ہن فیصلہ تسیں آپ کرو؟

لوک کہانیاں’ اقوال زریں’ فرمودات’ کہاوتاں’ حکایات اپنے اندر صدیاں دا نچوڑ لئے کتاباں دا حسن تے زینت ہوندیاں نیں۔ کوئی وی گل جدوں ماورائے عقل ہو جاوے تے اک واری تہاڈا شعور تہاڈے لاشعور وچ بیٹھی ہوئی سوچ نوں گدگدان دی کوشش ضرور کردا اے۔ ایہ وکھری گل اے کہ انسان بنیادی طور تے ڈھیٹ تے اکھڑ طبیعت دا اے تے ہر مسئلے دا حل اپنی طبیعت تے اپنے فائدے دے مطابق چاہندا اے۔ ایہدے لئی اوہ اپنی مرضی دی دلیل وی گھڑ لیندا اے پر جو کجھ وی ہو جاوے’ بھاویں انسان ستاریاں تے کمنداں پا دیوے پر انسان گھاٹے وچ اے۔ انسان قبر وچ جا ڈگدا اے پر سمجھدا نہیں ایہ انسان دی غلطی وی اے تے دنیا داری انسان دی غلط فہمی وی اے۔
کہیا جاندا اے کہ کسے بادشاہ دا گزر اپنی سلطنت دے اک اجہے علاقے توں ہویا جتھوں دے لوک سدھا نہر توں ای پانی لے کے پیندے سن۔ بادشاہ نے حکم دتا کہ لوکاں دی سہولت لئی ایتھے اک گھڑا بھر کے رکھ دتا جاوے تے زیادہ بہتر رہوے گا تے ہر چھوٹا وڈا سہولت دے نال پانی پی سکے گا۔ بادشاہ ایہ کہندے ہوئے اپنے باقی دے سفر تے اگے ول ودھ گیا۔ شاہی حکم تے اک گھڑا خرید کے نہر دے کنڈھے رکھیا جان لگا تے اک اہلکار نے مشورہ دتا ایہ گھڑا عوامی دولت نال خرید کے شاہی حکم تے ایتھے لایا جا رہیا اے۔ ضروری اے کہ ایہدی حفاظت دا بندوبست کیتا جاوے تے اک سنتری نوں چوکیداری لئی مقرر کیتا جاوے۔ سنتری دی تعیناتی دا حکم ملن تے ایہ قباحت وی سامنے آئی کہ گھڑا بھرن لئی کسے ماشکی دا ہونا وی ضروری اے تے ہفتے دے ست دن صرف اک ماشکی یاں اک سنتری نوں نہیں پابند کیتا جا سکدا بہتر ہووے گا کہ ست سنتری تے ست ای ماشکی ملازم رکھے جان تاں جے واری واری دے نال بلاتعطل ایہ کم چلدا رہوے۔ اک ہور محنتی اہلکار نے رائے دتی کہ نہر چوں بھریا ہویا گھڑا چک کے لیانا نہ تے ماشکی دا کم بن دا اے تے نہ ای سنتری دا۔ ایس محنت طلب کم لئی ست باربردار وی رکھے جانے چاہیدے نیں جو واری واری روزانہ بھرے ہوئے گھڑے نوں احتیاط نال چک کے لیان تے چنگے طریقے نال ڈھکنا لا کے بند کرکے رکھن۔ اک ہور دوران دیش مصاحب نے مشورہ دتا کہ اینے لوکاں نوں رکھ کے کم نوں منظم طریقے نال چلان لئی ایہناں سارے اہلکاراں دا حساب کتاب تے تنخواہواں دا نظام چلان لئی منشی محاسب رکھنے ضروری ہون گے۔ اکائونٹنگ دا ادارہ بنانا ہووے گا’ اکائونٹنٹ متعین کرنے ہون گے اک ہور ذی فہم و فراست اہلکار نے مشورہ دتا کہ ایہ اوسے صورت وچ یقینی بنایا جا سکدا اے کہ ہر کم چنگے طریقے نال چلے تے ایہناں سارے ماشکیاں’ سنتریاں تے باربرداراں توں بہتر طریقے نال کم لین لئی اک ذاتی معاملات دا اک شعبہ قائم کرنا پوے گا۔ اک ہور مشورہ آیا کہ ایہ سب کجھ ٹھیک ہو رہیا اے پر ملازماں دے وچکار لڑائی جھگڑا یاں کوئی زیادتی ہو جاندی اے تے اوہناں دا تصفیہ تے اوہناں دے وچکار صلح صفائی کون کراوے گا؟ تاں جے کم بلاتعطل چلدا رہوے ایس لئی میری رائے وچ خلاف ورزی کرن والیاں تے اختلاف کرن والیاں دی تفتیش لئی اک قنونی امور دا محکمہ قائم کیتا جانا چاہیدا اے۔ ایہناں سارے محکمیاں دی انشا دے بعد اک صاحب دا ایہ مشورہ آیا کہ ایس سارے انتظام تے کوئی ہیڈ وی مقرر ہونا چاہیدا اے اک ڈائریکٹر وی تعینات کر دتا گیا۔
اک ورھے دے بعد حسب روایت بادشاہ دا اپنی رعایا دے دورے دوران ایس مقام توں گزر ہویا تے اوہنے ویکھیا کہ نہر دے کنڈھے کئی کنال رقبے تے اک عظیم الشان عمارت دا وجود آ چکیا اے جہدے تے لگیاں ہوئیاں روشنیاں دور توں نظر آندیاں نیں تے عمارت دا دبدبہ اکھاں نوں خیرہ کردا اے۔ عمارت دی پیشانی تے نمایاں کرکے وزارت انتظامی امور برائے گھڑا دا بورڈ لگا ہویا اے۔ بادشاہ اپنے مصاحبین دے نال اندر وڑیا تے اک وکھرا ای جہان پایا۔ عمارت وچ کئی کمرے’ میٹنگ روم تے دفتر قائم سن۔ اک وڈے جہے دفتر وچ آرام دہ کرسی تے عظیم الشان چوبی میز دے پچھے سرمئی والاں والا اک پروقار معزز بندہ بیٹھا ہویا سی جہدے سامنے تختی تے اوہدے القابات پروفیسر ڈاکٹر دو جنگاں دا فاتح فلاں بن فلاں ڈائریکٹر جنرل برائے معاملات سرکاری گھڑا لکھیا ہویا سی۔ بادشاہ نے حیرت نال اپنے وزیر توں ایس عمارت دا کارن پچھیا’ تے نال ای ایس عجیب و غریب محکمہ دے بارے پچھیا جہدا اوہنے اپنی زندگی وچ کدی ناں وی نہیں سی سنیا۔ بادشاہ دے وزیر نے جواب دتا: حضور والا’ ایہ سب کجھ تہاڈے حکم تے ای ہویا اے جو تسیں پچھلے ورھے لوکاں دی فلاح تے سوکھیائی لئی ایتھے گھڑا لان دا حکم دتا سی۔ بادشاہ حیرت دے نال باہر نکل کے اوس گھڑے نوں تکن لگا جہنوں لان دا اوہنے حکم دتا سی۔ بادشاہ نے ویکھیا کہ گھڑا نہ صرف خالی تے ٹٹیا پیا اے سگوں اوہدے اندر اک مریا ہویا پرندہ وی پیا ہویا اے۔ گھڑے دے چار چفیرے ان گنت لوگ سوں کے آرام کر رہے نیں تے سامنے اک وڈا جیہا بورڈ لگا ہویا اے۔ گھڑے دی مرمت تے بحالی لئی اپنے عطیات جمع کرائو۔
ایہو حال ساڈے سیاستداناں دا اے۔ ایہو کجھ ساڈے ملک دے نال ہو رہیا اے۔ ایہ کھلواڑ ساڈے بزرگاں نے بھگتیا اے۔ ایہو ڈرامہ ساڈے نال ہو رہیا اے تے ایس توں وڈی زیادتی ساڈی نویں نسل دے نال ہو رہی اے۔ افسوس دی گل تے ایہہ وے کہ نویں نسل تے اپنی منزل دے تعین وچ وی بے بہرہ تے لاوارث نظر آ رہی اے۔
بقول جاوید رامش
ہماری جھولیاں بوجھل ہیں اِس گرانی سے
وہ روز اپنے خسارے بھی ڈال دیتا ہے