غزل دے کجھ شعر جو میں اک بچھڑے جان والے فنکار دوست دے حوالے نال لکھے سن تے ڈاکٹر اخترشمار دی رحلت تے اچانک یاد آئے۔ اختر شمار کئی حوالیاں نال ساڈے نال جڑیا ہویا سی اسیں جولیاں وانگوں سی۔ تقریباً اک ای عمر دے لوک۔ ایس توں پہلاں تے میں محترم قائم نقوی دے حوالے نال لکھن دا سوچ رہیا سی کہ ایہ اندوہناک خبر آ گئی پتہ لگا کہ اوہ آئی سی یو وچ نیں تے ملن دی اجازت نہیں۔ میں تے کہیا سی:
کاش عمر رواں ٹھہر جائے
کوئی رک رک کے دیکھتا ہے مجھے
یقین کرو کہ ایس خبر نے اندر اک خلاء جیہا پیدا کر دتا کجھ ایس طرح دا احساس کہ ساحل دے نیڑے جدوں سمندر دا پانی ٹکرا کے پرتدا اے تے پیراں دے تھلیوں ریت کھسکدی اے تے پیر اکثر اوقات اکھڑ جاندے نیں۔ اوہدی پیدائش 1960ء دی سی ساڈے توں چھوٹا سی۔ سچ معنیاں وچ سیلف میڈ’ بڑی محنت کیتی تے ترقی دیاں پوڑھیاں چڑھدا گیا۔ ڈاکٹر اخترشمار کجھ عرصہ مصر وچ رہے’ واپسی تے ایف سی کالج وچ شعبہ اردو دا چیئرمین’ ایف سی کالج وچ اردو دی ترویج لئی بڑا کم کیتا۔ مشاعرے کروائے اوہ بڑی محبت دے نال بلواندا تے خاطر مدارت کردا۔ کئی سفر اسیں اکٹھے کیتے ہسی مذاق تے چھیڑ چھاڑ وی۔ اوہ ادب و شاعر دا اک زندہ کردار سی۔ پڑھن دا انداز وی کمال تے قدرت نے قد کاٹھ وی دتا ہویا سی۔ دبنگ انداز وچ شعر پڑھدا۔ اکثر اوقات لگدا سی کہ اپنے محبوب نوںدھمکا رہیا اے:
میں تو اس واسطے چپ ہوں کہ تماشا نہ بنے
تو سمجھتا ہے مجھے تجھ سے گلہ کچھ بھی نہیں
کل بچھڑنا ہے تو پھر عہد وفا سوچ کے باندھ
ابھی آغاز محبت ہے گیا کچھ بھی نہیں
قائم نقوی صاحب دے نال وی ساڈا چالھی سال دا رشتہ سی۔ اوہ ساڈے سینئر سن۔ ”ماہ نو” اوہناں دے دم قدم نال سی۔ اوہناں دے بارے تے کدی وکھرے کالم لکھاں گا اجے میں ڈاکٹر اخترشمار دے حوالے نال کجھ لکھنا اے۔ اخترشمار پنجابی وچ بڑا چنگا لکھدا سی پلاک وچ اسیں ڈاکٹر صغرا صدف دے مشاعریاں وچ اکثر اکٹھے ہوندے۔ قریبی دوستاں وچ باقی احمد پوری’ فرحت عباس شاہ’ شفیق احمد تے ڈاکٹر جواز جعفری سنے کئی ناں نیں۔ ڈاکٹر اخترشمار وچ جو گل خاص سی اوہ اوہدی روش سی۔ اپنے آپ وچ مگن’ تقریباں دے بعد طعام دے مرحلے وچ اوہ سب توں وکھرا سی۔ گوشت غالباً نہیں سی کھاندا۔ انج وی کم خوراکی نال باطنی تے روحانی پالیدگی آندی اے۔ اوہ کالم نگار وی سی تصوف ول رجحان کافی سی۔ اوہ عام بندے نال جڑیا ہویا بندہ سی تے اپنے عہد دا بھرپور شعور رکھدا سی اوہدے شعراں دی گونج دیر تک ساڈے کناں وچ رہوے گی۔
ذرا سی دیر تھی بس اک دیا جلانا تھا
اور اس کے بعد فقط آندھیوں کو آنا تھا
میں گھر کو پھونک رہا تھا بڑے یقین کے ساتھ
کہ تیری راہ میں پہلا قدم دکھانا تھا
یہ کون شخص مجھے کرچیوں میں بانٹ گیا
یہ آئینہ تو میرا آخری ٹھکانا تھا
اسیں اکٹھے ہوندے تے خوب جملے بازی وی ہوندی’ چالھی سال تے پھیلی ساڈی شناسائی سی۔ اک واری ٹھنڈی سڑک توں گزر رہے سی اودوں ڈاکٹر اخترشمار دے کول گڈی نہیں میرے نال صدر دے اک مشاعرے وچ جا رہے سی سنگل سڑک توں آندی گڈیاں نوں ویکھ کے بھولپن نال پچھن لگا۔ ایہ کیویں پتہ لگدا اے کہ ساہمنیوں گڈی نوں راہ کیویں دینا میں کہیا بس یار اک اندازا ای ہوندا اے۔ اخترشمار اچھل کے بولیا یار توں اندازے نال ای گڈی چلا رہیا ایں۔ فیر اوہنے مصر جان توں پہلاں ای وڈی گڈی لے لئی۔ واپس آ کے اک خوبصورت بنگلہ خریدیا’ ہن تے انج ای لگا کہ:
ایک ہچکی میں دوسری دنیا
سعد اتنی سی بات ساری
ڈاکٹر اخترشمار دے نال کیہ کیہ یاداں جڑیاں ہوئیاں نیں اوہدا تعلیمی حوالا ملتان توں سی اوہدے سب توں قریبی دوست اطہرناسک مرحوم سن جدوں ایہناں دوہاں دے استاد بیدل حیدری لہور آئے تے میں گھر تے کھانا کیتا تے اوہدے وچ احمدندیم قاسمی تے قتیل شفائی وی شریک ہوئے۔ الحمد دے صفدرحسین دے کول ساڈی منڈلی وی جمدی سی۔ ساڈی تھوڑی بہت معاصرانہ چشمک وی چلدی رہی کہ اک فطری گل اے پر احترام دا رشتہ ہمیشہ قائم رہیا۔ اوہ رکھ رکھائو رکھن والا شاعر سی جو کہندا سی میرے معیار دا تقاضا اے میرا دشمن وی خاندانی ہووے۔ سچ مچ اج احساس ہو رہیا اے کہ سیل بلا دا رخ ساڈی نسل ول اے۔ اوہو شعر جو کدی جمال احسانی نے ساڈی موجودگی وچ بچھڑن ویلا سنایا سی:
چراغ بجھتے چلے جا رہے ہیں سلسلہ وار
میں خود کو دیکھ رہا ہوں فسانہ ہوتے ہوئے
دوست بڑے افسردہ نیں۔ سوشل میڈیا تے لوکاں نوں دکھ بھرے پیغام آ رہے نیں۔ دوستاں نے ایہ کمٹمنٹ وی کیتا کہ جناں وڈا لکھاری اوناں وڈا انسان والی گل اوہناں تے پوری اتردی اے۔ ڈاکٹر اخترشمار نے اسلامیہ یونیورسٹی بہاولپور توں ایم اے اردو کیتا سی تدریسی سفر دا آغاز گورنمنٹ کالج قصور توں کیتا تے فیر ایف سی کالج شعبہ اردو وچ آ گئے۔ اوہدی پی ایچ ڈی دے تھیسز دا موضوع حیدردہلوی کے احوال و آثار سی۔ وکھووکھ اخباراں وچ کالم لکھے’ اپنا ادبی اخبار ”بجنگ آمد” کڈھیا جہڑا تریخ اردو ادب وچ اک حوالا رہوے گا۔ اوہناں دا آبائی پنڈ سہال ثردچکری اے۔ اللہ اوہنوں غریق رحمت کرے۔ (آمین)
ہماری چپ بھی اسے ناگوار لگتی ہے
مگر پسند کوئی بات بھی نہیں آتی
آخر وچ اوہدی نعت دا اک شعر:
میں گزرتا تو وہاں جاں سے گزرتا چپ چاپ
یہ ہوا کیسے مدینے سے گزر جاتی ہے